Vanofiki ida badani danoki-ra vanokivini
16
Hari.
Magadã kaarabonia avakoꞌomisiꞌaha adani Jesus.
Oniaroa,
vikhaha adani farisio,
sadosio khama,
Jesu-ra vara vaniꞌahavini.
Vakajariꞌdaki ada Jesus Deua bikaronavini,
oniani ida vakaijoꞌavini hija.
Vaniꞌaha:
—Anofiki ida kadabadani danoki-ra anokivini.
Deus kabadani danoki fori hini vani bana bada iniꞌa mahija Deus ira karonavini-ra aogavini — Jesu-ra vaniꞌaꞌaha.
2 Hari.
Jesus vaꞌora niꞌaha:
—Mithani vaivaini vani avanokiki ida nama nadarani,
avakhanihi:
“Nadaraki ida nama,
ni-kharariki bana ada bahi afokajoma.”
3 Vagavagani avanokihi ida nama nadarani,
avakhanihi:
“Pororoki nadaraki hiki ida nama,
kharariki bana ada bahi hidakabaꞌi.”
Vada avaniꞌaki ida nama,
avarigajoraha ada safini,
bahi hiki kamahina.
Kodibadani danoki-ra avanokivini kabaꞌi,
ni-avarigapaꞌitxiki ida hana ohina.
4 Jahari kahojaia vakahojaiki adani ijaꞌari hidakabaꞌi vahokiki,
Deu-ra vanofiꞌbadaraki adani.
Oniani ida badani danokia okabadanina hora avakanikhariavini hija.
Aꞌonira onanokiahivini hiki bana ida rajomi hoarani kaꞌoa.
Jonas kohana varani hina rajomi hini hoarania aꞌonira onanamithaki bana ho.
Jona-ra kajoamoravini kari,
Deua binanokiaꞌiki ida danona.
Onivani fori hiꞌianaja bana,
hora kajoamoravini kamahini binanokiaꞌianaki ida danona — vaꞌora niꞌaha ada Jesus.
Hari.
Ajihiꞌaha.
Ibavi hoariha okhaha.
Jesus vaꞌora kaabaniki adani ipohina
5 Hari.
Avakakafianiꞌaha adani Jesus Galiléia kaꞌdakonia,
avakoꞌomisiꞌaha.
Jesus ipohina avakakavaꞌiꞌbirinihi ida pão-ra avakavikhavini.
6 Oniaroa,
Jesus vaꞌora niꞌaha:
—Avaabononi avakavaꞌigairi bana!
Hariꞌa bana vagathani bana ida farisio sadosio khama vakadipão-ra kanathoramananiki.
7 Vakamithahi,
ni-avigajahakiki ida Jesus vaꞌora navaꞌisohivini hiki.
Farisio vakadihojaia Jesus vaꞌora kaabaniki adani.
Pão vakavanihavini ida Jesus kavarani.
Oniania,
vaabono vara vakaniꞌakhamaꞌaha:
—Pão-ra akavikharihi,
oniani ida haria kaabanivini hija.
8 Jesua bikamithaki ida vakadivarani,
vaꞌora niꞌaha:
—Nahina kaimoni mani ida pão-ra avakavahojaravinia avaabononi vara avakaniꞌakhamavini hija?
Ni-hora avavakaijokajahakiki kaho.
9 Ni-avarigaki kaho ida kodivarani nahina hini.
Avakavaꞌihokiria ida pão saꞌai kahoarani kihiki-ra okanapitahatahavini kari,
5 mil ijaꞌari-ra vaꞌora okanoꞌbaiꞌiki ho,
12 soꞌoro-ra avanajiꞌbijiꞌbihaꞌiki aꞌoni pão akahabarinia.
10 Pão 7-ra okanapitahatahavini kari,
4 mil vihiki vaipohina vakadimoni,
7 soꞌoro-ra avanajiꞌbijiꞌbihaꞌiki aꞌoni pão akahabarinia.
11 Avarigaria koda hida kodivarani.
Vakavaꞌibodivaranijahaki bana.
Pão-ra kanathoramananiki kihirihi ida kodiꞌojomoꞌihi athini.
Farisio,
sadosio khama vakadihojai ida kodikaabanahi hija,
vakadihojaia avakahojairia kaimoni — vaꞌora niꞌaha ada Jesus.
12 Oniania,
Jesus ipohina avigaꞌihi ida kidivarani.
Ni-Jesus vaꞌora kaabanivini hiki ida pão-ra kanathoramananiki.
Farisio,
sadosio khama vakadihojai kavaranihi vani ida Jesus vaꞌora kaabanivini hija,
vaꞌoaniaro fori vihirara kaimoni.
Cristo ada Jesus
13 Hari.
Oniaroa,
Cesaréia de Filipe sidaji maakarinia avikhaꞌaha adani Jesus.
Vakaikahiꞌaha,
vaꞌora nanaꞌdohiꞌaha adani kidipohi:
—Hovani ijaꞌari hahavi vakadiꞌaajo ho.
Hora vara vavaniꞌaha adani vahoariha.
Nahina nimania ida hora vara vavaniꞌavini?
14 —Vahoariha vaniꞌaha:
Ivani João Batista kohana i iahokiꞌia.
Vahoariha vaniꞌaha:
Ivani Elias kohana i iahokiꞌia.
Vahoariha vaniꞌaha jaboni:
Ivani Jeremias kohana i iahokiꞌia.
Deus athi namoniva abono hoariha kohana mani i iahokiꞌia — ipohina vaniꞌaha.
15 Jesus vaꞌora nanaꞌdohiꞌianaha adani ipohina:
—Aꞌonivani,
nahina nimania ida hora vara avavaniꞌavini?
16 Simão Pedroa biniꞌaha:
—Ivani Cristo i.
Ijaꞌari hahavi vakadikaꞌdaꞌdi i.
Deus ira karonaki i.
Deus hokiki kaisai oamani i.
17 Jesua biniꞌaha ada Simão Pedro:
—Simão Pedro,
Deus ira kajoamoraꞌiki i.
Ni-ijaꞌari ira navaꞌisohivini hiki ida Cristo ohina.
Deus nama hojaki vani ira navaꞌisohivini ohija.
18 Kaꞌoa hiki hida vara ira oniꞌavini hiki bana.
Ivani Pedro i,
jaꞌdi onini ida ionini hija.
Kaꞌdaꞌdia hora inaonivini vani jaꞌdi kaaraki gora naboꞌani dadani fori ihiki i.
Gora hoarani fori vihiki adani kodijaꞌari hahavi vaꞌora oaniꞌiki.
Vaꞌora onajoromisiki fori vihiki adani hora vakajariꞌdariki jaꞌdi kaaraki namania,
Deus ibavi kaimoni hida gora.
Jahari,
kidijaꞌari khama ni-vakaabokaki bana ida kodijaꞌari-ra vaꞌora vanihimavini.
Kodijaꞌari vani adani Jahari danona-ra vanihimara.
19 Ogorana fori vihiki adani kodijaꞌari hahavi-ra vaꞌora ovakaꞌdaꞌdiki nama.
Ira onoꞌaki bana ho ogorana kachavenia.
Ijaꞌari chave-ra kavahojakia biakadavaꞌaki ida gora.
Ivani kodichave-ra ikavahojavini vaꞌora iakadavaꞌaki bana adani vaꞌora ovakaꞌdaꞌdiki.
Kodijaꞌari-ra ovakaꞌdaꞌdivini vani fori hiki ira ohonariavini vaꞌora ivakaꞌdaꞌdivini.
Nahina-ra ivaꞌaharihi araboja;
Deua bivaꞌahariki nama kidiania jaboni.
Nahina-ra ivaꞌahahi;
Deua bivaꞌahahi nama kidiania jaboni.
20 Oniaroa,
Jesus vaꞌora kaabaniꞌaha adani kidipohi:
—Hariꞌa vahoariha-ra bana vananamithaꞌa Cristo ohina.
Jesua vara bivaniꞌajoraki ida abinina ahokina hiki
21 Hari.
Oniaroa,
Jesus vaꞌora navaꞌisohijoravini hiki kidipohia avigaja kaimoni nahina namithaki bana.
Vaꞌora niꞌaha:
—Jerusalém sidajia ookhaki ho.
Ohojana kabaꞌi hora vanaimaꞌbanakarahoki bana adani judeus kaijaꞌari vanavaꞌisohiva abono,
sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono vihiki khama.
Vaꞌora vahonariaki bana adani ijaꞌari vahoariha hora vanaabinivini.
Mahi ahoarabakosiki radahahi,
oahokiki bana ho.
22 Oniaroa,
Pedroa biavikhapaꞌitxiha ada Jesus.
Bikaabanivini biniꞌaha:
—Hariꞌa varani nikia kavarani.
Jokoa kadania namitharihi ida vara hora iniꞌavini hiki.
23 Roiribaniꞌaha ada Jesus,
Pedro-ra kaabaniꞌaha:
—Jahari,
akaraꞌoꞌa!
Pedro,
jaꞌdi hoariha fori ihiki i,
jaꞌdi ijaꞌari-ra kaꞌdamanokhoki fori ihiki i.
Iathini,
ijaꞌari athini fori hiki.
Ni-inofiki ida Deua binofiki.
Deua binofiki ida oniꞌaki.
24 Oniaroa,
ipohina-ra vaꞌora niꞌaha:
—Kodipohi avihini-ra avanofihi;
vakavaꞌipahini ida avanofiki mahija Deua binofiki kaꞌoa-ra bada avaniꞌavini.
Avavaꞌini bodini vara niꞌava:
“Anofiki ida Jesus ipohina arihiꞌina.
Haria vanaabiniha;
haria vanaabiniha.
Jakaho Deus athi-ra anaabava kaho.”
25 Hari.
Asia vara niha ada Jesus:
—Ijaꞌaria bada biniꞌahahaꞌoadahahi ida binofiki kidimoni,
ni-bikavaꞌibodiki ida Deua binofiki,
akamadaki fori hiki bana ida kidimahi.
Kavithimaki ida.
Ni-bivahojaki ida mahi jaꞌdini anokhomiriki Deus kania.
Oipohina omonina jahakia kavaranini mani ida vahoariha vanaabinivini hija,
oniani ida Deus kania oipohina-ra arakhaja.
26 Ijaꞌari vakadinahina ipohiki-ra vanofivini arafiaki mani ida Deu-ra vanofijahakiravini hija,
vaabinina kamahini Ibavi Jaharikaꞌoakia avikhaha.
Ibavi Jaharikaꞌoakia okhahi ida ijaꞌari;
ni-khaonanijanaki.
Ni-arajomaki ida kidinahina ipohiki khaonanini-ra naabosivini kaimoni hini.
27 Hovani ijaꞌari hahavi vakadiꞌaajo ho.
Ojoiki bana ho ijaꞌari vakadiania.
Ojoina kamahini bana,
Deus ibavi kaijaꞌarini hora vavaipohihaki ho.
Ijaꞌaria vanokiki bana ida kodiabiꞌi jahana danona vagana kodiania.
Oniaroa,
ijaꞌari-ra onasohiki bana ho.
Vaꞌora oniꞌananaki bana adani vahoariha:
“Onaabosiki bana ida avakadihojai jahaki kodinahina jahakia.”
Vaꞌora oniꞌananaki bana adani vahoariha:
“Onaabosiki bana ida avakadihojai jahariki nahina jaharikia.”
28 Vakavaꞌibodivarani bana ida kodivarani.
Ojoina kamahini vaꞌora ovakaꞌdaꞌdiki bana adani ijaꞌari.
Vaabinirina oadani adani ijaꞌari hahavi ahararana vahojaki,
vanokiki bana ida vaꞌora oniꞌavini hiki — vaꞌora niꞌaha ada Jesus.