Gamoa vavaipohihaki ada Jesus
8
Hari.
Oniaroa,
ibavi ipohikia avaadahaoniꞌaha adani Jesus,
vara bivaniꞌavini ida Deus monina jahaki,
ijaꞌari-ra navaꞌisohiꞌaha Deua vakaꞌdaꞌdira kaimoni.
Jesus ipohina 12 vihiki vaipohina kidiania avikhaꞌiki.
2-3 Avaadahaonijabanaki adani gamo vaipohiriki jaboni Jesus vakadiania.
Vaonina Maria Madalena,
Joana,
Susana vihiki.
Jesus vaꞌora anaihotaꞌiki adani gamo,
oniani ida vavaipohihavini hija.
Gamo vakabajadiki Jesus vaꞌora najahaꞌiki.
Maria Madalena,
bajadi vaipohina 7 vihikia vagathiꞌiki ida.
Jesua bihonariaꞌihi ida bajadi akaraꞌoꞌini.
Joana kamakhira onina Cuza.
Cuza Iroji kahonai abono ada.
Iroji arabo kakaꞌdaꞌdini ada.
Cuza biakadavaꞌaki ida Iroji kanahina.
Jesus vaꞌora kaꞌojomoꞌivini oadani adani ijaꞌari,
Susana Jesu-ra vakaijahitaki,
gamo vahoariha jaboni Jesu-ra vaakodiaki.
Vakadinahina paꞌitxi,
jiniro,
ꞌbai hikia Jesu-ra vaakodiaꞌaha.
Trigo ꞌbaꞌdani txiotxioni karajomihi varani hini
4 Hari.
Oniaroa,
ijaꞌari vaipohiki vikhaki Jesus kania.
Sidaji ipohiki kaijaꞌarinia vanofiki vanokivini ada Jesus.
Oniaroa,
vajoroniha,
vaꞌora kaꞌojomoꞌiꞌaha adani ijaꞌari vahojaki.
Rajomi kavaranihia vaꞌora vara niꞌaꞌaha:
5 —Siroia okhaha ada makhira binatxiotxiohi ida trigo ꞌbaꞌdani.
Hagihi vadinia vararahi ida ꞌbaꞌdani hoarahanana.
Ijaꞌaria vakadaꞌahaꞌahaꞌihi ida trigo ꞌbaꞌdani,
ni-movaꞌiki.
Avigariha adani igitha,
vitxagatxagaꞌihi jaboni.
6 Jaꞌdi namania vararahi ida ꞌbaꞌdani hoariha.
Foraki ida nami.
Movani kamaꞌdani vani araꞌokhoꞌihi.
7 Hogoi kania vararahi ida ꞌbaꞌdani hoariha.
Movaꞌihi ida jaboni hogoi,
rakhajahi-ra najahariꞌihi,
ni-bonoꞌiki.
8 Arabo jahakia vararahi ida ꞌbaꞌdani hoariha.
Movahi,
avijavahi,
bonoꞌihi.
Aipohiꞌihi ida trigo ꞌbaꞌdani.
Trigo avani hoarahanana ꞌbaꞌdani ipohini 100.
Avakamithavini avanofihi;
mitha vaniꞌajahaki hida oathi — vaꞌora niꞌaha ada Jesus.
Lucas 8:1-56
9 Hari.
Jesus ipohina vananaꞌdohiꞌaha:
—Ni-aogajahakiki ida rajomi kavaranihi kadavarani hiki.
10 Jesus vaꞌora niꞌaha:
—Deua binofiki ida avarigavini,
oniani ida Deus kaꞌdaꞌdi hina kavaranihia aꞌonira onanamithajahakivini hija.
Ijaꞌari vahoariha ni-avigavini vanofiki ida varani Deus vaꞌora vakaꞌdaꞌdivini.
Vakadiania vara ovaniꞌaki ida rajomi kavaranihi,
avigajorakiria kaimoni hida kodivarani.
Oathi-ra mitha vaniꞌavini kabaꞌi,
ni-nahina nini avigaki.
11 Oniaroa,
Jesus vaꞌora nanamithavini hiꞌihi ida rajomi kavaranihi.
—Trigo ꞌbaꞌdani txiotxioni vani fori hija ida Deus athi kavaranihi.
Deus athi fori hiki ida trigo ꞌbaꞌdani.
12 Hagihia vararahi ida trigo ꞌbaꞌdani.
Igitha vitxagatxagahahaviꞌihi Onivani fori hini ijaꞌari vahoarahanana vakamithaja ida Deus athi.
Hari.
Oniaroa,
khaki ada Jahari Deus athi-ra anihavini vaꞌini bodinia,
vakajariꞌdaja kaimoni,
oniani ida Deus vaꞌora akavaꞌijoaravini hija.
13 Jaꞌdi namania vararahi ida trigo ꞌbaꞌdani hoariha.
Kanamini odorini movajorakiꞌihi.
ꞌDamani abohani abihiarini mani ida anaraꞌokhoni hija.
Movani kamaꞌdani vani araꞌokhoꞌihi.
Onivani fori hini ijaꞌari vahoariha Deus athi-ra vakamithaki.
Vanofihi,
khai vakhanimaniha.
Mahi ipohiriki vani khai vaniꞌaja ida Deus athi.
Jorakia vakajariꞌdaꞌihi.
Kamaꞌdaꞌihi ida Jahari vaꞌora kaboroborovini,
oniani ida Deus athi-ra vakavaꞌipahinivini hija.
14 Hogoi ꞌdamania vararahi ida trigo ꞌbaꞌdani hoariha.
Hogoia binajaharihi,
bonohi,
ni-aꞌdiꞌiki ida trigo bononi.
Onivani fori vihira adani ijaꞌari vahoariha Deus athi-ra vakamithaki.
Vakavaꞌibodivaranihaꞌoadahahi ida vakadiꞌbai-ra vanakoꞌdihavini,
vakadinahina-ra vakapavakarihavini,
vakadibadani hiki.
Vakadivaꞌikhaiini ꞌbadara vavaꞌi biakanaraꞌbanahanakhamavini.
Jiniro-ra vanofikarahovini mani ida Deus athi-ra vanofijahakiravini hija,
oniani ida Deus athi-ra vanaabaravini hija jaboni.
Onivani fori hija ida arabo rakhajahani bonorini.
15 Hari.
Arabo jahakia makhira binatxiotxiohi ida trigo ꞌbaꞌdani hoariha.
Movahi,
karahoꞌihi,
bonoꞌihi.
Aipohiꞌihi ida ꞌbaꞌdani.
Trigo avani bononi ꞌbaꞌdani ipohini 100.
Onivani fori hini vahoariha vakamithaja ida Deus athi.
Vavaꞌi bodinia vanaibavijahaki ida.
Deu-ra vanofivini mani ida athi vanaabajahakivini hija jaboni.
Ni-vakavaꞌipahiniki ida Deus athi,
oniani ida vakadihojai jahaki anaꞌbaꞌdini hija — vaꞌora niꞌaha ada Jesus.
Lamparina vagani karajomihi hida
16 Hari.
Jesus vaꞌora vara niꞌaꞌianavini hihi hida rajomi kavaranihi hoariha.
Jesus vaꞌora niꞌaha:
—Kodivarani fori hiki ida lamparina vagani.
Lamparina-ra anahaꞌdihi,
ni-siꞌaha akaasiaki kabodinia anahojaki ida lamparina,
ni-cama kanaboꞌania anahojaki.
Gora bodini nama vania anahojahi ida lamparina vagaja kaimoni ida gora bodini.
Ijaꞌari aviꞌoikia vanokiki ida gora bodini vagani.
17 Hidakabaꞌi ahojaki ida ijaꞌari kavaꞌibodivarani.
Khaki ida mahi kodivarania binanokiaki bana ida ijaꞌari kavaꞌibodivarani,
nahina hoarani ahojajanaria kaimoni.
Vagani kania hojani fori hiki ida.
18 Mitha vaniꞌajahaki bana hida kodivarani.
Mitha avakhanijahakihi;
avarigajahakihi hida avarigaꞌiariki.
Oathi-ra avanaabahi;
Deus aꞌonira kakodiahi avarigajahakija kaimoni hida kodivarani.
Oathi-ra avanaabarihi;
avarakavaꞌiꞌbirinihi ida paꞌitxi avarigaꞌiki — vaꞌora niꞌaꞌaha ada Jesus.
Vikhaki adani Jesus kaamia, kidikajoꞌo vihiki
19 Hari.
Oniaroa,
Jesus kania vikhamaiꞌaha adani kidiamia,
kidikajoꞌo vihiki.
Ijaꞌari vaipohiki vahararana hojaha ada Jesus,
oniani ida vanamaakariravini hija.
20 Oniaroa,
ijaꞌaria binavaꞌisohiꞌaha ada Jesus:
—Adani gora baninija vahojaha kadamia,
kadakajoꞌo vihiki,
ira vara vaniꞌavini-ra vanofiki.
21 Hari.
Jesus vaꞌora niꞌaha adani ijaꞌari hahavi vajoroniki:
—Ijaꞌari Deus athi-ra vakamithajahakihi,
vanaabajahakihi jaboni;
kodiamia,
oigamina fori vihiki adani — vaꞌora niꞌaha ada Jesus.
Jesua bikaabaniki ida sirisiriki, komini kihiki
22 Hari.
Mahi hoariha,
Galiléia kaꞌdakoni vadinia vahojaha adani Jesus kidipohi khama.
Vakiꞌdamaꞌaha kanava kabodinia.
Vaꞌora niꞌaha:
23 —Aakakafianiꞌava.
ꞌDako pitanija Jesu-ra avakavikafianiꞌaha adani kidipohi.
Avakakafianina kabaꞌi,
vadiꞌaha ada Jesus.
Sirisiriki danoki kamaꞌdaꞌihi.
Komini kanaꞌbahakia biakapahakarahoꞌihi ida kanava,
kaꞌbiriꞌbiriꞌihi.
24 Oniaroa,
kidipohia vanamaakariꞌaha ada Jesus,
vakananokiahiꞌaha vaniꞌaha:
—Jesus,
Jesus,
aahidanaꞌiki bana hari!
Nokho aforaꞌaha.
Gamaꞌaha,
bikaabaniꞌihi ida sirisiriki,
komini kihiki.
Jesua biniꞌahi:
—Radahaꞌa!
Radahaꞌihi ida sirisiriki,
karadahaꞌihi jaboni ida komini kanaꞌbahaki.
25 Oniaroa,
kidipohi-ra vaꞌora niꞌaha:
—Nahina mani ida Deus aꞌonira akadavaꞌavini-ra avakajariꞌdavini hija?
Sirisiriki komini kihiki jorakia karadahani mani ida vaꞌora naimahidaja.
Vakavaꞌibodivaranikarahoꞌaha.
Oniaroa,
vaabono vakaniꞌakhamaꞌaha:
—Makhira kaꞌoa hiriha hada?
Ni-anokiꞌiaki kaho ida ijaꞌari hoariha ovari fori hiki sirisiriki,
komini kihikia athi bikamithaki — vaabono vakaniꞌakhamaꞌaha.
Makhira kabajadiki aihotana varani hini hida
26 Hari.
Galiléia kaꞌdakonia avikafianiha adani Jesus.
Gerasa kaarabonia avakoꞌomisiꞌaha.
27-29 Vigaimoriha.
Makhira kabajadiki Jesu-ra karagararihaꞌaha.
ꞌDama kania ibaviki ada makhira.
Badara ipohiki ni-ibaviki gora bodinia.
Barobarona adahaki ada makhira.
Bajadia bigathibakhiaki ada.
Bikanaꞌbararaharahabakhiamanihi hida corrente saꞌa,
ꞌdama kihiki kodabohabakhiani kihiki,
sidaji kaijaꞌarinia vanaahobakhiavini ada.
Bajadia biavikhabakhiaki ada amasia.
Hari.
Kabajadikia binokiha ada Jesus,
bodiꞌbarahaꞌaha,
kajoꞌatharariꞌaha Jesus viaha.
Jesua biniꞌaha:
—Bajadi,
akaraꞌoꞌa!
Kabajadikia biniꞌaꞌaha bodiꞌbarahana:
—Jesus,
nahina hida kodiania inofija?
Ivani Deus danoki nama hojaki kaisai i.
Hariꞌa jaharikia haria arakha bana!
30 Jesua binanaꞌdohiha ada makhira kabajadiki:
—Nahina ionija?
Bigathanihi ida Jesus athi:
—Bajadi vaipohiki hora vagathivini mani ida ijaꞌari hora vanaonivini hija Îpohikia.
31 Oniaroa,
bajadia vakanikhariaha ada Jesus:
—Hariꞌa haria karona Ibavi Jaharikaꞌoakia aokhana — Jesu-ra vaniꞌaꞌaha.
32 Hari.
Arabo namahiki maakarinia vahojamaniha adani hirari vaipohiki viꞌbaiki.
Bajadi Jesu-ra vakanikhariaꞌaha:
—Haria karonaꞌa hirari vakadiania mahija haria vavaadahaꞌavini.
—Vaadahaꞌa!
— Jesus vaꞌora niꞌaha adani bajadi.
33 Hari.
Makhira kania vakaraꞌoꞌaha adani bajadi,
hirari-ra vagathiꞌaha.
Vakiꞌdarahahaꞌaha,
avikharafoniꞌaha,
arabo aꞌdomarariki kania avakiꞌdafafoniꞌaha,
avahidanaꞌaha.
34 Oniaroa,
vaofiniꞌaha adani makhira hirari-ra avakadavaꞌaki,
avigaꞌaha.
Ijaꞌari vaibavia avakhanoꞌaha,
vaꞌora vakanamoniꞌaha hirari vapohimajaꞌina.
35 Oniaroa,
ijaꞌari vaipohiki moni kamithava vaꞌora vanavanavanahaꞌaha adani hirari vapohimajaꞌiki.
Jesus kania avikhaꞌaha.
Vanokiꞌaha ada makhira kabajadijanarina.
Jahana vani vanokiꞌaha.
Vithina,
kamakariꞌina jaboni vanokiꞌaha.
Bajadi ai vihiꞌina naothinia ni-kabajadijanaki.
Vakavaꞌibodivaranikarahoꞌaha ada makhira.
36 Hirari avakadavaꞌava abono vaꞌora vaniꞌaha adani vavanavanahaki:
—Anokiꞌiki ada Jesus makhira kabajadiki-ra anaihotaꞌavini.
37 Oniaroa,
Jesu-ra vifiniꞌaha adani Gerasa kaaraboni kaijaꞌarini moni-ra vakamithaꞌiki.
Vaniꞌaha:
—Ajihiꞌa bana akadiaraboa!
38 Hari.
Ajihiꞌaha ada Jesus.
Kiꞌdamana kabaꞌi kabajadijanariki Jesu-ra kanikhariadanokiꞌaha:
—Onofiki kadania ookhana!
Jesua biniꞌaha:
39 —Iniani.
Igorania ajoiꞌa bana mahija kadaijaꞌari-ra vaꞌora vara iniꞌavini hini hida Deus ira kajoamoravini,
Deus ira vaꞌadivini.
Oniaroa,
ajihiꞌaha ada makhira,
sidaji kaijaꞌarini-ra vaꞌora kanamonivini hiꞌihi ida Jesua bikajoamoraꞌavini.
Jairoa bikanikhariaki ada Jesus
40 Hari.
Oniaroa,
avakajoifianiha adani Jesus kidipohi khama.
Avakoꞌomisiha,
vahojamaniha adani ijaꞌari vâipohiki Jesu-ra vanokhavini.
Khai vaniꞌaꞌihi ida Jesus vakajoifianina.
41 Oniaroa,
Jesus kania khaꞌaha ada makhira Jairo oniki.
Judeus kaijaꞌari Deu-ra vara vaniꞌavini kagorani akadavaꞌava abono ada Jairo.
Vaꞌi bodinia abono-ra niꞌaha:
—Kaꞌdaꞌdi oamani ada Jesus — oniani ida Jesus viaha nakajoꞌathararina hija.
42 Oniaroa,
Jesu-ra kanikhariaꞌaha ada Jairo:
—Onofiki bana ida ogorana iokhani.
Kodisai kavamonikarahoki.
Abinihani amaakariki ida.
Hoarani oamani ida kodisai.
Kabadarani 12 hiki ida ipohini — niha ada Jairo.
Oniaroa,
ai vihiꞌaha adani Jairo Jesus khama.
Vaadahana kabaꞌi ijaꞌari vâipohiki Jesu-ra vakaꞌdokhoꞌdokhorisahakhamaki.
Jesua bianaihotaki ida gamo
43 Hari.
Ijaꞌari vahararana hojajabanaki ida gamo kavamoniki.
12 badara ipohini amani aforarini hojaki ida gamo.
Mijiko vaipohikia vanaihabakhiavini kabaꞌi,
ni-ahajanipaꞌitxiki ida gamo.
Bivaihimiꞌimarinihi ida kidijiniro.
44 Oniaroa,
Jesus kaida-ra kanamaakariꞌihi.
Vahoariha vanokiravini kabaꞌi,
bikadasahi ida Jesus kakarahobi ihini.
Aforaꞌihi ida amani.
45 Oniaroa,
Jesus vaꞌora nanaꞌdohiꞌaha adani ijaꞌari:
—Hana hini mani ida kodikarahobi-ra kadasaja?
—Ni-aogaki,
ni-ira akadasarihi — vakhanihahaviꞌaha.
Oniaroa,
Pedroa biniꞌaha:
—Jesus,
ijaꞌari vâipohiki vahararana ihojaki i.
Ira vakaꞌdokhoꞌdokhohahaviki adani — niha ada Pedro.
46 Oniaroa,
Jesus vaꞌora niꞌaha:
—Ijaꞌari hora kadasaꞌiki ho.
Oogaki ida odanona ijaꞌari-ra anaihotaꞌavini.
47 Ni-gamoa bikaabokajanaki ida aihotaꞌini-ra anahojavini.
Jesua bikajaꞌoriaki abononi vanihavini mani ida naimahidani hija.
Tharararani mani ida naꞌbisonini hija Jesus viaha.
Ijaꞌari vaipohiki vaviaha Jesu-ra niꞌaꞌihi:
—Badara ipohiki vani okavamonija.
Ira okajariꞌdaravini mani ida hora ianaihotavini-ra oogavini hija,
oniani ida kadakarahobi-ra okadasavini hija.
Ojahaꞌiki ho — nihi ida gamo.
48 Hari.
Jesua biniꞌaꞌihi:
—Kodisai,
hora ikajariꞌdaravini mani ida ira oanaihotavini hiꞌia.
Adahaꞌa,
ivaꞌini jahajahaꞌini.
Jesus bianahokiꞌiki ida Jairo kaisai
49 Hari.
Oniaroa,
vara nina kabaꞌi ada Jesus,
Jairo kahonai abono akhanoꞌaha.
Biniꞌaha ada Jairo:
—Ida abiniꞌihi kadaisai.
Ni-nahina kaimoni iavikhajanariha o Jesus — Jairo-ra niꞌaꞌaha.
50 Jesua bikamithahi ida vakadivarani.
Oniaroa,
Jairo-ra niꞌaha:
—Hariꞌa ofini.
Hariꞌa jariꞌda.
Ahokiki bana ida kadaisai — niha ada Jesus.
51 Hari.
Avikhaꞌianaha adani Jesus.
Jairo gorana vakaikahiꞌaha.
Jesua binofirihi ida ijaꞌari vaipohiki gora aviꞌoina kidiania.
Aviꞌoiki adani Pedro,
João,
Tiago vihiki.
Hojaki ada isai kaabiꞌi,
hojaki ida isai kaamia jaboni.
52 Vaꞌora vanokiha adani ijaꞌari isai abaꞌoni-ra vavaasaraki.
Jesua biogaki ida isai-ra anahokivini,
oniani ida vaꞌora niꞌavini hija:
—Hariꞌa vaasara.
Abinirihi oni isai,
vadikaꞌoaki oni.
53 Jesus athi-ra vakajariꞌdaki,
oniani ida Jesu-ra vakanahahanihavini hija.
Abinikaꞌoani avigaki ida isai.
54 Hari.
Jesua binamaakariꞌihi ida isai abaꞌoni,
biagathiꞌihi ida saꞌani,
athi ꞌbarakia biniꞌaꞌihi:
—Isai,
gamaꞌa!
55 Oniaroa,
jorakia ahokiꞌihi,
gamaꞌihi ida isai.
Adahaꞌianahi,
jahaꞌini.
Isai kaamia-ra vaꞌora niꞌaha ada Jesus:
—Isai-ra ꞌbaia vanoꞌaꞌa bana.
56 Oniaroa,
isai kaabiꞌi,
kidiamia hikia vakavaꞌibodivaraniꞌihi ida isai-ra anahokiꞌavini.
Oniania,
Jesus vaꞌora kaabaniꞌaha:
—Hariꞌa bana vahoariha vakadiania vananamithaꞌa bana hida kodibadani.