2 Oniaroa,

bikanokihi ida kanava koꞌbamiki akarahokamoriki.

Araba abonoa vakosokohi ida vakaditahafa vakanahojahaja kaimoni.

3 Simão kakanava-ra kakanikhariaha ada Jesus.

Simãoa biakarahokafoniꞌihi,

vakiꞌdamaꞌaha avakakhanaipaꞌitxiꞌaha.

Kanava kabodinia hojaꞌaha vithina vaꞌora kaꞌojomoꞌiha adani ijaꞌari kaasia pasapasania vahojaki.

4 Hari hiꞌihi ida kidivarani,

Simão-ra niꞌaha:

—Simão,

avakakhanaipaꞌitxi bihiani kania.

Avakosonaꞌiana ida avakaditahafa,

abaisana-ra avarakanagithija kaimoni.

—Jesus,

joma oadani ariarabaꞌiki hari,

ni-nahina-ra akanagithiꞌiki.

Haria ihonariahi;

akosonaꞌianahi ida tahafa.

6 Hari.

Paha bihiani kania avakakhanaiha,

avakosonaꞌianahi,

avakanagithiꞌaha ada abaisana ipohiki.

Abaisana ipohikia bikanaꞌbirakamariꞌihi ida vakaditahafa.

7 Oniaroa,

vaꞌora vakobaranahaha adani vakahoariha kanava kahoariha vakahagiki vaꞌora vaakodiara kaimoni.

Vaakhaꞌaha,

vakanoꞌbamamisiꞌihi ida kanava.

Vakanajiꞌbiniꞌihi ida kanava koꞌbamiki abaisana.

Kaꞌbiriꞌbirihananaꞌihi ida kanava koꞌbamiki,

akoꞌomarikamariꞌihi.

8-9 Hari.

Simão Pedroa binokiha ada abaisana ipohiki vagathiꞌiki,

bikavaꞌibodivaraniꞌihi ida Jesus kabadani danoki.

Jesus viaha kajoꞌatharariꞌaha,

biniꞌaha:

—Kodikaꞌdaꞌdi,

ijahaki i.

Ojahariꞌoamanija.

Kodihojai jahariki ovaꞌi-ra anaipahihiki,

oniani ida iakaraꞌoni-ra onofivini hija — Jesu-ra niꞌaha ada Simão Pedro.

10 Simão koꞌbami Zebedeu kaisai viꞌbamiki,

Tiago,

João vihiki.

Vakavaꞌibodivaraniꞌaha jaboni ada abaisana ipohiki avakanagithiꞌiki.

Simão-ra niꞌaha ada Jesus:

—Hariꞌa hora fini!

Abaisana-ra avanakoꞌdijanarihi bana.

Ijaꞌari vani bana adani vaꞌora avanakoꞌdihara vaꞌora avibaranahara,

kodijaꞌari vihira kaimoni — vaꞌora navaꞌisohiꞌaha ada Jesus.

11 Hari.

Avakarahokamoriꞌianahi ida vakadikanava.

Vanahojahaꞌihi ida vakadinahina,

Jesu-ra vavaipohihaꞌara kaimoni.

12 Hari.

Sidaji bodinia hojaki ada Jesus,

kidiania okhaꞌaha ada makhira kavamoniki.

Asafi hahavi namani-ra najahariki kakavamoniki ada.

Jesu-ra nokiꞌaha.

ꞌBisoniꞌaha Jesus viaha.

Bikanikhariaꞌaha:

—Jesus,

hora kajoamora bana!

Hora inajahavini-ra inofihi;

hora inajahahi — niha ada makhira.

13 Oniaroa,

Jesua bikanaibaviꞌihi ida saꞌa makhira namana,

bikadasaꞌaha,

biniꞌaha:

—Haꞌa,

onofiki ida ira onajahavini.

Jahaꞌa bana!

—Hariꞌa inanamithaꞌa hida ira onajahavini.

Sasidotxi kania okhaꞌa bana mahija iasafini namani-ra nokivini,

biogaja kaimoni ida ijahaꞌini.

Deus kavaꞌisohihi jirikia bihonariaki ida ijaꞌari jahaꞌiki Deu-ra kanavaꞌigavini igitha abononi ahaꞌdikia,

vahoariha avigaja kaimoni ida jahaꞌiki.

Sasidotxi ira nokivini naothinia inaabaꞌa bana ida Deus kavaꞌisohihi jiriki — niha ada Jesus.

15 Ijaꞌari vaipohikia avananamithaoniꞌiki ida Jesus ijaꞌari-ra anaihotavini kavaranihi.

Ijaꞌari vakavamoniki vaipohiki vikhaki kidiania vaꞌora anaihotara kaimoni.

Vajoronibakhiaki jaboni adani ijaꞌari vaipohiki kidivarani vakamithara kaimoni.

16 Hari.

Okhabakhiaꞌaha ada Jesus ibavi kaijaꞌaririki kania,

Deus khama vara vaabono vakaniꞌakhamara kaimoni.

17 Hari.

Mahi hoariha gora bodinia hojaꞌaha ada Jesus.

Vaꞌora kaꞌojomoꞌiꞌaha adani ijaꞌari.

Vakadiania vajoroniꞌaha adani farisio,

judeus kaijaꞌari vakaꞌojomoꞌiva abono khama.

Jesus maakarina vavithiꞌaha.

Galiléia kaaraboni,

Judéia kaaraboni,

Jerusalém sidaji hikia vikhaki adani ijaꞌari.

Jesus kania Deus danona hojani mani ida Jesus ijaꞌari kavamoniki-ra vaꞌora anaihotavini-ra kaabokavini hija.

18 Hari.

Vakaikahiꞌaha adani makhira Jesus bivahojaki kania.

Vavikhaꞌaha ada makhira hoariha joꞌo abaꞌoronisiagaki jorana namania omaki.

Vanofiki ida vavikhajakosivini Jesus kania.

19 Jiꞌbiniki ida gora ijaꞌari vâipohikia,

ni-nihanikia makhira joꞌo abaꞌoronisiagaki-ra avavikhajakosiki.

Avavikasiha,

gora ꞌdaꞌdini aꞌani sohiriamaꞌokia avavikasiꞌaha.

Vanaꞌbakhamananiꞌihi ida gora ꞌdaꞌdini aꞌani,

kharaniꞌihi,

jorai damomisikia avaragariꞌaha,

avanahiririrarivini ada makhira ijaꞌari vajoroniki vakadiania.

Vibarariꞌaha Jesus viaha.

20 Jesus abono-ra niꞌaha:

—Vakajariꞌdarihi hida makhira joꞌo abaꞌoronisiagaki-ra oanaihotavini-ra okaabokavini.

—Kodivaꞌahi,

ꞌbiraꞌiki ida kadahojai asohiriki — niha ada Jesus.

21 Judeus kaijaꞌari vakaꞌojomoꞌiva abono,

farisio khama vaabono vakaniꞌakhamaꞌaha:

—Jahariki ida Jesus kavarani.

Deus kaꞌoa bikaabokaki hida hojai asohiriki naꞌbirani.

Deus hiriha ada Jesus.

Makhira kaꞌoa ni-bikaabokaki ida ijaꞌari kahojai asohiriki-ra naꞌbiravini.

22 Jesua biogaki ida vakavaꞌibodivaranivini,

vaꞌora niꞌaha:

—Jahariki ida kodivarani-ra avakajariꞌdavini.

23-24 Oanaihotaki bana ada makhira.

Oanaihotavini avanokiha;

avarigahi jaboni ida kidihojai asohiriki onaꞌbiravini okaabokavini.

Deus hora karonavini hiki ijaꞌari kahojai asohiriki-ra onaꞌbiravini.

Hovani ijaꞌari hahavi vakadiꞌaajo ho — vaꞌora niꞌaha ada Jesus.

—Gaaꞌa,

adahaꞌa.

Ijorani-ra nabiiniꞌa,

igorania okhaꞌa bana.

25 Vanokivini kabaꞌi jorakia gaaꞌaha,

jorana-ra nabiiniꞌaha,

gorana okhaꞌaha.

Khai biniꞌahahaꞌoadahavini ida Deus jahana.

26 Oniaroa,

ijaꞌari vanokiva vakavaꞌibodivaranikarahoꞌaha.

Vaofinikarahoꞌaha.

Deu-ra khai vaniꞌaha:

—Jahaꞌoamanija ida Deus kabadani anokiꞌiki hidakabaꞌi.

27 Hari.

Oniaroa,

ajihiꞌaha ada Jesus.

Adahana kabaꞌi binokiꞌaha ada Levi.

Imposto gathaniva abono ada Levi.

Imposto oniki ida jiniro arabo kakaꞌdaꞌdini kabadani kaimoni.

Imposto kagorania vithiki ada Levi.

Jesua biniꞌaha:

—Hora vaipohihaꞌa bana.

28 Oniaroa,

gaaꞌaha ada Levi.

Binahojahaꞌihi ida kidibadani,

kidinahina hahavi,

Jesu-ra vaipohihaꞌaha.

29 Hari.

Levia bivahonariahihi ida ꞌbai karaho amonahani,

vaꞌora kaboaꞌiꞌaha adani Jesus,

kanori abono vaipohiki vihiki gorana vikhana.

Vakadiania vahojaha adani imposto gathaniva abono vaipohiki,

ijaꞌari vahoariha jaboni vavithiki vakadiania.

30 Hari.

Farisio,

judeus kaijaꞌari vakaꞌojomoꞌiva abono khama vaꞌora vanokiha adani Jesus viꞌbaijabanaki.

Vaꞌora vanokiha vaꞌora vakajaꞌoriaꞌaha adani Jesus ipohina,

vaꞌora vaniꞌaha:

—Niha avakhanimanija aviꞌbaijabanaki imposto gathaniva abono vakadiania?

Hojai jaharikia vakahojaiki vakadiania aviꞌbaijabanaki aꞌoni jaboni.

Akadihojai hipaꞌitxirihi hida aꞌbaina hojai jaharikia vakahojaiki vakadiania — Jesus ipohina-ra vaꞌora vaniꞌaha adani farisio.

31 Jesua bigathaniꞌihi ida vakadivarani:

—Mijiko fori ohiki ho.

Kavamoni vani fori hija ida hojai asohiriki.

Vakavamonirikia ni-vanofiki ada mijiko.

Vakavamoniki vani adani mijiko-ra vanofira.

32 Hojai asohikia vakahojaiki ni-vaꞌora obaranahaki.

Hojai asohirikia vakahojaiki vani hadani vaꞌora obaranahara.

Vaꞌora obaranahavini oamani hida hora rakhaja,

vakavaꞌipahinikaꞌoaja kaimoni ida vakadihojai asohiriki — vaꞌora niꞌaha ada Jesus.

33 Hari.

Jesu-ra vaniꞌaha adani ijaꞌari:

—João Batista ipohina ni-mahi hahavi viꞌbaiki.

ꞌBai-ra vavahojavini kabaꞌi viꞌbairina vahojana Deu-ra vara vaniꞌakaꞌoara kaimoni.

Farisio vakadihojai onivani fori hija ida jaboni.

Kadaipohi vakadihojai hirihi hida.

Mahi hahavi viꞌbaiki,

paha-ra viꞌaviki jaboni adani.

—Vakadiania ohojahahaꞌoadahana mani ida viꞌbairina vaꞌora nahojarija.

Maisa hojana oadani,

ni-nahina vaꞌora honariaki adani kanori abono viꞌbairina vahojana akarai kaihinikani kania.

Maisa fori ohiki ho.

Kanori abono ihinika kania vahojana vani fori vihira adani oipohina.

Viꞌbaijahakiki adani kanori abono.

Onivani fori vihira adani oipohina.

35 Khaki bana ida mahi vakadiania oakaraꞌona kamahini,

oniaroa,

ni-ꞌbai havahani-ra vanofiki mahi hahavi Deu-ra vara vaniꞌakaꞌoara kaimoni.

36 Hari.

Jesus vaꞌora niꞌaha:

—Vakavaꞌipahinikaꞌoa bana ida avakadihojai ꞌboꞌda mahija kodihojaia avakahojaivini.

Ni-kabodihadihaki ida hojai ꞌboꞌda kodihojai jahakia.

Ni-ijaꞌaria bianiki ida makari pitani paꞌitxi makari jaꞌdini amonahaki kania,

makari ꞌboꞌda akarabajani kaimoni hini.

Makari pitani aniaja vaha;

makari jaꞌdini-ra najaharimanihi vaha.

Akaramisihi hida makari pitani jaꞌdini,

ꞌbiraꞌianahi ida makari ꞌboꞌda.

37 Hari.

Asia vara niha ada Jesus:

—Vakavaꞌipahinikaꞌoa bana ida avakadihojai ꞌboꞌda mahija kodihojaia avakahojaivini.

Ni-kabodihadihaki ida hojai ꞌboꞌda kodihojai jahakia.

Ni-ijaꞌaria binabaviki ida vinho jaꞌdini igitha asafini ꞌboꞌda bavi hikia.

Thoromananihi ida vinho jaꞌdini.

ꞌDakhaki ida baasafi kabavihi ꞌboꞌda,

ni-aꞌbitxajanaki.

Ijaꞌaria binabavija vaha ida vinho igitha asafini ꞌboꞌda;

akaꞌbararakhamamanihi vaha;

kavithimamanihi vaha ida vinho.

Ni-jahajanaki ida bavi.

38 Ijaꞌaria binabaviki ida vinho jaꞌdini igitha asafini jaꞌdini bavi hikia.

39 Ijaꞌaria bikaijoꞌahi ida vinho ꞌboꞌda,

biꞌaviꞌihi,

ni-binofijanaki ida vinho jaꞌdini.

Nini vani ijaꞌaria bivajahaja ida kidihojai ꞌboꞌda,

oniani ida biniꞌavini hija:

Jesus judeus kaijaꞌari vahojana ꞌboꞌda-ra kavarajomivini vinho ꞌboꞌda fori hini.