Judeus kaijaꞌari vakadihojai hiki hida
7
Hari.
Jesus kania vajoroniꞌaha adani farisio,
judeus kaijaꞌari vakaꞌojomoꞌiva abono khama vaipohiriki.
Jerusaléa vikhaꞌiki adani.
2 Vaꞌora vanokiha adani Jesus ipohina viꞌbaina.
Viꞌbaina viahania ni-vasaꞌa-ra vakosokovini arafiaki adani Jesus ipohina.
Farisio kahojaia vakahojairiki adani Jesus ipohina.
Farisio vaꞌora vakaꞌojomoꞌivini hiki adani judeus kaijaꞌari niha ninini asohini ijaꞌari saꞌani-ra kosokovini.
3 Judeus kaijaꞌaria vanaababakhiaki ida ojomoꞌihi athini vakadijaꞌari avikhananavakia vaꞌora vanavaꞌisohiꞌboꞌdavini hiꞌiki.
Arafiaki ida farisio ojomoꞌihi athini-ra vanaabavini.
Vakadihojai hiki ida viꞌbaina viahania vasaꞌa-ra vakosokovini arafiani.
4 Vakadihojai hoariha ida nahina havahaki-ra vakapavakarivini,
visokovini arafiani vahavini viahania.
Visokovini arafiaki jaboni ida ꞌbai bavini,
paha bavini,
siꞌaha kihiki.
Farisio vahojana hida nahina-ra visokovini arafiani.
5 Hari.
Farisio vaꞌora vanokiha adani Jesus ipohina vasaꞌa-ra vakosokovini arafiarini viꞌbaina.
Oniaroa,
Jesu-ra vananaꞌdohiꞌaha:
—Nahina mani ida kadaipohi akadijaꞌari avikhananavaki kahojai-ra vakajonivini hija?
Vasaꞌa-ra vakosokovini anarafiaravini hija viꞌbaina viahania.
6 Jesus vaꞌora niꞌaha adani farisio:
—Deus athi-ra avanofivini-ra avakahiꞌbadaraki aꞌoni.
Ni-Deus aꞌonira honariavini hirihi hida avakadihojai niki.
Deua vara bivaniꞌaꞌboꞌdaꞌiki ida avakadihojai niha ninini.
Isaías kohana binajiriꞌiki hida Deus athi.
Asohiki ida varani avihini.
Niha ada Deus:
“Vavaꞌi bodinia hora vanofipaꞌitxiravini kabaꞌi,
ojahana-ra khai vaniꞌabakhiaki adani ijaꞌari afoꞌbadara,
varani jahakia vara hora vavaniꞌabakhiaki adani.
7 Ni-nahina kaimoni hora vakanamasiviki.
Vakadijaꞌari avikhananavaki vahojana vanofivini
mani ida oathi-ra
vanaabaravini hija.
Vakadihojaia vakahojaina vaꞌora ohonariaꞌboꞌdavini-ra vakahivini.
8 Kodihonari hirihi ida vakadihojai hija.”
Nimania ida Deus athi papira hojaki athini.
Asia vara niha ada Jesus:
—Avakadijaꞌari avikhananavaki vahojana mani ida avakadihojai hija.
9 Avarigavini kabaꞌi ida Deua binofiki bada avaniꞌavini,
avakajonibakhiamanihi.
Avanahoarihaki ida Deus athi,
bada avaniꞌaja kaimoni ida badani avanofiki.
Nimania bana hida avakadihojai.
10 ꞌBoꞌdakari Moisés kohana binajiriꞌiki ida Deus kavaꞌisohihi jiriki.
Ijaꞌari-ra honariaki:
“Vaꞌora vanakaidiva adani avakadiamia,
avakadiabiꞌi vihiki,
vara aꞌonira vaniꞌavini vanaabaꞌa.”
Deua kavaꞌisohihi jirikia bivahonariahivini abinini ida ijaꞌari kidiamia,
kidiabiꞌi vihiki-ra vakanavaranihaki.
Nimania ida Deus kavaꞌisohihi jiriki — vaꞌora niꞌaha ada Jesus.
11 Asia vara niha ada Jesus:
—Avanahoarihaki ida Deus athi asohijanaria kaimoni.
Nimania bana hida avakadiꞌojomoꞌihi athini asohiriki.
“Ijaꞌari kajiniroki Deu-ra kanavaꞌigavini hini ida kidijiniro pitani,
ni-makhaniki ida ijaꞌari kidiamia,
kidiabiꞌi vihiki-ra vaꞌora kaijahitaravini,
vakadinahina-ra vakainamovini kabaꞌi.
12 Deu-ra kanavaꞌigavini hini mani ida
vaꞌora kaijahitaravini namakhanirini hija.”
13 Nimania ida varani asohiriki ijaꞌari-ra vaꞌora avakaꞌojomoꞌivini hiki.
Ni-nirihi ida Deus athi.
Ni-avanofiki ida Deus athi.
Avanahoarihaꞌoamanija ida.
Avanofiki ida avakadijaꞌari avikhananavaki vahojana.
Vakadihojaia vaꞌora avakaꞌojomoꞌibakhiaki adani ijaꞌari.
Ni-vaꞌora avakaꞌojomoꞌivini hiki ida Deua binofiki.
Onivani fori hija ida avakadihojai ipohiki asohiriki — Jesus vaꞌora niꞌaha adani farisio.
Ijaꞌari-ra najahariki varani hini hida
14 Oniaroa,
Jesus vaꞌora baranahaꞌianaha adani ijaꞌari vaipohiki vikhara kaimoni kidiania.
Vara vaꞌora niꞌaha:
—Aꞌonivani afohahavi,
mitha vaniꞌa hida kodivarani mahija avarigajahakivini.
15 Ni-ꞌbaia binamakhaniki ida ijaꞌari Deus viaha.
Ijaꞌari varani jaharikia kavaranini mani ida ijaꞌari-ra najaharija Deus viaha.
16 Avakamithavini avanofihi;
mitha vaniꞌajahaki bana hida kodivarani hiki.
17 Hari.
Ai vihiꞌaha adani Jesus,
ipohina khama.
Avikhaha,
gora bodinia avikhajakosiꞌaha.
Oniaroa,
Jesu-ra vananaꞌdohiꞌaha:
—Haria nanamithajahakivinihi bana hida vara vaꞌora iniꞌavini hiꞌiki.
18 —Vahoariha fori avihimania koda?
Ni-nahina-ra avarigaria koda?
Ijaꞌari vaꞌini bodinia hojaki ida ijaꞌari-ra najahariki.
19 ꞌBai ni-hojaki ijaꞌari vaꞌini bodinia.
Ijaꞌaria biobaihi ida kidiꞌbai bodinia,
bikidafihi,
kaijonia okhahi,
kiaꞌihi.
Ni-vaꞌini bodinia oꞌoiki ida ꞌbai.
Ni-hojaki ida ꞌbai kaaji hiki ijaꞌari-ra najahariki Deus viaha.
20 Vaꞌini bodinia hojaki ida ijaꞌari vaꞌini bodini vara nini jahariki.
Varani jahariki-ra vara vaniꞌavini mani ida ijaꞌari-ra najaharija Deus viaha.
21 Bikavaꞌibodivaraniꞌimidiaki ida hojai jahariki.
Binofihi;
bada biniꞌahi.
Hida vani mani vaꞌi bodini vara nini jaharikaꞌoaki.
Binofiki ida makhira kidigamo hiriki khama vaabono vakaviꞌomakhamavini.
Binofiki ida boꞌdiani.
Binofiki ida kaabinina.
22 Binofiki ida hoariha kagamo-ra viꞌomavini.
Binofiki ida hoariha kamakhira-ra viꞌomavini.
Binofiki ida hoariha kanahina.
Binofiki ida hojai hahavi Deua bivajahariki.
Binofiki ida korijanahani.
Binofiki ida kidihojai jahariki kaipahivahaki.
Binofiki ida akabajahani.
Binofiki ida hoariha-ra kanavaranihavini.
Binofiki ida abononi vaboraborahavini.
Vaꞌini bajadidiꞌoamanija hida ijaꞌari.
23 Ijaꞌari vaꞌini bodini khaonaniki ida nahina ijaꞌari-ra najahariki Deus viaha.
Jahariki ida ijaꞌari kavaꞌibodivarani,
oniani ida hojai jahariki-ra bada niꞌavini hija — vaꞌora niꞌaha ada Jesus.
Jesua bikajoamoraki ida gamo
24 Hari.
Ai vihiꞌaha adani Jesus,
Tiro sidaji kaaraboni-ra avanikhahavini.
Avakhanoꞌaha,
gora bodinia avikhajakosiꞌaha.
Ni-Jesua binofiki ida vahoariha avigavini gora bodinia hojana.
Ni-amithihipaꞌitxiki ida avigavini.
25-26 Oniaroa,
gamo vania biogaha ada Jesus hojana.
Israel kaijaꞌari hirihi ida gamo.
Siro-Fenícia kaaraboni kaijaꞌarini ida.
Kabajadiki ida gamo kaisai.
Hari.
Jesus varani hina-ra kamithaꞌihi,
khamaiꞌihi.
Jesus viaha kajoꞌatharariꞌihi,
Jesu-ra kanikhariaꞌihi:
—Ida kodisai kabajadiki hojahi.
Ihonaria bana ida bajadi akaraꞌoꞌini.
27 Jesua biniꞌaꞌihi:
—Isai-ra vaꞌora anoꞌavini hiki ida ꞌbai.
Jomahi-ra vaꞌora anoꞌavini hiki ida ꞌbai isaia vakaiꞌdariki.
Jahariki ida isai viꞌbairina kabaꞌi,
jomahi-ra vaꞌora anoꞌavini hini isai vakadiꞌbaia — niha ada Jesus.
Jesus judeus kaijaꞌari-ra vaꞌora kavarajomivini isai fori vihina.
Judeus kaijaꞌari vihiriki-ra vaꞌora kavarajomivini jomahi fori vihina.
28 Oniaroa,
gamoa bigathaniꞌihi ida Jesus athi:
—Hai oamani.
Jomahi fori ohiki ho.
Isai viꞌbaina kabaꞌi,
jomahi vaitxanava vahahi ida vakadiꞌbai moramorani gora naboꞌania vararaki.
Kadaijaꞌari ohirina kabaꞌi,
onofiki ida kodisai-ra ikajoamoravini — Jesu-ra niꞌahi.
29 Hari.
Jesua vara biniꞌaꞌihi ida gamo:
—Jahaki ida kadavarani.
Hora ivakaijokajahakivini mani ida kadaisai-ra oanaihotavini hija.
Ba ajihiꞌa.
Ida akaraꞌoꞌihi bajadi kadaisai kania.
30 Ajihiꞌihi ida isai kaamia,
gorania ajoiꞌihi,
cama kanamania isai-ra karagaꞌihi.
Ni-kabajadijanaki ida isai.
Jesua bianaihotaki ada makhira morobo kavagahariki
31 Hari.
Tiro kaarabonia ai vihiꞌaha adani Jesus.
Sidom sidaji onikia avikafianiha,
Decápolis kaarabonia avikafianiha,
Galiléia ꞌdako-ra avanikhahavini.
32 Jesus kania avavikhaꞌaha ada makhira morobo kavagahariki,
abani aꞌdakharariki hiki.
Vaniꞌaha:
—Ikaabada bana mahija morobo akavagahavini,
abani jaboni varavaraꞌara kaimoni.
33 Ijaꞌari vaipohiki-ra vaꞌora avakakaraꞌopaꞌitxiꞌaha ada Jesus.
Makhira morobo-ra kakaꞌoahahaꞌaha saꞌa nokhonia.
Biakathoꞌihi ida iꞌbana,
saꞌa nokhoni-ra kaiꞌbaiꞌaha,
bikadasaꞌihi ida makhira abani.
34 Vada nimananiꞌaha,
vaꞌi aharoroni ada Jesus,
biniꞌaha athia:
—Ifata.
(Ariathi hini:
—Imoroboni akavagahaꞌava.)
35 Morobo akavagahani,
athi-ra kamithaꞌaha,
abani ni-aꞌdakhararijanaki,
sohimainaꞌihi ida kidivarani.
36 Jesus vaꞌora niꞌaha:
—Hariꞌa vahoariha-ra vananamitha — niha ada Jesus.
Vaꞌora kaabanibakhiavini vananamitharia kaimoni,
vananamithaꞌahapikimaniꞌihi.
37 Vakamithava Jesu-ra vakavaꞌibodivaraniꞌaha afoꞌahapiki.
Vaabono vakaniꞌakhamaꞌaha:
—Jahaki ida kidibadani!
Bikaabokaki ida moroboni kavagahariki-ra akanavagahavini,
abani aꞌdakharariki jahaꞌiki jaboni.