2 —Vaꞌora onakaidivaki vaꞌoani ijaꞌari vaipohiki.

Mahi ahoarabakosikia kodiania vahojaha.

Vakadiꞌbai-ra vakainamovini hiki napaja vikhana.

3 Viꞌbairina oadani ni-onofiki ida ai vihina ohonariavini.

Vaibavia avakakhanakhamana vaha vaꞌora ohonariara vaha;

vaiꞌami vajarona binafajafajahamaniha vaha;

hagihia vaiꞌami vaꞌora naraiꞌahamaniha vaha.

4 Ipohina vaniꞌaꞌaha ada Jesus:

—Pão kahojarihi bana hihida ibavia kakapavakari vahaki kaimoni.

Niha akaniꞌaꞌaki koda bana hida pão vaꞌora anoꞌavini kihiki kaimoni?

5 —Nihafori kihimanija ida pão avakavahojaki?

— vaꞌora niꞌaha ada Jesus.

—Akavahojaki 7 pão kihiki kaipohini — vaniꞌaꞌaha.

6 Oniaroa,

Jesus vaꞌora honariaꞌaha adani ijaꞌari vaipohiki vavithionahana.

Biagathaniꞌihi ida pão,

Deu-ra vara niꞌaꞌaha:

—Deus,

ivani ijahaki i,

pãoa haria inoꞌaꞌiki i.

Hari.

Bikanapitahatahaꞌihi,

ipohina-ra vaꞌora noꞌavini kihiꞌihi vakaravinaja kaimoni.

Oniania,

vakaravinaꞌihi ijaꞌari vaipohiki vakadimoni kihiꞌini.

7 Hari.

Vavahojaꞌaha ada abaisana ipohiriki akaiki jaboni.

Deu-ra vara niꞌaꞌianaha ada Jesus:

—Deus,

ivani ijahaki i,

abaisana haria inoꞌaꞌiki i.

Hari.

Varavinavini vaꞌora honariaꞌaha adani kidipohi,

varavinamaniꞌaha ada abaisana.

8 Jesua biakanaipohiꞌianaha ada abaisana,

pão kihiki.

Viꞌbaihahaviꞌaha,

vaakhariꞌaha.

Viꞌbaina naothinia,

Jesus ipohina vanajoroniꞌihi ida ꞌbai ahabarini.

Vanajiꞌbijiꞌbihaꞌihi ida 7 soꞌoro ipohini.

9 Vaipohina 4 mil vihiki adani ijaꞌari viꞌbaiki.

Hari.

Jesus vaꞌora kaaminaꞌaha adani ijaꞌari vaipohiki,

ai vihiꞌaha.

10 Naothinia,

vakiꞌdamaꞌaha adani Jesus,

ipohina khama.

Ai vakihiꞌaha,

avakakafianiha,

Dalmanuta kaarabonia avakoꞌomisiꞌaha.

11 Hari.

Oniaroa,

vikhaha adani farisio,

Jesu-ra vara vaniꞌahavini.

Vakajariꞌdaki ida Jesus Deua bikaronavini,

oniani ida vakaijoꞌavini hija.

Vaniꞌaha:

—Anofiki ida kadabadani danoki-ra anokivini.

Deus kabadani danoki fori hini vani bana bada iniꞌa mahija Deus ira karonavini-ra aogavini — Jesu-ra vaniꞌaꞌaha.

12 Vaꞌi mokara niꞌaha ada Jesus,

vaꞌi aitapiahi vaꞌi aharoroꞌaha.

Vaꞌora niꞌaha:

—Nahina kaimoni mani ida ijaꞌaria vakanikhariavini hija badani danoki-ra vanokivini.

Kaꞌoa oamani ida oniꞌaki.

Jokoa vaꞌora onanokiahiriha adani kodibadani danokia.

13 Hari.

Jesus vaꞌora nahojahaꞌaha adani farisio.

Vakiꞌdamaꞌaha,

ipohina khama.

Avakakafianiꞌianaha.

14 Hari.

Jesus ipohina avakakavaꞌiꞌbiriniꞌihi ida pão-ra avakavikhavini.

Vakavahojaki ida pão kahoarani kaꞌoa.

15 Avakakafianina kabaꞌi Jesus vaꞌora kanavaꞌisohiꞌaha:

—Avaabononi avakavaꞌigairi bana!

Hariꞌa bana vagathani ida farisio,

Iroji khama vakadipão-ra kanathoramananiki.

16 Vakamithahi,

ni-avigajahakiki ida Jesus vaꞌora navaꞌisohivini hiki.

Farisio vakadihojaia Jesus vaꞌora kaabaniki adani.

Pão vakavanihavini ida Jesus kavarani.

Oniania,

vaabono vara vakaniꞌakhamaꞌaha:

—Pão-ra akavikharihi,

oniani ida haria kaabanivini hija.

—Nahina kaimoni mani ida pão-ra avakavahojaravinia avaabononi vara avakaniꞌakhamavini hija?

Mitha avaniꞌavini kabaꞌi hida oathi,

ni-nahina nini avarigaki?

Asia mani avakajariꞌdaja?

18 Avanokhoni ꞌbaꞌdahani kabaꞌi,

ni-nahina-ra avanokiki.

Avamorobohani kabaꞌi,

ni-nahina-ra avakamithaki.

19 Avakavaꞌihokiria ida pão saꞌai kahoarani kihiki-ra okanapitahatahavini kari 5 mil ijaꞌari-ra vaꞌora onoꞌbaiꞌavini.

Nihafori soꞌoro ipohini-ra avanajiꞌbijiꞌbihaꞌia pão akahabarinia?

—12 soꞌoro — vakhaniha.

20 Jesus vaꞌora nanaꞌdohiꞌianaha:

—Pão 7 kihiki-ra okanapitahaꞌiki,

4 mil ijaꞌari-ra vaꞌora onoꞌbaiꞌiki ho.

Nihafori soꞌoro ipohini-ra avanajiꞌbijiꞌbihaꞌiki pão akahabarinia?

—7 soꞌoro — vakhaniha.

21 —Avarigajahakirihi kaho ida kodivarani?

— vaꞌora niꞌaha ada Jesus.

22 Hari.

Oniaroa,

avakoꞌomisiha adani Jesus.

Betsaida ibavia vakaikahiꞌaha.

Oniaroa,

Jesus kania avavikhaꞌaha ada makhira kamaodorohaki.

Jesu-ra vakanikhariaha makhira-ra kaabadavini,

nokho avagahara kaimoni.

23 Saꞌa biagathiha,

Betsaida ibavia banininia Jesua biakakavanamaonaniꞌaha.

Biravisovini ida nokho ꞌbaꞌdani iꞌbana.

Bikaabadaha,

binanaꞌdohiꞌaha:

—Nahina-ra inokiria?

24 Hari.

Vada niꞌaha ada makhira.

Biniꞌaꞌaha ada Jesus:

—Ijaꞌari-ra onokiꞌavini ava adahaki fori vihina.

25 Nokho ꞌbaꞌdani namani bikaabadaꞌianaha.

Vada vadaꞌianaha,

nokho ꞌbaꞌdani avagahajahakiꞌiki,

aihotaꞌini.

26 Jesua bihonariaha:

—Igorania okhaꞌa.

Hariꞌa kaho Betsaida ibavia kaho ajoi.

27 Hari.

Oniaroa,

Cesaréia de Filipe ibavia avikhaꞌaha adani Jesus,

ipohina khama.

Avikhana kabaꞌi,

vaꞌora nanaꞌdohiꞌaha:

—Hora vara vavaniꞌaha adani vahoariha,

nahina nimania ida hora vara vavaniꞌavini?

28 —Vahoariha vaniꞌaha:

Ivani João Batista kohana i iahokiꞌia.

Vahoariha vaniꞌaha:

Ivani Elias kohana i iahokiꞌia.

Vahoariha vaniꞌaha jaboni:

Ivani Deus athi namoniva abono kohana i iahokiꞌia — ipohina vaniꞌaha.

29 Oniaroa,

Jesus vaꞌora nanaꞌdohiꞌianaha adani ipohina:

—Aꞌonivani,

nahina nimania ida hora vara avavaniꞌavini?

Pedroa biniꞌaha:

—Ivani Cristo i.

Ijaꞌari hahavi vakadikaꞌdaꞌdi i.

30 —Haꞌa,

hovani Cristo ho.

Deus hora karonaꞌiki ho.

Hariꞌa vahoariha-ra bana vananamithaꞌa bana — vaꞌora niꞌaha ada Jesus.

31 Hari.

Oniaroa,

Jesus vaꞌora nanamithajoravini hiki ida nahina namithaki kaimoni kidiania.

Vaꞌora niꞌaha:

—Hovani ijaꞌari hahavi vakadiꞌaajo ho.

Oimana bana hida ꞌbanakarahoja.

Hora vakajoniki adani judeus kaijaꞌari vanavaꞌisohiva abono.

Hora vakajoniki jaboni bana adani sasidotxi vavakaꞌdaꞌdiva,

judeus kaijaꞌari vakaꞌojomoꞌiva abono khama.

Hora vakajoniki hora vavahonariahiki bana ijaꞌari vahoariha hora vanaabinija kaimoni.

Mahi ahoarabakosiki radahahi oahokiki bana ho.

32 Vaꞌora navaꞌisohijoravini hiki avigajahakija kaimoni.

Hari.

Pedroa biavikhapaꞌitxiha ada Jesus.

Bikaabanivini biniꞌaha:

—Hariꞌa varani nikia kavarani.

33 Roiribaniꞌaha ada Jesus,

ipohina-ra vada vaꞌora niꞌaha,

Pedro-ra kaabaniꞌaha:

—Jahari,

akaraꞌoꞌa!

Ni-Deus kavaꞌibodivarani fori hiki ida kadavaꞌibodivarani.

Ni-inofiki ida Deua binofiki.

Deua binofiki ida oniꞌaki.

34 Oniaroa,

Jesus vaꞌora baranahavini adani ijaꞌari vaipohiki,

ipohina vihiki.

Vaꞌora niꞌaha:

—Kodipohi avihini-ra avanofihi;

vakavaꞌipahini ida avanofiki mahija Deua binofiki kaꞌoa-ra bada avaniꞌavini.

Avavaꞌini bodinia vara niꞌava:

35 Hari.

Asia vara niha ada Jesus:

—Ijaꞌaria bada biniꞌahahaꞌoadahahi ida binofiki kidimoni,

ni-bikavaꞌibodiki ida Deua binofiki,

akamadaki fori hiki bana ida kidimahi.

Kavithimaki ida.

Ni-bivahojaki ida mahi jaꞌdini anokhomiriki Deus kania.

Oipohina omonina jahakia kavaranini mani ida vahoariha vanaabinivini hija,

oniani ida Deus kania oipohina-ra arakhaja.

36 Ijaꞌari vakadinahina ipohiki-ra vanofivini arafiani mani ida Deu-ra vanofijahakiravini hija.

Vaabinina kamahini Ibavi Jaharikaꞌoakia avikhaha.

Ibavi Jaharikaꞌoakia okhahi ida ijaꞌari,

ni-khaonanijanaki.

37 Ni-arajomaki ida kidinahina ipohiki khaonanini-ra naabosivini kaimoni.

38 Ijaꞌari vaipohikia vakajariꞌdaki ada Deus.

Vakadihojai jahariki-ra vanofivini mani ida Deus athi-ra vakamitharavini hija.

Hora avakaipahihi;

ojoina kamahini aꞌonira okaipahihi jaboni.

Oathi-ra avakaipahihi;

ojoina kamahini aꞌonira okaipahihi jaboni bana.

Hovani ijaꞌari hahavi vakadiꞌaajo ho.

Kodiabiꞌi ibavia ookhaki bana ho.

Ojoina kamahini bana Deus ibavi kaijaꞌarini hora vavaipohihaki bana ho.

Ijaꞌaria vanokiki bana ida kodiabiꞌi jahana,

danona,

vagana kodiania.

Nokiaki jaboni bana ida Deus ibavi kaijaꞌarini vajahana kodiania.