Ovilia akamadaki karajomihi hida
15
Hari.
Oniaroa,
Jesus kania vakaikahiꞌaha adani imposto gathaniva abono,
ijaꞌari hojai jahariki vakahojaiki vahoariha khama.
Vanofiki ida Jesus kavarani-ra vakamithavini.
Imposto oniki ida jiniro arabo kakaꞌdaꞌdi kabadani abosini kaimoni.
Vakadihojai jaharini vahoariha vaꞌora vakahibakhiaki adani imposto gathaniva abono.
2 Hari.
Farisio,
judeus kaijaꞌari vakaꞌojomoꞌiva abono khama vaꞌora vanokiha adani Jesus kania vakaikahiki,
vaabono vara vakaniꞌakhamaꞌaha,
vakhaniha:
—Ni-jahapaꞌitxiki ida Jesus ijaꞌari hojai jaharikia vakahojaiki-ra vaꞌora gathanivini.
Jesus ꞌbaina vakadiania jaboni — vakhaniha.
Lucas 15:1-32
—Aꞌonira okavarajomivini hiki ada ovilia akadavaꞌava abono.
4 Hari.
Vaꞌora ivahojaki adani 100 ovilia vaipohina.
Vaꞌora iakadavaꞌavini kabaꞌi,
hoarana akamadaꞌiki.
Inakoꞌdimanira ada ovilia akamadaki?
Haꞌa,
inakoꞌdiꞌoamanira ada.
Vaꞌora inahojaꞌimidiaꞌaha adani ovilia 99 vihiki avakamadariki vaibavia,
naothinia kadaꞌovilia akamadaꞌiki-ra ianakoꞌdioniki i.
Ikaragaravini oadani ianakoꞌdioniki bana ada.
5 Hari.
Ikaragaꞌaha,
khaii inihi,
ikamaꞌadosihavini ivajoiki ada kadaꞌovilia.
6 Hari.
Igorania ivakaikahiha,
vaꞌora ibaranahaki adani kadavaꞌahi,
ijaꞌari vahoariha vagorana maakariki,
vaꞌora iniꞌaha:
“Khai vakhaniꞌa kodiania.
Ada okaragaꞌaha kodiꞌovilia akamadaꞌiki.”
7 Oniaroa,
Jesus vaꞌora niꞌaha:
—Onivani fori hija bana ida Deus ibavi kaijaꞌarini vakadiania.
Vaꞌora khai vaniꞌaki adani ijaꞌari 99 hiki hojai asohikia vakahojaiki.
Khai vaniꞌavini arafiaki ida ijaꞌari hoarani Jahari kahojai-ra kavaꞌipahinikaꞌoaki.
Jiniro ꞌbaꞌdani akamadaki karajomihi varani hini
8 Hari.
Oniaroa,
Jesus vara vaꞌora niꞌaꞌianavini hiki ida rajomi kavaranihi hoariha:
—Hari.
Gamoa bivahojahi ida jiniro ꞌbaꞌdani prata amonahaki 10 hiki ipohini.
Binakaidivaki ida jiniro ꞌbaꞌdani.
Oniaroa,
bianakamadaꞌihi ida jiniro ꞌbaꞌdani hoarani.
Kidijiniro ꞌbaꞌdani-ra nakoꞌdimanija ida gamo?
Haꞌa.
Binakoꞌdiki ida.
Oniaroa,
bianahaꞌdiꞌimidiahi ida kidilamparina,
gora bodinia binakoꞌdija kaimoni.
Biaragahi ida gora bodini,
vajaforia binakoꞌdiꞌihi ida jiniro.
Bikaragaravini oadani binakoꞌdihi.
9 Hari.
Bikaragahi,
khaii niꞌihi.
Vaꞌora kaboaꞌiha adani kidivaꞌahi,
ijaꞌari vahoariha vagorana maakarinia vahojaki,
vaꞌora niꞌaha:
“Khai vakhaniꞌa kodiania.
Ida okaragaꞌihi kodijiniro
ꞌbaꞌdani hoarani
akamadaꞌiki.”
Oniaroa,
Jesus vaꞌora niꞌaha:
10 —Aꞌonira onavaꞌisohivini hiki bana adani Deus ibavi kaijaꞌarini khai vakhanina.
Gamo kidinahina kaidivaki-ra karagavini vani fori vihira adani Deus ibavi kaijaꞌarini jaboni khai vakhanina.
Ijaꞌari hoarania bikavaꞌipahinihi ida kidihojai asohiriki,
oniani ida khai vaꞌora niꞌaja.
Ijaꞌari hojai asohiriki kahojaiki fori hiki ida jiniro ꞌbaꞌdani akamadaꞌiki.
Imakhinava viꞌbamiki rajomi vihina kavaranihi
11 Hari.
Oniaroa,
Jesus vara vaꞌora niꞌaꞌianaha rajomi kavaranihi hoariha:
—Hari.
Makhira vaꞌora vahojaki adani imakhinava viꞌbamiki.
12 Oniaroa,
kajoꞌojahikia biniꞌaha hada kidiabiꞌi:
“Papai,
iabinini kamahini
kodiꞌaajo khama
agahinaki hari bana kadanahina.
Onofiki ida pitani ogahinana hini hidakabaꞌi.”
Niha ada kajoꞌojahiki.
Oniaroa,
vakadiabiꞌia binapitaꞌihi ida kidinahina kidisai viꞌbamiki vakadimoni hini.
13 Hari.
Mahi ipohiriki radahani naothinia,
kajoꞌojahikia binaibavijahaꞌihi ida kidinahina hahavi,
ajihiꞌaha,
arabo hoariha-ra anikhahaꞌavini.
Ibavi napaja hikia kaikahiꞌaha.
Jahari kabadani ipohikia kabadanibakhiaki ada.
Nahina binofiki bikapavakariki.
Binakavithimaki ida kidijiniro hahavi kidiabiꞌia binoꞌavini hiꞌiki.
14 Hari.
Ihimihahaviꞌihi ida jiniro.
Oniaroa,
ni-khararijanaki ada bahi,
ni-movaki ida arabo kaijaꞌarini vakadirakhajahi.
Ijaꞌari hahavia vakainamoki ida vakadiꞌbai.
Imakhinava jabonia bikainamoki ida kidiꞌbai,
kidinahina hahavi.
15 Vaiꞌamina mani ida badani-ra anakoꞌdionivini hija ꞌbai-ra naabosivini kaimoni.
Kaꞌdaꞌdi-ra niꞌaha:
“Onofiki ida hora badania inoꞌavini ꞌbai ohaki-ra
onaabosivini kaimoni.”
Kaꞌdaꞌdia biniꞌaha:
“Kodihiraria vavahojaki
kania okhaꞌa
mahija vaꞌora iakadavaꞌavini.”
Oniaroa,
hirari vakadiania okhaꞌaha ada imakhinava.
16 Vaiꞌami abani hina hojaꞌaha.
Vaiꞌamikarahona mani ida hirari vakadiꞌbai-ra havini-ra nofivini hija.
Ni-ijaꞌaria ꞌbaia vanoꞌapaꞌitxiki,
ni-vavaꞌahaki ida hirari vakadiꞌbai-ra havini.
17 Oniaroa,
vaꞌi bodinia vara niꞌaha:
“Vakoꞌbaiꞌahapikiki adani kodiabiꞌi kahonai abono.
Ahabaribakhiaki ida
vakadiꞌbai.
Hida ohojana vaiꞌami hora naabiniki ho bana.
18 Kodiabiꞌi gorana oajoiki ho.
Okaikahina oniꞌaha:
‘Papai,
bada oniꞌaꞌiki ida hojai asohiriki Deua
bivajahariki,
ivajahariki jaboni ida.
19 Jahari kabadania okabadanina mani ida ovaꞌi-ra anaipahihija,
oniani ida kadaisaia hora inaonivini ovaꞌi-ra anaipahihija.
Onofiki kadahonai abono ohina.’
Nimania ida bana kodiabiꞌi-ra vara oniꞌavini kaimoni okaikahina.”
Abono-ra niꞌaꞌaha ada imakhinava.
20 Oniaroa,
ajihiꞌaha,
joiꞌaha kidiabiꞌi gorana-ra anikhahaꞌavini.
Napaja khana kabaꞌi,
kidiabiꞌia bianokiꞌaha ada imakhinava joiꞌina.
Kidiabiꞌia binakaidivamaniha,
kiꞌdarahaꞌaha,
bikajaraꞌbaꞌbaꞌaha ada kidisai,
biramosiꞌaha.
21 Hari.
Imakhinava biniꞌaꞌaha ada kidiabiꞌi:
“Papai,
bada oniꞌaꞌiki ida
hojai asohiriki Deua
bivajahariki,
ivajahariki jaboni ida.
Jahari kabadania okabadanina mani ida ovaꞌi-ra anaipahihija,
oniani ida kadaisaia hora inaonivini ovaꞌi-ra anaipahihija.”
22 Imakhinava vara nina kabaꞌi,
kidiabiꞌi vaꞌora niꞌaha adani kidihonai abono:
“Jorakia avanikhaꞌa ida
makari jahaki,
jaꞌdini
mahija avaranabosihavini makari jahakia.
Vanaibavi bana ada saꞌavithinahi saꞌa.
Vakanaibavi oni sandália ꞌdama jaboni.
23 Avanikhaꞌa bana ada ꞌdaama kahidari dorona basinaki mahija avanaabinivini.
Haria vakoꞌbaihaꞌa mahija kodisai joina kaikahiꞌina-ra khai aniꞌavini koꞌbaini.
24 Abiniꞌiki fori hiki ada kodisai,
ahokiꞌiki fori hiki ada.
Napaja hojaꞌiki ada,
joiribaniꞌiki ada.”
Oniaroa,
khai vakhaniha adani ijaꞌari.
25 Hari.
Aajojahikia ni-biogaꞌiaki kaho ada kidikajoꞌo joina.
Siroi vania hojaha ada aajojahiki.
Hari hiꞌihi ida kidibadani,
kidiabiꞌi gorana joiꞌaha.
Binamaakarihi ida vagorana,
bikamithaꞌihi ida música ithoni,
ijaꞌari vikhajoki,
vaahiaki hiki.
26 Oniania,
bibaranahaꞌaha ada honai abono,
binanaꞌdohiꞌaha:
“Nahina mani ida música-ra
agorana bodinia naꞌithoja?”
27 Honai abonoa bigathanihi ida kidinaꞌdohi:
“Ada joiribaniꞌaha
kadakajoꞌo.
Ni-kavamoniki,
ni-pohimajaki,
ni-abiniki jaboni.
Oniani ida kadabiꞌi ꞌdaama kahidari dorona basinaki abinina-ra vahonariahivini hija,
ꞌbai jahaki amonahaja kaimoni kidimoni.”
28 Hari.
Ihamahiꞌaha ada aajojahiki,
ni-binofiki ida vagorana oꞌoina.
Oniaroa,
khaonaniꞌaha ada kidiabiꞌi kidiania.
Kidisai-ra niꞌaha:
“Kodisai,
onofiki ida ioꞌoini akadiania.”
Oꞌoina-ra nofiravini kabaꞌi,
kidiabiꞌia bikaboaꞌihahaꞌoadahaha.
29 Aajojahikia biniꞌaha ada kidiabiꞌi:
“Papai,
badara ipohiki bada
onihaꞌoadahaki ho
kadaimoni.
Kadabadani abono fori
ohihaꞌoadahaki ho.
Ni-iathini-ra onaabariki
hoaranija.
Jahani kabaꞌi ida kodibadani,
ni-nahina hora inoꞌaki.
Ni-boji dorona hoarana hora inoꞌaki kodimoni,
onamonahaja kaimoni ida ꞌbai jahaki,
kodivaꞌahi khama khai akhanijabanaja kaimoni.
30 Hiꞌada kadaisai hoariha
binakavithimahahaviꞌiki ida kadajiniro.
Gamo vakadihojai asohiriki-ra vaꞌora avavadionikaꞌoaki ada.
Joiꞌaha ada kadaisai,
ivahonariahiꞌaha ada ꞌdaama kahidari dorona basinaki abinina kidiꞌbai kaimoni.”
Niha ada aajojahiki.
31 Oniaroa,
kidiabiꞌia biniꞌaha:
“Kodisai,
mahi hahavi vani kodiania ihojaja.
Nahina hahavi ovahojaki,
kadani ida jaboni.
32 Kadakajoꞌo joina-ra khai
aniꞌavini jahaki hari.
Khai akhanina mani ida
ihinika kidimoni
onamonahavini hija.
Abiniꞌiki fori hiki ada kadakajoꞌo,
ahokiꞌianahi fori hiki ada.
Napaja hojaꞌina,
joiribaniꞌiki ada.”
Niha ada vakadiabiꞌi.
Anokhomiꞌihi ida rajomi kavaranihia Jesus vara vaꞌora niꞌavini hiki.