Trigo ꞌbaꞌdani txiotxioni karajomihi hida
13
Hari.
Oniaroa,
gora bivahojaki kania khaonaniꞌaha,
ajihiꞌaha ada Jesus.
Galiléia kaꞌdakoni vadini maakarinia okharafoniꞌaha,
vithiꞌaha.
Oniaroa,
vaꞌora kaꞌojomoꞌiꞌaha adani ijaꞌari vajoroniki.
2 Ijaꞌari vaipohikia vavajoronivini mani ida nakiꞌdamana hija.
Kanava vithiꞌaha,
vaꞌora kaꞌojomoꞌiꞌaha adani ijaꞌari pasapasania vahojaki vigaagaboahaki.
3 Rajomi kavaranihia vaꞌora vara niꞌaꞌaha:
—Siroia okhaha ada makhira,
binatxiotxiohi ida trigo ꞌbaꞌdani.
4 Hagihi vadinia vararahi ida ꞌbaꞌdani hoarahanana.
Avigariha adani igitha,
vitxagatxagahahaviꞌihi.
5 Jaꞌdi namania vararahi ida ꞌbaꞌdani hoariha.
Abihiarihi ida nami jaꞌdi namania.
Odorihi ida nami,
movajorakiꞌihi.
6 ꞌDamani abohani abihiarini mani ida safini afana bianaraꞌokhovini hija.
7 Hogoi kajaroiki kania vararahi ida ꞌbaꞌdani hoariha.
Movaꞌihi ida jaboni hogoi,
rakhajahi-ra najahariꞌihi,
ni-bonoꞌiki.
8 Arabo jahakia vararahi ida ꞌbaꞌdani hoariha.
Movahi,
avijavahi,
bonoꞌihi.
Aipohiꞌihi ida trigo ꞌbaꞌdani.
Trigo avani hoarahanana ꞌbaꞌdani ipohini 100.
Trigo avani hoarahanana bononi ꞌbaꞌdani ipohini 60.
Trigo avani hoariha bononi ꞌbaꞌdani ipohini 30.
9 Avamorobohahi;
mitha vaniꞌajahaki hida oathi — vaꞌora niꞌaha ada Jesus.
10 Hari.
Ijaꞌari vaipohiki vahojajanarina,
Jesu-ra vanamaakariꞌaha adani ipohina,
vananaꞌdohiꞌaha:
—Nahina mani ida rajomi kavaranihia vara vaꞌora iniꞌabakhiavini hija?
11 Jesua bigathaniꞌihi ida vakadinaꞌdohi:
—Deua binofiki ida avarigavini,
oniani ida Deus kaꞌdaꞌdi hina kavaranihia aꞌonira onanamithajahakivini hija.
Ijaꞌari vahoariha ni-avigavini vanofiki ida varani Deus vaꞌora vakaꞌdaꞌdivini.
Ogavahariki hida varani vakadimoni hini.
12 Avakamithabakhiaki hida oathi.
Avanaabavini mani ida avakadiꞌogahai-ra oanaꞌbaꞌdivini hija.
Vahoariha oathi-ra vakamithaki,
ni-vanaabaꞌiki ida oathi paꞌitxi vakamithaki,
oniani ida avakavaꞌiꞌbirinivini hija.
13 Vakhanina vani rajomi kavaranihia vara vaꞌora oniꞌavini.
Vada vaniꞌavini kabaꞌi ida kodibadani danoki,
ni-vanofiki ida kodihojai-ra vanokivini.
Oathi-ra mitha vaniꞌavini kabaꞌi,
ni-vanofiki ida nahina hini avigavini.
14 Namithaꞌiki ida vakadiania Deus athi namoniva abono Isaías kohana vara vaꞌora niꞌajoravini hiꞌiki:
“Avakamithavini kabaꞌi ida athii,
ni-avarigaki bana nahina nini.
Vada avakhanini kabaꞌi,
ni-nahina-ra avanokiki bana.
15 Avigavini vanofiravini mani ida vakadivaꞌibodivarani kaꞌoahaki fori vaꞌora nihaja.
Kamokhihaki fori kihiki ida vamorobo.
Modo vaniꞌaki fori hiki ida vanokho.
Vavaꞌi bodinia avigavini vanofija vaha;
vakamithavini vakaabokamanihi vaha;
vakaabokaki ida nahina-ra avigavini jaboni.
Avigaja vaha hida Deus athi;
kodiania vajoiribanimaniha vaha;
vaꞌora anaihotamaniha vaha.”
Nimania ida Deus athi Isaías vara bivaniꞌajoraꞌiki.
16 Asia vara niꞌaha ada Jesus.
Kidipohi-ra vaꞌora niꞌaꞌaha:
—Deus aꞌonira kajoamoraki aꞌoni.
Vaꞌoaniaro fori avihiriki aꞌoni.
Vagahaki fori hiki oni avanokhoni ꞌbaꞌdani.
Kamokhihariki fori kihiki ida avamoroboni,
oniani ida Deus athi nahina hini-ra avarigavini hija.
17 Aꞌonivani avanokibakhiaki hida kodibadani,
avakamithabakhiaki hida kodivarani.
Aꞌonira onavaꞌisohiki bana ho,
mahi ꞌboꞌdakari vaipohiki adani Deus athi namoniva abono kohana,
Deus kaijaꞌari kohana vahoariha khama vanofiki ida kodibadani-ra vanokivini,
ni-vakaabokaki vanokivini.
Kodivarani-ra vakamithavini-ra vanofiha,
oniaro kari ni-vakaabokaki.
18 Mitha vaniꞌajahaki bana hida kodivarani mahija trigo ꞌbaꞌdani karajomihi kavaranihi nahina hini-ra avarigavini.
Aꞌonira onavaꞌisohivini hiki ida nahina hini.
19 Trigo ꞌbaꞌdani fori hiki hida oathi.
Ijaꞌari fori hiki ida arabo.
Hagihia vararahi ida trigo ꞌbaꞌdani.
Igitha vitxagatxagahahaviꞌihi.
Onivani fori hini ijaꞌari vahoarahanana vakamithaja ida Deus ijaꞌari-ra vakaꞌdaꞌdivini kavaranihi.
Ni-avigavini vanofiki ida varani nahina hini.
Oniaroa,
khaki ada Jahari Deus athi-ra anihavini vaꞌini bodinia,
oniani ida Deus athi-ra avakavaꞌiꞌbirinivini hija.
20 Jaꞌdi namania vararahi ida trigo ꞌbaꞌdani hoariha.
Kanamini odorini movajorakiꞌihi.
ꞌDamani abohani abihiarini mani ida anaraꞌokhoni hija.
Movani kamaꞌdani vani araꞌokhoꞌihi.
Onivani fori vihira adani ijaꞌari vahoariha Deus athi-ra vakamithaki.
Vanofihi,
khai vakhanimaniha.
21 Mahi ipohiriki vani khai vaniꞌaja ida Deus athi.
Deus kaijaꞌari vihina mani ida vahoariha vaꞌora vanajahariharivini hija.
Nahina jahariki namithahi vakadiania,
oniani ida Deus athi-ra vakavaꞌipahinivini hija.
22 Hogoi jaroki ꞌdamania vararahi ida trigo ꞌbaꞌdani hoariha.
Hogoia binajaharihi,
bonohi,
ni-aꞌdiꞌiki ida trigo bononi.
Onivani fori vihira adani ijaꞌari vahoariha Deus athi-ra vakamithaki.
Vakavaꞌibodivaranihaꞌoadahahi ida vakadiꞌbai-ra vanakoꞌdihavini,
vakadinahina-ra vakapavakarihavini,
vakadibadani hiki.
Vaabono vaniꞌaha:
Ni-nahina-ra okainamoki;
jahahi ida kodimahi.
Vakhaniki adani.
Hari.
Nahina ipohiki-ra vanofikarahovini mani ida Deus athi-ra vanofijahakiravini hija,
oniani ida Deus athi-ra vanaabaravini hija jaboni.
Onivani fori hija ida rakhajahi,
ni-bonoki ida arabo rakhajahani,
onivani fori vihiki adani ijaꞌari vamorobohariki fori vihina.
23 Arabo jahakia makhira binatxiotxiohi ida trigo ꞌbaꞌdani hoariha.
Movahi,
naꞌbahaꞌihi,
bonoꞌihi.
Aipohiꞌihi ida ꞌbaꞌdani.
Arabo jahaki fori vihiki adani.
Onivani fori vihira adani ijaꞌari vahoariha Deus athi-ra vakamithaki.
Vakamithahi,
avigahi ida Deua binofiki bada vaniꞌavini,
oniani ida vanaabajahakivini hija.
Trigo ꞌbaꞌdani 100 hiki vani fori vihira adani ijaꞌari Deus athi-ra vanaabajahakiki.
Trigo ꞌbaꞌdani 60 hiki vani fori vihira adani ijaꞌari Deus athi-ra vanaabavini doronini.
Trigo ꞌbaꞌdani 30 hiki vani fori vihira adani ijaꞌari Deus athi-ra vanaabavini paꞌitxini — vaꞌora niꞌaha ada Jesus.
Trigo, hogoia kabodihadihaki karajomihi hida
24 Oniaroa,
Jesua vara bivaniꞌaꞌianahi ida rajomi kavaranihi.
Vaꞌora niꞌaha adani ijaꞌari vajoroniki:
—Kodivarani hiꞌianaki ida Deus ijaꞌari-ra vakaꞌdaꞌdivini.
Makhira binatxiotxiohi ida trigo ꞌbaꞌdani jahaki kidisiroia.
25 Joma vania vavadiꞌaha adani makhira,
kidijaꞌari hahavi khama.
Vavadina kabaꞌi,
khaꞌaha ada hoariha makhira-ra vajahariki.
Trigo kasiroini kania binatxiotxiohi ida hogoi ꞌbaꞌdani trigo kania.
Trigo nokiani fori hiki ida hogoi.
Birakhaivini naothinia ajihiꞌaha ada makhira jahariki.
26 Hari.
Movaꞌihi ida trigo ꞌbaꞌdani,
movahi jaboni ida hogoi ꞌbaꞌdani.
Naꞌbahaꞌihi,
bonoꞌihi.
27 Oniaroa,
siroi kakaꞌdaꞌdini kania avikhaꞌaha adani kidibadani abono,
vaniꞌaha:
“Inatxiotxioꞌiki ida trigo ꞌbaꞌdani jahaki kadasiroia.
Niha nimanija koda ida
hogoi movajabanaki trigo hararania?”
28 Vakadikaꞌdaꞌdia bigathanihi ida vakadinaꞌdohi:
“Hora vajahariki kabadani ida hogoi ꞌbaꞌdani-ra natxiotxiovini kodisiroia.”
Vananaꞌdohiꞌaha:
“Inofimanija koda ida hogoi-ra arasohasohavini?”
29 Kaꞌdaꞌdia bigathanihi ida athi:
“Iniani,
jakaho hojaꞌimidiava ida hogoi.
Avijavarini oadani ida hogoi nokiani trigo avani fori hiki ida.
Avarasohahi ida hogoi,
karasohajahahi ida trigo avani itxani jaboni.
30 Aꞌdirini oadani ida bononi,
jakaho hojava ida hogoi avani.
Aꞌboahahavini kamahini vaꞌora ohonariaki bana adani badani abono
hogoi avani-ra varasohaꞌimidiavini,
vanajoronivini vanahokahivini siho kabodinia.
Hari hini ida hogoi kabadanihi,
vaꞌora ohonariavini hiki trigo bononi-ra avibaivini trigo kagorania.”
Niha ada vakadikaꞌdaꞌdi — vaꞌora niꞌaha ada Jesus.
Mostarda ꞌbaꞌdani avijavani karajomihi hida
31 Hari.
Vara niꞌianaha ada Jesus:
—Aꞌonira vara oniꞌavini hiki ida bana rajomi kavaranihi hoariha.
Mostarda ꞌbaꞌdani avijavani vani fori hiki ida Deus ijaꞌari-ra vakaꞌdaꞌdivini.
Itxanini arafiaki ida mostarda ꞌbaꞌdani.
Ijaꞌaria birakhaihi ida mostarda ꞌbaꞌdani kidisiroia.
32 Movahi,
avijavahi,
karahoki ida mostarda avani patxapatxahaki.
Vadini avijavani naꞌbahaki jaboni.
Igitha raboki kagorahaki vadinia.
Itxani arafiaki ida baꞌbaꞌda,
kabaꞌi,
mostarda ꞌbaꞌdani,
movahi,
avijavaꞌihi,
karahoꞌihi — niha ada Jesus.
Pão-ra kanathoramananiki karajomihi hida
33 Hari.
Asia vara niha ada Jesus:
—Okavarajomiki bana ida Deus ijaꞌari-ra vakaꞌdaꞌdivini.
Pão kaimani-ra kanathoramananiki vani fori hija ida Deus ijaꞌari-ra vakaꞌdaꞌdivini.
Gamo vania bigathija ida pão-ra kanathoramananiki paꞌitxi,
binaibaviꞌihi ida trigo karaho,
biaraꞌbiraꞌihi bavi hoarani bodinia.
Paꞌitxini kabaꞌi ida pão-ra kanathoramananiki,
biaraꞌbiravini naothinia kathoramananiꞌihi ida pão kaimani hahavi.
Nimania ida Deus ijaꞌari-ra vakaꞌdaꞌdivini avijavani — vaꞌora niꞌaha ada Jesus.
Rajomi kavaranihia kavaranibakhiaki ada Jesus
34 Jesus vara vaꞌora niꞌaki adani ijaꞌari vajoroniki rajomi kavaranihi ipohikia.
Rajomi kavaranihi kaꞌoa-ra vara vaniꞌaki ada Jesus.
35 ꞌBoꞌdakari Deus athi namoniva abono kohana vara bivaniꞌaꞌiki ida Jesus kahojai rajomi kavaranihia kavaranina,
biniꞌaha:
“Vara vaꞌora oniꞌavini hiki bana ida rajomi kavaranihi.
Nahina ogavaharikia vaꞌora onanamithaki bana adani ijaꞌari hahavi.”
Nihi ida Deus athi papira hojaki.
Jesua bivavaꞌisohihiki ida hogoi avani karajomihi nahina hini
36 Oniaroa,
Jesus vaꞌora nahojahaꞌaha adani ijaꞌari vaipohiki.
Ai vihiꞌaha kidipohi khama,
gora vavahojaki kania avikhaꞌaha avikhajakosiꞌaha.
Kidipohia vanamaakarimiꞌaha ada Jesus,
vaniꞌaha:
—Ni-aogaki ida hogoi ꞌbaꞌdani txiotxioni karajomihi kavaranihi nahina hini.
Haria navaꞌisohijahakivinihi bana ida varani nahina hini.
37 Jesua bigathanihi ida vaathi:
—Hovani ijaꞌari hahavi vakadiꞌaajo ho.
Makhira trigo ꞌbaꞌdani jahaki-ra natxiotxiovini vani fori ohija.
38 Arabo hahavi fori hiki ida siroi.
Ijaꞌari Deua bivakaꞌdaꞌdiki fori hiki ida trigo ꞌbaꞌdani jahaki.
Ijaꞌari Jaharia bivakaꞌdaꞌdiki fori hiki ida hogoi ꞌbaꞌdani.
39 Makhira hogoi ꞌbaꞌdani-ra natxiotxioki fori hiki ada Jahari.
Aꞌboahahavini kamahini fori hiki ida mahi bana Deus ijaꞌari hahavi-ra nasohivini kamahini.
Siroia vakabadaniki fori vihiki adani Deus ibavi kaijaꞌarini.
40 Siroia vakabadanikia varasohahaviki ida hogoi,
vanahokahiki ida siho kabodinia.
Onivani fori hija ida bana namithaki Deus ijaꞌari-ra nasohivini kamahini.
41 Vaꞌora okaronaki bana adani Deus ibavi kaijaꞌarini ijaꞌari vakadiania avikhana.
Vaꞌora oniꞌaki bana adani:
“Deus kaijaꞌari vahararana vahojaki adani ijaꞌari,
ijaꞌari hoariha-ra vakaboroborobakhiaki Jahari kabadania vakabadanira kaimoni.
Vahojaki jaboni adani Jahari kahojaia vakahojaiki.
Vaꞌora vaani bana adani ijaꞌari vajahariki.
42 Hogoi fori vihiki adani.
Vaꞌora vanahokahi bana siho kabodinia.
Vabarariariaꞌahapikiki bana adani,
vakanada-ra vakanakiroromisiki bana adani.”
Vaꞌora oniꞌaki bana adani Deus ibavi kaijaꞌarini.
43 Oniaroa,
kodiabiꞌi nama hojaki vaꞌora vakaꞌdaꞌdiki adani kidijaꞌari.
Vavagaki bana adani Deus kahojaia vakahojaiki,
safini vagana fori vihiki adani bana.
Avamorobohahi;
oathi-ra mitha avaniꞌajahakihi — vaꞌora niꞌaha ada Jesus.
Jiniro ꞌbaꞌdani ahojaki karajomihi hida
44 Hari.
Jesua vara bivaniꞌahi ida rajomi kavaranihi hoariha:
—Okavarajomiki ida Deus ijaꞌari-ra vakaꞌdaꞌdivini,
ijaꞌari jiniro ꞌbaꞌdani kaidivaki ahojaki-ra karagavini fori hini.
Hoariha kasiroia adahaꞌaha ada makhira.
Adahaha,
bikaragaꞌihi ida jiniro ꞌbaꞌdani kaidivaki ahojaki.
Khaii niꞌaha.
Bikaragavini naothinia,
bianahojaꞌianahi ida jiniro ꞌbaꞌdani kaidivaki.
Abono-ra niꞌaha ada makhira:
“Onofikarahoki hida siroi kodimoni hini.
Hihavirihi vahabini hida jiniro okaragaki.
Ida asia vahabini hojahi.
Onofiki ida jiniro hahavi.
Kodiani hirihi hida siroi.
Okapavakarihi;
ni-siroi kakaꞌdaꞌdini siroi-ra onakoꞌdiꞌianavini-ra nadabaki.
Siroi kaidivaki arafiaki mani bana hida kodinahina hahavi-ra pavakari onihavini hija.
Kodinahina abosini kajinironi-ra ogathanivini vani okapavakariki hida siroi.”
Abono-ra niꞌaꞌaha.
Oniaroa ajihiꞌaha ada makhira.
Siroi kakaꞌdaꞌdini kania okhaꞌaha,
bikapavakariꞌihi ida siroi.
Nimania ida ijaꞌari Deu-ra nofikarahovini kidikaꞌdaꞌdi hina — niha ada Jesus.
Jaꞌdi kaidivaki karajomihi hida
45 Hari.
Jesua vara bivaniꞌahi ida rajomi kavaranihi hoariha:
—Okavarajomiki ida Deus ijaꞌari-ra vakaꞌdaꞌdivini,
makhira jaꞌdi kaidivaki-ra nakoꞌdivini.
Makhira bianakoꞌdioniki ida jaꞌdi jahaki kaidivaki,
jaꞌdi-ra pavakari vanihaki abono vakadiania.
46 Oniaroa,
bikaragaꞌihi ida jaꞌdi kaidivaki hoarani karaho.
Jahaki kaidivani arafiaki ida.
Binofiꞌoamaniꞌihi ida jaꞌdi kaidivaki kidimoni hini.
Kaidivani arafiani mani ida kidinahina hahavi-ra pavakari nihavini hija.
Kidinahina hahavi abosini kajinironi-ra gathanivini vani bikapavakarihi ida jaꞌdi hoarani kaidivani arafiaki.
Hari.
Nimania ida ijaꞌari Deu-ra nofikarahovini kidikaꞌdaꞌdi hina — niha ada Jesus.
Tahafa karajomihi hida
47 Hari.
Jesua vara bivaniꞌaꞌihi ida rajomi kavarani hoariha:
—Vara ovaniꞌaꞌianaki ida Deus ijaꞌari-ra vakaꞌdaꞌdivini nahina fori hini.
Tahafa ꞌdakoa ijaꞌaria biakosonavini vani fori hija ida.
Ijaꞌaria biakosonahi ida tahafa,
bianagithiꞌaha ada abaisana ipohiki.
48 Kajiꞌbiniki ida tahafa,
araba abonoa vakaraꞌbaniki avakoꞌomisiꞌaha.
Kaasia pasapasania vavithiꞌaha,
vakanapitakhamaꞌaha ada abaisana.
Vanaibaviꞌaha ada abaisana havahaki kaimoni soꞌoroa.
Vanahokahiꞌaha ada abaisana havahariki.
49 Abaisana-ra vakanapitakhamavini vani fori hiki ida Deus ibavi kaijaꞌarini vakadibadani bana,
ijaꞌari-ra nasohivini kamahini.
Avikhaki bana adani Deus ibavi kaijaꞌarini ijaꞌari vakadiania.
Vaꞌora vaaniki bana adani ijaꞌari Jahari kahojaia vakahojaiki,
ijaꞌari kahojai jahaki vahararana.
50 Vaꞌora vanahokahiki bana adani ijaꞌari Jahari kahojaia vakahojaiki siho kania.
Oniania vabarariariaꞌahapikiki bana adani,
vakanada-ra vakanakiroromisiki bana adani — vaꞌora niꞌaha ada Jesus.
51 Oniaroa,
Jesus vaꞌora nanaꞌdohiꞌaha adani ipohina:
—Avarigamanija hida rajomi kavaranihi vaꞌora vara oniꞌavini hiꞌiki nahina hini?
—Haꞌa,
oogaki — vagathaniꞌihi.
52 Jesus vaꞌora niꞌaha:
—Vara aꞌonira oniꞌavini hiki ada judeus kaijaꞌari kaꞌojomoꞌiva abono.
Ovaria biogajahakiki ida athi jiriki Deus athi kapapirania hojaki.
Oathi-ra kamithavini vani kodipohi hiꞌaha ada makhira.
Kodipohi hina mani ida oathi-ra kaꞌojomoꞌivini hija.
Ijaꞌari kanahinaꞌahapikiki fori hiki ada makhira.
Danoꞌoamanija ida kidiꞌogahai.
Biogaki ida athi ꞌboꞌda-ra vara vaniꞌavini Deus athi kapapirania hojaki,
biogaki jaboni ida oathi jaꞌdini-ra vara vaniꞌavini — vaꞌora niꞌaha ada Jesus.
Nazaré sidajia okhaha ada Jesus
53 Hari hiꞌihi ida Jesus rajomi kavaranihia kavaranina,
ajihiꞌaha.
54 Bivavijavaki kania joiꞌianaha,
kaikahiꞌaha.
Jesua bivavijavaki ibavi onini Nazaré.
Jesus vaꞌora kaꞌojomoꞌiꞌaha adani judeus kaijaꞌari Deu-ra vara vaniꞌavini kagorania.
Oniania mitha vaniꞌahi ida kidivarani,
Jesu-ra vakavaꞌibodivaraniꞌaha.
Vaabono vakaniꞌakhamaꞌaha:
—Hanaja vani bivikhaja ida kidiꞌogahai danoki?
Niha biniꞌaꞌavini koda biogaja ida badani danoki?
55 Aogajahakiki ada.
Gora namonahava abono ada kidiabiꞌi.
Kidiamia Maria.
Jesus kakajoꞌo adani Tiago,
José,
Simão,
Judas vihiki.
56 Gamo isani kidikajoꞌo vihiki akadiania vahojaki jaboni.
Ni-nahina bikaꞌojomoꞌiki ada.
Ni-anofiki ida haria kaꞌojomoꞌivini.
Akajariꞌdaki hida kidivarani — vaabono vakaniꞌakhamaꞌaha.
57 Nazaré sidaji kaijaꞌarinia ni-vanofipaꞌitxiki ada Jesus.
Oniania,
Jesus vaꞌora niꞌaha:
—Ibavi hahavi kaijaꞌarinia vagathanijahakiki ada Deus athi namoniva abono.
Kidijaꞌaria bivavijavaki kania ni-vagathanijahakiki,
igamina jaboni ni-vanofijahakiki,
oniani ida Nazaré sidaji kaijaꞌarini hora vagathanijahakiravini hija — vaꞌora niꞌaha ada Jesus.
58 Nazaré sidaji kaijaꞌarinia vakajariꞌdaki ada Jesus,
oniani ida kidibadani danoki naipohirini hija vakadiania.