Jesua bikanavaranihaki ida farisio vakadihojai
12
Hari.
Oniaroa,
Jesus vakadiania vajoroniha adani ijaꞌari vaipohiki.
Vaipohiꞌoamanira adani.
Vaabono vaakaꞌdokhoꞌdokhokhamaki adani,
vaꞌdama-ra vaakadaꞌahaꞌahakhamaꞌiki adani jaboni.
Jesus vara vaꞌora niꞌaꞌimidiaha adani kidipohi:
—Farisio Deu-ra vanofiki vaabono vavanihavini mani ida vakadihojai nasohirini hija.
Avaabononi avakavaꞌigairi bana mahija vakadihojai avanofiravini.
2 Ijaꞌari vakadihojai ogavaharini kabaꞌi hidakabaꞌi,
khaki bana ida mahi hojai hahavi ogavahani kamahini.
Nahina ijaꞌaria bianahojaki,
khaki bana ida mahi vahoariha avigavini kamahini.
Lucas 12:1-59
3 Ijaꞌaria bianahojavini kabaꞌi ida kidivarani,
vahoariha avigaria kaimoni,
khaki bana ida mahi ijaꞌari hahavi avigavini kamahini.
Gora bodinia avakahojakosoani vara avakhanihi,
vahoariha vakamitharia kaimoni,
gora ꞌdaꞌdini aꞌani sohiriamaꞌoki kania vahoariha vakabodiꞌbarahaki ida avakadivarani ahojaki — niha ada Jesus.
Afinivini jahaki ida Deus athi-ra anaabaravini
4 Hari.
Vara niꞌianaha ada Jesus:
—Kodivaꞌahi,
kaꞌoa hiki hida vara aꞌonira oniꞌavini hiki.
Hariꞌa bana vaꞌora vifini adani ijaꞌari aꞌonira vanaabinivini-ra vanofiki.
Avaabinini naothinia,
ni-aꞌonira vanapohimajavini-ra vakaabokajanaki bana.
5 Aꞌonira onavaꞌisohivini hiki bana ada avifiniki kaimoni.
Vifini bana ida Deus athi-ra avanaabaravini!
Deus aꞌonira naabinivini naothinia,
bikaabokaki ida aꞌonira nahokahivini Ibavi Jaharikaꞌoakia.
Vara oniꞌaꞌianaki ida oniꞌaki,
vifini bana ida Deus athi-ra avanaabaravini!
6 Kaidivariki ida kirikiri.
Pavakari anihahi ida kirikiri abosini jiniro paꞌitxi saꞌai kahoarani hiki.
Kaidivarini kabaꞌi,
Deus vaꞌora akadavaꞌaki adani,
ni-biakavaꞌiꞌbiriniki ida hoarani.
7 Hariꞌa avavaꞌini soko iniva!
Deua binakaidivaki ida kirikiri,
Deus aꞌonira nakaidivavini arafiaki aꞌoni!
Deua biogaki ida hahavi.
Biakogaki ida avakaꞌdaꞌdi kaafani nihafori kihini kaipohini,
oniani ida aꞌonira onavaꞌisohivini hija,
aꞌonira nakaidivaꞌoamanira ada Deus — vaꞌora niꞌaha ada Jesus.
Jesus kaijaꞌari vihiki vihiriki
8 Hari.
Vara niꞌianaha ada Jesus:
—Aꞌonira vara oniꞌavini hiki,
ijaꞌari kodijaꞌari hini-ra kahihi vahoariha vaviaha;
kodijaꞌari hini okahihi jaboni bana Deus ibavi kaijaꞌarini vaviaha.
9 Ijaꞌari kodijaꞌari hirini-ra kahihi vahoariha vaviaha;
kodijaꞌari hirini okahihi jaboni bana Deus ibavi kaijaꞌarini vaviaha.
10 Hari.
Ijaꞌari hora kanavaranihahi,
Deua bikaabokaki ida varani jahariki-ra naꞌbiravini.
Ijaꞌari Maꞌonahai Jahaki-ra kanavaranihahi,
jokoa Deua biakariakapaꞌitxirihi ida ijaꞌari varani jaharikia kavaraniki — vaꞌora niꞌaha ada Jesus.
11 Vara niꞌianaha ada Jesus:
—Kodijaꞌari avihini mani ida vahoariha badani jaharikia avakabadanini-ra vakahiꞌbadaravini hija,
oniani ida aꞌonira avarakhavini hija judeus kaijaꞌari vanasohiva abono vakadiania,
judeus kaijaꞌari Deu-ra vara vaniꞌavini kagorania.
Kodijaꞌari avihini mani ida vahoariha aꞌonira avarakhavini hija jaboni bana ijaꞌari vakadiarabo vakaꞌdaꞌdiva vakadiania,
jaharikia aꞌonira avarakhara kaimoni.
Aꞌonira avakaraganahavini kamahini,
hariꞌa bana avakavaꞌisokonijora vakadiꞌakaraganahi avagathanivini.
12 Vakadiꞌakaraganahi avagathanivini kamahini,
Maꞌonahai Jahaki aꞌonira navaꞌisohiki bana varani vara avavaniꞌaki kaimonia — vaꞌora niꞌaha ada Jesus.
Makhira vaꞌibodivaraniriki varani hina
13 Hari.
Oniaroa,
ijaꞌari vaipohiki vahararana hojaha ada makhira.
Ovaria biniꞌaha:
—Jesus,
ada abiniꞌaha kodiabiꞌi.
Ihonaria bana ada kodiꞌaajo mahija akadiabiꞌi kohana kanahina-ra napitavini,
pitania ogahinaja kaimoni.
14 Jesua biniꞌaha:
—Xoni,
jokoa onasohirihi ida avakadiꞌaathidanoarari.
Kodibadani hirihi ida.
Ni-kodibadani hiki ida avakadiabiꞌi kohana kanahina-ra onapitavini.
15 Oniaroa,
vaꞌora niꞌaha adani vajoroniki:
—Avavaꞌini ogairiva bana mahija hoariha kanahina-ra avakavaꞌibodivaranihaꞌoadaharavini.
Avakadimahi hirihi ida nahina avavahojaki.
Ipohini kabaꞌi ida nahina avavahojaki,
ni-avakadimahi hiki.
Kanahinaꞌahapikini kabaꞌi ida ijaꞌari,
ni-kidinahina ipohikia biakodiaki ida ijaꞌari gahinaja kaimoni mahi anokhomirikia — niha ada Jesus.
16 Hari.
Oniaroa,
rajomi kavaranihia vaꞌora vara niꞌaꞌianaha:
—Hojaha ada makhira kanahinaꞌahapikiki.
Kidirakhajahi abani bononi ipohiki.
17 Oniaroa,
bikavaꞌibodivaraniꞌihi:
“Ni-arajomaki ida kodirakhajahi bononi kagorani,
onaibavijahaja kaimoni.
Niha oniꞌaꞌaki koda ida kodirakhajahi bononi?”
18 Asia abono-ra niꞌavini:
“Hai oamani,
oogaki ida.
Onathararaki bana ida
kodirakhajahi bononi
kagorani.
Onamonahaꞌianahi bana ida gora naꞌbahaki,
onaibavijahaja kaimoni ida kodirakhajahi bononi,
kodinahina hahavi.
19 Aꞌdiahihi bana ida
kodibadani,
oabono oniꞌahi:
Hovani makhira khaii niki ho!
Ovahojaki ida nahina
ahapini.
Badara ipohiki vani ni-nahina-ra okainamoki.
Oakoirihi,
nahina jahaki-ra onofihi;
ohahi.
Nahina jahaki-ra onofihi;
oꞌavihi jaboni.
Khai oniki bana ho.”
20 Oniaroa,
Deua biniꞌaha:
“Ivaꞌini bajadidiꞌoamanija!
Ikavaꞌibodivaranikaꞌoaki ida kadanahina ahapini.
Hihida joma iabiniki bana i.
Ni-ivahojajanaki bana ida
kadanahina inaibavijahajahakiꞌiki.
Hoariha gahinani hiki bana ida kadanahina.”
21 Hari.
Jesua biananokhomiꞌihi ida rajomi kavaranihi.
Jesus vara vaꞌora niꞌaꞌianaha adani ijaꞌari:
—Vakhanimanira adani ijaꞌari Deu-ra vakavaꞌibodivaranipaꞌitxiriki.
Vaabono vavidorahaki adani vakanahinaꞌahapikira kaimoni.
Deus vaꞌora vara vaniꞌaha:
“Vakanahinaꞌahapikiki
vaabono vavanihaki adani vaꞌora onokiki,
vakanahinarina vaꞌora okahiha.”
Niha ada Deus — vaꞌora niꞌaha ada Jesus.
Hariꞌa avakavaꞌisokoni!
22 Oniaroa,
Jesus vaꞌora niꞌaha adani ipohina:
—Aꞌonira onavaꞌisohiki bana ho.
Hariꞌa avakavaꞌisokonihaꞌoadaha ida ꞌbai avahaki kaimoni-ra avagathivini.
Hariꞌa avakavaꞌisokonihaꞌoadaha ida avakadimakari avakaimahaki-ra avavahojaravini.
23 Avakadimahi hirihi ida avakadiꞌbai.
Ni-avaabononi hirihi ida avakadimakari.
Jahaki ida avakadiꞌbai-ra avanakoꞌdihavini,
makari avavahojavini jaboni.
Avanofivini kabaꞌi ida ꞌbai,
makari hiki,
hariꞌa avavaꞌini-ra nahonariahihiva bana ida makari,
ꞌbai hiki.
Deus aꞌonira noꞌavini hiꞌiki ida avakadimahi;
aꞌonira kaijahitaki jaboni ada.
24 Vada vaꞌora vaniꞌa bana adani kosoro.
ꞌBai-ra vanakoꞌdivini kabaꞌi,
ni-vavaꞌi soko iniki.
Ni-varakhajahaki,
ni-vidoraki ida rakhajahi bononi.
Ni-vanamonahaki ida bavi,
rakhajahi bononi ibavijahani kagorani kaimoni,
kabaꞌi Deus vaꞌora kaijahitaki adani kosoro.
Deus vaꞌora nakaidivaki adani igitha varaboki,
Deus aꞌonira nakaidivavini arafiaki aꞌoni!
25 Avarakavaꞌisokonimanija koda ida avakadimahi-ra avanaꞌoadavini?
Iniani.
Ni-avakaabokaki ida avakadimahi-ra avaranaipohivini.
26 Badani paꞌitxi oamani ida ijaꞌari kidimahi-ra anaipohivini kabadanihi,
kabaꞌi ni-bikaabokaki.
Ni-nahina kaimoni avarakavaꞌisokoniki ida ꞌbai,
makari hiki-ra avakainamovini.
27 Vakavaꞌibodivarani bana ida hogoi movani avijavani.
Ni-bada niki ida movai,
ni-binamonahaki ida makari bikaimahaki kaimoni.
Kaꞌoa hiki hida kodivarani.
Aꞌonira onavaꞌisohivini hiki ada arabo vakaꞌdaꞌdiva Salomão oniki kohana.
Kanahinaꞌahapikiki ada Salomão.
Kaidivaki ida kidimakari,
nokiani jahaki jaboni ida.
Jahani kabaꞌi ida kidimakari nokiani,
jahani nokiani arafiaki ida movai.
28 Deus vania binamonahaja ida hogoi movani nokiani jahaki.
Hidakabaꞌi hojahi ida hogoi,
afokajoma araꞌokhoꞌiki ida,
ijaꞌaria bianahaꞌdiꞌiki ida.
Kaidivarini kabaꞌi ida hogoi,
Deua bikahinanikaki ida.
Deus aꞌonira nakaidivavini arafiaki aꞌoni,
oniani ida bana aꞌonira kakodiavini hija avakadimakari avakainamokia.
Deus aꞌonira kaijahitavini-ra avakajariꞌdarihi.
Hariꞌa avavaꞌini soko iniva!
29 Hariꞌa vakavaꞌibodivaranihaꞌoadahaꞌa bana ida avakadiꞌbai avahaki kaimoni,
nahina aviꞌaviki kaimoni.
Hariꞌa avakavaꞌisokoni!
30 Deu-ra avigarikia vakavaꞌibodivaranihaꞌoadahaki ida vakainamoki.
Avakadiabiꞌi nama hojakia biogaki ida nahina hahavi avakainamoki.
31 Vakavaꞌibodivarani afoꞌimidia bana ida Deua binofiki.
Vavaꞌaha ada Deus aꞌonira vakaꞌdaꞌdivini.
Athi vanaabahahaꞌoadahaha;
aꞌonira kaijahitajahakiha.
Deus kania avavahojaki ida nahina kaidivaki
32 Kodipohi,
hariꞌa bana avavaꞌini soko iniva!
Avakadiabiꞌia khai biniꞌaki ida kidinahina avavakaꞌdaꞌdivini kidiania,
ovaria bivakaꞌdaꞌdivini fori hini.
33 Pavakari vanihaꞌa ida avakadinahina hahavi.
Ijaꞌari vakanahinariki-ra vaꞌora vanoꞌavinihi ida avakadijiniro.
Vanaibavijaha bana ida avanakaidivaki Deus kania nama.
Ni-ihimiki ida avanaibavijahaki.
Boꞌdi abonoa ni-bikaabokaki bianivini,
ni-vaꞌbaꞌba binihimaki jaboni bana.
34 Avakadinahina-ra avanakaidivavini arafiahi;
avakadinahina-ra avakavaꞌibodivaranihaꞌoadahahi.
Deu-ra avanakaidivavini arafiahi;
Deu-ra avakavaꞌibodivaranihaꞌoadahahi — vaꞌora niꞌaha ada Jesus.
Vanokha bana ida avakadikaꞌdaꞌdi joina
35 Hari.
Rajomi kavaranihia kavaraniꞌianaha ada Jesus:
—Honai abonoa vanokhaha ada vakadikaꞌdaꞌdi akarai kaihinikani kania joina.
Vakadimakari vakaimahaꞌiki,
vakadilamparina avanahaꞌdiꞌiki,
joina vanokhavini.
36 Hari.
Hihada honai abono fori vihiꞌa bana.
Avakadikaꞌdaꞌdi joina-ra vanokhaꞌa bana!
Vakadikaꞌdaꞌdi joina vani bakatha-ra too too kaniꞌaꞌaha,
kidihonai abono jorakia avakarabikhaiꞌihi ida bakatha.
37 Oniaroa,
vakadikaꞌdaꞌdi vaꞌora karagaꞌaha adani honai abono vanokina,
joina vanokhavini,
jahaki ida vakadimoni.
Kaꞌoa hiki hida aꞌonira oniꞌavini hiki.
Vakadikaꞌdaꞌdia binaibavijahaki bana ida ibavi vaviꞌbaiki ibavini kaimoni,
vavithiriamaꞌona vaꞌora honariaha,
vaꞌora koꞌbaihaꞌaha.
38 Joiki vahabini bana ada joma ꞌboꞌda hini.
Joiki vahabini bana ada joma jararini.
Joina vanokhavini vani vaꞌora karagaha;
jahaki ida vakadimoni bana — vaꞌora niꞌaha ada Jesus.
39 Hari.
Jesus rajomi kavaranihi hoariha-ra vara vaniꞌaꞌianaha:
—Ni-ijaꞌaria avigaki ida daji anahoroava abono khana kamahini.
Gora kakaꞌdaꞌdinia biogaja vaha ida mahi daji anahoroava abono khana,
ni-gorana oꞌoina bivaꞌahaki vaha,
ni-bivaꞌahaki ida kidinahina ahoroani.
40 Hovani ijaꞌari hahavi vakadiꞌaajo ho.
Onivani fori hija ida ojoina kamahini.
Ni-avarigaki ida mahi hana hini ojoina kaimoni.
Oniani ida aꞌonira ohonariavini hija,
hora vanaviahanokhahahaꞌoadaha bana!
Kaꞌdaꞌdi kahonai abono varani vihina
41 Hari.
Oniaroa,
Pedroa binanaꞌdohiꞌaha ada Jesus:
—Aajo,
akadimoni kaꞌoa mani ida rajomi kavaranihi haria vara iniꞌavini hiꞌiki?
Ijaꞌari hahavi vakadimoni mani koda ida kadavarani?
42 Oniaroa,
Jesua bigathaniꞌihi ida kidinaꞌdohi:
—Aꞌonivani honai abono jahaki fori vihiꞌa bana!
Hovani honai abono kakaꞌdaꞌdi fori ohiki ho.
Vara aꞌonira oniꞌavini hiki bana ada honai abono ogahaki,
kidikaꞌdaꞌdi athi-ra naabaki ada.
Kidikaꞌdaꞌdia bihonariaha:
“Iakadavaꞌa bana hida
ogorana.
Vaꞌora noꞌa bana adani kodihonai abono vahoariha vakadiꞌbaia mahi hahavi.”
Niha ada kaꞌdaꞌdi.
Ajihiꞌaha.
43 Hari.
Kaꞌdaꞌdi athi-ra naabahahaꞌoadahaha;
kaꞌdaꞌdi joina kamahini,
jahaki ada honai abono kidimoni hina.
44 Kaꞌoa hiki hida kodivarani.
Kaꞌdaꞌdia biniꞌaki bana ada kidihonai abono:
“Inaabajahakiꞌiki ida ira
ohonariavini hiꞌiki,
oniani ida kodinahina
hahavi,
ogorana,
arabo hiki-ra
iakadavaꞌavini maina ira ohonariavini hija.”
Niha ada kaꞌdaꞌdi.
Onivani fori hija bana hida vara aꞌonira oniꞌavini hiki jaboni.
45 Hariꞌa bana honai abono jahariki fori vihiꞌa!
Ni-kidikaꞌdaꞌdi athi-ra naabaki.
Abono-ra niꞌaha ada honai abono:
“Agathinahaki ada
kodikaꞌdaꞌdi.”
Niha ada honai abono.
Oniani ida honai abono vahoariha-ra vaꞌora dafiabakhiavini hija.
Gamo,
makhira vihiki adani honai abono vaꞌora najaharihariꞌiki.
Koꞌbainofiki ada honai abono,
kakavinofiki jaboni ada,
kahanobakhiaki ada.
46 Oniaroa,
joiꞌaha ada kaꞌdaꞌdi.
Ni-kidihonai abonoa binokhajanaki joina,
ni-biogaki ida joina kamahini.
Hari.
Jaharikia kaꞌdaꞌdia biarakhaꞌaha ada honai abono,
binaimaꞌbanakarahoki bana ada.
Bihonariaha ada honai abono Ibavi Jaharikaꞌoakia okhana,
Deus athi-ra vanaabariki vakadiania.
47 Asia vara niha ada Jesus:
—Hari.
Honai abonoa biogavini kabaꞌi ida kidikaꞌdaꞌdi binofiki,
ni-bada biniꞌaki.
Bikajoniki ida bada biniꞌavini,
oniani ida kidikaꞌdaꞌdi xikotxia bidafiaꞌahapikivini hija.
48 Hari.
Honai abono hoariha ni-biogajahakiki ida kidikaꞌdaꞌdi binofiki.
Ovari hikia bada biniꞌaꞌiki ida kidikaꞌdaꞌdi bivajahariki.
Kidikaꞌdaꞌdia bidafiaki ada honai abono jaboni.
Ni-arafiaki ida bidafiavini xikotxia.
Kajoniahaki fori hiriha ada.
Onivani fori hija ida Deus kahonai abono Deus kanahina-ra akadavaꞌavini.
Deua biarakhaki ida kidinahina ipohiki kidihonai abonoa biakadavaꞌaja kaimoni.
Deua binokhaki ida kidihonai abono kidinahina ipohiki anaꞌbaꞌdini hina.
Deus kidinahina ipohiki-ra arakhahi;
kidinahina ipohini aꞌbaꞌdini arafiaki-ra nokhaha joiribanini kidiania.
Jesu-ra vanofiki, Jesu-ra vanofiriki varani vihina hida
49 Hari.
Asia vara niha ada Jesus:
—Hora rakhaki Jahari kabadani-ra onihimavini,
siho nahina jahariki-ra akanahaꞌdiki fori ohina.
Onofiki ida jorakia nahina jahariki-ra oanahaꞌdivini hari hiꞌini.
50 Jahari kabadani-ra onihimavini kamahini oabinina,
oimana ꞌbanakarahoki bana ho.
Hari hini kamahini oimana ꞌbanani radahani-ra onofihi.
51 Asia vara niꞌaha ada Jesus:
—Hariꞌa vakavaꞌibodivarani:
Jesus kaikahina mani ida ijaꞌari vaabono vakanajahamisikhamavini hija.
Okhaꞌina mani ida hora vakajariꞌdaki hora vakajariꞌdariki-ra vaꞌora vanajahariharivini hija.
52 Ijaꞌari vaipohina saꞌai kahoarani vihiki adani gora bodinia vahojaki.
Ijaꞌari avahoarabakosiki,
ijaꞌari viꞌbamiki khama vaabono vaakajaꞌoriakhamaki.
53 Isai kaabiꞌi,
kaamia vihiki vaꞌora vanajaharihariki bana adani vakadisai.
Isai vaꞌora vanajahariki bana adani vakadiabiꞌi,
vakadiamia.
Isai kaamia vaꞌora vanajaharihariki adani gamo isani vakadisai.
Gamo isani vaꞌora vanajaharihariki adani vakadiamia.
Gamo kamasodini vaꞌora vanajaharihariki adani vakadiꞌaboni gamo.
Vakadiꞌaboni vaꞌora vanajaharihariki adani vakadimasodini.
Hora vakajariꞌdaki vaꞌora vavajahariki bana adani hora vanofijahakiki — vaꞌora niꞌaha ada Jesus.
Nama rajomi kavaranihi
54 Hari.
Jesus vaꞌora niꞌaha adani ijaꞌari vajoroniki.
—Avanokiha ada bahi pororona,
avakhanihi:
“Kharariki bana ada bahi.”
“Afaki bana ida hidakabaꞌi.”
Avakhanihi.
Afaꞌoamanija bana ida mahi.
56 Avanokiki ida nama rajomi,
avarigajoraha ada bahi,
safini hiki kamahina.
Avanokivini kabaꞌi hida kodibadani,
ni-avarigapaꞌitxiki ida nahina namithaki kaimoni.
Ogahai abono avihini-ra avakahiꞌbadaraki aꞌoni.
Ianariaka bana ida ira anaathidanoarariki
57 Hari.
Jesua biananokhomiꞌihi ida kidivarani.
Vaꞌora niꞌaha:
—Nahina mani ida avaabononi avanasohivini-ra avarigaravini hija?
Vakavaꞌibodivaranihanana bana.
58 Ijaꞌari ira anaathidanoarariki badani jaharikia ikabadaninia,
inasohijoraki bana ida avakadivarani.
Jahaki ida hojai ihamahiki-ra ianariakajorakivini.
Jahari kabadania ikabadanihi;
jorakia inasohi.
Ijaꞌari nasohiva abono kania ikaikahini viahania,
inasohi bana ida kadavarani.
Ianariaka bana ada ira anaathidanoarariki.
Ianariakariha;
ira osaki bana ada ijaꞌari nasohiva abono kania.
Ijaꞌari nasohiva abono ira arakhaki bana i sorara vasaꞌa kabodinia.
Sorara ira obaiki bana i cadeia.
Ijaꞌari nasohiva abono ira honariaki bana kadabadani jahariki-ra inaabosivini jiniro karahoa.
59 Kaꞌoa hiki hida kodivarani.
Inaabosihahaviravini oadani ida jiniro,
ni-cadeia iokhaonaniki bana.
Jahari kabadania ikabadanihi;
jorakia bana Deu-ra anariakaꞌa mahija jaharikia ira arakharavini — vaꞌora niꞌaha ada Jesus.