Jesus vaꞌora nagathogathoꞌiki adani makhira
10
1-4 Hari.
Oniaroa,
Jesus vaꞌora baranahaki adani kidipohi kidiania vikhana.
Vaꞌora naonivini adani 12 makhira vaipohina,
athi avavaadahaoniva abono.
Hiꞌadani 12 makhira vaonina Simão,
André,
Tiago,
João,
Filipe,
Bartolomeu,
Tomé,
Mateus,
Tadeu,
Tiago hoariha,
Simão o nacionalista,
Judas Iscariotes vihiki.
Badara ahoarabakosiki radahaꞌihi naothinia Judas Iscariotes vaꞌora kakodiaki bana adani Jesu-ra vanaabinivini-ra vanofiki.
Jesus Simão-ra noꞌavini onii hoariha Pedroa,
igamina ada André.
Tiago igamina ada João.
Zebedeu kaisai adani.
Tiago hoariha Alfeu kaisai.
Imposto gathaniva abono ada Mateus.
Jesus vaꞌora niꞌaha adani 12 vihiki vaipohina:
—Aꞌonira onoꞌaki bana ho odanona,
avakaabokaja kaimoni ida bajadi akaraꞌoꞌini-ra avahonariavini,
avakaabokaja kaimoni jaboni ida ijaꞌari kavamoniki-ra avaranaihotahahavivini — vaꞌora niꞌaha ada Jesus.
Jesus vaꞌora karonaki adani kidipohi judeus kaijaꞌari vaibavia
5 Oniaroa,
Jesus kania vahojaki adani kidipohi.
12 vihiki vaipohina adani.
Vaꞌora niꞌaha:
—Aꞌonira okaronaki ho akadijaꞌari vaibavia avarikhani.
Hariꞌa avikha bana Samaria kasidajini kaibavinia.
Hariꞌa avikha bana akadijaꞌari vihiriki vaibavia.
6 Judeus kaijaꞌari vaibavi kaꞌoa avikha bana.
Ovilia akamadaki fori vihiki adani judeus kaijaꞌari,
ni-avigajahakiki kaho ada Deus.
7 Oniani ida aꞌonira okaronavini hija vakadiania.
Vaꞌora vaniꞌa:
“Deua binofiki aꞌonira vakaꞌdaꞌdivini”.
8 Vaꞌora vanajaha adani ijaꞌari asafi namani-ra najaharikia vakavamoniki,
vakavamoniki vahoariha jaboni avanaihotaꞌa bana.
Vaꞌora avanahoki bana adani ijaꞌari vaabiniki.
Ijaꞌari vakabajadiki-ra avanokihi;
vahonaria bana ida bajadi afohanana akaraꞌoja kaimoni.
Avagahinaꞌiki aꞌoni Deus danona,
ijaꞌari-ra avaranaihotaja kaimoni,
ni-aabosiki ida danona.
Hariꞌa vakanikharia ida ijaꞌari-ra vaꞌora avaranaihotavini abosinia.
9 Hariꞌa avavikha ida avaabononi avakaijahitavini kaimoni.
Vanokha bana ada Deus aꞌonira kaijahitavini.
Hariꞌa avavikha ida jiniro,
jiniro ꞌbaꞌdani hiki avamasiꞌahani bodinia.
10 Avadairini vani avikhaꞌa bana.
Hariꞌa avakavikha ida sacola.
Hariꞌa avavikha ida avakadimakari odoki hoariha avakadiꞌabosihi kaimoni.
Hariꞌa avakavikha ida sandália,
ava avaabononi avanadadavini kaimoni.
Avakadibadani hiki ida ijaꞌari-ra vaꞌora avaranaihotavini.
Jahaki ida aꞌonira vanoꞌavini hiki ꞌbai,
vada ibavini hikia.
Avakadibadani abosini ida aꞌonira vakaijahitavini.
11 Ijaꞌari vaibavi avakaikahihi,
vanakoꞌdi bana ida ijaꞌari aꞌonira gathanijahakiki gorania.
Sidajia avaꞌajihirini oadani gorania vahojahahaꞌoadaha bana mahija aviꞌbaivini avavadini jaboni.
12 Ijaꞌari gorania avakaikahini,
ijaꞌari vahojaki-ra vaꞌora vaniꞌaꞌimidia bana:
“Anofiki Deus aꞌonira noꞌavini vaꞌi jahajahania.”
13 Vagorana aꞌonira vagathanijahakiki bana adani ijaꞌari,
vaꞌora vanavaꞌisohihaꞌa:
“Deus aꞌonira noꞌaꞌiki aꞌoni vaꞌi jahajahania.”
Vagorana aꞌonira vanofiriha,
ni-aꞌonira vagathanijahakiki,
vaꞌora vanavaꞌisohi bana:
“Jokoa Deus aꞌonira noꞌarihi vaꞌi jahajahania.”
14 Aꞌonira vanofiriki vahabini bana adani gora kaijaꞌarini,
sidaji kaijaꞌarini,
ni-aꞌonira vagathaniki,
ni-avaathini-ra mitha vaniꞌavini-ra vanofiki jaboni,
oniania vaꞌajihiꞌa bana.
Avaꞌajihini kabaꞌi vaꞌora vaniꞌa bana:
“Aꞌdama-ra akanaꞌdaraꞌdaravini hiki,
aniaja kaimoni hida arabo khomakhomani aꞌdama hojaki,
avarigaja kaimoni ida jaharini ariathi-ra avakajonivini.”
15 Vakavaꞌihoki bana ida Deus ijaꞌari hahavi-ra nasohivini kamahini.
Deus vaꞌora vaꞌadipaꞌitxiki adani Sodoma sidaji kaijaꞌarini,
Gomorra sidaji kaijaꞌarini vihiki.
Vajaharina kabaꞌi,
Deus vaꞌora vaꞌadipaꞌitxiki adani.
Deus vaꞌora ni-vaꞌadipaꞌitxiki adani hihida sidaji kaijaꞌarini,
avaathini-ra vakamithavini kabaꞌi vanofiriki.
Jesus kaijaꞌari vajahariharina varani hini
16 Hari.
Ijaꞌari aꞌonira vavajahariki vakadiania aꞌonira okaronaki bana ho.
Ovilia fori avihiki aꞌoni.
Vaꞌoaniaro jomahi hiihiha fori vihiki adani.
Aꞌonira vaarivini-ra vanofiki fori vihiki adani.
Hari.
Makha biogaki ida abono-ra akadavaꞌavini pohimajarara kaimoni.
Makha fori vihiꞌa bana mahija avapohimajaravini.
Hoꞌdoko fori vihiꞌa bana jaboni mahija vahoariha-ra vaꞌora avanaibavijahajahakivini.
Hoꞌdokoa ni-bikanapohimajaki ida kahoariha.
17 Avaabononi avakavaꞌigairiꞌa bana.
Aꞌonira vavajahariki aꞌonira vagathiki bana aꞌoni,
vakadijaꞌari vanasohiva abono vakadiania aꞌonira avarakhaki bana adani.
Avavadadamiki bana ida omonina avakavaranijanarini.
Judeus kaijaꞌari Deu-ra vara vaniꞌavini kagorani bodinia dafi avihiki bana jaboni aꞌoni xikotxia.
18 Oipohina avihini mani ida aꞌonira avisavini hija bana arabo kakaꞌdaꞌdini,
arabo ipohiki kakaꞌdaꞌdini vihiki vakadiania,
aꞌonira avanaathidanoararivini kaimoni.
Jaharikia aꞌonira avarakhavini hiki bana oipohina avihini-ra vavajaharivini.
Aꞌonira vanajahariharivini kabaꞌi,
asia omonina-ra vara vavaniꞌa bana.
Judeus kaijaꞌari vihiriki adani hiꞌadani arabo kakaꞌdaꞌdini,
vaꞌora vanavaꞌisohi bana adani jaboni omonina.
19 Aꞌonira avanaathidanoararivini kamahini hariꞌa bana avakavaꞌisokonijora ida vakadiꞌaathidanoarari avagathanivini.
Vakadiꞌaathidanoarari avagathanivini kamahini,
Deus aꞌonira navaꞌisohiki bana aꞌoni varani vara avavaniꞌaki kaimonia.
20 Ni-avakavaꞌibodivaraniki bana ida varani vara avavaniꞌaki kaimoni.
Maꞌonahai Jahaki avavaꞌini-ra nahonariahihiki bana aꞌoni,
aꞌonira navaꞌisohivini hiki ida varani kodiabiꞌia binofiki.
21 Hora vanofiriki vaꞌora vaniꞌaha adani arabo kakaꞌdaꞌdini:
“Jahaki ada oigamina abinina.
Jesus ipohina hina mani ida abinina onofivini hija.”
Vakhaniha.
Hora vanofiriki vahoariha vaꞌora vaniꞌaki bana adani arabo kakaꞌdaꞌdini:
“Jahaki ida kodisai vaabinina.
Jesus ipohina vihina mani ida vaabinina vaꞌora onofivini hija.”
Vakhaniha.
Hora vanofiriki vahoariha vaꞌora vaniꞌaki bana adani arabo kakaꞌdaꞌdini:
“Jahaki ida kodiamia,
kodiabiꞌi vihiki vaabinina.
Jesus ipohina vihina mani ida vaabinina vaꞌora onofivini hija.”
Vakhaniha.
22 Oipohina avihini mani ida ijaꞌari vaipohiki aꞌonira vavajaharavini hija bana.
Avaabinirini oadani oipohina avihini-ra avakajonirihi;
hora avakavaꞌipahinirihi;
Deus aꞌonira akadavaꞌaki bana aꞌoni,
ni-akamadaki bana ida avamaꞌonahani,
Deus kania avarikhaki bana aꞌoni — vaꞌora niꞌaha ada Jesus.
23 Asia vara niha ada Jesus:
—Aꞌonira onavaꞌisohiki bana ho.
Sidaji kaijaꞌarini aꞌonira vanajahariharihi;
avigaꞌa bana,
sidaji hoariha avikhaꞌa.
Avakadibadani hiki bana ida judeus kasidajini hahavia avarikhani vaꞌora avarakanamonionira kaimoni omonina.
Hovani ijaꞌari hahavi vakadiꞌaajo ho.
Ojoina viahania,
ni-aꞌdiahiꞌiaki kaho ida avakadibadani Israel kaijaꞌari vahararana vakadisidaji hahavi.
24 Ipohina ni-bihonariafiahaki ada kidiꞌojomoꞌihi abono.
Honai abonoa ni-bivakaꞌdaꞌdiki ada kidikaꞌdaꞌdi.
Avakadikaꞌdaꞌdi ohiki ho.
25 Ipohina abononi niꞌahi:
—Onofiki ida kodiꞌojomoꞌiva abono fori ohina.
Ijaꞌari kodihojai kidihojai fori hini-ra vakahihi;
khai onihi — nimania ida ipohina athi.
Onivani fori hiki jaboni ida honai abono athi.
Ovaria binofiki ida kidikaꞌdaꞌdi kahojaia kahojaina.
Kidikaꞌdaꞌdi kahojaia kahojaiha;
khai niꞌaha.
Hari.
Ijaꞌari hora vavajahariki hora vaniꞌabakhiaki:
“Ivani Biosibo Jahari i.
Bajadi vakadikaꞌdaꞌdi i.”
Vakhaniki adani.
Ijaꞌari hora noꞌavini hiki onii jaharikia.
Kodijaꞌari avihini mani ida aꞌonira vanoꞌavini hija bana onii jaharini arafiakia.
Afinivini jahaki ida Deus athi-ra anaabaravini
26 Hari.
Vara niꞌianaha ada Jesus:
—Hariꞌa bana vaꞌora vifini adani ijaꞌari.
Ijaꞌari vakadihojai ogavaharini kabaꞌi hidakabaꞌi,
khaki ida bana mahi hojai hahavi ogavahani kaimoni.
Ni-ijaꞌari kahojai ahojajanaki bana.
27 Aꞌonivani avaipohiriki,
mitha avaniꞌaki hida kodivarani.
Vara vavaniꞌahaꞌiana bana hida kodivarani mahija ijaꞌari vaipohikia vakamithavini.
Vahoariha vahojarina oadani vara aꞌonira oniꞌabakhiaki ho.
Ijaꞌari vaipohiki vahararana vananamithaꞌa bana hida kodivarani.
28 Hariꞌa bana vaꞌora vifini adani ijaꞌari aꞌonira vanaabinivini-ra vanofiki.
Ni-vakaabokaki ida avamaꞌonahani-ra vanaabinivini.
Avaabinini naothinia,
ni-aꞌonira vanapohimajajanaki bana.
Vifini bana ida Deus athi-ra avanaabaravini.
Avaabinini naothinia,
Deua bikaabokaki ida avaabononi,
avamaꞌonahani hiki-ra nahokahivini Ibavi Jaharikaꞌoakia.
Deu-ra vifini bana!
29 Deua bikaabokaki ida ijaꞌari-ra naabinivini.
Bikaabokaki jaboni ida aꞌonira akadavaꞌavini.
Deus vaꞌora akadavaꞌaki adani igitha varaboki.
Kaidivariki ida kirikiri.
Pavakari anihavini ida kirikiri ꞌbamiki abosini jiniro ꞌbaꞌdani paꞌitxi.
Kaidivarini kabaꞌi,
Deus vaꞌora akadavaꞌaki adani.
Deua abinini binofiravini kabaꞌi,
ni-abiniki ida kirikiri hoarani.
30-31 Hariꞌa avavaꞌini soko iniva!
Deua binakaidivaki ida kirikiri.
Deus aꞌonira nakaidivavini arafiaki aꞌoni.
Deua biogaki ida hahavi.
Biakogaki jaboni ida akaꞌdaꞌdi kaafani nihafori kihini kaipohini,
oniani ida aꞌonira onavaꞌisohivini hija,
aꞌonira nakaidivaꞌoamanira ada Deus — vaꞌora niꞌaha ada Jesus.
Kodijaꞌari vihina-ra vakahiki
32 Vara niꞌianaha ada Jesus:
—Ijaꞌari kodijaꞌari hini-ra kahihi vahoariha vaviaha;
kodijaꞌari hini okahihi jaboni bana kodiabiꞌi nama hojaki viaha.
33 Ijaꞌari kodijaꞌari hirini-ra kahihi vahoariha vaviaha;
kodijaꞌari hirini okahihi jaboni bana kodiabiꞌi nama hojaki viaha — vaꞌora niꞌaha ada Jesus.
Jesu-ra vanofiki, Jesu-ra vanofiriki varani vihina hida
34 Hari.
Vara niꞌianaha ada Jesus:
—Hariꞌa vakavaꞌibodivarani:
Jesus kaikahina mani ida ijaꞌari vaabono vakanajahamisikhamavini hija.
Okhaꞌina mani ida ijaꞌari vaabono vakanajahariharikhamavini hija.
35 Okhaꞌina mani ida hora vakajariꞌdaki hora vakajariꞌdariki-ra vaꞌora vanajahariharivini hija.
Isai kaabiꞌi,
kaamia vihiki vaꞌora vanajaharihariki bana adani vakadisai.
Isai vaꞌora vanajaharihariki bana adani vakadiabiꞌi,
vakadiamia.
Isai kaamia vaꞌora vanajaharihariki adani gamo isani vakadisai.
Gamo isani vaꞌora vanajaharihariki adani vakadiamia.
Gamo kamasodini vaꞌora vanajaharihariki adani vakadiꞌaboni gamo.
Hora vakajariꞌdaki vaꞌora vavajahariki bana adani hora vanofijahakiki.
36 Ijaꞌaria vakaimajahariki bana ida oipohina.
Kidiabiꞌi,
kidiamia,
igamina vihikia vakaimajahapaꞌitxiriki bana ada oipohina.
37 Ijaꞌaria binofiki ida oipohina hini,
jahaki ida hora nofivini arafiani,
vaꞌora vanofiki adani kidiabiꞌi,
kidiamia,
kidisai vihiki.
Hora nofivini arafiarihi;
ni-bikaabokaki ida oipohina hini.
38 Deus athi-ra onaabavini mani ida hora avakaꞌitapoamisahanavini hija bana ava akasanakhamakia.
Ijaꞌari abononi vaꞌahariki ida abinini kodimoni hini,
bikajoniki jaboni ida oathi-ra naabavini,
ni-arajomaki ida oipohina hini.
39 Ijaꞌaria bada biniꞌahahaꞌoadahahi ida binofiki kidimoni hini,
ni-bikavaꞌibodiki ida Deua binofiki.
Kavithimaki ida kidimahi,
ni-ajaꞌdiki,
ni-bivahojaki ida mahi jaꞌdini anokhomiriki Deus kania.
Oipohina bada biniꞌahahaꞌoadahaki ida Deua binofikia kabadanini.
Hokini oadani bikavaꞌibodivaraniki ida kidimahi Deua bihonariaja kaimoni,
ni-oniani abononi honariaki binofikia,
oniani ida Deus kania kidimahi jaꞌdini ananokhomirini hija bana — vaꞌora niꞌaha ada Jesus.
Deus ijaꞌari-ra naabosivini kamahini
40 Hari.
Asia vara niha ada Jesus:
—Ijaꞌari aꞌonira gathanihi,
hora gathanihi jaboni.
Ijaꞌari hora gathanihi,
bigathaniki jaboni ada hora karonaꞌiki.
41 Ijaꞌari abononi niꞌavini:
“Hihada khaki Deua bikaronaki hada,
vara bivaniꞌaja kaimoni ida Deus athi,
oniani ida ogathanijahakivini hija jaboni.”
Deua binaabosiki bana ada bikaronaki.
Binaabosiki jaboni ada karonana hiki gathanijahakina hiki.
Ijaꞌari abononi niꞌahi:
“Jahaki oni ijaꞌari kahojai,
Deus kaijaꞌari oni,
oniani ida ogathanijahakivini hija.”
Deua binaabosiki bana ida kidijaꞌari hojai jahakia kahojaiki.
Binaabosiki jaboni ida kidijaꞌari gathanijahakini hiki.
42 Vakavaꞌihoki bana hida kodivarani.
Ijaꞌari abononi niꞌahi:
“Kanabidini akaaforaki ida Jesus ipohina,
paha pahisiriki-ra nofiki ida.
Nahina hirini kabaꞌi ida ijaꞌari,
Jesus ipohina hina mani ida okajoamoravini hija.”
Paꞌitxi kabaꞌi ida kidikajoamorahi;
Deua binaabosiki bana hida.
Kaꞌoa hiki ida Deua binaabosivini kavaranihi — vaꞌora niꞌaha ada Jesus.