2 Vahojaki jaboni adani ijaꞌari Jesus kabadani-ra vavajahariki.

Vavajaharihi hida Jesus ijaꞌari kavamoniki-ra anaihotavini avakoirina kamahini,

oniani ida Jesu-ra vada vaniꞌavini hihi.

Bianaihotaha;

Jesu-ra vakaihamahiꞌaha.

Vanofiki ida Jesu-ra avanaathidanoararivini:

—Inaabariki ida Deus kavaꞌisohihi jiriki.

Ni-bivaꞌahaki ida ijaꞌari kavamoniki-ra ianaihotavini aakoirina kamahini.

3 Oniaroa,

Jesua biniꞌaha ada makhira saꞌa akasakarabakosiki:

—Gaaꞌa.

Hida kha kodiania.

4 Jesus vaꞌora nanaꞌdohiꞌaha adani vahoariha:

—Nahina mani ida papira athinia Deus ijaꞌari aakoirina kamahini vaꞌora vara vaniꞌavini hija?

Hana hini badani koda ida Deus kavaꞌisohihi jiriki haria vaꞌahavini hija aakoirina kamahini?

Bivaꞌahamanija koda ida hoariha-ra aakodiavini?

Haꞌa.

Bivaꞌahamanija koda ida hoariha-ra avaꞌadiravini?

Iniani.

Bivaꞌahamanija koda ida hoariha-ra aakavaꞌijoavini?

Haꞌa.

Bivaꞌahamanija koda ida hoariha abinini.

Iniani.

Hana hini badani ida Deus kavaꞌisohihi jirikia bihonariaja aakoirina kamahini bada aniꞌavini?

— vaꞌora niꞌaha ada Jesus.

Ni-nahina Jesus athi-ra vagathaniꞌiki.

Viso vakhaniꞌoamaniha adani ijaꞌari.

5 Oniaroa,

vaꞌora vada niꞌaribaniꞌaha ada Jesus,

ihamahiꞌina.

Ijaꞌari-ra vavaꞌadiravini mani ida Jesus vaꞌi-ra mokara niꞌaꞌia.

Makhira-ra niꞌaha:

—Isaꞌani-ra akanaviraꞌa.

Saꞌa-ra akanaviraꞌaha,

akaihotaꞌihi ida saꞌa.

6 Oniaroa,

judeus kaijaꞌari Deu-ra vara vaniꞌavini kagorania avikhaonaniha adani farisio,

Iroji ipohina khama.

Jesus makhira-ra anaihotavini mani ida vavaꞌi najokojokoni hija.

Vaabono vara vakaniꞌakhamaꞌaha:

—Ni-jahapaꞌitxiki ida ijaꞌari kavamoniki aihotani kabadanihia kabadanina aakoirina kamahini.

Niha aniꞌaꞌaki koda ada Jesus.

Abinina jahaki ada — vakhaniꞌaha.

7 Oniaroa,

ai vihiꞌaha adani Jesus,

ipohina khama.

Galiléia kaꞌdakonia avakhanofoniha.

Avikharafonisiagaha adani ijaꞌari vâipohiki Jesus vanaothia Galiléia kaaraboni kaijaꞌarini,

Judéia kaaraboni kaijaꞌarini,

8 Jerusalém sidaji kaijaꞌarini,

Iduméia kaaraboni kaijaꞌarini,

Jordão vaini oniki banininija kaijaꞌarini,

Tiro sidaji ꞌdihani kaijaꞌarini,

Sidom sidaji ꞌdihani kaijaꞌarini vihiki avikharafonisiagaki Jesus vanaothia.

Vahihavifoniꞌaha adani ijaꞌari vâipohiki vajoroniꞌina.

Jesus kabadani varani hini-ra vakamithavini mani ida vaꞌora rakhaonanihahavija Jesus kania.

Vaꞌora anaihotaha adani ijaꞌari vaipohiki.

9-10 Vakavamonikia vanofiki ida Jesu-ra vakaabadavini,

avaihotara kaimoni.

Ijaꞌari vaipohikia vakaabadabadarisahakhamaha ada Jesus vakahararahakhamaꞌaha,

araꞌaraꞌaha ada Jesus.

Oniania,

Jesus vaꞌora navaꞌisohiha adani kidipohi:

—Vakavikha oni kanava mahija kamaakarivini.

Hora vanaꞌaraꞌaraki hadani ijaꞌari vaipohiki.

Okiꞌdamana-ra onofiki ho.

11 Ijaꞌari vaipohiki vahararana vahojaki jaboni adani ijaꞌari vakabajadiki.

Kabajadikia binokiha ada Jesus,

adariꞌaha Jesus viaha,

bodiꞌbaraha:

—Ivani Deus kaisai i — Jesu-ra niꞌaha.

12 Oniaroa,

Jesua biniꞌaha:

—Hariꞌa vaꞌora nanamitha Deus kaisai ohina — bajadi-ra kaabanidanokiꞌaha ada Jesus.

Onivani fori vihiha adani vakabajadiki vahoariha vaakaikahirisahakhamaꞌina.

13 Hari.

Oniaroa,

ajihiꞌaha ada Jesus.

Arabo namahikia ogaimoriꞌaha.

Jesus vaꞌora baranahaꞌaha adani makhira vaꞌora nofiki kidiania vikhara kaimoni.

Athi vanaabaꞌaha,

avigaimoriha Jesu-ra vanamaakariꞌaha.

14 Vaꞌora nagathogathoꞌiki adani 12 makhira vaipohina,

vaꞌora naonivini athi avavaadahaoniva abono.

Vaꞌora niꞌaha:

16-19 Hiꞌadani 12 vihiki vaonina Simão,

Tiago,

João,

André,

Filipe,

Bartolomeu,

Mateus,

Tomé,

Tiago,

Tadeu,

Simão Zelotes,

Judas Iscariotes vihiki adani.

Jesus Simão-ra noꞌavini onii hoariha Pedroa.

Zebedeu kaisai viꞌbamiki Tiago,

João vihiki vaꞌora noꞌavini onii hoariha Boanerges.

(Boanerges ariathia Bahi Tararahaki.)

Tiago hoariha Alfeu kaisai.

Badara ahoarabakosiki radahaꞌihi naothinia,

Judas Iscariotes vaꞌora kakodiaki bana adani Jesu-ra vanaabinivini-ra vanofiki.

20 Hari.

Joiꞌaha ada Jesus gorana.

Ijaꞌari vaipohiki vajoroniꞌianana mani ida Jesus,

ipohina khama vaꞌora kanoꞌbaiharija.

21 Jesus igamina vakamithaꞌihi ida varani hina,

vaabono vakaniꞌakhamaꞌaha:

—Anikhava ada arigamina mahija agorana hojaꞌavini.

Ijaꞌaria kabajadiki vavanihaki ada.

22 Oniaroa,

vakhaniha adani judeus kaijaꞌari vakaꞌojomoꞌiva abono Jerusaléa vikhaꞌiki.

Vakhaniha:

—Bajadi vakadikaꞌdaꞌdi Biosibo Jahari onikia Jesus vaꞌi-ra nahonariahihivini.

Biosiboa binoꞌaki ada Jesus danona,

bikaabokaja kaimoni ida bajadi akaraꞌoꞌini — vakhaniha.

23 Oniaroa,

ijaꞌari-ra baranahaꞌaha ada Jesus kidiania.

Vaꞌora niꞌaha:

—Rajomi kavaranihi-ra vara ovaniꞌaki bana ho,

avarigaja kaimoni ida Biosibo Jahari hora noꞌaravini danona.

Ni-ovaꞌi-ra nahonariahihiki ada Jahari.

Ovaꞌi-ra nahonariahihira vaha;

ni-abono-ra vahonariahiki akaraꞌona.

Ni-Jahari akaraꞌona abono-ra vahonariahiki.

24 Arabo kaijaꞌarini vaabono vakodakhamaha;

vaabono vakanihimakhamaha.

25 Gora kaijaꞌarini vaabono vakodakhamaha;

vaabono vakanihimakhamaha.

26 Vakhaniha vaha jaboni adani Jahari kaijaꞌari vanokiariki.

Vaabono vakodakhamara vaha;

vaabono vakanihimakhamaha vaha jaboni,

ni-vahojajanaki vaha adani kidijaꞌari,

Jahari vaꞌora vakaꞌdaꞌdiki kaimoni.

27 Makhira danoki fori hiki ada Jahari.

Ijaꞌaria ni-bikaabokaki ida nahina makhira danoki gorana bodinia hojaki-ra saarivini.

Makhira danoki-ra dabohaꞌimidiaki ida ijaꞌari,

oniani ida kidinahina ipohiki bisaarivini bikaabokavini hija.

28 Kaꞌoa oamani ida oniꞌaki.

Deua bikaabokaki ida hojai asohiriki-ra naꞌbiravini.

Ijaꞌari varani jaharikia Deu-ra vakanavaranihavini,

Deua bikaabokaki ida varani jahariki-ra naꞌbiravini jaboni.

29 Ijaꞌaria Jahari kabadani hini bikahihi ida Maꞌonahai Jahaki kabadani,

jokoa Deua binaꞌbirarihi ida ijaꞌari kavarani jahariki.

Ni-Deua biakavaꞌiꞌbiriniki ida varani.

Mahi hahavi ni-biakariakapaꞌitxiki.

30 Anokhomiꞌihi ida Jesus kavarani.

Jesus vaꞌora kaabanidanokivini hiꞌihi ida kabajadina vakahivini.

31 Oniaroa,

vikhamaiꞌaha adani Jesus kaamia,

kidikajoꞌo vihiki.

Gora banininia vigaaboahaꞌaha.

Jesus baranahi hina-ra vavahonariahiꞌaha.

32 Ijaꞌari vaipohiki vavithiriahaki vahararana vabodi pana hojaha ada Jesus.

Oniaroa,

Jesu-ra vanavaꞌisohiꞌaha:

—Jesus,

adani gora ꞌdihania vahojaha kadamia,

kadakajoꞌo vihiki.

Ira vibaranahaki adani.

33 Jesus vaꞌora niꞌaha:

—Aꞌonira onanokiahivini hiki hadani kodiamia kodikajoꞌo kaꞌoa vihiki.

34 Oniaroa,

Jesus vada vaꞌora niꞌaribanaonivini adani ijaꞌari vavithiriahaki,

vaꞌora niꞌaha:

—Kodiamia,

kodikajoꞌo fori avihiki aꞌoni.

35 Ijaꞌaria binofihi ida hojai jahaki kodiabiꞌi nama hojakia bivajahaki;

binaabahi jaboni ida kodiabiꞌi athi;

kodiamia,

oigamina fori vihiha.