2 Avakoirina kamahini vani judeus kaijaꞌari Deu-ra vara vaniꞌavini kagorani kania avikhaha,

Jesus vaꞌora kaꞌojomoꞌiꞌaha adani ijaꞌari.

Oniania,

mitha vaniꞌahi ida kidivarani,

Jesu-ra vakavaꞌibodivaraniꞌaha.

Vaabono vakaniꞌakhamaꞌaha:

—Hanaja vania bikaꞌojomoꞌiꞌia ida kidibadani?

Hanaja vania bivikhaja ida kidiꞌogahai danoki?

Niha biniꞌaꞌavini koda biogaja ida badani danoki?

3 Aogajahakiki ada.

Gora namonahava abono ada.

Kidiamia Maria.

Jesus kakajoꞌo adani Tiago,

José,

Judas,

Simão vihiki.

Gamo isani kidikajoꞌo vihiki akadiania vaibaviki jaboni,

oniani ida haria kaꞌojomoꞌivini-ra anofiravini hija — vaabono vakaniꞌakhamaꞌaha.

Nazaré sidaji kaijaꞌarinia ni-vanofipaꞌitxiki ada Jesus.

4 Oniania,

Jesus vaꞌora niꞌaha:

—Ibavi hahavi kaijaꞌarinia vagathanijahakiki ada Deus athi namoniva abono.

Kidijaꞌaria bivavijavaki kania ni-vagathanijahakiki.

Igamina jaboni ni-vanofijahakiki,

oniani ida Nazaré sidaji kaijaꞌarini hora vagathanijahakiravini hija — vaꞌora niꞌaha ada Jesus.

5 Nazaré sidaji kaijaꞌarinia vakajariꞌdaki ada Jesus,

oniani ida kidibadani danoki-ra kaabokaravini hija.

Ijaꞌari vaipohiriki vania vanofira ada Jesus.

Vakajariꞌdariha ada,

oniani ida vaꞌora kaabadavini,

vaꞌora anaihotavini hija.

6 Jesua bikavaꞌibodivaraniꞌihi ida vakajariꞌdavini.

7 Hari.

Jesus vaꞌora kaꞌojomoꞌiha adani ijaꞌari ibavi maakarinia vahojaki.

Oniaroa,

vaꞌora baranahaha adani 12 vihiki vaipohina kidiania.

Vaꞌora niꞌaha:

—Aviꞌbamiꞌbaminanani aꞌonira oakakaronanakhamaki ho.

Aꞌonira onoꞌaki bana ho odanona.

Ai vihiꞌa bana.

Ijaꞌari vakabajadiki-ra avanokihi;

bajadi avakaraꞌona-ra vahonaria bana vaꞌajihira kaimoni.

8 Avadairini vani avikhaꞌa bana.

Hariꞌa avavikha hida bavi,

ꞌbai bavini,

jiniro hiki.

Ava kaꞌoa-ra avavikha,

avakadidadahi kaimoni.

9 Vaakaimaha bana hida sandália avaꞌdamania.

Hariꞌa avavikha ida avakadimakari odoki hoariha avakadiꞌabosihi kaimoni.

10 Asia vara niha ada Jesus:

—Ijaꞌari vaibavi avakaikahihi,

vanakoꞌdi bana ida ijaꞌari aꞌonira gathanijahakiki gorania.

Sidaji avaꞌajihirini oadani gorania vahojahahaꞌoadaha bana mahija aviꞌbaivini,

avavadini jaboni.

11 Hari.

Ibavi kaijaꞌarini aꞌonira vanofirihi;

ni-vanofiki jaboni ida avakadivarani-ra vakamithavini,

vaꞌajihi bana.

Avaꞌajihini viahania,

vanaꞌdaraꞌdara bana oni khomakhomani avakadisandália hojaki.

Ijaꞌari Deus athi-ra vakajoniki-ra avakavarajomivini ida sandália-ra avakanaꞌdaraꞌdaravini — vaꞌora navaꞌisohiha ada Jesus.

12 Oniaroa,

viꞌbamiꞌbaminanana ai vihiꞌaha adani Jesus ipohina.

Avikhaꞌaha,

ijaꞌari-ra vaꞌora vakanamonivini hiki ida Jesus varani hina.

Vakhaniha:

—Vakavaꞌipahini bana ida avakadihojai asohiriki.

Vanaaba bana ida Deus athi — vaꞌora vaniꞌaha.

13 Vaꞌora vahonariabakhiaha adani bajadi ijaꞌari kania avakaraꞌoꞌina.

Vaꞌora avanaihotabakhiaha adani vakavamoniki vaipohiki.

Vakabasinapaꞌitxivini ida vaatha,

vaꞌora avanaihotara kaimoni.

14 Hari.

Ijaꞌari vaibavi ipohikia vakamithahi ida Jesus varani hina.

Irojia jaboni bikamithaꞌihi.

Galiléia kaaraboni kakaꞌdaꞌdini ada Iroji oniki.

Ijaꞌari Jesus varani hina-ra vakamithaki,

vaniꞌaha:

—Ada ahokiꞌaha João Batista kohana,

oniani ida badani danoki-ra kaabokavini hija.

15 Vahoariha vakhaniha:

—Iniani.

João Batista kohana hiriha ada Jesus.

Elias kohana ahokiꞌiki ada.

Vahoariha vaniꞌaha:

—Deus athi namoniva abono ada Jesus.

Deus athi namoniva abono kohana fori hiki ada — vaabono vakaniꞌakhamaꞌaha adani ijaꞌari vaipohiki.

16 Irojia bikamithaꞌiki ida Jesus varani hina,

abono-ra niꞌaha:

—Okavahonariahiꞌiki ida João Batista kaꞌdaꞌdi akaꞌboani.

Ahokiꞌina joiꞌoamaniꞌara ada João.

João Batista ahokiꞌina oamani ada Jesus — abono-ra niꞌaha ada Iroji.

17 Hari.

Irojia bivahonariahiꞌiki ada João Batista kohana gathaꞌina,

saꞌa kodabohani.

Cadeia avibaiꞌiki ada.

João Batista kohana cadeia avibaivini viahania Irojia bikanagamohaꞌiki ida kidikajoꞌo kagamo.

Filipea oniki ada Iroji kakajoꞌo.

Irodisi oniki ida Filipe kagamo Irojia bisaariꞌiki.

18 Oniania,

João Batista biniꞌaha ada Iroji:

—Ni-jahapaꞌitxiki ida kadakajoꞌo kagamo-ra ivahojavini.

Nimania ida Deus kavaꞌisohihi jiriki athini — niha ada João Batista.

19 Oniaroa,

João-ra kaihamahiꞌihi ida Irodisi,

João-ra naabinivini-ra nofiꞌihi.

Ni-bikaabokaki.

20 Irojia ni-bivaꞌahaki ida João-ra naabinivini.

Irojia biogaki ida João Batista makhira jahakaꞌoaki hina.

Hojai asohikia kahojaiki ada,

oniani ida João Batista-ra finivini hija.

João Batista vara nina-ra kamithavini mani ida Iroji vaꞌi-ra karakhakhamaja,

kabaꞌi,

bivajahaki ida João Batista kavarani-ra mitha niꞌavini.

21 Hari.

Mahi bivaꞌbanaki kamahini vani,

ihinika karaho amonahani-ra vahonariahiꞌaha ada arabo kakaꞌdaꞌdini Iroji oniki.

Bivahonariahivini ida ihinika koꞌbaini ahapini amonahani,

kanori abono vaipohikia vahaki kaimoni.

Vaꞌora kaboaꞌiha adani kidibadani abono Galiléia kaaraboni vakadikaꞌdaꞌdi,

sorara vakadikaꞌdaꞌdi vihiki.

Vaꞌora kaboaꞌiꞌaha adani ijaꞌari vakainisikaꞌahapikiki.

22 Vajoronihahaviꞌaha,

khajakosihi ida Irodisi kaisai,

khajoꞌihi.

Kanori abono hahavia vavajahaki ida kidikhajoi.

Irojia jaboni khai biniꞌahi ida kidinabadiahi khajoni.

Khajoꞌini naothinia,

Irojia biniꞌahi:

—Nahinaro-ra inofihi,

ira onoꞌahi.

23 Deus viaha vara ira oniꞌahi,

ira onoꞌahi ikaꞌdomakia.

Jokoa ira onavaꞌipohiꞌimarinirihi,

ikaꞌdomakia ira onoꞌahi.

Kodiarabo-ra oakanapitakhamavini-ra inofihi;

oakanapitakhamahi kadaimoni hini — biniꞌahi ida kidinabadiahi.

24 Mitha biniꞌaꞌihi,

ajihihi,

kidiamia kania okhaꞌihi.

Binanaꞌdohihi:

—Mamai,

nahina mani ida okanikhariaja kidiania?

Kidisai-ra niꞌahi:

—Iakanikharia ida João Batista kaꞌdaꞌdi.

25 Ajihiꞌianahi,

jorakia ajoihi,

kidibadia-ra niꞌahi:

—Onofiki hidakabaꞌi João Batista kaꞌdaꞌdia hora inoꞌavini bavia kabaviki.

26 Vaꞌi mokara niꞌaha ada Iroji.

Ni-binofiki ida João Batista kaꞌdaꞌdi akaꞌboani.

Kidikanori abonoa vakamitharija vaha ida athi;

ni-binoꞌaki vaha ida kidinabadiahi bikanikhariakia.

27 Oniania,

bihonariaha ada sorara:

—Iakavaꞌboaha bana ida João Batista kaꞌdaꞌdi.

Ikavikha hida — biniꞌaha.

Ajihiha ada sorara,

cadeia okhaha,

João Batista kaꞌdaꞌdi-ra akavaꞌboahaꞌavini.

28 Bavi bodinia bikanahojaꞌihi.

Bikavikhahi,

imaꞌinavi-ra noꞌavini kihiꞌihi.

Bigathanihi ida bavi bakaꞌdaꞌdia daiki,

biakosahi,

kidiamia-ra noꞌavini kihiꞌihi.

29 João Batista kohana ipohina vakamithaꞌihi ida monina,

cadeia avikhaꞌaha,

abaꞌona avanikhaꞌavini.

Jaꞌdi hodijamaꞌokia avibaihaꞌihi ida abaꞌona.

30 Hari.

Oniaroa,

Jesus kania vajoiꞌaha adani kidipohi Jesus athi-ra avavaadahaoniꞌiki.

Vananamithavini hihi ida vaadahana bada vakhaniꞌina,

ijaꞌari-ra vaꞌora vakaꞌojomoꞌiki jaboni.

31 Jesus kania vaakaikahirisahakhamaki adani ijaꞌari vaipohiki,

vikhaꞌiki,

ai vihiꞌiki adani ijaꞌari afohaꞌoadaha,

oniani ida Jesus,

ipohina khama viꞌbaina-ra vakaabokaravini hija.

Oniania,

ipohina-ra vaꞌora niꞌaha:

—Ai arihiꞌava.

Kaijaꞌaririki kania aokhaꞌava mahija avarakoiripaꞌitxiꞌavini.

32 Vakiꞌdamaha,

kaijaꞌaririki kani-ra avakanikhahaꞌavini.

33 Hari.

Ijaꞌari vaipohiki vaꞌora vanokiꞌaha adani Jesus,

ipohina khama vakiꞌdamana.

Vaꞌora avigaki adani Jesus ai vakihina,

oniani ida Jesu-ra vanajoikahivini hija.

Vaibavia vikhaonaninanibakhiaha adani ijaꞌari vaipohiki,

ꞌdako vadinia vikhabaoniha,

Jesus avakoꞌomisina-ra vanaviahanokhaꞌaha.

34 Avakoꞌomisiꞌaha adani Jesus,

vaꞌora nokiha adani ijaꞌari vâipohiki.

Vaꞌora nakaidivamaniha.

Vaꞌora kavaꞌibodivaraniꞌaha:

—Ovilia nahina vaꞌora akadavaꞌariki fori vihiki adani ijaꞌari.

Ni-avigaki ida Deus vaꞌora akadavaꞌavini.

Oniania,

vaꞌora kaꞌojomoꞌiꞌaha varani ipohikia.

35 Hari.

Safini ajoraꞌina vani vikhaꞌaha adani ipohina,

Jesu-ra vaniꞌaꞌaha:

—Kamahijanarihi.

Kagorarihi bana hida ibavi.

36 Vaꞌora honaria ai vihiꞌina mahija ijaꞌari vahoariha vaibavia ꞌbai-ra vakapavakarihavini.

37 —Iniani.

Aꞌonivani ꞌbaia vaꞌora vanoꞌa — niha ada Jesus.

Hari.

Vagathanihi ida Jesus athi:

—Ida hanaja vania ꞌbai-ra akapavakarivini hihadani ijaꞌari hahavi-ra vaꞌora anoꞌavini kaimoni?

Ni-arajomaki ida 200 jiniro ꞌbaꞌdani hiki pão-ra akanaabosivini kaimoni hini,

vagahinara kaimoni pão kabobini kapaꞌitxi afohanana — Jesu-ra vaniꞌaꞌaha.

(Mahi hoarani kavabadanini abosini fori hiki ida jiniro ꞌbaꞌdani hoarani.)

38 Oniaroa,

Jesus vaꞌora niꞌaha:

—Nihafori kihimanija oni pão avakavahojaki?

Vakanavanavanaha oni pão kaipohini niha fori kihini.

Vakanavanavanahaꞌihi,

vajoina,

vaniꞌaha:

—Pão saꞌai kahoarani kihiki oavani-ra akavahojaja,

abaisana ꞌbamiki oavani-ra jaboni avahojaja.

39-40 Hari.

Jesus vaꞌora honariavini adani ijaꞌari vaipohiki:

—Vajoronionahaꞌa bana,

vavithionahaꞌa afohahavi.

Vajoroniꞌa 50 avihiki avaipohini,

vavithijabanaꞌa.

Vajoroniꞌa 100 avihiki avaipohini vavithijabanaꞌa jaboni — vaꞌora niꞌaha ada Jesus.

Oniaroa,

50, 100 vihiki vaipohina,

onivani fori vihina adani ijaꞌari vaipohiki vavithijabanana hogoi itxani namania vavithionahana.

41 Jesua bigathaniha ada abaisana ꞌbamiki,

pão saꞌai kahoarani kihiki,

nama vada nimananiꞌaha,

Deu-ra vara niꞌaꞌaha:

—Deus,

ivani ijahaki i.

ꞌBaia haria inoꞌaꞌiki i — niha ada Jesus.

Oniaroa,

bikanapitahatahahi ida pão,

ipohina-ra vaꞌora noꞌavini kihiꞌihi.

Vaꞌora honariaꞌaha:

—Vakaravinaꞌa hida pão,

ijaꞌari hahavia vakahaja kaimoni.

Binapitahatahaha ada abaisana ꞌbamiki vaꞌora ravinavini hiꞌaha jaboni.

42 Hari.

Viꞌbaihahaviꞌaha vavaꞌi naꞌbihahavimaniꞌaha.

43 Viꞌbaina naothinia,

Jesus ipohina vakanajoroniꞌihi ida pão akahabarini,

abaisana ahabarina jaboni.

12 soꞌoro-ra vanajiꞌbijiꞌbihaꞌaha ꞌbai ahabarini.

44 Makhira 5 mil vaipohina viꞌbaiki,

gamo,

isai vihiki jaboni.

Ijaꞌari vaꞌahâpina oamani adani viꞌbaira.

45 Hari.

Pão-ra vakanajoronivini naothinia,

Jesus ipohina-ra vaꞌora honariaha:

—Vakiꞌdamaꞌa mahija avarakhananavaꞌavini,

Betsaida ibavi oniki-ra avarakanikafianija kaimoni — vaꞌora niꞌaha.

Avakakafianina kabaꞌi Jesus vaꞌora honariaha adani ijaꞌari vaipohiki avajoiꞌina vagorana.

46 Ipohina-ra vaꞌora kaaminavini naothinia,

arabo namahikia gaimoriha ada Jesus,

Deu-ra vara niꞌara kaimoni.

47 Arabo namanija jominikosoaꞌaha ada Jesus.

ꞌDako bodi pania vakavanamina kabaꞌi adani ipohina,

vakajominiꞌaha.

48 Kanava-ra aagathanihi ida sirisiriki danoki.

Vakavanamina kabaꞌi ni-vakaadahajanaki.

Sirisirikia bikanadaanivini ida kanava.

Jesus vaꞌora akanokiha.

Avagarini oadani,

khaꞌaha ada Jesus kidipohi vakadiania,

adahana paha namania.

49 Vaꞌora karadavini kabaꞌi vakanokiꞌaha.

Vanokihahaviꞌaha paha namania adahana.

50 Paha kapamoarihi vakavanihavini,

vaꞌora kanaimahidaꞌiki.

Vakabodiꞌbarahaꞌaha.

Oniaroa,

Jesus vaꞌora kaniꞌaꞌaha:

—Khai hora vakaniꞌa!

Hovani Jesus ho.

Hariꞌa vaimahida!

— vaꞌora niꞌaha ada Jesus.

51 Hari.

Kiꞌdamaꞌaha.

Radahaꞌihi ida sirisiriki.

Jesus paha namania adahana vani ida vavaꞌi nakidakidani hija.

Vaimahidaꞌaha.

52 Vanokivini kabaꞌi ida Jesus pão-ra akanaipohivini,

ni-avigaꞌiaki ida badani hahavi danoki-ra kaabokavini.

Asia ni-vavakaijokajahakiki ada Jesus.

53 Hari.

Vakajoifianiꞌaha adani Jesus kidipohi khama.

Genesaré arabo onikia avakoꞌomisiꞌaha.

Vakanaahoꞌihi ida kanava kaasia.

54 Vigaimoriꞌaha.

Genesaré arabo kaijaꞌarini vaꞌora vanokiꞌaha adani Jesus.

Vaꞌora avigajorakiꞌaha.

55 Ijaꞌari Jesu-ra vanokiꞌiki avakahoaraharahanakhamaꞌiki vahoariha-ra vaꞌora vanavaꞌisohihaꞌavini adani sidaji kaijaꞌarini afohahavi Jesus vaakaikahiꞌina.

Jesus varani hina-ra vakamithavini,

Jesu-ra vanajoikahivini hiki.

Vakavamoniki-ra vavikhaha Jesus kania,

vaꞌora anaihotara kaimoni.

56 Ibavi ipohikia aadahaoniꞌaha ada Jesus.

Ibavi kagorani ipohikia aadahaonina,

kagoraꞌipohiriki kania aadahaonina,

siroi kagorania aadahaonina jaboni.

Pavakarihi ibavinia ijaꞌari vaꞌora vibarariꞌaha adani vakavamoniki vajorana namania.

Khaꞌaha ada Jesus,

vakavamonikia vaniꞌaha afohanana:

—Jakaho kadakarahobi ihini-ra akaabadava — vaniꞌaha.

Jesus kakarahobi ihini-ra vakaabadabadarisahakhamaha,

avaihotahahaviꞌaha.