Jesua bianaihotaꞌiki ada makhira adahariki
9
Hari.
Kanava kabodinia vakiꞌdamaꞌaha adani Jesus.
ꞌDako pitanija avakajoifianiꞌaha.
Vigaimoriꞌaha adani Jesus.
Sidaji bivahojaki kania vakaikahiꞌaha.
2 Hari.
Vakaikahiꞌaha adani ijaꞌari Jesus bivahojaki kania.
Vakaibaꞌiha ada makhira hoariha joꞌo abaꞌoronisiagaki.
Vibarariꞌaha Jesus viaha.
Jesus abono-ra niꞌaha:
—Vakajariꞌdarihi hida makhira joꞌo abaꞌoronisiagaki-ra oanaihotavini-ra okaabokavini.
Oniaroa,
makhira kavamoniki-ra niꞌaꞌaha:
—Kodisai,
khai iniꞌa!
ꞌBiraꞌiki ida kadahojai asohiriki — niha ada Jesus.
3 Judeus kaijaꞌari vakaꞌojomoꞌiva abono vaipohiriki vaabono vaniꞌaꞌaha:
—Jahariki ida Jesus kavarani.
Deus kaꞌoa bikaabokaki hida hojai asohiriki-ra naꞌbiravini.
4 Jesua biogaki ida vakavaꞌibodivaranivini,
vaꞌora niꞌaha:
—Jahariki ida kodivarani-ra avakajariꞌdavini.
5 Onaihotaki bana ada makhira,
oanaihotavini avanokiha;
avarigahi jaboni ida kidihojai asohiriki onaꞌbiravini okaabokavini.
6 Deus hora karonavini hiki ijaꞌari kahojai asohiriki-ra onaꞌbiravini.
Hovani ijaꞌari hahavi vakadiꞌaajo ho — vaꞌora niꞌaha ada Jesus.
Makhira joꞌo abaꞌoronisiagaki-ra niꞌaha:
—Gaaꞌa,
adahaꞌa!
Ijorani-ra nabiiniꞌa,
igorania okhaꞌa bana!
7 Hari.
Aihotaꞌaha ada makhira.
Gaaꞌaha,
jorana-ra nabiiniꞌaha,
gorana okhaꞌaha.
8 Oniaroa,
ijaꞌari vanokiva vakavaꞌibodivaranikarahoꞌaha.
Vaofiniꞌaha.
Deu-ra khai vaniꞌaꞌaha:
—Jahaꞌoamanira ada Deus!
Ijaꞌari-ra noꞌavini danona,
hoariha-ra anaihotavini-ra kaabokara kaimoni.
Jesua bikaboaꞌiki ada Mateus vaipohihana hira kaimoni
9 Oniaroa,
ajihiꞌaha ada Jesus.
Adahana kabaꞌi binokiha ada Mateus.
Imposto gathaniva abono ada.
Imposto kajinironi ida arabo kakaꞌdaꞌdini kabadani kaimoni.
Imposto kagorania vithiki ada Mateus.
Jesua biniꞌaha:
—Hora vaipohihaꞌa bana.
Gaaꞌaha ada Mateus.
Jesu-ra vaipohihaꞌaha.
10 Oniaroa,
Mateus gorana avikhaꞌaha adani Jesus.
Viꞌbaina kabaꞌi vakaikahiꞌaha jaboni adani imposto gathaniva abono vaipohiki,
ijaꞌari vahoariha hojai jaharikia vakahojaiki jaboni.
Viꞌbaiki jaboni adani ijaꞌari Jesus kidipohi khama vakadiania.
11 Hari.
Farisio vaipohiriki vaꞌora vanokiha adani Jesus viꞌbaijabanaki,
vaꞌora vananaꞌdohiꞌaha adani Jesus ipohina:
—Nahina kaimoni ꞌbaijabanaki ada Jesus imposto gathaniva abono,
hojai jahariki namonahava abono vakadiania jaboni?
Akadihojai hipaꞌitxirihi hida aꞌbaina hojai jaharikia vakahojaiki vakadiania — Jesus ipohina-ra vaꞌora vaniꞌaha adani farisio.
12 Jesua bikamithaꞌihi ida vakadinaꞌdohi,
vaꞌora niꞌaha:
—Onofiki ida vaꞌora oakavaꞌijoavini,
oniani ida vakadiania hora noꞌbaijabanaja.
Kavamoni vani fori hija ida ijaꞌari kahojai asohiriki.
Mijiko fori ohiki ho.
Vakavamoniki vani adani mijiko-ra vanofira.
Vakavamonirikia ni-vanofiki ada mijiko.
13 Hojai asohikia vakahojaiki ni-vaꞌora obaranahaki.
Hojai asohirikia vakahojaiki vani hadani vaꞌora obaranahara,
vakavaꞌipahinikaꞌoaja kaimoni ida vakadihojai asohiriki.
Vada vaniꞌa ida Deus athi kapapirani mahija aꞌonira kaꞌojomoꞌivini,
avarigaja kaimoni Deus athi kapapirani haria navaꞌisohivini hiki ida:
“Ni-onofiki ida igitha abononi ahaꞌdikia hora avakanavaꞌigavini.
Onofiki ida vahoariha-ra vaꞌora avavaꞌadivini.”
Nihi ida Deus athi
— vaꞌora niꞌaha ada Jesus.
Ijaꞌari viꞌbairina vahojana varani hini
14 Hari.
Jesus kania vamaakariꞌaha adani João Batista ipohina.
Vaniꞌaha:
—Harivani,
farisio khama akadihojai hiki ida aꞌbairina arihojabakhiana Deu-ra vara aniꞌakaꞌoaja kaimoni.
Kadaipohi vakadihojai hirihi hida.
Niha vakhanimanira adani kadaipohi viꞌbairina vahojariki Deu-ra vara vaniꞌakaꞌoara kaimoni?
15 Jesua bigathanihi ida vaathi:
—Vakadiania ohojahahaꞌoadahana mani ida viꞌbairina vaꞌora nahojarija.
Maisa hojana oadani,
ni-vavaꞌi mokara niki adani kanori abono.
Maisa fori ohiki ho.
Kanori abono ihinika kania vahojana vani fori vihira adani oipohina.
Viꞌbaijahakiki adani kanori abono.
Onivani fori vihira adani oipohina.
Khaki bana ida mahi vakadiania oakaraꞌona kamahini,
oniaroa,
ni-ꞌbai havahani-ra vanofiki mahi hahavi,
Deu-ra vara vaniꞌakaꞌoara kaimoni.
Jesua vara bivaniꞌaki ida kidihojai makari jaꞌdini fori hini
16 Hari.
Jesus vaꞌora niꞌaha:
—Vakavaꞌipahinikaꞌoa bana ida avakadihojai ꞌboꞌda mahija kodihojaia avakahojaivini.
Ni-kabodihadihaki ida hojai ꞌboꞌda kodihojai jahakia.
Ijaꞌaria ni-biakarabajaki ida makari ꞌbiraki makari pitani jaꞌbiririꞌiarikia.
Makari pitani jaꞌdinia akarabajaja vaha;
sokoahi ida makari,
jaꞌbiririmanihi vaha ida pitani jaꞌdini,
ꞌbiraꞌianahi vaha ida makari ꞌboꞌda,
aꞌahapimanihi vaha ida makari ꞌbirani — vaꞌora niꞌaha ada Jesus.
Jesua vara bivaniꞌaki ida kidihojai vinho jaꞌdini fori hini
17 Jesus vaꞌora niꞌaha:
—Vakavaꞌipahinikaꞌoa bana ida avakadihojai ꞌboꞌda mahija kodihojaia avakahojaivini.
Ni-kabodihadihaki ida hojai ꞌboꞌda kodihojai jahakia.
Ni-ijaꞌaria binabaviki ida vinho jaꞌdini igitha asafini ꞌboꞌda bavi hikia.
Thoromanihi ida vinho jaꞌdini.
ꞌDakhaki ida baasafi kabavihi ꞌboꞌda,
ni-aꞌbitxajanaki.
Ijaꞌaria binabavija vaha ida vinho igitha asafini ꞌboꞌda;
akaꞌbararakhamamanihi vaha;
kavithimamanihi vaha ida vinho.
Ni-jahajanaki ida bavi.
Ijaꞌaria binabaviki ida vinho jaꞌdini igitha asafini jaꞌdini bavi hikia.
Ni-akaꞌbararakhamajanaki ida igitha asafini,
ni-ahovarijanaki ida vinho — niha ada Jesus.
Judeus kaijaꞌari navaꞌisohiva abonoa bikanikhariaki ada Jesus
18 Hari.
Jesus ijaꞌari-ra vaꞌora vara niꞌavini oadani,
kidiania khaha ada judeus kaijaꞌari navaꞌisohiva abono.
Vaꞌi bodinia abono-ra niꞌaha ada makhira:
—Kaꞌdaꞌdi oamani ada Jesus — oniani ida Jesus viaha nakajoꞌathararina hija.
Jesu-ra kanikhariaꞌaha ada makhira:
—Hora kajoamora bana!
Onofiki bana ida ogorana iokhani.
Abiniꞌiki ida kodisai.
Kodiania okhaꞌa bana.
Isaꞌani-ra kanaibaviha kodisai kania mahija ahokivini — niha ada makhira.
—Jakaho kadania okhava — niha ada Jesus.
19 Oniaroa,
ajihiꞌaha ada makhira.
Avikasiagaꞌaha adani Jesus kidipohi khama.
Jesua bianaihotaki ida gamo
20 Hari.
Jesus naothia khaꞌihi ida gamo kavamoniki.
12 badara ipohini amani aforarini hojaki hida gamo.
21 Abononi niꞌahi:
—Jesus kakarahobi-ra okadasahi,
oaꞌaihotahi.
Oniaroa,
Jesus kaida-ra kanamaakariꞌihi.
Bikadasaꞌihi ida kidikarahobi.
22 Hari.
Roiribaniꞌaha ada Jesus.
Binokiꞌihi ida gamo,
biniꞌaꞌihi:
—Kodisai,
khaii niꞌa!
Hora ikajariꞌdaravini mani ida ira oanaihotavini hiꞌia.
Oniaroa,
jorakia aihotaꞌihi ida gamo.
Jesua bianahokiꞌiki ida isai
23 Hari.
Oniaroa,
vakaikahiꞌaha adani Jesus judeus kaijaꞌari navaꞌisohiva abono gorana.
Oꞌoiha,
vaꞌora nokiha adani ijaꞌari vabarariariaki,
vahoariha vaꞌithohana kaꞌdamahi viahania.
Vavaꞌi kidakidaꞌaha saa vakhanina adani ijaꞌari vaipohiki.
24 Jesua biogaki ida isai-ra anahokivini,
oniani ida vaꞌora niꞌavini hija:
—Abinirihi oni isai,
vadikaꞌoaki oni.
Avakaraꞌo hahavi hida!
Jesus athi-ra vakajariꞌdaki,
oniani ida Jesu-ra vakanahahanihavini hija,
vakanavaranihavini hija jaboni.
Abinikaꞌoani avigaki ida isai.
25 Hari.
Ijaꞌari vaipohiki avakaraꞌona naothinia,
oꞌoiꞌaha ada Jesus isai bivahojaki kania.
Jesua binamaakariꞌihi ida isai abaꞌoni,
biagathiꞌihi ida saꞌani,
ahokiꞌihi,
gamaꞌihi ida isai.
Jahaꞌihi.
26 Isai ahokiꞌiki monini varani hini akarafarakhamaꞌiki ibavi maakariki hahavia.
Jesus vaꞌora anaihotaki adani vakamaodorohaki viꞌbamiki
27 Hari.
Ajihiꞌaha ada Jesus.
Ibavi hoariha radahana kabaꞌi,
Jesus naothia avikasiagaꞌaha adani makhira viꞌbamiki,
vakamaodorohaki.
Vabodiꞌbarahaki:
—Jesus,
ivani akadikaꞌdaꞌdi i.
Davi kohana haria vakaꞌdaꞌdivini fori ihiki i.
Haria nakaidiva bana!
28 Oꞌoiꞌaha ada Jesus gora bodinia.
Avakhanoꞌaha adani makhira vakamaodorohaki,
aviꞌoiꞌaha jaboni.
Jesus vaꞌora niꞌaha:
—Avakajariꞌdarihi hida aꞌonira oanaihotavini-ra okaabokavini;
avaraihotahi.
Vaniꞌaha:
—Haꞌa,
akajariꞌdarihi ida aꞌaihotana.
29 Jesua bikadasaꞌihi ida vanokho ꞌbaꞌdani.
Vaꞌora niꞌaha:
—Avajariꞌdarihi;
avagahahi ida avanokhoni ꞌbaꞌdani.
30 Bikaabadavini naothinia avagahaꞌihi.
Jesus vaꞌora kaabanidanokiꞌaha:
—Hariꞌa vananamitha hida aꞌonira oanaihotavini vahoariha vakadiania.
31 Hari.
Ai vihiꞌaha.
Jesus vaꞌora kaabanivini kabaꞌi,
ibavi maakariki hahavi kaijaꞌarini-ra vaꞌora vananamithavini hiꞌihi ida vanokho anavagahani hiki.
Jesua bianaihotaki ada makhira kabajadiki
32 Hari.
Makhira viꞌbamiki vaꞌajihina naothinia,
vahoariha vavikhaha ada makhira hoariha Jesus kania.
Bajadia abani bianaꞌdakharariki ada makhira.
Jesua bihonariahi ida bajadi akaraꞌoꞌini.
33 Bajadi ajihini naothinia vara niꞌaha ada makhira.
Ijaꞌari hahavi vahojakia vakavaꞌibodivaranikarahoꞌihi ida Jesus kabadani danoki.
Vaabono vakaniꞌakhamaꞌaha:
—Ni-ijaꞌari hoariha ahararana hojaki kabadani niki-ra anokiki kidibadani fori hiki.
34 Oniania,
vakhanihaha adani farisio:
—Bajadi vakaꞌdaꞌdiva Jesu-ra noꞌaꞌiki danona,
oniani ida bajadi ajihini-ra honariavini hija.
Jesus vaꞌora nakaidivaki adani ijaꞌari
35 Oniaroa,
sidaji ipohikia ijaꞌari ibavini ipohikia aadahaoniꞌaha ada Jesus.
Judeus kaijaꞌari Deu-ra vara vaniꞌavini kagorania oꞌoiki ada.
Vaꞌora kaꞌojomoꞌiꞌaha adani ijaꞌari.
Jesus vaꞌora vara niꞌavini hihi ida Deus monina jahaki.
Vaꞌora vara niꞌavini hiki ida Deus ijaꞌari hahavi-ra vakaꞌdaꞌdivini.
Vaꞌora anaihotaki jaboni adani ijaꞌari vakavamonihahaviki.
Ipohiki ida vakadikavamoni.
36 Jesus vaꞌora vada niꞌaha adani ijaꞌari vaipohiki,
vaꞌora nakaidivaꞌoamaniha.
Abono-ra niꞌaha:
—Ovilia nahina vaꞌora akadavaꞌariki fori vihiki adani ijaꞌari.
Vakaamiariki fori vihiki adani,
ni-hojaki ida vaꞌora kajoamoraki.
37 Jesus vaꞌora niꞌaha adani kidipohi:
—Rakhajahi bononi aꞌdiki ipohiki vani fori vihira adani ijaꞌari vaipohiki.
Vanofiki ida vaabono gahinai vanihavini kodiania.
Vaipohiriha adani Deus kahonai abono hora avigariki-ra vananamithaki varani ohina.
38 Deu-ra vakanikharia bana mahija vaꞌora karonavini adani kidihonai abono hora avigariki vakadiania.
Omonina-ra vakamithavini vani,
vaabono gahinai vanihavini kodiania.