Ijaꞌari akoirini kamahini kavaranihi
12
Hari.
Oniaroa,
judeus kaijaꞌari vakadiꞌakoiri kamahini vani,
avikafianiribaniꞌaha adani Jesus trigo kasiroinia.
Ipohina vihiki vavaiꞌamina mani ida trigo bononi jaꞌdini-ra avaraꞌbirimivini hija.
Varisiꞌihi,
vahaꞌihi ida trigo ꞌbaꞌdani.
2 Oniaroa,
farisioa vanokiꞌihi ida trigo bononi-ra varisivini,
vaniꞌaha ada Jesus:
—Deus kavaꞌisohihi jiriki ijaꞌari-ra honariavini hiki ijaꞌari bada nirini aakoirina kamahini.
Ni-jahaki ida iipohini Deus kavaꞌisohihi jiriki-ra vanaabaravini.
3 Jesua bigathaniꞌihi ida vaathi:
—Aꞌonira vara oniꞌavini hiki ada akadijaꞌari avikhananavaki Davi kohana.
Deus athi kapapirania hojaki ida Davi varani hina.
ꞌBoꞌdakari vavaiꞌamiha adani Davi kidipohi khama.
4 Deu-ra khai vaniꞌavini kagorani kania avikhajakosiꞌaha adani Davi.
Hari.
Gora bodinia kahojaꞌiki ida pão.
Deu-ra kanavaꞌigaꞌimidiaki ida pão,
naothinia sasidotxi kaꞌoa vakahaki ida.
Nimania ida Deus kavaꞌisohihi jiriki haria navaꞌisohivini hiki.
Sasidotxi vihiriha adani Davi kidipohi khama.
Kabaꞌi,
Davia bikahaꞌiki ida pão gora bodinia kahojaki.
Kidipohi-ra vaꞌora noꞌavini kihiꞌihi jaboni.
Vavaiꞌamikarahona mani ida sasidotxi vaꞌora vaꞌadivini hija,
pãoa vaꞌora noꞌavini hija.
Ni-Deua bivajahariki ida pão-ra vakahavini.
5 Avanokiria koda ida Deus kavaꞌisohihi jiriki pitani?
Sasidotxia bada vaniꞌaki ida badani Deua bihonariaki Deu-ra khai vaniꞌavini kagorani kania aakoirina kamahini kabaꞌi.
Sasidotxia vanakaidivaki ida Deu-ra khai vaniꞌavini kagorani,
oniani ida Deus vakadibadani aakoirina kamahini bivamakhaniravini hija.
6 Kaꞌoa oamani hida kodivarani.
Avanakaidivavini kabaꞌi ida Deu-ra khai avaniꞌavini kagorani,
hojaki ada ijaꞌari hoarana avahararania avanakaidivavini arafiaki kaimoni — niha ada Jesus abono-ra vara vaniꞌavini.
7 Asia vara niha ada Jesus:
—Deus athi kapapirani haria navaꞌisohivini hiki ida:
“Onofiki ida nahina hora avakanavaꞌigavini.
Onofikarahoki ida vahoariha-ra vaꞌora avavaꞌadivini.”
Avarigaja vaha hida athii nahina hini;
ni-vaꞌora avaranaathidanoarariꞌimariniki vaha adani kodipohi Jahari kabadania vakabadaniriki.
8 Hovani ijaꞌari hahavi vakadiꞌaajo ho.
Hovani kaꞌoa oogaki ida badani hana hini jahaki ijaꞌaria bada biniꞌaki kaimoni akoirina kamahini — vaꞌora niꞌaha ada Jesus.
Jesua bianaihotaꞌiki ada makhira saꞌa akasakarabakosiki
9 Oniaroa,
ajihiꞌaha ada Jesus.
Okhaꞌianaha judeus kaijaꞌari Deu-ra vara vaniꞌavini kagorania.
Okhajakosiꞌaha.
10 Hojamaniha ada makhira saꞌa akasakarabakosiki.
Vahojaki jaboni adani ijaꞌari Jesus kabadani-ra vavajahariki.
Vavajaharihi ida Jesus ijaꞌari kavamoniki-ra anaihotavini avakoirina kamahini,
oniani ida Jesu-ra avanaathidanoararivini hija.
Vaniꞌaha:
—Inaabariki ida Deus kavaꞌisohihi jiriki.
Ni-bivaꞌahaki ida ijaꞌari kavamoniki-ra anaihotavini aakoirina kamahini.
11 Jesua bigathaniꞌihi ida athi:
—Aakoirina kamahini voroniki ida ovilia hodi bihiaki bodinia,
ijaꞌaria bikaijoꞌahaꞌoadahaki ida kidiꞌovilia-ra akavaꞌijoavini aakoirina kamahini.
12 Jahaki ida ovilia-ra akajoamoravini aakoirina kamahini.
Jahani arafiaki ida ijaꞌari-ra akajoamoravini,
oniani ida Deus kavaꞌisohihi jiriki ijaꞌari hoariha-ra kajoamoravini-ra vaꞌahavini hija aakoirina kamahini.
13 Hari.
Makhira-ra niꞌaha:
—Isaꞌani-ra akanaviraꞌa!
Saꞌa-ra akanaviraꞌaha,
akaihotaꞌihi ida saꞌa.
Saꞌa kahoariha fori kihiꞌihi ida saꞌa akaihotaꞌini.
14 Oniaroa,
vaihamahikarahoꞌaha adani farisio.
Jesus makhira-ra anaihotavini mani ida vavaꞌi najokojokokaꞌoani hija.
Vaabono vara vakaniꞌakhamaꞌaha:
—Ni-jahapaꞌitxiki ida ijaꞌari kavamoniki aihotani kabadanihia kabadanina aakoirina kamahini.
Niha aniꞌaꞌaki koda ada Jesus.
Abinina jahaki ada — vakhaniꞌaha.
Honai abono Deua binagathogathoꞌiki
15 Hari.
Jesua biogaki ida vanaabinivini vanofivini oniaroa,
ajihiꞌaha.
Ijaꞌari vaipohikia vavaipohihaꞌaha.
Jesus vaꞌora anaihotaꞌaha adani ijaꞌari vakavamoniki hahavi.
16 Vaꞌora niꞌaꞌaha:
—Hariꞌa vaꞌora vananamitha bana adani ijaꞌari vahoariha kodibadani danokia okabadanina — vaꞌora niꞌaha ada Jesus.
17 Mahi ꞌboꞌdakari Deus athi namoniva abono Isaías kohana onikia binajiriꞌiki ida Cristo varani hina namithaꞌiariki.
Jesus vania bada biniꞌahahaviꞌia ida Isaías vara bivaniꞌajoraꞌiki.
18 Isaías biniꞌajoraꞌiki:
“Deua biniꞌaha:
‘Hada vani kodihonai abono.
Onagathogathoꞌiki ada.
Onofijahakiki ada.
Khai hora niꞌaki ida hojana hiki.
Onaibaviki bana ada Maꞌonahai Jahaki vaꞌi bodinia.
Ovari vaꞌora navaꞌisohiki bana adani arabo hahavi kaijaꞌarini vaꞌora onasohira kaimoni.
19 Vara nina kamahini,
ni-jahana abono-ra vaboraborahariha ada.
Ni-kamadiaki fori hiriha ada bana hagihia ijaꞌari vaipohiki vajoroniki vahararana.
Ijaꞌari vakadikaꞌdaꞌdi hoariha fori hiriha bana ada.
20 Vaꞌora vaꞌadiki bana adani vavaꞌi jahajahariki.
Mosori kaaꞌdariki fori hiki ida ijaꞌari vaꞌini jahajahariki.
Ovaria binajahaki ida vakadimahi.
Lamparina daijanariki fori hiki ida ijaꞌari Jahari kahojaia kahojaiki.
Ovaria biakavaꞌijoaki ida bana.
Aꞌdiahirini oadani ida kidibadani,
binasohihaꞌoadahaki ida nahina Jaharia binajahariki.
21 Arabo hahavi kaijaꞌarinia vakamithaki bana ida varani hina.
Vaipohiki bana adani ijaꞌari vakaijokana vihiki.’ ”
Nimania ida Deus athi kapapirania hojaki.
Biosibo Jahari varani hina
22 Hari.
Oniaroa,
Jesus kania avavikhaꞌaha ada makhira kabajadina bikanamaodorohaki,
abani bianaꞌdakharariki jaboni ada.
Jesua bihonariaki ida bajadi akaraꞌoni makhira kania.
Nokho avagahaꞌianaha,
varavaraꞌianaha jaboni ada makhira.
23 Ijaꞌari vaipohiki vajoronikia vakavaꞌibodivaranikarahoꞌaha ada Jesus.
Vananaꞌdohiha:
—Kaꞌdaꞌdi koda ada Jesus.
Davi kohana kaꞌdaꞌdi fori hina hiki koda ada.
24 Oniaroa,
farisioa vakamithaki ida vakadinaꞌdohi,
vakhaniha:
—Iniani,
bajadi vakadikaꞌdaꞌdi Biosibo Jahari onikia binoꞌaki ada Jesus danona,
bikaabokaja kaimoni ida bajadi akaraꞌoꞌini.
25 Jesua biogamanihi ida vakavaꞌibodivaranivini,
vaꞌora niꞌaha:
—Rajomi kavaranihi-ra vara ovaniꞌaki bana ho,
avarigaja kaimoni ida Jahari hora noꞌaravini danona.
Arabo kaijaꞌarini vaabono vakodakhamaha;
vaabono vakanihimakhamaha.
Sidaji kaijaꞌarini vaabono vakodakhamaha;
vaabono vakanihimakhamaha jaboni.
Gora kaijaꞌarini vaabono vakodakhamaha;
vaabono vakanihimakhamaha jaboni.
26 Vakhaniha vaha jaboni adani Jahari kaijaꞌari vanokiariki,
vaabono vakodakhamaha;
vaabono vakanihimakhamaha jaboni.
Ni-vahojajanaki vaha adani kidijaꞌari Jahari vaꞌora vakaꞌdaꞌdiki kaimoni.
27 Avakadivarani hiki ida Biosibo Jahari hora noꞌavini danona,
bajadi akaraꞌoni-ra ohonariaja kaimoni.
Ni-asohiki ida avakadivarani.
Avaipohini jabonia vakaabokaki ida bajadi akaraꞌoni.
Kaꞌoa hija vaha ida avakadivarani,
Jahari vani koda danona vaꞌora noꞌara adani avaipohini?
Ni-Jahari vaꞌora noꞌariha adani danona.
Bajadi akaraꞌoni-ra vakaabokavini mani ida Deus danona-ra avigavini hija.
Bajadi akaraꞌoni-ra vakaabokavini mani ida avakadivarani asohirikia avaipohini haria vananokiahivini hija.
28 Deus hora noꞌavini hiki hida odanona,
oniani ida bajadi akaraꞌoni-ra okaabokavini hija.
Deus danona-ra ovahojavini mani ida Deus khaꞌina-ra avarigavini hija,
ijaꞌari-ra vaꞌora vakaꞌdaꞌdira kaimoni.
29 Ijaꞌaria ni-bikaabokaki ida nahina makhira danoki gorana bodinia hojaki-ra saarivini.
Makhira danoki-ra dabohaꞌimidiaki ida ijaꞌari,
oniani ida kidinahina ipohiki bisaarivini bikaabokavini hija.
Makhira danoki fori hiki ada Jahari.
Odanona biaradaki ida Jahari danona.
Odabohaꞌiki fori hina mani ida bajadi akaraꞌona okaabokavini hija — niha ada Jesus.
30 Hari.
Asia vara niꞌaha ada Jesus:
—Ijaꞌari hora kakodiariki ni-hora nofiki.
Kodijaꞌari-ra vaꞌora onajoronivinia hora vaakodiariha;
vaꞌora akarakhakhamaha.
31 Kaꞌoa oamani ida oniꞌaki,
Deua bikaabokaki ida hojai asohiriki-ra naꞌbiravini.
Ijaꞌari varani jaharikia Deu-ra vakanavaranihavini,
Deua bikaabokahi ida varani jahariki-ra naꞌbiravini jaboni.
Ijaꞌaria Jahari kabadani hini bikahihi ida Maꞌonahai Jahaki kabadani,
jokoa Deua binaꞌbirarihi ida ijaꞌari kavarani jahariki.
32 Hovani ijaꞌari hahavi vakadiꞌaajo ho.
Varani jaharikia ijaꞌari hora kanavaranihahi;
Deua bikaabokaki ida varani jahariki-ra naꞌbiravini.
Varani jaharikia ijaꞌari Maꞌonahai Jahaki-ra kanavaranihahi;
ni-Deua binaꞌbiraki.
Hokini oadani ida ijaꞌari,
ni-Deua biakariakaki.
Abinini naothinia asia hojaki ida kidivarani jahariki,
ni-Deua binaꞌbirapaꞌitxiki — vaꞌora niꞌaha ada Jesus.
Ihiꞌai fori hiki ida ijaꞌari kahojai
33 Hari.
Vara niꞌianaha ada Jesus:
—Avanokihi ida kodibadani jahaki;
avarigahi jaboni ida ojahakaꞌoana.
Jahahi ida ihiꞌai avani;
jahahi ida jaboni ihiꞌai bononi.
Jaharihi ida ihiꞌai avani;
jaharihi jaboni ida ihiꞌai bononi.
Ikaijoꞌahi ida ihiꞌai;
iogahi ida ihiꞌai jahani jaharini.
Nini vani iogaja ida ihiꞌai avani jahani jaharini.
Ijaꞌari kahojai fori hiki ida ihiꞌai bononi.
Ijaꞌari jahaki,
kidihojai jahaki jaboni.
Ijaꞌari jahariki,
ni-kidihojai jahaki jaboni.
34 Makha fori avihiki aꞌoni,
ijaꞌari-ra avanapohimajaki fori avihiki aꞌoni.
Ni-nihanikia vara avavaniꞌaki ida varani asohiki.
Jahari kahojai ijaꞌari vaꞌini bodinia bivajahahi;
jahariki jaboni ida kidivarani.
35 Ijaꞌari jahaki vaꞌini bodinia hojaki ida vaꞌi bodini vara nini jahaki.
Jahahi hida kidivaꞌibodivarani,
oniani ida varani jahaki-ra vara vaniꞌavini hija.
Ijaꞌari hojai jaharikia kahojaiki vaꞌini bodinia hojaki ida vaꞌi bodini vara nini jahariki.
Jaharihi hida kidivaꞌibodivarani,
oniani ida varani jahariki-ra vara vaniꞌavini hija.
Ijaꞌaria vara bivaniꞌaki ida bikavaꞌibodivaraniki — niha ada Jesus.
36 —Deus ijaꞌari-ra nasohivini kamahini,
Deua binavaꞌihokiki bana ida ijaꞌari hahavi afohanana varani jaharikia vakavaraninanaki.
Deu-ra vananamithavini hiki bana ida varani hahavia vakavaraniꞌina.
37 Deua bikavaꞌihokiki ida bana ijaꞌari kavarani hahavi vara bivaniꞌaꞌiki.
Deua biogaki ida ijaꞌari kahojai abosini.
Jahahi ida ijaꞌari,
jahahi ida ijaꞌari vara bivaniꞌaꞌiki,
oniani ida Ibavi Jahakaꞌoaki kania okhani Deua bihonariavini hija bana.
Jaharihi ida ijaꞌari,
jaharihi ida ijaꞌari vara bivaniꞌaꞌiki,
oniani ida Ibavi Jaharikaꞌoaki kania okhani Deua bihonariavini hija bana — vaꞌora niꞌaha ada Jesus.
Vanofiki ida badani danoki-ra vanokivini
38 Hari.
Oniaroa,
Jesus kania vahojaha adani judeus kaijaꞌari vakaꞌojomoꞌiva abono vaipohiriki,
farisio khama.
Jesu-ra vaniꞌaꞌaha:
—Jesus,
anokivini anofiki ida Deus kabadani danokia ikabadanini,
aogaja kaimoni ida Deus ira karonavini.
39 Jesua bigathaniꞌihi ida vaathi:
—Jahari kahojaia vakahojaiki adani ijaꞌari hidakabaꞌi vahokiki.
Deu-ra vakajariꞌdaki adani.
Avanokivini avanofiki ida Deus kabadani danoki.
Jokoa aꞌonira onanokiahirihi badani danokia.
Aꞌonira onanokiahivini hiki bana ida rajomi hoarani.
Deus kabadani danoki Jonas kohana kania namithaꞌiki rajomi hini hoarania aꞌonira onanokiahiki bana ho.
40 Vakavaꞌibodivaraniꞌa bana ada Deus athi namoniva abono kohana Jonas oniki.
ꞌBoꞌdakari abaisana karahoa bikidafiꞌiki ada Jonas.
Mahi ahoarabakosiki,
joma ahoarabakosikia jaboni hojaꞌaha ada Jonas abaisana kaijona.
Ni-abiniꞌiki.
Kaꞌdamahaki fori hina hojaꞌiki ada.
Onivani fori hija bana ida namithaki kodiania.
Arabo nami bodinia ohojaki bana ho okaꞌdamahana,
mahi ahoarabakosikia,
joma ahoarabakosikia jaboni.
Abaisana kaijona khaonanina naothinia,
Nínive sidaji kaijaꞌarinia vanokiꞌaha ada Jonas.
Vanokivini vani avigaha ada Jonas Deua bikaronavini.
41 Nínive sidaji kaijaꞌarinia vakamithaꞌiki ida Jonas vaꞌora kaabanivini,
vakavaꞌipahinimaniꞌihi ida vakadihojai asohiriki.
Deus ijaꞌari hahavi-ra nasohivini kamahini ijaꞌari vajoroniki vahararana vahojaki bana adani Nínive sidaji kaijaꞌarini.
Aꞌonira avanaathidanoararivini hiki bana ida avakadihojai asohiriki-ra avakavaꞌipahiniravini.
Hidakabaꞌi ohojaki ho avakadiania,
oaradahaki ida Jonas jahana,
aꞌonira okaabanidanokiki ho,
ni-avanofiki ida avakadihojai asohiriki-ra avakavaꞌipahinivini.
42 Rajomi hoariha ida kodivarani.
Deus ijaꞌari hahavi-ra nasohivini kamahini,
ijaꞌari vajoroniki vahararana hojaki bana ida gamo Sabá sidaji kaijaꞌarini vakadikaꞌdaꞌdi.
Aꞌonira anaathidanoararivini hiki bana ida oathi-ra avakajariꞌdavini.
ꞌBoꞌdakari hojaki ada Salomão oniki.
Ogahaki ada Salomão.
Sabá sidaji kaijaꞌarini vakadikaꞌdaꞌdia binavanavanahaki ada,
bikamithaja kaimoni ida Salomão athi jaboni.
Hovani kodiꞌogahai Salomão aagahai-ra aradaki.
Hahavi-ra oogavini kabaꞌi,
oathi-ra avakajariꞌdaki aꞌoni — vaꞌora niꞌaha ada Jesus.
Ijaꞌari kania hojaki ida bajadi
43-44 Hari.
Vara niꞌianaha ada Jesus:
—Ijaꞌari kania akaraꞌoꞌihi ida bajadi,
adahaꞌihi kaijaꞌaririki kaarabonia.
Binakoꞌdihahi ida ibavi biavakoiriki kaimoni.
Bikaragarihi ida ibavi,
abononi niꞌahi:
“Oajoiki bana ho ogorana.
Ijaꞌari kania oakaraꞌoꞌina,
kidiania oajoiki bana ho.”
Oniaroa,
joiꞌihi bikaragaꞌihi ida gora bodini jahaꞌini dairiki.
45 Oniaroa,
ajihiꞌianahi ida bajadi vaꞌora anikhaꞌaha adani ipohini 7 vihiki vaipohina vajaharina arafiaki,
ijaꞌari kania vahojara kaimoni.
Bajadi hoarani hojani kari,
jaharini ida ijaꞌari kamahi.
Bajadi vaipohiki vahojaꞌaha ijaꞌari kania,
jaharini arafiaꞌihi ida ijaꞌari kamahi.
Vakhanimanira bana adani ijaꞌari hidakabaꞌi hora vakajoniki — vaꞌora niꞌaha ada Jesus.
Vikhaki adani Jesus kaamia, kidikajoꞌo vihiki
46 Oniaroa,
Jesus ijaꞌari-ra vaꞌora kaꞌojomoꞌivini kabaꞌi,
vikhaꞌaha adani Jesus kaamia,
kidikajoꞌo vihiki.
Gora banininia vigaaboahaꞌaha vaniꞌaha:
—Anofiki ida Jesu-ra vara aniꞌavini — vakhaniha.
47 Oniaroa,
ijaꞌari Jesu-ra navaꞌisohiꞌaha:
—Jesus,
adani gora banininija vahojaha kadamia,
kadakajoꞌo vihiki,
ira vara vaniꞌavini-ra vanofiki adani.
48 Hari.
Jesus vaꞌora niꞌaha:
—Aꞌonira onanokiahivini hiki hadani kodiamia,
kodikajoꞌo fori vihiki.
49 Oniaroa,
Jesus vaꞌora arajoꞌiꞌaha adani ipohina,
nihaha: