Makhira kabajadiki aihotana varani hini hida.
5
Hari.
Galiléia ꞌdakoa avakakafianiha adani Jesus.
Gerasa kaarabonia avakoꞌomisiꞌaha.
2 Avigaimoriꞌaha.
Oniaroa,
Jesu-ra karagararihaꞌaha ada makhira kabajadiki ꞌdama kania khanaina.
Jesus expulsa alguns demônios (Marcos 5:1-20)
3 Jaꞌdi kahodijamaꞌoki bodinia ibaviki ada makhira kabajadiki.
Ijaꞌaria vagathibakhiaha,
vanofiki ida vanaahovini correntea,
ni-vakaabokaki ada makhira.
4 Bikanaꞌbararaharahabakhiamanihi ida corrente saꞌa,
ꞌdama hiki kodabohabakhiani hiki.
Ni-nahina bikaabokaki ada makhira.
5 Mahi oadani,
joma oadani,
ꞌdama kania adahana,
arabo namahikia adahana jaboni,
bodiꞌbarahaꞌaha,
abono-ra vasiinanahaꞌaha jaꞌdia.
6 Hari.
Kabajadikia napaja bianokiha ada Jesus.
Kiꞌdarahahaꞌaha,
kajoꞌatharariꞌaha Jesus viaha.
7-8 Jesua biniꞌaha:
—Bajadi,
akaraꞌoꞌa!
Kabajadikia biniꞌaha bodiꞌbarahana:
—Jesus,
nahina hida kodiania inofija?
Ivani Deus danoki nama hojaki kaisai i.
Deus onina ira okanikhariaki bana ho.
Hariꞌa jaharikia haria arakha bana.
9 Jesua binanaꞌdohiha ada makhira kabajadiki:
—Nahina ionija?
Bigathanihi ida Jesus athi:
—Oonina ipohiki.
Bajadi vâipohiki hora vagathivini mani ida ijaꞌari hora vanaonivini hija Îpohikia.
10 Hariꞌa vaꞌora karona bana ibavi hoariha avikhana — Jesu-ra niꞌaꞌaha ada makhira kabajadiki.
11 Hari.
Arabo namahikia vahojamaniha adani hirari vaipohiki viꞌbaiki.
12 Bajadi Jesu-ra vakanikhariadanokiꞌaha:
—Haria karonaꞌa hirari vakadiania mahija haria vavaadahaꞌavini.
13 —Vaadahaꞌa!
— Jesus vaꞌora niꞌaha adani bajadi.
Hari.
Makhira kania vakaraꞌoꞌaha adani bajadi,
hirari-ra vagathiꞌaha.
Hirari vaipohina 2 mil.
Vâipohiꞌoamanira adani hirari.
Vakiꞌdarahahaꞌaha,
avikharafoniha,
arabo aꞌdomarariki kania avakiꞌdafafoniꞌaha,
avahidanaꞌaha.
14 Oniaroa,
vaofiniꞌaha adani makhira hirari-ra avakadavaꞌaki,
avigaꞌaha.
Ijaꞌari vaibavia avakhanoꞌaha,
vaꞌora vakanamoniꞌaha hirari vapohimajaꞌina.
Ijaꞌari gorania vakaikahinanaꞌaha,
vaꞌora vakanamoniꞌaha.
Oniaroa,
moni kamithava vaꞌora vanavanavanahaꞌaha adani hirari vapohimajaꞌiki.
15 Jesus kania avikhaha.
Vanokiꞌaha ada makhira kabajadijanarina.
Jahana vani vanokiꞌaha.
Vithina,
kamakariꞌina jaboni vanokiꞌaha.
Ni-kabajadijanaki.
16 Hirari-ra avakadavaꞌaki vaꞌora vaniꞌaha adani vaavanavanahaki:
—Anokiꞌiki ada Jesus makhira kabajadiki-ra anaihotaꞌavini.
Vaꞌora anokiꞌiki adani hirari vapohimajaꞌina.
17 Hari.
Gerasa kaaraboni kaijaꞌarini adani moni-ra vakamithaꞌiki.
Vakavaꞌibodivaraniꞌaha.
Jesu-ra vifiniꞌaha.
Vaniꞌaha:
—Ajihiꞌa bana akadiaraboa.
18 Hari.
Ajihiꞌaha ada Jesus.
Kiꞌdamana kabaꞌi,
kabajadijanariki Jesu-ra kanikhariadanokiꞌaha:
—Onofiki ida kadania ookhana.
19 Jesua biniꞌaha:
—Iniani.
Igorania ajoiꞌa bana mahija kadaijaꞌari-ra vaꞌora vara iniꞌavini hini hida Deus ira kajoamoravini,
Deus ira vaꞌadivini.
20 Oniaroa,
ajihiꞌaha ada makhira Decápolis kaaraboni kaijaꞌarini-ra vaꞌora kanamonivini hiꞌihi ida Jesua bikajoamoraꞌavini,
oniani ida ijaꞌari hahavi Jesu-ra vakavaꞌibodivaranikarahovini hija.
Jairoa bikanikhariaki ada Jesus
21 Hari.
Oniaroa,
avakajoifianiha adani Jesus kidipohi khama.
Avakoꞌomisiha,
vahojamaniha adani ijaꞌari vaipohiki Jesu-ra vanokhavini kaasia.
Oniaroa,
Jesus kania okhaꞌaha ada makhira Jairo oniki.
22 Judeus kaijaꞌari Deu-ra vara vaniꞌavini kagorani kakadavaꞌava abono ada Jairo.
Vaꞌi bodinia abono-ra niꞌaha:
—Kaꞌdaꞌdi oamani ada Jesus,
— oniani ida Jesus viaha nakajoꞌathararina hija.
23 Jesu-ra kanikhariadanokiꞌaha ada Jairo:
—Onofiki bana ida ogorana iokhani.
Kodisai kavamonikarahoki.
Abinihani amaakariki ida.
Kodisai-ra kaabadaha bana mahija aihotavini — niha ada Jairo.
24 Oniaroa,
Jesus khama avikhaꞌaha.
Avikhaha adani ijaꞌari vaipohiki jaboni.
Vaadahana kabaꞌi,
Jesu-ra vakaꞌdokhoꞌdokhorisahakhamaki.
Jesua bianaihotaki ida gamo
25 Hari.
Ijaꞌari vahararana hojajabanaki ida gamo kavamoniki.
12 badara ipohini amani aforarini hojahi ida gamo.
26 Mijiko vaipohikia vanaihabakhiavini kabaꞌi,
ni-aihotaꞌiaki.
Mijikoa vavaimaꞌbanaꞌahapikihi ida gamo.
Bivaihimiꞌimariniꞌihi ida kidijiniro.
Ni-ahajanipaꞌitxiki.
27-28 Oniaroa,
bikamithahi ida Jesus varani hina.
Abononi niꞌahi:
—Jesus kakarahobi-ra okadasahi;
oaꞌaihotahi.
Oniaroa,
Jesus kaida-ra kanamaakariꞌihi.
Vahoariha vanokiravini kabaꞌi,
bikadasahi ida Jesus kakarahobi.
29 Jorakia aforaꞌihi ida amani.
Aihotani-ra ogaꞌihi.
30 Hari.
Jesua biogaꞌihi ida hoarani aihotaꞌini.
Biogaki ida danona ijaꞌari-ra najahaꞌavini.
Roiribaniꞌaha,
vaꞌora nanaꞌdohiꞌaha adani ijaꞌari:
—Hana hini mani ida kodikarahobi-ra kadasaja?
31 Ipohina avigarihi ida gamo jahaꞌini,
Jesu-ra vaniꞌaha:
—Vaꞌora inokirara adani ijaꞌari vaipohiki ira vakaꞌdokhoꞌdokhohahaviki.
Nahina kaimoni mani ida haria inanaꞌdohivini hija kadakarahobi kadasahi hinia?
32 Jesus naothi-ra nokiribaniꞌaha,
biogaja kaimoni ida kidikarahobi kadasini hiki.
33 Hari.
Jahani-ra ogaꞌihi ida gamo.
Jesu-ra namaakarihi imahidani,
jaroni tharararahani.
Jesus viaha ꞌbisoniꞌihi,
binanamithaꞌihi ida aihotaꞌini.
34 Oniaroa,
Jesua biniꞌaꞌihi:
—Oigamina,
hora ikajariꞌdaravini mani ida ira anaihotaꞌia.
Adahaꞌa bana,
ivaꞌini jahajahaꞌini.
Jesu-ra kaaminaꞌihi,
ajihiꞌihi.
Jesua bianahokiki ida Jairo kaisai
35 Hari.
Oniaroa,
vara nina kabaꞌi ada Jesus,
Jairo kahonai abono vaipohiriki vakhanoꞌaha.
Jesu-ra vakaragarariꞌaha,
vaniꞌaha:
—Ida abiniꞌihi kadaisai.
Ni-nahina kaimoni iavikhajanariha o Jesus — Jairo-ra vaniꞌaꞌaha.
36 Jesua bikamithamanihi ida vakadivarani.
Oniaroa,
Jairo-ra niꞌaha:
—Hariꞌa ofini.
Hariꞌa jariꞌda!
37 Hari.
Jesua binofirihi ida ijaꞌari vaipohiki gora avikhana kidiania.
Vaꞌora vaꞌahaki adani Pedro,
Tiago,
Tiago kakajoꞌo João vihiki kaꞌoa avikhana kidiania.
38 Jairo gorana vakaikahiꞌaha,
aviꞌoiꞌaha,
vaꞌora vanokiha adani ijaꞌari vaipohiki saa vakhaniki,
vabodiꞌbarahana abaꞌoi-ra vavaasaravini.
39 Oniaroa,
Jesus vaꞌora niꞌaꞌaha:
—Niha avakhanimanija saa avakhaniꞌahapikiki?
Abaꞌoi-ra avavaasaraki jaboni.
Abinirihi oni isai,
vadikaꞌoaki oni — vaꞌora niꞌaha ada Jesus.
Jesua biogaki ida isai-ra anahokivini,
oniani ida vaꞌora niꞌavini hija:
—Abinirihi oni isai.
Vadikaꞌoaki oni.
40 Jesus athi-ra vakajariꞌdavini hiki abinirini bikahivini,
oniani ida Jesu-ra vakanahahanihavini hija.
Abinikaꞌoani avigaki ida isai.
Oniaroa,
Jesus vaꞌora honariaꞌaha avakaraꞌona.
Vaꞌora avavikhajakosiha adani isai kaamia,
kidiabiꞌi,
Jesus ipohina avahoarabakosiki vihiki.
Isai abaꞌoni omariamaꞌoki kania avikhamiꞌaha.
41 Hari.
Biagathiꞌihi ida isai saꞌani,
Jesua biniꞌaꞌihi:
—Talita cumi.
(Ariathia:
— “Isai,
gamaꞌa!”)
42 Hari.
Jorakia ahokiꞌihi,
gamaꞌihi ida isai.
Jahaꞌini,
adahaꞌianahi.
12 badara ipohini-ra vahojaki ida isai.
Oniaroa,
vakavaꞌibodivaranikarahoꞌihi ida Jesus isai-ra anahokiꞌavini.
43 Hari.
Jesus vaꞌora kaabaniꞌaha:
—Hariꞌa bana vahoariha vakadiania vananamithaꞌa bana hida kodibadani.
Oniaroa,
Jesus vaꞌora honariaꞌaha:
—Vanoꞌa bana ida isai ꞌbaia!