2 Rajomi kavaranihia vaꞌora vara niꞌaꞌaha:

3 —Mitha vaniꞌa.

Siroia okhaha ada makhira binatxiotxiohi ida trigo ꞌbaꞌdani.

4 Hagihi vadinia vararahi ida ꞌbaꞌdani hoarahanana.

Avigariha adani igitha vitxagatxagahahaviꞌihi.

5 Jaꞌdi namania vararahi ida ꞌbaꞌdani hoariha.

Abihiarihi ida nami jaꞌdi namania.

Odorihi ida nami,

movajorakiꞌihi.

6 ꞌDamani abohani abihiarini mani ida safini afana bianaraꞌokhovini hija.

7 Hogoi kajaroiki kania vararahi ida ꞌbaꞌdani hoariha.

Movahi ida jaboni hogoi,

rakhajahi-ra najahariꞌihi,

ni-bonoꞌiki.

8 Arabo jahakia vararahi ida ꞌbaꞌdani hoariha.

Movahi,

avijavahi,

bonoꞌihi.

Aipohiꞌihi ida trigo ꞌbaꞌdani.

Trigo avani hoarahanana bononi ꞌbaꞌdani ipohini 30.

Trigo avani hoarahanana bononi ꞌbaꞌdani ipohini 60.

Trigo avani hoariha bononi ꞌbaꞌdani ipohini 100.

9 Hari.

Kidirajomi kavaranihi anokhomiꞌini,

vaꞌora niꞌaha ada Jesus:

—Avamorobohahi;

mitha vaniꞌajahaki bana hida kodivarani.

10 Hari.

Ijaꞌari vaipohiki vahojajanarina,

Jesu-ra vaniꞌaha adani ipohina vahoariha khama:

—Ni-aogajahakiki ida rajomi kavaranihia ikavaranini.

Haria nanamithajahaki bana — vaniꞌaha.

11 Jesus vaꞌora niꞌaha:

—Deua binofiki ida avarigavini,

oniani ida Deus kaꞌdaꞌdi hina kavaranihia aꞌonira onanamithajahakivini hija.

Ijaꞌari vahoariha ni-avigavini vanofiki ida varani Deus vaꞌora vakaꞌdaꞌdivini.

Vakadiania vara ovaniꞌaki ida rajomi kavaranihi,

avigajorakiria kaimoni hida kodivarani.

12 Oathi-ra mitha vaniꞌavini kabaꞌi,

ni-nahina hini avigaki.

Avigaja vaha ida Deus athi nahina hini;

Deus kania vaabono gahinai vanihamaniha vaha;

vakadihojai asohiriki-ra vakavaꞌipahinikaꞌoamaniha vaha,

Deus binaꞌbiramaniha vaha ida vakadihojai asohiriki.

13 Oniaroa,

asia vara niha ada Jesus:

—Avarigarihi hida rajomi kavaranihi hoarani,

nihanikia koda avarigaki ida rajomi kavaranihi hoariha afohahavi?

14 Oniaroa,

Jesus vaꞌora nanamithavini hiꞌihi ida rajomi kavaranihi:

—Trigo ꞌbaꞌdani txiotxioni vani fori hija ida Deus athi kavaranihi.

Deus athi fori hiki ida trigo ꞌbaꞌdani.

Vara bivaniꞌahi ida Deus athi,

trigo ꞌbaꞌdani-ra natxiotxiovini vani fori hihi.

15 Hagihia vararahi ida trigo ꞌbaꞌdani.

Igitha vahaꞌihi.

Onivani fori vihira adani ijaꞌari vahoarahanana Deus athi-ra vakamithaki.

Hari.

Oniaroa,

khaki ada Jahari Deus athi-ra anihavini vaꞌini bodinia,

oniani ida Deus athi-ra vakavaꞌiꞌbirinivini hija.

16-17 Jaꞌdi namania vararahi ida trigo ꞌbaꞌdani hoariha.

Kanamini odorini movajorakiꞌihi.

ꞌDamani abohani abihiarini mani ida anaraꞌokhoni hija.

Movani kamaꞌdani vani araꞌokhoꞌihi.

Onivani fori vihira adani ijaꞌari vahoariha Deus athi-ra vakamithaki.

Vanofihi,

khai vakhanimaniha.

Mahi ipohiriki vani khai vaniꞌaja ida Deus athi.

Deus kaijaꞌari vihina kamaꞌdaꞌini mani ida vahoariha vaꞌora vanajahariharivini hija,

oniani ida Deus athi-ra vakavaꞌipahinivini hija.

18-19 Hogoi jaroki ꞌdamania vararahi ida trigo ꞌbaꞌdani hoariha.

Hogoia binajaharihi,

bonohi,

ni-aꞌdiki ida trigo bononi.

Onivani fori vihira adani ijaꞌari vahoariha Deus athi-ra vakamithaki.

Vakavaꞌibodivaranihaꞌoadahahi ida vakadiꞌbai-ra vanakoꞌdihavini,

vakadinahina-ra vakapavakarihavini,

vakadibadani hiki.

Vakadinahina aipohini-ra vanofiki adani.

Jiniro-ra vanofikarahovini mani ida Deus athi-ra vanofijahakiravini hija,

oniani ida Deus athi-ra vanaabaravini hija jaboni.

Onivani fori hija ida rakhajahi,

ni-bonoꞌiki.

Onivani fori vihiki adani ijaꞌari vamorobohariki fori vihina.

20 Hari.

Arabo jahakia makhira binatxiotxiohi ida trigo ꞌbaꞌdani hoariha.

Movahi,

naꞌbahaꞌihi,

bonoꞌihi.

Aipohiꞌihi ida ꞌbaꞌdani.

Arabo jahaki fori vihiki adani.

Onivani fori vihira adani ijaꞌari vahoariha Deus athi-ra vakamithaki.

Vakamithahi,

avigahi ida Deua binofiki bada vaniꞌavini,

oniani ida vanaabajahakivini hija.

Trigo ꞌbaꞌdani 30 hiki vani fori vihira adani ijaꞌari Deus athi-ra vanaabavini paꞌitxini.

Trigo ꞌbaꞌdani 60 hiki vani fori vihira adani ijaꞌari Deus athi-ra vanaabavini doronini.

Trigo ꞌbaꞌdani 100 hiki vani fori vihira adani ijaꞌari Deus athi-ra vanaabajahakiki.

21 Hari.

Jesus vaꞌora vara niꞌaꞌianavini hihi ida rajomi kavaranihi hoariha.

Jesus vaꞌora niꞌaha:

—Lamparina vagani fori hiki hida kodivarani.

Gora vagani-ra anofihi;

ni-siꞌaha akaasiaki kabodinia anahojaki ida lamparina,

ni-cama kanaboꞌania anahojaki jaboni.

Gora bodini nama vania anahojahi ida lamparina,

vagaja kaimoni ida gora bodini.

22 Hidakabaꞌi ahojaki ida ijaꞌari kavaꞌibodivarani.

Khaki ida mahi kodivarania binanokiaki bana ida ijaꞌari kavaꞌibodivarani,

nahina hoarani ahojajanaria kaimoni.

Vagani kania hojani fori hiki ida.

23 Avamorobohahi;

mitha vaniꞌajahaki bana hida kodivarani.

24 Mitha vaniꞌajahaki bana hida kodivarani mahija avarigajahakiꞌavini.

Hariꞌa vaꞌora anaathidanoarari bana adani vahoariha Jahari kabadania vakabadanina,

avarigaravini oadani vanamonahavini vanamonaharavini.

Vaꞌora avaranaathidanoarariha;

Deus aꞌonira anaathidanoararihi bana jaboni.

Deus aꞌonira anaathidanoararivini arafiaki bana aꞌoni.

25 Oathi-ra avanaabahi;

Deus aꞌonira kakodiahi avarigajahakija kaimoni ida kodivarani.

Oathi-ra avanaabarihi;

avarakavaꞌiꞌbirinihi ida paꞌitxi avarigaꞌiki — vaꞌora niꞌaꞌaha ada Jesus.

26 Rajomi kavaranihi hoariha vaꞌora vara niꞌavini.

Jesua biniꞌaha:

—Baꞌbaꞌda avijavani vani fori hini hida Deus ijaꞌari-ra vakaꞌdaꞌdivini.

Ijaꞌaria bikarakhaihi ida jaroꞌoa kaꞌbaꞌdani.

27 Ni-biakogaki ida kidibaꞌbaꞌda niha khanikhanini kamovani,

kavijavaꞌini.

Bikarakhaivini naothinia joma vadihi,

mahia nokihi.

Binokhaꞌihi ida kidirakhajahi movaꞌini,

karahoꞌini.

Ni-biakogaki ida jaroꞌoa kavijavani niha khanikhanini.

Ni-biakogaki jaboni ida kabonoꞌini niha khanikhanini.

Biogaravini kabaꞌi namithaꞌihi.

28 Araboa movaꞌihi ida kidibaꞌbaꞌda,

jahahi,

bonoꞌihi.

Afani afoꞌimidia nokiaki naothinia avani maina hida avijavahi.

Karahoꞌihi,

movaꞌihi,

bonoꞌihi.

29 Naꞌbahaꞌihi ida bononi,

aꞌdiꞌihi,

aniani kamahini aꞌboahahavihi ida avani — niha ada Jesus.

30 Hari.

Vara niꞌaꞌianaha ada Jesus:

—Aꞌonira vara oniꞌavini hiki ida bana rajomi kavaranihi hoariha.

Mostarda ꞌbaꞌdani avijavani fori hiki ida Deus ijaꞌari-ra vakaꞌdaꞌdivini.

31-32 Itxanini arafiaki ida mostarda ꞌbaꞌdani.

Ijaꞌaria birakhaihi ida mostarda ꞌbaꞌdani kidisiroia.

Movahi,

avijavahi,

karahoki ida mostarda avani.

Patxapatxahaki ida.

Vadini avijavani naꞌbahaki jaboni.

Igitha raboki kagorahaki vadinia afani hararania.

Itxanini arafiaki ida baꞌbaꞌda,

kabaꞌi,

mostarda ꞌbaꞌdani movahi,

avijavaꞌihi,

karahoꞌihi — niha ada Jesus.

33 Rajomi kavarani ipohikia kavaraniha ada Jesus.

Binofiki ida ijaꞌaria kidivarani vakamithavini,

avigajahakija kaimoni nahina hini.

34 Rajomi kavaranihi kaꞌoa-ra vara vaniꞌaki ada Jesus.

Ijaꞌari vaipohiki vahojajanarina,

ipohina-ra vaꞌora vara niꞌahahavivini hiꞌihi ida kidivarani nahina hini,

avigajahakija kaimoni.

35 Hari.

Mithani asia mani kanava kabodinia hojaha ada Jesus.

Hari.

Ipohina-ra vaꞌora niꞌaha:

—Aakakafianiꞌava.

36 Hari.

Vaꞌora vakaaminaꞌaha adani ijaꞌari vaipohiki,

vakiꞌdamaꞌaha adani Jesus,

ipohina khama.

ꞌDako pitanija Jesu-ra avakavikafianiꞌaha.

Kanava kaipohiki aakafianisiagaki.

37 Hari.

Avakakafianina kabaꞌi,

kamaꞌdaꞌihi ida sirisiriki danoki.

Komini kanaꞌbahakia biakapahakarahoꞌihi ida kanava.

38 Hari.

Vadisiagaꞌaha ada Jesus.

Kaꞌdaꞌdi kanaboꞌania kahojahi ida ꞌdaꞌdijora.

Avikhamahanaꞌaha adani Jesus ipohina kidiania.

Vakananokiahaꞌaha:

—Jesus,

Jesus.

Haria akavaꞌijoa bana!

Aahidananaki bana hari!

Haria koda inakaidivaria?

39 Nokho aforaꞌaha.

Gamaꞌaha,

bikaabaniꞌihi ida sirisiriki,

komini kihiki.

Jesua biniꞌahi:

—Radahaꞌa!

Radahaꞌihi ida sirisiriki.

Karadahaꞌihi ida komini kanaꞌbahaki.

40 Ipohina-ra vaꞌora kaniꞌaꞌaha:

—Niha avakhanimanija avaofiniki?

Deu-ra vavakaijoka bana!

Avakajariꞌdamanija ida Deus aꞌonira akadavaꞌavini?

— niha ada Jesus.

41 Komini jorakia karadahani mani ida vaꞌora naimahidaja.

—Makhira kaꞌoa hiriha hada.

Ni-anokiꞌiaki kaho ida ijaꞌari hoariha ovari fori hiki sirisiriki,

komini kihikia athi bikamithaki — vaabono vakaniꞌakhamaꞌaha.