Jesus vaꞌora kaꞌojomoꞌivini hiki Deu-ra vara vaniꞌara kaimoni
11
Hari.
Oniaroa,
Jesua vara biniꞌaha ada Deus.
Anokhomiꞌihi ida kidivarani,
kidipohia bikanikhariaꞌaha:
—Aajo,
haria kaꞌojomoꞌi bana Deu-ra vara aniꞌaja kaimoni.
Vakhanina vani João vaꞌora kaꞌojomoꞌira adani ipohina.
2 Oniaroa,
Jesua bigathaniꞌihi ida athi:
—Nimania bana hida varani Deu-ra vara avaniꞌavini kaimoni:
“Akadiabiꞌi,
anofiki ida
ijaꞌari hahavi ijahakaꞌoani-ra avigavini.
Anofiki ida ijaꞌari hahavi-ra vaꞌora ivakaꞌdaꞌdivini.
Lucas 11:1-54
3 Hidakabaꞌi haria noꞌa bana ꞌbaia,
arihaki kaimoni.
4 Anofiki ida akadihojai asohiriki-ra inaꞌbiravini.
Vahoariha vakadihojai asohiriki-ra aakavaꞌiꞌbirinivini vani fori hini
anofivini jaboni ida akadihojai asohiriki-ra iakavaꞌiꞌbirinivini jaboni.
Haria kajoamora bana
mahija kaborohirohi
arihina kabaꞌi Jahari
athi-ra akamitharavini.”
Nimania hida Deu-ra vara avaniꞌavini.
5-6 Oniaroa,
Jesus vaꞌora niꞌaha adani ipohina:
—Vakavaꞌibodivaraniꞌa bana ada kadavaꞌahi igorania kaikahiꞌina joma ꞌboꞌda hini.
Vaiꞌamina kabaꞌi ni-nahina hojapaꞌitxirihi igorania bihaki kaimoni.
Oniaroa,
kadavaꞌahi hoariha gorana iokhamaihi,
ikanikhariaha:
“Hora kanarihai bana pão akahoarabakosikia.
Ada kaikahiꞌaha kodivaꞌahi,
napaja khaki ada.
Ni-nahina-ra ovahojaki
bihaki kaimoni.”
7 Vakavaꞌibodivaraniꞌa bana ida iathini-ra gathanionanivini:
“Hariꞌa kodivada-ra
kaꞌbaraha.
Kakaꞌoahaꞌiki ida gora
kaathani.
Aꞌomaꞌiki hari kodisai khama.
Ni-onofiki ida ogamana ira onoꞌaja kaimoni pãoa.”
Jesus vaꞌora niꞌaha adani ipohina:
8 —Kaꞌoa hiki hida kodivarani.
Kidivaꞌahi hina kabaꞌi,
ni-binofiki ida gamana bikajoamorara kaimoni.
Bikanikhariahaꞌoadahavini mani ida ragamana hija,
kidivaꞌahi-ra noꞌara kaimoni nahina biakanikhariakia.
9-10 Oniani ida aꞌonira onavaꞌisohivini hija;
Deu-ra vakanikharia bana avanofikia mahija avagathanivini.
Deus kania vakanikhariahaꞌoadaha bana ida avanofiki mahija aꞌonira noꞌavini hini ida avakanikhariaki.
Ijaꞌari hahavi nahina jahakia Deu-ra vakanikhariaha;
vagathanihi ida vakanikhariaki.
Ijaꞌaria binakoꞌdiha ada Deus;
bikaragaha.
11 Kadaisai ira kanikhariahi abaisana,
makha vania koda bana inoꞌara ada?
Iniani.
Jokoa nahina jaharikia inoꞌariha ada.
12 Banafa ira kanikhariaha,
akoro vania koda bana inoꞌara ada?
Iniani.
Jokoa nahina jaharikia inoꞌariha ada.
13 Aꞌonivani hojai asohirikia avakahojaini kabaꞌi,
avarigaki ida nahina jahakia avakadisai-ra avanoꞌavini.
Jahaꞌoamanira ada avakadiabiꞌi nama hojaki.
Bikaronaki bana ada Maꞌonahai Jahaki avakanikhariavini hiki.
Biosibo Jahari varani hina
14 Hari.
Oniaroa,
Jesua bihonariaki ida bajadi akaraꞌoni makhira kania.
Kabajadina oadani ada makhira ni-varavarana-ra kaabokaki.
Akaraꞌoꞌihi ida bajadi,
varavaraꞌaha ada makhira.
Ijaꞌari vâipohiki vajoronikia vakavaꞌibodivaranikarahoꞌaha ada Jesus.
15 Hari.
Vahoariha vaipohiriki vani adani vakhaniha:
—Bajadi vakadikaꞌdaꞌdi Biosibo Jahari onikia binoꞌaki ada Jesus danona,
bikaabokaja kaimoni ida bajadi akaraꞌoꞌini.
16 Hari.
Vahoariha vanofiki ida Jesu-ra vakaborovini bianahoarihaja kaimoni ida kidivarani,
oniania,
Jesu-ra vaniꞌaha:
—Anokivini anofiki ida Deus kabadani danoki-ra bada iniꞌavini.
Bada iniꞌahi;
Deus danona-ra ivahojavini-ra aogahi — Jesu-ra vaniꞌaha.
17 Hari.
Jesua biogamanihi ida vakadivaꞌibodivarani,
vaꞌora niꞌaha:
—Rajomi kavaranihi-ra vara ovaniꞌaki bana ho,
avarigaja kaimoni ida Biosibo Jahari vakadikaꞌdaꞌdi hora noꞌaravini danona.
Arabo kaijaꞌarini vaabono vakodakhamaha;
vaabono vakanihimakhamaha.
Gora kaijaꞌarini vaabono vakodakhamaha;
vaabono vakanihimakhamaha jaboni.
18 Vakhaniki jaboni adani Jahari kaijaꞌari vanokiariki vaabono vakodakhamara vaha;
vaabono vakanihimakhamamaniha vaha;
ni-vahojajanaki vaha adani kidijaꞌari Jahari vaꞌora vakaꞌdaꞌdiki kaimoni.
Asia vara niki ada Jesus:
—Avakadivarani hiki ida Biosibo Jahari hora noꞌavini danona bajadi akaraꞌoni-ra ohonariaja kaimoni.
Ni-asohiki ida avakadivarani.
19 Avaipohini jabonia vakaabokaki ida bajadi akaraꞌoni.
Kaꞌoa hija vaha ida avakadivarani,
Jahari vani koda danona vaꞌora noꞌara adani avaipohini?
Ni-Jahari vaꞌora noꞌariha adani danona.
Bajadi akaraꞌoni-ra vakaabokavini mani ida Deus danona-ra avarigavini hija.
Bajadi akaraꞌoni-ra vakaabokavini mani ida avakadivarani asohirikia avaipohini haria vananokiahivini hija.
20 Deus hora noꞌavini hiki hida odanona,
oniani ida bajadi akaraꞌoni-ra okaabokavini hija.
Deus danona-ra ovahojavini mani ida Deus avakadiania khaꞌina-ra avarigavini hija,
ijaꞌari-ra vaꞌora vakaꞌdaꞌdira kaimoni — vaꞌora niꞌaha ada Jesus.
21 Asia vara niꞌaha ada Jesus:
—Makhira danoki fori hiki ada Jahari.
Makhira danoki kasaꞌaikia biakadavaꞌavini oadani ida gorana,
ni-avisonipaꞌitxiki ida kidinahina.
22 Khaki bana ada makhira hoariha danona arafiaki kasaꞌaiki jaboni.
Ovaria bidaki hihada makhira,
bianahoroaja kaimoni ida gorana,
bisaariki ida makhira abono-ra vakaijokaki kasaꞌai.
Bisaariki jaboni ida kidinahina hahavi biravinaja kaimoni vahoariha vakadiania — niha ada Jesus.
23 Hari.
Asia vara niꞌaha ada Jesus:
—Ijaꞌari hora kakodiariki,
ni-hora nofiki.
Kodijaꞌari-ra vaꞌora onajoronivinia hora kakodiariha;
vaꞌora akarakhakhamaha — niha ada Jesus.
Ijaꞌari kania hojaki ida bajadi
24 Hari.
Vara niꞌianaha ada Jesus:
—Ijaꞌari kania akaraꞌoꞌihi ida bajadi,
adahaꞌihi kaijaꞌaririki kaarabonia.
Binakoꞌdihahi ida ibavi biavakoiriki kaimoni.
Bikaragarihi,
abononi niꞌahi:
“Oajoiki bana ho ogorana.
Ijaꞌari kania oakaraꞌoꞌina,
kidiania oajoiki bana ho.”
25 Oniaroa,
joiꞌihi,
bikaragaꞌihi ida gora bodini jahaꞌini dairiki.
26 Oniaroa,
ajihiꞌianahi ida bajadi,
vaꞌora anikhaꞌaha adani ipohini 7 vihiki vaipohina vajaharina arafiaki,
ijaꞌari kania vahojara kaimoni.
Bajadi hoarani hojani kari,
jaharihi ida ijaꞌari kamahi.
Bajadi vaipohiki vahojaꞌaha ijaꞌari kania,
jaharini arafiaꞌihi ida ijaꞌari kamahi — niha ada Jesus.
Deus bikajoamoraki ida ijaꞌari
27 Anokhomiꞌihi ida Jesus kavarani,
athini ꞌbarakia Jesu-ra niꞌahi ida gamo ijaꞌari vaipohiki vahararana hojaki:
—Deua bikajoamoraki ida kadamia ira namonahaꞌiki jahani bodinia,
ira kanajohohaki jaboni ida.
28 Jesua bigathaniꞌihi ida athini:
—Deus vaꞌora kajoamoraꞌoamanira adani ijaꞌari Deus athi-ra vakamithaki,
vanaabaki — niha ada Jesus.
Vanofiki ida badani danoki-ra vanokivini
29 Hari.
Oniaroa,
vajoroniꞌianaha adani ijaꞌari vaipohiki Jesus vahararana.
Vara vaꞌora niꞌaha:
—Jahari kahojaia vakahojaiki adani ijaꞌari hidakabaꞌi vahokiki.
Avanokivini avanofiki ida Deus kabadani danoki,
rajomi kaimoni ida Deus kodiania hojana.
Jokoa aꞌonira onanokiahirihi badani danokia.
Aꞌonira onanokiahivini hiki bana ida rajomi hoarani.
Deus kabadani danoki Jonas kohana kania namithaꞌiki rajomi hoarania aꞌonira onoꞌavini hiki.
30 Vakavaꞌibodivaraniꞌa bana ada Deus athi namoniva abono kohana Jonas oniki.
ꞌBoꞌdakari Deua bikaronaꞌiki ada Jonas Nínive sidajia okhana,
vaꞌora kaabanira kaimoni adani ijaꞌari.
Jona-ra karonavini vani fori hora nihara ada Deus,
hora karonavini jaboni,
aꞌonira okaabanija kaimoni.
Jona-ra anahokivini vani fori hora nihara bana ada Deus,
hora anahokivini jaboni,
avarigaja kaimoni hida varani kaꞌoa hini.
Hovani ijaꞌari hahavi vakadiꞌaajo ho.
31 Hari.
Deus ijaꞌari hahavi-ra nasohivini kamahini,
ijaꞌari vajoroniki vahararana hojaki bana ida Sabá sidaji kaijaꞌarini vakadikaꞌdaꞌdi.
Aꞌonira anaathidanoararivini hiki ida oathi-ra avakajariꞌdavini.
ꞌBoꞌdakari hojaki ada Salomão oniki.
Ogahaki ada Salomão.
Sabá sidaji kaijaꞌarini vakadikaꞌdaꞌdia binavanavanahaki ada,
bikamithaja kaimoni ida Salomão athi jaboni.
Hahavi-ra oogavini kabaꞌi,
oathi-ra avakajariꞌdaki aꞌoni.
32 Hari.
Deus ijaꞌari hahavi-ra nasohivini kamahini,
ijaꞌari vajoroniki vahararana vahojaki bana adani Nínive sidaji kaijaꞌarini.
Aꞌonira avanaathidanoararivini hiki ida avakadihojai jahariki-ra avakavaꞌipahiniravini.
ꞌBoꞌdakari Nínive sidaji kaijaꞌarinia vakamithaꞌiki ida Jonas vaꞌora kaabanivini,
vakavaꞌipahinimaniꞌihi ida vakadihojai asohiriki.
Hidakabaꞌi ohojaki ho avakadiania,
aꞌonira okaabanidanokiki ho kabaꞌi,
ni-avanofiki ida avakadihojai asohiriki-ra avakavaꞌipahinivini.
Hahavi-ra oogavini kabaꞌi,
oathi-ra avakajariꞌdaki aꞌoni — vaꞌora niꞌaha ada Jesus.
Ijaꞌari kamahi sohini varani hini
33 Hari.
Asia vara niꞌaha ada Jesus:
—Ijaꞌaria bianahaꞌdihi ida lamparina,
ni-bianahojaki.
Ni-varaja kanaboꞌania binaibaviki jaboni.
Nama vania binaibavihi,
ijaꞌari oꞌoihi binokijahakija kaimoni ida gora bodini vagani.
34 Lamparina fori hiki ida ijaꞌari nokhoni vagani.
Avanokhoni vagani jahahi;
hahavi-ra avanokihi.
Mahi vagania avaadahani fori hihi nahina-ra avanokivini hiki avanokhoni jahani.
Avanokhoni jaharihi;
ni-nahina-ra avanokiki,
joma bakibakinia adahai fori hiki hida.
Jahari kahojaia avakahojaihi;
joma bakibakinia avaadahani fori avihiki bana aꞌoni.
35 Hari.
Avavaꞌini ogairiva bana mahija Jahari kahojaia avakahojairavini.
36 Jahari kahojaia avakahojairihi;
avaabononi hahavi mahi vagania hojaki fori hihi.
Jahari kahojaia avakahojaihi;
joma bakibakinia avahojaki fori avihihi.
Jesus vaꞌora kaabaniki adani farisio vakadihojaia
(Mateus 23.1-36; Marcos 12.37c-40)
37 Hari.
Anokhomiꞌihi ida Jesus kavarani,
farisioa bikaboaꞌiꞌaha ada Jesus gorana ꞌbaira kaimoni.
Okhaha ada Jesus,
okhajakosiha mesa kania vithiꞌaha.
38 Farisioa bikavaꞌibodivaranikarahoꞌaha ada Jesus.
Judeus kaijaꞌaria vakosokovini arafiaki ida vasaꞌa viꞌbaina viahania.
Jesua vahojana binaabaravini mani ida farisio-ra navaꞌibodivaranija.
39 Oniaroa,
Jesus vaꞌora niꞌaha:
—Farisio,
mitha vaniꞌa hida aꞌonira vara oniꞌavini!
Ijaꞌari prato-ra sokojahakiriki fori avihiki aꞌoni.
Bisokohi ida copo,
prato hiki namanija,
ni-bodinija bisokoki.
Jahahi ida avanokiani.
Nokiarihi ida avavaꞌini bodini vara nini jaharikaꞌoaki,
avavaꞌini joko nini jaboni.
40 Avajahani-ra avakahiꞌbadaraki aꞌoni.
Deua binokiki ida ijaꞌari jahani bodini hahavi,
namanija jaboni.
41 Ijaꞌari kanahinariki-ra avakadinahina avakajoamorajahakihi;
avakadivaꞌibodivarani jahahi.
Ni-nahina kaimoni avanaababakhiaki ida akadijaꞌari vakadihojai,
avasaꞌani-ra avakosokovini arafiani.
42 Farisio,
mitha vaniꞌa hida aꞌonira vara oniꞌavini!
Jahariki ida avakadimoni bana!
Avanajoroniki ida nahina hahavi avagahinani hiki,
avanapitahatahaki ida saꞌai koꞌbamihani hiki.
Avanajoiribaniki ida pitani hoarani Deus kania.
Chá afani,
nahina hoariha havahaki kaimoni jaboni avanapitahatahaki.
Jahaki ida Deus athi-ra avanaabavini,
Deu-ra avanoꞌavini hiki ida pitani.
Asohiriki ida Deus athi-ra avanaabahahaviravini.
Ni-avanofiki ida ijaꞌari-ra avanaibavijahajahakivini.
Ni-Deu-ra avanofijahakiki jaboni.
43 Farisio,
mitha vaniꞌa hida aꞌonira vara oniꞌavini!
Jahariki ida avakadimoni bana!
Avanofivini arafiaki ida kaꞌdaꞌdi kavithi ibavinia avavithini akadijaꞌari Deu-ra vara aniꞌavini kagorania.
Ijaꞌari vahoariha vaipohiki vakadikaꞌdaꞌdi-ra vakaꞌivanitivini vani fori hini hida aꞌonira vakaꞌivanitivini-ra avanofivini.
44 Farisio,
mitha vaniꞌa hida aꞌonira vara oniꞌavini!
Avajahani-ra avakahiꞌbadaraki aꞌoni.
Jahariki ida avakadimoni bana!
Akadijaꞌari vakadikaaji hiki ida abaꞌoi kaꞌdamahani namani,
ni-jahaki ida ꞌdama kanamania avaadahani.
Aꞌonivani abaꞌoi kaꞌdamahani ibavini nokiariki fori avihiki aꞌoni.
Ijaꞌaria bikanokiravini mani ida ꞌdama kanamania naadahani hija — Jesus vaꞌora niꞌaha adani farisio.
45 Oniaroa,
judeus kaijaꞌari kaꞌojomoꞌiva abonoa biniꞌaha ada Jesus:
—Jesus,
nimania hijanani ida kadavarani,
haria ikanavaranihavini jaboni.
46 Jesua bigathaniꞌihi ida athi:
—Judeus kaijaꞌari vakaꞌojomoꞌiva abono,
mitha vaniꞌa hida aꞌonira oniꞌavini!
Jahariki ida avakadimoni bana jaboni!
Daji khanaki fori hiki ida kaaji ipohiki.
Kaaji ipohiki-ra avavahonariahivini fori hiki ida daji khanaki-ra avanaibavibakhiavini vahoariha vamaꞌadosia vavajadojadoja kaimoni.
Ni-avanofipaꞌitxiki ida vaꞌora avaakakodiavini vadaina-ra vakaibaꞌivini.
Ni-avasaꞌani hoarania vaꞌora avaakakodiaki.
47 Judeus kaijaꞌari vakaꞌojomoꞌiva abono,
mitha vaniꞌa hida aꞌonira oniꞌavini!
Jahariki ida avakadimoni bana!
Avakadiabiꞌi avikhananavaki vaꞌora vanaabiniki adani Deus athi namoniva abono kohana.
Avanaibaviki ida jaꞌdi karaho avanajahaja kaimoni ida Deus athi namoniva abono kohana vakaꞌdamahana ibavini,
avakarajomiki ida kaꞌdamahi ibavini kaimoni.
48 Avarigaki ida ꞌboꞌdakari vaꞌora vanaabinivini,
avavajahaki ida vaꞌora vanaabinivini,
oniani ida Deus athi namoniva abono kohana vakaꞌdamana-ra avakakarajomivini hija.
Vaꞌoaniaro ꞌboꞌdakari vaꞌora vanaabiniꞌiki adani.
Aꞌonivani avanajahaki ida vakaꞌdamana.
Aꞌonivani vaꞌoaniaro fori avihiꞌoamanija.
49 Deua biogahahaviki ida namithaki kaimoni.
ꞌBoꞌdakari niha ada Deus:
“Vaꞌora okaronabakhiaki
bana adani oathi
namoniva abono,
oathi avaadahaoniva abono vaipohiki vihiki,
judeus kaijaꞌari vakadiania avikhana afobakhia.
Judeus kaijaꞌari vaꞌora vanaabiniki bana adani vaꞌora okaronaki vahoarahanana,
vaꞌora vanajaharihariki bana adani vahoariha.”
Niha ada Deus.
50 Hari.
Asia vara niha ada Jesus:
—Deus jaharikia vaꞌora arakhaki bana adani ijaꞌari hahavi hidakabaꞌi vahokiki.
Deus athi namoniva abono hahavi kidai vihiꞌiki abosini ida jaharikia Deus vaꞌora arakhavini hija.
51 Deus hahavi-ra namonahabiininivini kari,
kidai hiꞌina abiniꞌiki ada Abel.
Abel naothia kidai vihiꞌina vaabiniꞌaha adani Deus athi namoniva abono vaipohiki afohanana.
Naothinia Zacarias jaboni kidai hiꞌiki,
Deu-ra khai vaniꞌavini kagorani bodinia.
Igitha ahaꞌdini ibavini,
Ibavi Katokini Jahaki kahararakhamania abiniꞌiki ada Zacarias kohana.
Kaꞌoa hiki hida kodivarani.
Deus jaharikia vaꞌora arakhaki bana adani ijaꞌari hidakabaꞌi vahokiki.
Deus kaijaꞌari hahavi kidai vihiꞌiki vaabinina abosija kaimoni.
52 Judeus kaijaꞌari kaꞌojomoꞌiva abono,
mitha vaniꞌa hida aꞌonira vara oniꞌavini!
Jahariki ida avakadimoni bana!
Avaranahojaki ida Deus varani hina asohiki,
Deu-ra avigarara kaimoni adani ijaꞌari vahoariha.
Ni-avanofiki ida Deus varani hina asohiki-ra avarigavini.
Ni-avanofiki jaboni ida vahoariha avigavini — vaꞌora niꞌaha ada Jesus.
53 Hari.
Jesus ajihina viahania,
judeus kaijaꞌari kaꞌojomoꞌiva abono,
farisio khama vaabono vara vakaniꞌakhamaꞌaha.
Vaihamahina Jesu-ra vakanavaranihaꞌaha.
Jesu-ra vananaꞌdohiꞌaha naꞌdohi ipohikia.
54 Jesu-ra avakaraganahavini-ra vanofivini mani ida Jesus athi-ra mitha vaniꞌajahakivini hija.
Vanofiki ida vakamithavini nahina asohiriki Jesua biniꞌaꞌiki,
Jesu-ra avanaathidanoararira kaimoni.