Jesus vaꞌora karonaki adani kidipohi ibavi hoariha
9
Hari.
Oniaroa,
Jesus vaꞌora baranahaha adani 12 vihiki vaipohina kidiania.
Vaꞌora niꞌaha:
—Aꞌonira onoꞌaki bana ho odanona.
Ijaꞌari vakabajadiki-ra avanokihi;
bajadi-ra vahonaria bana akaraꞌoja kaimoni.
Ijaꞌari vakavamoniki-ra vaꞌora avanokihi;
vaꞌora avanaihota bana.
Deus aꞌonira kakodiavini mani bana ida vaꞌora avaranaihotavini hija bana.
2-3 Hari.
Jesus vaꞌora niꞌaha:
—Aꞌonira okaronaki ho.
Hahavi-ra vaꞌora vara avaniꞌavini hiki bana ida moni Deus akadikaꞌdaꞌdi hina.
Vaꞌora avanaihotaha bana adani ijaꞌari vakavamoniki jaboni.
Avadairini vani avikhaꞌa bana.
Hariꞌa avavikha ida ava avaabononi avanadadavini kaimoni.
Hariꞌa avavikha ida ꞌbai bavini,
ꞌbai,
jiniro hiki.
Hariꞌa avavikha ida avakadimakari odoki hoariha avakadiꞌabosihi kaimoni.
Lucas 9:1-22
4 Sidaji kaijaꞌarini aꞌonira vanofihi;
vahojaꞌa bana.
Sidaji avaꞌajihirini oadani gora hoarania vahojaꞌa bana mahija aviꞌbaivini,
avavadini jaboni.
5 Sidaji kaijaꞌarini aꞌonira vanofiriha;
jorakia bana vaꞌajihi.
Avaꞌajihini viahania vanaꞌdaraꞌdara bana oni khomakhomani avakadisandália hojaki.
Ijaꞌari Deus athi-ra vakajoniki-ra avakavarajomivini ida sandália-ra avakanaꞌdaraꞌdaravini — vaꞌora navaꞌisohiꞌaha ada Jesus.
6 Hari.
Oniaroa,
ai vihiꞌaha adani Jesus ipohina,
sidaji itxani avaadahaoniꞌaha,
ijaꞌari-ra vaꞌora vakanamonivini hiꞌihi ida Jesus monina jahaki.
Vaꞌora avanaihotabakhiaha adani vakavamoniki vaibavia vahojaki.
Iroji varani hina hida
7 Hari.
Galiléia kaaraboni kakaꞌdaꞌdini ada Iroji oniki.
Irojia bikamithaꞌihi ida Jesus kabadani danoki varani hini.
Oniaroa,
vaꞌi kidakidaꞌaha.
Vakhaniꞌaha adani ijaꞌari vaipohiriki:
—Ada ahokiꞌaha João Batista kohana.
8 Vahoariha vaniꞌavini Elias kohana ahokiꞌina abono-ra nanokiaꞌiki.
Vahoariha Deus athi namoniva abono okhananavaki kohana ahokiꞌina hina vakahiꞌaha.
Vakadivarani Iroji vaꞌi-ra nakidakidaꞌiki.
9 Oniania biniꞌaha:
—Okavahonariahiꞌiki ida João Batista kohana kaꞌdaꞌdi akaꞌboani.
Hana hina mani makhira ada?
Kidibadani danoki varani hini okamithabakhiaki.
Oniaroa,
Irojia binofiki binokivini ada Jesus.
Jesus ꞌbaia vaꞌora noꞌaki adani ijaꞌari vaipohiki
10 Hari.
Oniaroa,
Jesus kania vajoiꞌaha adani kidipohi Jesus athi-ra avavaadahaoniꞌiki.
Vananamithavini hihi ida vaadahana bada vakhaniꞌina.
Oniaroa,
Jesus vaꞌora avikhaꞌaha adani kidipohi kaꞌoa.
Betsaida sidaji maakarini avikhaꞌaha.
11 Hari.
Ijaꞌari vaipohikia avigaki ida ibavi vavahojaki,
oniaroa,
avikasiagaꞌaha.
Vakadiania avakhanoꞌaha,
Jesus vaꞌora gathaniꞌaha.
Vara vaꞌora niꞌavini hiki ida moni jahaki kaꞌdaꞌdi hina ada Deus.
Ijaꞌari vakavamoniki-ra vaꞌora anaihotaꞌaha jaboni.
12 Hari.
Vajominiꞌaha,
vikhaꞌaha adani 12 ipohina,
Jesu-ra vaniꞌaꞌaha:
—Kagorarihi bana hida ibavi.
Kamahijanarihi.
Vaꞌora honaria bana ai vihiꞌina mahija ijaꞌari vahoariha vagorana avikhavini,
ꞌbai-ra vakapavakarihavini,
vada ibavini-ra vanakoꞌdihavini jaboni.
13 Oniaroa,
Jesus vaꞌora niꞌaha:
—Iniani.
Aꞌonivani ꞌbaia vaꞌora vanoꞌa.
Oniaroa,
vagathaniꞌihi ida Jesus athi:
—Pão saꞌai kahoarani kihiki oavani-ra akavahojaja.
Abaisana ꞌbamiki oavani-ra jaboni avahojaja.
Aokhamaniki koda hari ꞌbai-ra akapavakarihavini ijaꞌari vaipohiki vakadimoni?
— Jesu-ra vaniꞌaha.
14 Makhira 5 mil vihiki vahabini adani vahojaki.
Jesus vaꞌora honariaꞌaha adani kidipohi:
—Vaꞌora vanajoronionahaꞌa bana adani ijaꞌari.
Vavithina vaꞌora vahonaria bana.
Vaꞌora vanajoroni vaꞌoani 50 vihiki vahabini vaipohina afonana — niha ada Jesus.
15 Hari.
Jesus ipohina vaꞌora vahonariaꞌaha vavithionahana adani ijaꞌari hahavi 50 vihiki vaipohina.
16 Oniaroa,
Jesua bigathaniꞌaha ada abaisana ꞌbamiki,
pão saꞌai kahoarani kihiki,
nama-ra vada niꞌamananiꞌaha,
Deu-ra vara niꞌaꞌaha:
—Deus,
ivani ijahaki i.
ꞌBaia haria inoꞌaki i — niha ada Jesus.
Naothinia,
bikanapitahatahaꞌihi ida pão,
abaisana ꞌbamiki hiki.
Kidipohi-ra vaꞌora noꞌavini kihiꞌihi.
Vaꞌora honariaꞌaha:
—Vakaravina bana hida pão,
abaisana hiki,
ijaꞌari vavithiki viꞌbaiꞌara kaimoni.
17 Hari.
Viꞌbaihahaviꞌaha,
vavaꞌi naꞌbihahavimaniꞌaha.
Viꞌbaina naothinia,
Jesus ipohina vanajoroniꞌihi ida ꞌbai ahabarini.
12 soꞌoro-ra vanajiꞌbijiꞌbihaꞌaha ꞌbai ahabarinia.
Cristo ada Jesus
18 Hari.
Oniaroa,
gaakosoaꞌaha ada Jesus,
Deu-ra vara niꞌaha.
Kidipohi kidiania avamaakariꞌaha.
Jesus vaꞌora nanaꞌdohiꞌaha:
—Hora vara vavaniꞌaha adani vahoariha,
nahina nimania ida hora vara vavaniꞌavini?
19 Kidipohia vagathaniꞌihi ida Jesus kanaꞌdohi,
vaniꞌaha:
—Vahoariha vaniꞌaha:
ivani João Batista kohana i iahokiꞌia.
Vahoariha vaniꞌaha:
ivani Elias kohana i iahokiꞌia.
Vahoariha vaniꞌaha:
ivani Deus athi namoniva abono kohana okhananavaki i iahokiꞌia — ipohina vaniꞌaha.
20 Oniaroa,
Jesus vaꞌora nanaꞌdohiꞌianaha adani ipohina:
—Aꞌonivani,
nahina nimania ida hora vara avavaniꞌavini?
Pedroa biniꞌaha:
—Ivani,
Cristo Deua bikaronaꞌiki i.
Jesua vara bivaniꞌajoraki ida abinina ahokina hiki
21 Hari.
Oniaroa,
Jesus vaꞌora kaabaniꞌaha adani kidipohi:
—Hariꞌa vahoariha-ra bana vananamithaꞌa Cristo ohina,
hiꞌada Deua binagathogathoꞌiki.
22 Oniaroa,
Jesus vaꞌora navaꞌisohijoravini hiki kidipohia avigaja kaimoni ida nahina namithaki.
Vaꞌora niꞌaha:
—Hovani ijaꞌari hahavi vakadiꞌaajo ho.
Oimana bana hida ꞌbanakarahoja.
Hora vakajoniki bana adani judeus kaijaꞌari vanavaꞌisohiva abono.
Hora vakajoniki jaboni adani sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama.
Hora vakajoniki,
hora vavahonariahiki ijaꞌari vahoariha hora vanaabinija kaimoni.
Mahi ahoarabakosiki radahahi,
oahokiki bana ho — Jesus vaꞌora niꞌaha.
23 Hari.
Naothinia Jesus vara vaꞌora niꞌaꞌianaha adani ijaꞌari vaipohiki vahojaki kidiania.
Vaꞌora niꞌaha:
—Kodipohi avihini-ra avanofihi;
vakavaꞌipahini ida avanofiki mahija Deua binofiki kaꞌoa-ra bada avaniꞌavini.
Avavaꞌini bodini vara niꞌava:
“Anofiki ida Jesus ipohina arihiꞌina.
Haria vanaabiniha;
haria vanaabiniha.
Jakaho Deus athi-ra
anaabava kaho.”
Lucas 9:23-62
24 Hari.
Asia vara niha ada Jesus:
—Ijaꞌaria bada biniꞌahahaꞌoadahahi ida binofiki kidimoni hini,
akamadaki fori hiki bana ida kidimahi.
Kavithimaki ida.
Ni-bivahojaki ida mahi jaꞌdini anokhomiriki Deus kania.
Oipohina omonina jahakia kavaranini mani ida vahoariha vanaabinivini hija,
oniani ida Deus kania oipohina-ra arakhaja.
25 Ijaꞌari vakadinahina ipohiki-ra vanofivini arafiani mani ida Deu-ra vanofijahakiravini hija.
Vaabinina kamahini Ibavi Jaharikaꞌoakia avikhaha.
Ibavi Jaharikaꞌoakia okhahi ida ijaꞌari;
ni-khaonanijanaki.
Ni-arajomaki ida kidinahina ipohiki khaonanini-ra naabosivini kaimoni hini.
26 Hora avakaipahihi;
ojoina kamahini aꞌonira okaipahihi jaboni.
Oathi-ra avakaipahihi;
ojoina kamahini aꞌonira okaipahihi jaboni.
Hovani ijaꞌari hahavi vakadiꞌaajo ho.
Kodiabiꞌi ibavia ookhaki bana ho.
Ojoiki bana ho ijaꞌari vakadiania.
Ojoina kamahini bana Deus ibavi kaijaꞌarini hora vavaipohihaki ho.
Ijaꞌaria vanokiki bana ida kodiabiꞌi jahana,
danona,
vagana kodiania.
Nokiaki jaboni bana ida Deus ibavi kaijaꞌarini vajahana kodiania.
27 Vakavaꞌibodivarani bana hida kodivarani.
Khaki bana ida mahi Deus ijaꞌari-ra nanokiahivini kaꞌdaꞌdi hina.
Vaabinirina oadani bana adani ijaꞌari ahararana vahojaki,
vanokiki bana ida vaꞌora oniꞌavini hiki.
Pedroa vanokiki ida Jesus jahana, vagana hiki
28 Hari.
Radahahi ida 6 mahi ipohini.
Oniaroa,
Jesus vaꞌora vigaimoriꞌaha adani Pedro,
Tiago,
João vihiki.
Arabo namahikia vigaimoriꞌaha,
Deu-ra vara vaniꞌara kaimoni.
29 Deu-ra vara niꞌavini kabaꞌi,
kamaꞌdaꞌihi ida Jesus vagana nokiani.
Kidimakari vaforiki vagaki jaboni.
30 Oniaroa,
Jesus kania vanokiaꞌaha adani makhira viꞌbamiki kohana avajaꞌdina,
Jesu-ra vara vaniꞌaꞌaha.
Hoarana onina Moisés.
Hoariha onina Elias.
31 Vaiꞌoaria nokiahi ida vagaki safini vagana fori hiki.
Jesus khama vara vakhaniꞌaha adani viꞌbamiki.
Vakadivarani hiki ida Jesus abinina bana Jerusalém sidajia.
Nimania ida kidimoni hini Deua binofiki.
32 Hari.
Vakadivadaꞌbanaki adani Pedro,
Tiago,
João vihiki.
Oniaroa,
vanokhoꞌaforaꞌaha,
vanokiꞌihi ida Jesus nokiana vagani.
Vaꞌora vanokiꞌaha jaboni adani makhira kohana avajaꞌdiꞌina viꞌbamiki Jesus kania.
33 Oniaroa,
makhira viꞌbamiki vaꞌajihina kabaꞌi,
Pedro Jesu-ra niꞌaha:
—Aajo,
hida vania arihojana jahaja.
Oniania,
anamonahaki bana ida gora itxani ahoarabakosiki.
Hoarani kadaimoni,
hoariha Moisés kaimoni,
hoariha Elias kaimoni.
Vara nina kabaꞌi ada Pedro,
ni-biogaki ida kidivarani.
34 Vara nina kabaꞌi,
khaꞌaha ada bahi vaforiki.
Bahi vaforiki amokhinina vaꞌora karahobaꞌaha.
Bahi magimagina bodia vahojaha,
ni-nahina-ra vanokijanaki,
oniani ida Jesus ipohina-ra vaꞌora naimahidaja.
35 Bahi kania vakamithaꞌihi ida athii:
—Hiꞌo kodisai,
onagathogathoꞌiki o.
Mitha vaniꞌa bana oni kodisai athi!
36 Athii naothinia,
Jesu-ra vanokiꞌianaha,
ni-vahoariha vahojajanaki.
Jesus oavani ada vakadiania hojaꞌara.
Viso vakhaniꞌaha adani Jesus ipohina.
Ni-vahoariha-ra vaꞌora vananamithavini hiꞌiki ida arabo namahikia vanokiꞌiki.
Jesua bianaihotaki ada isai
37 Hari.
Mahi hoariha vajoifoniꞌaha adani Jesus,
Pedro,
João,
Tiago vihiki.
Vakhanofoniha,
ijaꞌari vaipohiki vajoroniki vaꞌora vakaragarariꞌaha.
38 Oniaroa,
hojaha ada makhira ijaꞌari vajoroniki vahararana,
athi ꞌbarakia Jesu-ra niꞌaha:
—Jesus,
ira okanikhariavini hiki kodisai-ra ikajoamoraja kaimoni.
Hoarana oamani ada kodisai.
39 Bajadia bigathibakhiaki ada kodisai.
Bigathivini kamahini bodiꞌbarabakhiaki ada kodisai,
raiꞌaha iꞌbana thorothoronaniki bodia.
Bajadia bianahahabakhiaki ada kodisai,
ni-bivaꞌahaki aihotana.
40 Kadaipohi-ra vaꞌora okanikhariavini hiki bajadi akaraꞌoni-ra vahonariara kaimoni.
Vahonariavini kabaꞌi,
ni-akaraꞌoꞌiki ida bajadi.
41 Hari.
Jesus vaꞌora niꞌaha adani vajoroniki:
—Aꞌonivani,
ovaꞌi-ra mokara avaniꞌaki aꞌoni.
Avanokibakhiaki ida Deus kabadani danokia okabadanina,
kabaꞌi,
ni-Deu-ra avavakaijokaki aꞌonira kakodiara kaimoni kidibadani danokia avakabadanini.
Isai kaabiꞌi-ra niꞌaha:
—Kodiania ivikha o kadaisai.
42 Bivikhavini kabaꞌi ada isai,
bajadia binaraiꞌaꞌianaha,
bajadia bisonarariꞌaha arabo namania.
Oniaroa,
Jesua biniꞌahi ida bajadi:
—Bajadi,
isai kania akaraꞌoꞌa bana!
Jesua bianaihotaꞌaha ada isai,
kidiabiꞌi kania biarakhaꞌaha.
43 Vanokiva vakavaꞌibodivaraniꞌihi ida Deus danona.
Jesua vara bivaniꞌaꞌianaki ida abinina kamahini
Hari.
Ijaꞌari vaipohikia vakavaꞌibodivaranihi ida Jesus kabadani danoki.
Oniaroa,
Jesus kidipohi-ra vaꞌora niꞌaha:
44 —Vakavaꞌihoki bana hida vara aꞌonira oniꞌavini hiki.
Hovani ijaꞌari hahavi vakadiꞌaajo ho.
Ijaꞌari vakadiania hora avarakhaki bana ho,
vahoariha hora vanaabinira kaimoni.
45 Hari.
Jesus ipohina mitha vaniꞌahi ida kidivarani,
ni-nahina nini avigaki.
Jesus ni-vaꞌora nanamithavini hiki ida athi nahina hini.
Ni-Deua binofiꞌiaki kaho avigavini ida Jesus kavarani nahina hini.
Vifinivini mani ida kidivarani nahina hini vananaꞌdohiravini hija.
Kaꞌdaꞌdi nofiana varani hina hida
46 Hari.
Oniaroa,
vaabono vakananaꞌdohikhamaꞌaha adani Jesus ipohina:
—Hana hina ada akadiania hojana jahara haria vakaꞌdaꞌdiki kaimoni?
47 Jesua biogaki ida nahina vakavaꞌibodivaraniki.
Isai-ra anikhaha,
iꞌoaria binahojahi ida isai.
48 Kidipohi-ra vaꞌora niꞌaha:
—Ijaꞌari hora nofijahakivini mani ida isai-ra gathanijahakivini hija,
oniani ida hora gathanijahakivini hija jaboni.
Hora gathanijahakiha;
bigathanijahakiha ada hora karonaꞌiki.
Ijaꞌari abononi niꞌahi:
Kaꞌdaꞌdi ohirihi.
Deua vara biniꞌahi ida ijaꞌari:
Kaꞌdaꞌdi ihiki i.
Jesus ipohina hirikia bihonariaki ida bajadi akaraꞌoꞌini
49 Hari.
Oniaroa,
Joãoa biniꞌaha ada Jesus:
—Aajo,
anokiꞌiki ada makhira bajadi akaraꞌoꞌina-ra honariavini.
Aripohina hiriha ada,
oniani ida akaabanivini hija:
“Ni-Jesus ira honariaki
bajadi akaraꞌoni-ra
ihonariavini.
Ikavaꞌipahini bana ida
kadabadani.”
Aniꞌaha ada makhira.
50 Oniaroa,
Jesua bigathaniꞌihi ida João athi:
—Hariꞌa vakaabani ada makhira.
Ijaꞌari aꞌonira kanavaraniharihi;
aꞌonira kakodiahi — vaꞌora niꞌaha ada Jesus.
Samaria kaaraboni kaijaꞌarinia vagathaniriki ada Jesus
51 Hari.
Jesua biogaki ida Deus ibavia ajoina kamahini amaakarini,
oniani ida kidipohi-ra vaꞌora niꞌavini hija:
—Jerusalém sidajia aokhaꞌava.
52 Jesus vaꞌora honariaha adani ijaꞌari vaipohiriki avikhananavana.
Vaꞌora niꞌaha:
—Vanakoꞌdihaꞌa bana ida vada ibavini akadimoni.
Hari.
Oniaroa,
avikhananavaꞌaha adani vaꞌora karonaki.
Samaria kaaraboni kaijaꞌarini vaibavia avakhanoꞌaha,
vanakoꞌdiꞌihi ida gora Jesua vavavadiki kaimoni.
53 Ni-Samaria kaaraboni kaijaꞌarini vaꞌora vanofiki vaibavia vavadina adani Jesus.
Jerusalém okhana avigavini mani ida Jesu-ra vagathanivini-ra vanofiravini hija.
54 Hari.
João,
Tiago khama vakamithaꞌihi ida varani vada ibavinia Jesu-ra vakaathirivini adani Samaria kaaraboni kaijaꞌarini.
Oniaroa,
Jesu-ra vaniꞌaha:
—Inofimanija ida siho kahaꞌdini nama kakhanorarini-ra akavahonariahivini,
vaihimira kaimoni adani ijaꞌari ira vanofiriki?
55 Oniaroa,
roiribaniꞌaha ada Jesus,
vaꞌora niꞌaha adani João,
Tiago khama:
—Iniani.
Ni-jahapaꞌitxiki ida avakadivarani.
Jokoa vaꞌora onihimariha adani.
56 Oniaroa,
ai vihiꞌaha,
ijaꞌari vaibavi hoariha avikhaꞌaha.
Ijaꞌaria vanofiki ida Jesus ipohina vihina
57 Hari.
Hagihia vaadahana kabaꞌi adani Jesus,
makhira Jesu-ra vara niꞌaꞌiki:
—Jesus,
onofiki ida ira ovaipohihaꞌavini.
Ibavi hana hinia iokhahi,
ookhaki ho jaboni.
58 Oniaroa,
Jesua binavaꞌisohiꞌaha ada makhira ipohina hina-ra nofiki kidimahi niha nininia,
oniani ida athi bigathanivini hija:
—Igitha vavahojaki ida vagorana ava hodinia akoirija kaimoni.
Igitha varabokia vavahojaki ida vagorana ava vadinia.
Hovani ijaꞌari hahavi vakadiꞌaajo ohina kabaꞌi,
ni-ovahojaki ida ibavi oavakoiriki kaimoni — niha ada Jesus.
59 Hari.
Jesua biniꞌaha ada makhira hoariha:
—Hora vaipohihaꞌa.
Jesus athi-ra gathaniꞌaha:
—Jesus,
jakana oajoiꞌimidiava kaho kodiabiꞌi abaꞌona-ra okaꞌdamahavini,
naothinia bona ira ovaipohihahi.
60 Jesua biniꞌaha:
—Iniani.
Jakaho ijaꞌari abiniki-ra vakaꞌdamahava adani ijaꞌari vahoariha vahokina kabaꞌi Deus viaha vaabiniki fori vihiki.
Ivani bana okhaꞌa mahija Deus ijaꞌari-ra vakaꞌdaꞌdivini kavaranihi-ra iananamithaonivini — niha ada Jesus.
61 Hari.
Makhira hoariha biniꞌaha ada Jesus:
—Onofiki ida ira ovaipohihavini.
Ivaꞌahamanija koda bana ida vaꞌora okaaminaꞌimidiavini adani kodiabiꞌi,
kodiamia,
oigamina vihiki,
naothinia ira ovaipohihaꞌihi.
62 Oniaroa,
Jesua binavaꞌisohiꞌaha ada makhira ipohina hina-ra nofiki kidimahi niha nininia,
oniani ida athi bigathanivini hija:
—Ijaꞌaria binakamaꞌdahi ida arabo-ra najahavini kidirakhajahi ibavini kaimoni hini,
aꞌdiahirini kabaꞌi binahojahi ida badani.
Onivani fori hija ida ijaꞌari hora vaipohihaki joiribanini.
Ijaꞌari niki,
ni-jahaki Deua bivakaꞌdaꞌdivini ipohina kaimoni hini.