Pedroa vanokiꞌiki ida Jesus jahana vagana hiki
17
Hari.
Radahahi ida 6 mahi ipohini.
Oniaroa,
arabo namahikia vigaimoriha adani Jesus,
vaꞌora avigaimoriꞌaha adani Pedro,
Tiago,
Tiago kakajoꞌo João oniki vihiki kaꞌoa.
2 Avakhanomoriꞌaha,
kamaꞌdaꞌihi ida Jesus vagana nokiani.
Nokho vagani vanokiꞌaha ada Jesus,
safini vagana fori hiki ida.
Kidimakari vaforini vagaki jaboni.
A transfiguração de Jesus (Mateus 17:1-13)
3 Oniaroa,
Jesus ipohina avahoarabakosiki vaꞌora vanokiꞌaha adani ijaꞌari kohana avajaꞌdina viꞌbamiki.
Hoarana onina Moisés.
Hoariha onina Elias.
Jesus khama vara vakhaniꞌaha adani viꞌbamiki.
4 Oniaroa,
Pedro Jesu-ra niꞌaha:
—Aajo,
hida vania arihojana jahaja.
Inofihi ida gora itxani ahoarabakosiki-ra onamonahavini,
onamonahahi.
Hoarani kadaimoni,
hoariha Moisés kaimoni,
hoariha Elias kaimoni.
5 Pedro vara nina kabaꞌi,
khaha ada bahi vaforiki vagaki vanamana hiꞌaha.
Bahi vaforiki kania vakamithaꞌihi ida athii:
—Hiꞌo kodisai,
onofijahakiki o,
ovaꞌi-ra khai niꞌaki o.
Mitha vaniꞌa oni kodisai athi.
6 Jesus ipohina vakamithaꞌihi ida athii,
vaimahidakarahoꞌaha,
avaꞌbisonirariꞌaha.
7 Jesus vaꞌora namaakariꞌaha,
vaꞌora kadasaha,
vaꞌora niꞌaha:
—Vigaamananiꞌa,
hariꞌa vaimahida!
8 Vada vakhaniribaniꞌaha,
ni-vahoariha-ra vaꞌora vanokijanaki.
Jesus oavani ada vanokiꞌaha vakadiania hojana.
9 Ai vihiꞌaha,
vajoifonina vani,
vaꞌora honariaꞌaha:
—Hariꞌa bana vahoariha-ra vaꞌora vara vaniꞌa arabo namahikia avanokiꞌikia.
Hovani ijaꞌari hahavi vakadiꞌaajo ho.
Oabinina oahokina kamahini vahoariha-ra vaꞌora vara vaniꞌa bana hidakabaꞌi avanokiꞌikia.
10 Oniaroa,
Jesu-ra vaniꞌaha adani kidipohi:
—Jesus,
nahina mani ida judeus kaijaꞌari vakaꞌojomoꞌiva abono haria vaniꞌabakhiavini hija:
“Deua bikaronaꞌimidiaki ada Elias,
naothinia bikaronaki ada Cristo oniki.”
Vakhaniha.
11 Jesus vaꞌora niꞌaha:
—Asohiki ida vakadivarani.
Okhananavaki ada Elias kohana fori hiki ijaꞌari-ra vaꞌora navaꞌisohijoravini hiki vakadimahi-ra vanasohivini okaikahina viahania.
12 Aꞌonira onavaꞌisohivini hiki ada kaikahiꞌina Elias fori hiki.
Ni-avigaki ada makhira Elias kohana fori hiki hina,
oniani ida vanaimaꞌbanavini hiꞌia.
Nimania bana ida ijaꞌari hora vanaimaꞌbanavini jaboni bana.
Hovani ijaꞌari hahavi vakadiꞌaajo ho — vaꞌora niꞌaha ada Jesus.
13 Hari.
Kidipohia avigaꞌiki ada hana hina Elias kohana fori hiki.
João Batista vani ada Jesua vara bivaniꞌara.
Jesua bianaihotaki ada isai
14 Hari.
Ijaꞌari vaipohiki vakadiania vajoifoniꞌaha adani Jesus.
Khaꞌaha ada makhira,
Jesu-ra namaakariꞌaha,
viaha kajoꞌatharariꞌaha.
15 Biniꞌaha:
—Jesus,
ivaꞌadi bana o kodisai.
Kavamonikarahoki ada.
Raiꞌabakhiaki ada.
Raiꞌana vani adarina siho kabodinia,
kafariki ada paha bodinia jaboni.
16 Kadaipohi vakadiania ovikhaꞌiki o kodisai,
ni-avanaihotavini vakaabokaki — niha ada isai kaabiꞌi.
17 Oniaroa,
Jesus vaꞌora niꞌaha adani ipohina:
—Aꞌonivani asia Deu-ra avakajariꞌdaki aꞌoni.
Ovaꞌi-ra avanamokaraki aꞌoni.
Avanokibakhiaki ida Deus kabadani danokia okabadanina,
kabaꞌi,
ni-Deu-ra avavakaijokaki aꞌonira kakodiara kaimoni kidibadani danokia avakabadanini.
Isai kaabiꞌi-ra niꞌaha:
—Kodiania vavikha bana o isai!
18 Vavikhaꞌaha,
oniaroa,
Jesua biniꞌahi ida bajadi:
—Bajadi,
isai kania akaraꞌoꞌa!
Jorakia akaraꞌoꞌihi ida bajadi,
aihotaꞌaha ada isai.
19 Hari.
Bianaihotavini naothinia,
ipohina vanamaakariꞌaha ada Jesus,
vananaꞌdohiꞌaha:
—Jesus,
niha akhanimanija hiꞌoni bajadi akaraꞌoni-ra akaabokariki?
20 —Asia Deu-ra avakajariꞌdaki aꞌoni.
Vakavaꞌihoki bana hida kodivarani.
Paꞌitxi ida mostarda ꞌbaꞌdani.
Mostarda ꞌbaꞌdani ahapini fori hija vaha ida Deu-ra avakajariꞌdaravini;
avakaabokahi vaha ida arabo namahiki-ra avahonariavini:
“Arabo namahiki,
akaraꞌoꞌa,
oniaja okhaꞌa.”
Deu-ra avakajariꞌdarihi;
okhahi ida arabo namahiki.
Deu-ra avakajariꞌdarija vaha;
avakaabokahi vaha ida badani danoki hana hini avanofiki.
21 Aviꞌbairini avahojarihi,
Deu-ra avakanikhariaja kaimoni danona,
ni-avakaabokaki ida bajadi,
hiꞌida bajadi danoki fori hiki akaraꞌoni.
Jesua vara bivaniꞌaꞌianaki ida abinina ahokina hiki
(Marcos 9.30-32; Lucas 9.43b-45)
22-23 Hari.
Oniaroa,
Galiléia kaarabonia vajoroniꞌaha adani Jesus kidipohi khama.
Vaꞌora niꞌaha:
—Hovani ijaꞌari hahavi vakadiꞌaajo ho.
Ijaꞌari hora avarakhaki bana ho vahoariha hora vanaabinira kaimoni.
Mahi ahoarabakosiki radahahi,
oahokiki bana ho — vaꞌora niꞌaha ada Jesus.
Vakamithaꞌihi ida Jesus athi,
vavaꞌi mokara nikarahoꞌaha adani ipohina.
Imposto kavaranihi
24 Oniaroa,
Cafarnaum sidaji onikia avakhanoꞌaha adani Jesus kidipohi khama.
Pedro kania avikhaꞌaha adani makhira Deu-ra khai vaniꞌavini kagorani kaꞌimpostoni-ra vagathaniki.
Pedro-ra vanamaakariha,
vananaꞌdohiꞌaha:
—Jesua binaabosimanija ida imposto kajinironi Deu-ra khai vaniꞌavini kagorani kaimoni?
25 —Haꞌa,
binaabosiki ida — vaꞌora niꞌaha ada Pedro.
Gora okhajakosiꞌaha ada Pedro,
Jesus miroꞌa vani ada vara niꞌaha:
—Simão Pedro,
nahina mani ida ikavaꞌibodivaranija?
Ijaꞌari hana vihina vanaabosiki ida imposto kajinironi arabo ipohiki vakaꞌdaꞌdiva vakadiania?
Arabo vakaꞌdaꞌdiva vaꞌora vahonariamanira adani vakadiarabo kaijaꞌarini,
vakadiarabo kaijaꞌarini vihiriki imposto kajinironi-ra vanaabosivini?
26 —Arabo kaijaꞌarini vihiriki vania vanaabosiki ida — niha ada Pedro.
—Hai oamani,
asohiki ida iniꞌaki.
Kadavarani hiki ida arabo vakaꞌdaꞌdiva ni-vaꞌora honariaki adani kidiarabo kaijaꞌarini vanaabosivini.
27 Hari.
Deua bivakaꞌdaꞌdiki ida gora ijaꞌari khai niꞌana vihiki.
Deus kaisai ohina kabaꞌi onaabosiki bana ida Deu-ra khai aniꞌavini kagorani kaꞌimpostoni.
Ni-onofiki ida imposto gathaniva abono haria vakaꞌdaꞌdigariavini.
Anaabosirihi;
Deu-ra khai aniꞌavini kagorani-ra anakaidivariki haria vavanihaha.
Oniania,
okharafoniꞌa bana ꞌdako vadinia mahija ikanabaꞌdahavini.
Iraꞌbani bana ada abaisana ovari miroꞌa ianagithiki kaikoakana ahoni.
Abaisana bodia,
ikaragaki bana ida jiniro ꞌbaꞌdani.
Arajomaki ida imposto-ra inaabosivini jiniro ikaragaki kadaimoni hini,
kodimoni hini jaboni.
Jiniro-ra ianivini naothinia,
okhaꞌa bana mahija imposto kajinironi-ra inaabosihavini — niha ada Jesus.
Oniaroa,
okhaꞌaha ada Pedro Jesus athi-ra naabahaꞌavini.