Jesus vaꞌora kaꞌojomoꞌiki adani kidipohi
5
1-2 Hari.
Jesus vaꞌora nokiꞌaha adani ijaꞌari vaipohiki.
Oniania,
ogaimoriꞌaha arabo namahikia vithimaꞌoꞌaha,
kidipohi-ra vaꞌora kaꞌojomoꞌira kaimoni.
Vajoroniꞌaha kidiania vavithiribanaoniꞌaha.
Jesus vaꞌora niꞌaha:
3 —Deua bikajoamoraki ida ijaꞌari abononi navaꞌibodivaraniki:
“Deus hora kajoamorarihi;
ni-nahina-ra okaabokaki.”
Nihi ida ijaꞌari.
Nini vani Deua bivakaꞌdaꞌdiki ida ijaꞌari.
4 Deua bikajoamoraki ida ijaꞌari abononi navaꞌibodivaraniki:
“Jahari kabadania okabadanina mani hida
hora naasaraja.”
Nihi ida ijaꞌari.
Deus vania binavaꞌijahaja bana ida ijaꞌari.
5 Deua bikajoamoraki ida ijaꞌari abononi navaꞌibodivaraniki:
“Jokoa hovani kaꞌoa
oabono ovakaꞌdaꞌdirihi.
Deus hora vakaꞌdaꞌdivini-ra onofiki ho.”
Nihi ida ijaꞌari.
Nini vani,
nahina hahavi araboa hojaki-ra vakaꞌdaꞌdiki ida ijaꞌari.
6 Deua bikajoamoraki ida ijaꞌari abononi navaꞌibodivaraniki:
“Onofiꞌoamanija ida
badani Deua binofiki
bada oniꞌavini.”
Nihi ida ijaꞌari.
Nini vani Deua bikajoamoraki hida ijaꞌari,
bada biniꞌaja kaimoni hida badani Deua binofiki.
7 Deua bikajoamoraki ida ijaꞌari abononi navaꞌibodivaraniki:
“Onofiki ida hoariha-ra
ovaꞌadivini,
ni-onamakhaniki.”
Nihi ida ijaꞌari.
Nini vani Deua bivaꞌadija ida ijaꞌari.
8 Deua bikajoamoraki ida ijaꞌari abononi navaꞌibodivaraniki:
“Ni-onofipaꞌitxiki ida Jahari kahojaia okahojaina.
Deus kahojai kaꞌoa vani ida onofija.”
Nihi ida ijaꞌari.
Nini vani binokira bana ada Deus.
9 Deua bikajoamoraki ida ijaꞌari abononi navaꞌibodivaraniki:
“Oanariakaki ida hoariha ihamahiki.”
Nihi ida ijaꞌari.
Nini vani ida ijaꞌari kahojai,
Deus kahojai fori hija,
oniani ida kidisaia Deus ijaꞌari-ra naonivini hija.
10 Deua bikajoamoraki ida ijaꞌari abononi navaꞌibodivaraniki:
“Hora vanajaharihariki adani,
kabaꞌi bada oniꞌaki ida
badani Deus hora honariavini hiꞌiki.”
Nihi ida ijaꞌari.
Nini vani Deua bivakaꞌdaꞌdiki ida ijaꞌari — vaꞌora niꞌaha ada Jesus.
11 Vara niꞌianaha ada Jesus:
—Kodipohi avihini mani ida vahoariha onii jaharikia aꞌonira vaniꞌavini hija,
aꞌonira vanajahariharivini hija jaboni,
korijanahia vara vavaniꞌaki bana ida varani avihini jaboni.
Hariꞌa avavaꞌini soko iniva bana.
Deus aꞌonira kajoamoraki bana aꞌoni.
12 Aꞌonira vanajahariharivini kabaꞌi,
khai vakhani bana.
Deua binaibavijahaki ida kidijaꞌari vajaharihariki vakadimoni kidinahina jahaki kidiania,
vaꞌora naabosira kaimoni.
Onivani fori vihiki jaboni adani Deus athi namoniva abono kohana.
Mahi ꞌboꞌdakari vajaharihariꞌiki jaboni adani — vaꞌora niꞌaha ada Jesus.
Jokira karajomihi varani hini
13 Hari.
Jesus vaꞌora niꞌaha adani kidipohi:
—Jokira fori avihiki aꞌoni.
Avakajokirahi ida baimana;
ni-ꞌbaxaki.
Hojai jahakia avakahojaihi;
ijaꞌari vahoariha hojai jaharikia vakahojaiki-ra avanadabahi.
Avaabononi avakavaꞌigairi bana!
Nahina binajaharihi ida jokira;
ni-ponini jahajanaki.
Hokahikaꞌoaki ida jokira jahajanariki ijaꞌari vaadahakia vakadaꞌahaꞌahaꞌiki ida.
Aꞌonivani jaboni,
nahina bana binajahariki bana ida avakadihojai;
ni-avajahajanaki jaboni.
14 Lamparina fori avihiki aꞌoni.
Ahaꞌdiki ida lamparina,
ni-bakibakini kania vahojaki adani ijaꞌari.
Vagaki fori hihi ida avakadihojai jahaki;
Deus kahagihi-ra anavagahi ijaꞌari hahavi vakadimoni.
Hari.
Sidaji arabo namahiki namania hojaki fori avihiki aꞌoni.
Ahojariki ida sidaji.
Ahojariki jaboni ida avakadihojai,
ijaꞌari hahavia vanokiki ida.
15 Varaja akaasiaki kabodinia ahojaki kaimoni hirihi ida lamparina ahaꞌdiki.
Anaibavihi ida lamparina ahaꞌdiki nama,
ijaꞌari gora bodinia vahojaki-ra navagaja kaimoni.
16 Lamparina vagani fori hiva ida avakadihojai jahaki.
Onofiki ida ijaꞌari vahoariha avakadihojai jahaki-ra vanokivini.
Avakadihojai jahaki-ra vanokiha;
khai vaniꞌaha ada avakadiabiꞌi nama hojaki — vaꞌora niꞌaha ada Jesus.
Deus kavaꞌisohihi jiriki varani hini
17 Jesus vaꞌora niꞌaha:
—Hariꞌa avaabononi vaniꞌa bana:
“Khaꞌaha ada Jesus,
binihimaja kaimoni ida Deus kavaꞌisohihi jiriki
Moisé-ra navaꞌisohiꞌboꞌdavini hiꞌiki.
Binihimaꞌiki jaboni ida ojomoꞌihi kavaranihi Deus athi namoniva abono
vaꞌora navaꞌisohiꞌboꞌdavini hiꞌiki adani akadijaꞌari avikhananavaki.”
Hariꞌa vakavaꞌibodivarani hida athii-ra avanaabajanaravini.
Onihimavini kaimoni hirihi ida hora rakhaja hida.
Hora rakhaki ida ijaꞌari-ra vaꞌora onavaꞌisohijahakivini Deus kavaꞌisohihi jiriki nahina hini ida binofiki vakadiania.
18 Vakavaꞌihoki bana hida kodivarani.
Nama,
arabo hiki hojani oadani,
ni-ihimirihi ida Deus kavaꞌisohihi,
ni-athi pitani paꞌitxi hoarani Deua biniꞌaki avisonirihi,
namithahahaviki bana ida varani Deua biniꞌaki.
Namithahahaviki bana ida varani Deua bivavaꞌisohihijoraꞌiki,
nama,
arabo hiki ihimini viahania.
19 Ijaꞌaria bikajoniki ida Deus kavaꞌisohihi jiriki pitani paꞌitxi,
vaꞌora kaꞌojomoꞌivini hiki jaboni adani vahoariha Deus athi-ra vakajoniki,
Deus ijaꞌari-ra vakaꞌdaꞌdivini kamahini ni-Deua bivaꞌahaki ida ijaꞌari vahoariha-ra vaꞌora vakaꞌdaꞌdivini.
Ijaꞌaria binaabahi ida Deus kavaꞌisohihi jiriki,
vaꞌora kaꞌojomoꞌivini hiki jaboni adani vahoariha vanaabavinia,
Deus ijaꞌari-ra vakaꞌdaꞌdivini kamahini Deua bihonariaki bana ida ijaꞌari vahoariha-ra vaꞌora vakaꞌdaꞌdivini.
20 Aꞌonira onavaꞌisohivini judeus kaijaꞌari vakaꞌojomoꞌiva abono,
farisio khama jaboni vaabono vara vavaniꞌaꞌbadaraki:
“Jahaki ida akadihojai.
Anaabajahakiki ida Deus kavaꞌisohihi jiriki.”
Vakhaniꞌbadarana.
Ni-vanaabajahakiki ida Deus vaꞌora honariavini hiki.
Vaꞌoaniaro fori avihihi;
ni-Deua khai biniꞌaki bana ida kaꞌdaꞌdi avihini kidiania.
Ijaꞌari vaꞌini jokojokoni varani hini
21-22 Asia vara niꞌaha ada Jesus:
—Avakamithabakhiaꞌiki ida Deus kavaꞌisohihi jiriki avakadijaꞌari avikhananavaki-ra vaꞌora noꞌavini hiꞌiki:
“Hariꞌa kaabini.
Ijaꞌaria binaabinihi ida hoariha,
ijaꞌari nasohiva abono viaha vahoariha avisahi ida ijaꞌari.
Nasohiva abonoa bihonariaki kaabiniki abinini kaꞌdaꞌdi kaabosini hina.”
Asohiki ida Deua bivavaꞌisohihiꞌboꞌdaki athini.
Hovani aꞌonira onavaꞌisohijahakiki ho bana Deua binofikia.
Iigamini-ra ikaihamahihi;
Deua bihonariaki ida Jahari kabadani abosini-ra igathanivini.
Ijaꞌaria biniꞌahi ida igamini:
“Ijahariꞌoamanija.”
Deua bihonariahi bana ida ijaꞌari Jahari kabadani abosini-ra gathanija kaimoni.
Ijaꞌaria biniꞌahi ida igamini:
“Ivaꞌihariki fori ihiki i,
ni-nahina-ra iogarihi.”
Deua bihonariaki vahabini bana ida ijaꞌari Ibavi Jaharikaꞌoaki siho kabodinia okhani.
23-24 Deu-ra khai aniꞌavini kagorania ihojani vani ikavaꞌihokiki ida iigamini ira kajaꞌoriavini,
hariꞌa bana Deu-ra kanavaꞌiga kaho.
Inakoꞌdiꞌimidia ada iigamini mahija ianariakavini.
Naothinia ajoiꞌiana bana Deu-ra khai aniꞌavini kagorania mahija Deu-ra ikanavaꞌigavini.
25 Ijaꞌari ira anaathidanoarariki badani asohirikia ikabadaninia.
Inasohijoraki bana ida avakadivarani.
Ijaꞌari vakadihojai hiki ida ihamahiki-ra anariakajorakivini.
Bianariakahi;
ni-pohimajaki.
Bianariakarihi;
ijaꞌari nasohiva abonoa jaharikia biarakhaꞌihi.
Ijaꞌari nasohiva abono ira arakhaki bana i sorara vasaꞌa kabodinia.
Sorara ira obaiki bana i cadeia.
Ijaꞌari nasohiva abono ira honariaki bana kadabadani asohiriki-ra inaabosivini jiniro karahoa.
26 Kaꞌoa hiki hida kodivarani.
Inaabosihahaviravini oadani ida jiniro,
ni-cadeia iokhaonaniki bana.
Jahari kabadania ikabadanihi;
jorakia bana Deu-ra anariakaꞌa mahija jaharikia ira arakharavini — vaꞌora niꞌaha ada Jesus.
Jahari kahojai varani hini hida
27 Vara niꞌianaha ada Jesus:
—Avarigaki ida Deus kavaꞌisohihi jiriki:
“Hariꞌa makhira biviꞌomava ida hoariha kagamo.
Hariꞌa gamoa biviꞌomava ada hoariha kamakhira.
Jahari kabadani ida hojana hiki.”
Asohiki ida Deua bivavaꞌisohihiꞌboꞌdaki athini.
28 Hovani aꞌonira onavaꞌisohijahakiki bana Deua binofikia.
Makhira vada biniꞌahi ida gamo kidigamo hiriki,
biviꞌomavini binofiki ida,
ovari vaꞌi bodinia biviꞌomaki fori hiki ida gamo.
29 Ijaꞌaria binokiki ida Jahari kabadani,
binofiki ida bada biniꞌavini,
bianivini jahaki ida nokhoni ꞌbaꞌdani aniaja,
binahokahiꞌihi ida nokhoni ꞌbaꞌdani bada biniꞌaria kaimoni ida Jahari kabadani.
Jahari kabadani-ra bada niꞌahi;
Ibavi Jaharikaꞌoaki kania hokahihi.
Jahariki ida abononi hahavi Ibavi Jaharikaꞌoaki kania hokahini.
Jahaki ida nokhoni ꞌbaꞌdani hoaranini kabaꞌi,
Deus Ibavi Jahakaꞌoakia okhani.
30 Ijaꞌaria binofihi ida Jahari kabadani-ra bada niꞌavini,
biakavaꞌboavini kajahaki ida saꞌani aniaja kahokahini,
bada biniꞌaria kaimoni ida Jahari kabadani.
Jahariki ida abononi hahavi Ibavi Jaharikaꞌoaki kania okhani.
Jahaki ida saꞌani kahoaranini kabaꞌi Deus Ibavi Jahakaꞌoaki okhani.
Makhira kidigamo-ra nahojahavini varani hini
31-32 Hari.
Vara niꞌiana ada Jesus:
—Hojaki ida Deus kavaꞌisohihi jiriki hoariha:
“Makhira binofiki ida kidigamo-ra nahojahavini,
binahojahavini viahania
kidigamo-ra noꞌavini hiva ida papira jiriki
kidigamo hijanaria kaimoni.”
Asohiki ida Deua bivavaꞌisohihiꞌboꞌdaꞌiki athini.
Hovani aꞌonira onavaꞌisohijahakiki bana ho Deua binofikia.
Gamo makhira hoariha-ra viꞌomaravini kabaꞌi kidimakhira binahojahahi,
gamo hoariha-ra anakarara kaimoni,
Jahari kahojaia kahojaiki ada makhira.
Makhira hoariha bianakaraꞌihi ida gamo kidimakhira binahojahaꞌiki,
jaharihi ida hojani hiꞌiki.
Jaharihi jaboni ida makhira anakarani hiꞌiki kahojai.
Ijaꞌari kidivarani-ra kavaꞌipahinivini varani hini
33-34 Asia vara niꞌaha ada Jesus:
—Avarigaki ida Deus kavaꞌisohihi jiriki avakadijaꞌari avikhananavaki-ra vaꞌora noꞌavini hiꞌiki:
“Deu-ra vara iniꞌavini hiki ida badani bada iniꞌaja kaimoni kidimoni,
bada iniꞌa bana,
hariꞌa inavaꞌiponiꞌimarini bana.”
Asohiki ida Deua bivavaꞌisohihiꞌboꞌdaki athini.
Hovani aꞌonira onavaꞌisohijahakiki bana ho Deua binofikia.
Ijaꞌari-ra inavaꞌisohivini hiki ida badani bada iniꞌaki kaimoni,
bada iniꞌa.
Hariꞌa Deus onina-ra dioni,
hoariha biogaja kaimoni ida iathini kaꞌoa hini.
Hariꞌa nama onini-ra dioni jaboni biogaja kaimoni ida iathini kaꞌoa hini.
Deus kavithi ibavini ida nama.
35 Hariꞌa arabo onini-ra dioni jaboni hoariha biogaja kaimoni ida iathini kaꞌoa hini.
Deus ꞌdama kakatirani ida arabo.
Hariꞌa Jerusalém sidaji onini-ra dioni,
hoariha biogaja kaimoni ida iathini kaꞌoa hini.
Ijaꞌari hahavi vakadikaꞌdaꞌdi danoki kasidaji ida Jerusalém.
36 Hoariha-ra inavaꞌisohivini hiki ida varani bada iniꞌaꞌiki kidimoni,
hariꞌa iꞌdaꞌdini onini-ra dioni,
hoariha biogaja kaimoni ida kaꞌoa hini kadavarani.
Ni-ikaabokaki ida ikaꞌdaꞌdini kaafani kahoarani-ra ikanavaforivini,
ni-ikanapororovini,
ni-ikaabokaki ida iabononi-ra ivakaꞌdaꞌdivini.
37 Hoariha-ra inavaꞌisohivini hiki ida badani inamonahaki,
inamonahaꞌa bana.
Hariꞌa inavaꞌiponiꞌimarini bana ida hoariha.
Jahari kavarani ida hoariha-ra inavaꞌiponiꞌimarinivini kavaranihi — vaꞌora niꞌaha ada Jesus.
Ijaꞌari kaꞌdaꞌdini-ra kanaabosivini varani hini
38-39 Asia vara niha ada Jesus:
—Avakadiꞌojomoꞌihi abono aꞌonira vanavaꞌisohibakhiavini hiki ida Deus kavaꞌisohihi jiriki:
“Ijaꞌaria bianahahahi ida hoariha nokhoni ꞌbaꞌdani,
jakaho binaꞌdaꞌdiabosiva bianahahavini jaboni ida nokhoni ꞌbaꞌdani.
Ijaꞌaria bianahahahi ida hoariha inoni,
jakaho binaꞌdaꞌdiabosiva bianahahavini jaboni ida inoni.”
Asohiki ida Deua bivavaꞌisohihiꞌboꞌdaki athini.
Hovani aꞌonira onavaꞌisohijahakiki bana ho Deua binofikia.
Ijaꞌari hojai jaharikia vakahojaiki avakadiania,
hariꞌa vanaꞌdaꞌdiabosi bana.
Ijaꞌari iꞌbaꞌdani-ra kapatahi,
hariꞌa ianaꞌdaꞌdiabosi bana.
Jahaki ida iroiribanini pitanija bikapataja kaimoni jaboni.
40 Ijaꞌari ira najahariharikia binofiki ida ijaꞌari nasohiva abono ira honariavini kadamakari-ra iarakhavini,
ivaꞌaha bana jaboni ida kadamakari hoariha-ra saarivini.
41 Sorara ira gathihi daina ikaibaꞌija kaimoni kidimoni napaja hirikia.
Ikajoamoravini ikaibaꞌi bana ida daina napaja kidimoni.
42 Ijaꞌaria bikanikhariahi ida kadanahina,
inoꞌa bana.
Ijaꞌaria birihavini binofihi ida kadanahina,
ikanarihaivinihi bana — vaꞌora niꞌaha ada Jesus.
Ijaꞌari kidivaꞌahi hiriki-ra nofijahakivini varani hini
43-44 Asia vara niha ada Jesus:
—Avakadiꞌojomoꞌihi abono aꞌonira vanavaꞌisohibakhiavini hiki ida Deus kavaꞌisohihi jiriki:
“Vaꞌora nakaidiva bana adani kadavaꞌahi kaꞌoa.
Hariꞌa vaꞌora nakaidiva adani vaimajahahiriki.”
Vakhaniha.
Hovani aꞌonira onavaꞌisohijahakiki bana ho Deua binofikia.
Vaꞌora nakaidiva bana adani aꞌonira vakaimajahariki.
Deu-ra vakanikharia mahija aꞌonira vanajaharihariki-ra vaꞌora nakaidivavini.
45 Deus vaꞌora kajoamoraki adani ijaꞌari hojai jahakia vakahojaiki,
ijaꞌari hojai jaharikia vakahojaiki vihiki.
Deua binavagaki ada safini ijaꞌari hojai jahakia vakahojaiki,
ijaꞌari hojai jaharikia vakahojaiki vanamana.
Deua bihonariaki ada bahi ijaꞌari hahavi vakadimoni hina,
ijaꞌari kahojai jahaki,
ijaꞌari kahojai jahariki vakadimoni jaboni ada bahi.
Vahoariha vaꞌora avakajoamoraki aꞌoni,
oniani ida kodiabiꞌi kaisai aꞌonira nihaja.
Deus vaꞌora kajoamorahahaviki adani ijaꞌari vajahaki vajahariki.
Deus kahojaia vakahojaiꞌa bana.
46 Ijaꞌari Deu-ra avigariki vaꞌora vanakaidivavini adani nofini vihiki.
Ijaꞌari hahavi hojani hiki ida nofini hiki-ra nakaidivavini.
Avakadihojai jaboni ida vaꞌora avanakaidivaki adani aꞌonira vanofiki.
Vaꞌora nakaidiva jaboni bana adani aꞌonira vanofiriki.
Vaꞌora avanakaidivariha;
ni-Deus avajahani arafiani-ra kahiki.
Ni-Deus avakadihojai-ra naabosiki kidinahina jahakia.
47 Avakadihojai hiki vaꞌora avanavaravaraki adani avakadivaꞌahi.
Ijaꞌari Deu-ra avigariki jaboni vaꞌora vanavaravaraki adani nofini vihiki.
Vaꞌora vanavaravara jaboni bana adani aꞌonira vanofiriki.
Vaꞌora avanavaravarariha adani aꞌonira vanofiriki;
ni-Deus avakadihojai jahani arafiani-ra kahiki.
Ni-Deus avakadihojai-ra naabosiki kidinahina jahakia.
48 Deua binofiki ida ijaꞌari hahavi-ra vaꞌora avanakaidivavini.
Nimania ida kidihojai jahaki.
Kidihojai jahakaꞌoakia vakahojaiꞌa bana.
Jahakaꞌoaki ada avakadiabiꞌi nama hojaki.
Ovari fori vihiꞌa bana — vaꞌora niꞌaha ada Jesus.