2 Hari.

Farisio vaipohirikia vanokiꞌihi ida trigo bononi-ra varisivini,

vaniꞌaha ada Jesus:

—Deus kavaꞌisohihi jiriki ijaꞌari-ra honariavini hiki ijaꞌari bada nirihi aakoirina kamahini.

Nahina mani ida Deus kavaꞌisohihi jiriki-ra avanaabaravini hija?

3 Jesua bigathaniꞌihi ida vaathi:

—Aꞌonira vara oniꞌavini hiki ada akadijaꞌari avikhananavaki Davi kohana.

Deus athi kapapirania hojaki ida Davi varani hina.

ꞌBoꞌdakari vavaiꞌamiha adani Davi kohana kidipohi khama.

4 Deu-ra khai vaniꞌavini kagorani kania avikhajakosiꞌaha adani Davi.

Hari.

Gora bodinia kahojaꞌiki ida pão sasidotxi kaꞌoa vakahaki kaimoni.

Sasidotxi Deu-ra kanavaꞌigaꞌimidiavini kihiki ida pão.

Sasidotxi vaoniki adani Deus kabadani abono.

Deus kavaꞌisohihi jirikia biniꞌaha:

5 Hovani ijaꞌari hahavi vakadiꞌaajo ho.

Hovani kaꞌoa oogaki ida badani hana hini jahaki ijaꞌaria bada biniꞌaki kaimoni aakoirina kamahini — vaꞌora niꞌaha ada Jesus.

6 Hari.

Avakoirina kamahini hoariha okhaꞌianaha ada Jesus judeus kaijaꞌari Deu-ra vara vaniꞌavini kagorania.

Okhajakosiꞌaha vaꞌora kaꞌojomoꞌiꞌaha adani ijaꞌari vajoroniki.

Vahararana hojaha ada makhira saꞌa kakaꞌaniajani akasakarabakosiki.

7 Vahojaki jaboni adani judeus kaijaꞌari vakaꞌojomoꞌiva abono vaipohiriki farisio vaipohiriki khama.

Vavajaharihi ida Jesus ijaꞌari kavamoniki-ra anaihotavini avakoirina kamahini,

oniani ida Jesu-ra vada vaniꞌavini hihi.

Bianaihotaha;

Jesu-ra vakaihamahiꞌaha.

Vanofiki ida Jesu-ra avanaathidanoararivini:

—Inaabariki ida Deus kavaꞌisohihi jiriki.

Ni-bivaꞌahaki ida ijaꞌari kavamoniki-ra ianaihotavini aakoirina kamahini.

8 Jesua biogaꞌiki ida vakavaꞌibodivaranivini.

Oniania,

biniꞌaha ada makhira saꞌa akasakarabakosiki:

—Gaaꞌa onia!

Gaamananiꞌaha ada makhira,

Jesus kania khamiꞌaha.

9 Jesus vaꞌora niꞌaha adani farisio:

—Aꞌonira onanaꞌdohiki bana ho.

Hana hini badani koda ida Deus kavaꞌisohihi jiriki haria vaꞌahavini hija aakoirina kamahini?

Bivaꞌahamanija koda ida hoariha-ra aakodiavini?

Haꞌa.

Bivaꞌahamanija koda ida hoariha-ra avaꞌadiravini?

Iniani.

Bivaꞌahamanija koda ida hoariha-ra aakavaꞌijoavini?

Haꞌa.

Bivaꞌahamanija koda ida hoariha abinini?

Iniani.

Hana hini badani ida Deus kavaꞌisohihi jiriki bihonariaja aakoirina kamahini bada aniꞌavini?

— vaꞌora niꞌaha ada Jesus.

10 Oniaroa,

vaꞌora vada niꞌaribaniꞌaha ada Jesus.

Makhira-ra niꞌaha:

—Isaꞌani-ra akanaviraꞌa!

Saꞌa-ra akanaviraꞌaha,

akaihotaꞌihi ida saꞌa jorakia.

11 Oniaroa,

vaihamahikarahoꞌaha adani farisio.

Jesus makhira-ra anaihotavini mani ida vavaꞌi najokojokokaꞌoani hija.

Vaabono vara vakaniꞌakhamaꞌaha:

—Ni-jahapaꞌitxiki ida ijaꞌari kavamoniki aihotani kabadanihia kabadanina aakoirina kamahini.

Niha aniꞌaꞌaki koda ada Jesus?

Abinina jahaki ada — vakhaniꞌaha.

12 Hari.

Oniaroa,

ajihiꞌaha ada Jesus.

Arabo namahikia ogaimoriꞌaha.

Joma oadani hojaꞌaha Deu-ra vara niꞌavini.

13 Kaꞌafokajomani vani vagavagani vaꞌora baranahaꞌaha adani kidipohi kidiania vikhana.

Vaꞌora nagathogathoꞌiki adani 12 makhira vaipohina,

vaꞌora naonivini athi avavaadahaoniva abono.

14-16 Hiꞌadani 12 makhira vaonina Simão,

André,

Tiago,

João,

Filipe,

Bartolomeu,

Mateus,

Tomé,

Tiago hoariha,

Simão o nacionalista,

Judas Iscariotes vihiki.

Judas Iscariotes vaꞌora kakodiaki bana adani Jesu-ra vanaabinivini-ra vanofiki.

Jesus Simão-ra noꞌavini onii hoariha Pedroa,

igamina ada André.

Tiago hoariha Alfeu kaisai.

17 Hari.

Jesus vaꞌora nagathogathoꞌaha adani athi avavaadahaoniva abono.

Naothinia avikharafoniꞌaha.

Jesus ipohina vahoariha vakadiania vakaikahiꞌaha ibavi sohiriamaꞌoki kania vahojaki adani.

Ijaꞌari vaipohiki vajoroniꞌiki vakadiania.

Judéia kaaraboni,

Jerusalém sidaji hiki kaijaꞌarini adani.

Tiro sidaji,

Sidom sidaji hiki kaijaꞌarini adani vahoariha.

ꞌDako karaho vadinia hojaki ida sidaji ꞌbamiki.

18 Jesus kania vajoroniꞌaha adani ijaꞌari vaipohiki,

mitha vaniꞌaja kaimoni ida kidivarani.

Vakavamonikia vanofiki ida Jesus vaꞌora anaihotavini.

Vikhaꞌaha adani ijaꞌari vakabajadiki jaboni.

Bajadi vaꞌora najahariharibakhiaki adani.

Jesus vani ada vaꞌora anaihotaꞌaha.

19 Vakavamoniki hahavia vanofiki ida Jesu-ra vakadasavini avaihotara kaimoni.

Jesus kabadani danoni mani ida ijaꞌari vakavamoniki-ra vaꞌora anaihotahahavivini hija.

20 Hari.

Jesus vada vaꞌora niꞌaha adani ipohina,

vaꞌora niꞌaha:

—Aꞌonivani avakanahinariki aꞌoni.

Deus avakadikaꞌdaꞌdi hina mani ida aꞌonira kajoamoravini hija bana.

21 Aꞌonivani hidakabaꞌi avavaiꞌamiki aꞌoni.

Deus aꞌonira kajoamoraki bana aꞌoni.

Deua bivahojaki ida nahina ahapini avakadimoni.

Aꞌonivani hidakabaꞌi avaasaraki aꞌoni.

Deus aꞌonira kajoamoravini mani ida aꞌonira khai niꞌaja bana.

22 Hora avanofijahakivini mani ida vahoariha aꞌonira vavajaharavini hija,

aꞌonira vanofiriki,

aꞌonira vaniꞌavini onii jaharikia,

aꞌonira vakanavaranihavini varani jaharikia.

Hiꞌadani ijaꞌari aꞌonira vavajahariki,

ꞌboꞌdakari vakadijaꞌari avikhananavaki vaꞌora vanajaharihariꞌiki adani Deus athi namoniva abono kohana — vaꞌora niꞌaha ada Jesus.

24 Hari.

Vara niꞌianaha ada Jesus:

25 Aꞌonivani hidakabaꞌi ni-nahina-ra avakainamorihi.

Jahariki bana ida avakadimoni.

Avakanahinajanarini kamahini,

vaiꞌami abani avihiki bana aꞌoni.

Aꞌonivani haha avakhaniki aꞌoni hidakabaꞌi.

Jahariki ida avakadimoni bana.

Mahi jahariki khani kamahini ni-khai avakhanijanarihi,

avaasaraꞌoamanija bana.

26 Aꞌonivani avakadihojai jaharini kabaꞌi vahoariha avakadihojai jahani-ra vakahibakhiaki.

Jahariki bana ida avakadimoni hini.

ꞌBoꞌdakari vahojaki adani Deus athi namoniva abono vihina-ra vakahiꞌbadaraki.

Vaꞌoaniaro jaboni vakadihojai jaharini kabaꞌi vahoariha vakadihojai jahani vakahibakhiaki adani — vaꞌora niꞌaha ada Jesus.

27 Hari.

Asia vara niha ada Jesus:

—Mitha vaniꞌajahaki bana hida kodivarani.

Vaꞌora vanofijahaki bana adani ijaꞌari aꞌonira vanofiriki.

Vaꞌora kakodia bana adani ijaꞌari aꞌonira vanofipaꞌitxiriki.

28 Deu-ra vakanikharia bana vakadimoni,

vaniꞌa bana:

29 Ijaꞌari iꞌbaꞌdani-ra kapatahi,

ivaꞌaha oni pitanija jaboni-ra kapatavini.

Ijaꞌaria bisaarihi ida kadakarahobi,

ivaꞌaha bana jaboni ida kadamakari-ra avikhavini.

30 Ijaꞌaria bikanikhariahi ida kadanahina,

inoꞌa bana.

Kadanahina-ra saariha,

hariꞌa kadanahina joini-ra kanikharia.

31 Avanofihi ida vahoariha aꞌonira vanaibavijahajahakivini,

oniania vaꞌora vanaibavijahajahaki jaboni bana.

32 Ijaꞌari hahavi hojani hiki ida nofini hiki-ra nofivini.

Ijaꞌari jaharikia jaboni binofivini ida nofini hiki.

Deus kidinahina jahakia aꞌonira naabosivini-ra avanofihi;

vaꞌora vanofijahaki bana jaboni adani ijaꞌari aꞌonira vanofiriki.

33 Ijaꞌari hahavi hojani hiki ida kakodiani hiki-ra kakodiavini.

Ijaꞌari jaharikia jaboni biakodiaki ida kakodiani hiki.

Deus kidinahina jahakia aꞌonira naabosivini-ra avanofihi;

vaꞌora vaakodia bana adani ijaꞌari aꞌonira vaakodiariki.

34 Ijaꞌari kidinahina joiribanini-ra ogahi,

hoariha-ra kanarihaivini hihi ida kidinahina.

Ijaꞌari hahavi hojani hiki ida kidinahina najoiribanini hiki-ra kanarihaivini.

Ijaꞌari jahariki jaboni ijaꞌari jahariki hoariha-ra kanarihaivini hiki ida kidinahina.

Deus kidinahina jahakia aꞌonira naabosivini-ra avanofihi;

vanajoiravini avarigavini kabaꞌi,

vaꞌora vakanarihai bana jaboni avakadinahina.

35 Hari.

Nini vani onofija ida avakadihojai.

Vaꞌora vanofijahaki bana adani aꞌonira vanofiriki.

Vaꞌora vaakodia bana jaboni.

Avakadinahina vaꞌora avakanarihaiha,

hariꞌa vakanikharia ida avakadinahina avakanarihaihivini hiki joini.

Nini vani onofija ida avakadihojai.

Deus aꞌonira naabosiki bana aꞌoni kidinahina jahaki karahoa.

Deus danoki nama hojaki kaisai avihiki aꞌoni.

Deus jaboni vaꞌora kajoamoraki adani ijaꞌari hojai asohirikia vakahojaiki,

vaꞌora kajoamoraki adani Deu-ra khai vaniꞌariki.

36 Avakadihojai nini vani-ra nofira ada Deus.

Jahaki ada avakadiabiꞌi nama hojaki,

ovari fori vihiꞌa bana — niha ada Jesus.

37 Hari.

Jesus vaꞌora niꞌaha adani vajoroniki:

—Hariꞌa vaꞌora avanaathidanoarari bana adani vahoariha Jahari kabadania vakabadanina,

avarigaravini oadani ida vanamonahavini vanamonaharavini.

Vaꞌora avaranaathidanoaraririha;

ni-Deus aꞌonira anaathidanoarariki bana jaboni.

Hariꞌa vahoariha-ra vara vaniꞌa:

Avajahariki aꞌoni.

Jahaki ida Ibavi Jaharikaꞌoakia avarikhani.

Nihi ida avakadivarani,

Deus jaboni avajaharini-ra kahiki bana aꞌoni,

aꞌonira karonaki ada jaboni bana Ibavi Jaharikaꞌoakia.

Vahoariha vakadihojai asohiriki-ra avarakavaꞌiꞌbirinihi;

avakadihojai asohiriki-ra akavaꞌiꞌbiriniha ada Deus.

38 Vahoariha-ra avanoꞌahi;

Deus aꞌonira noꞌahi jaboni.

Nini vani nahina karahoa avagahinaja.

Ni-Deua binapaꞌitxirihi ida aꞌonira noꞌavini hiki kaimoni,

karaho oamani ida avagahinani kaimoni bana.

Deua binajiꞌbiniki bana ida avakadibavi avagahinani hikia bana ahoꞌdoararihi,

jiꞌbiniꞌianahi ida avakadibavi,

daiꞌianahi jiꞌbiniꞌianahi.

Avanapaꞌitxihi ida vahoariha-ra avanoꞌavini hiki,

Deua binapaꞌitxihi jaboni ida aꞌonira noꞌavini hiki — niha ada Jesus.

39 Hari.

Asia vara niꞌaha ada Jesus:

—Makhira kamaodorohakia ni-bikaabokaki ida hoariha kamaodorohaki-ra bananivini hagihia.

Bikaijoꞌahi;

hodi bodinia avavoronijakosiꞌbamakhamaꞌaha.

40 Hari.

Ni-ojomoꞌihi abonoa bivakaꞌdaꞌdiki ada vaꞌora kaꞌojomoꞌiki.

Ojomoꞌihi abonoa ni-avigaꞌiaki kaho ida vaꞌora kaꞌojomoꞌikia biogaki.

Aꞌdiahiꞌihi ida vaꞌora kaꞌojomoꞌivini,

bona avigaꞌihi ida vaꞌora kaꞌojomoꞌiki biogaki.

41 Hari.

Asia mani vara niha ada Jesus:

—Hogoi moramorani nokhoi ꞌbaꞌdania hojaki fori hiki ida hojai jahariki.

Inokhoni ꞌbaꞌdania hojani oadani ida ava pitani karaho,

hariꞌa ikaijoꞌa ida hogoi moramorani iigamini nokho ꞌbaꞌdania aniani.

42 Inokhoni ꞌbaꞌdania ava pitani karaho aniarini oadani,

hariꞌa iigamini-ra niꞌa:

43 Hari.

Vara niꞌianaha ada Jesus:

—Ihiꞌai avani fori hiki ida ijaꞌari.

Jahahi ida ihiꞌai avani,

jahahi ida jaboni ihiꞌai bononi.

Jaharihi ida ihiꞌai avani,

jaharihi jaboni ida ihiꞌai bononi.

44 Ikaijoꞌahi ida ihiꞌai;

iogahi ida ihiꞌai jahani jaharini.

Nini vani iogaja ida ihiꞌai avani jahani jaharini.

Ijaꞌari kahojai fori hiki ida ihiꞌai bononi.

Ijaꞌari kahojai-ra inokivini vani iogaja ida ijaꞌari jahani jaharini.

Ni-hojai jaharikia kahojaiki ida ijaꞌari jahaki.

45 Ijaꞌari vaꞌini bodinia hojaki ida vaꞌi bodini vara nini jahaki.

Jahahi hida kidivaꞌibodivarani,

oniani ida varani jahaki-ra vara vaniꞌavini hija.

Ijaꞌari hojai jaharikia kahojaiki vaꞌini bodinia hojaki ida vaꞌi bodini vara nini jahariki.

Jaharihi ida kidivaꞌibodivarani,

oniani ida varani jahariki-ra vara vaniꞌavini hija.

Ijaꞌaria vara bivaniꞌaki ida bikavaꞌibodivaraniki — niha ada Jesus.

46 Asia vara niha ada Jesus:

—Oathi-ra avanaabaravini oadani,

hariꞌa kaꞌdaꞌdia hora vanaonibakhia.

47 Aꞌonira onavaꞌisohivini hiki ida rajomi kavaranihi,

nahina fori hiki ida.

Kodiania khahi ida ijaꞌari,

mitha biniꞌahi ida oathi,

binaabamaniꞌihi.

48 Gora kaaraki-ra namonahaki vani fori hija hida ijaꞌari.

Bikhoriꞌimidiahi ida hodi abihiaki,

gora avani arokhojahani ibavini kaimoni aꞌdaimaki.

Gora aꞌdiahini naothinia,

jiꞌbinini kamaꞌdaꞌihi ida vaini kapahani.

Vaini kapahani jorania bigathiꞌihi ida gora avani,

ni-hoꞌdohoꞌdoki ida gora.

Abihiaki ida gora avani nami imani bodinia.

49 Hari.

Gora-ra namonahaki vani fori hija jaboni ida ijaꞌari hoariha.

Bikamithahi ida oathi,

ni-binaabaꞌiki.

Binamonahahi ida hodi abihiariki,

arokhojahajahakirihi ida gora avani.

Binaibaviꞌihi ida gora avani hodi abihiariki bodinia.

Gora aꞌdiahini naothinia,

jiꞌbinini kamaꞌdaꞌihi ida vaini kapahani.

Vaini kapahani jorania bigathiꞌihi ida gora avani,

adariꞌihi ihimikaꞌoaꞌihi ida gora — niha ada Jesus.