—Ada ahokiꞌaha João Batista kohana,

oniani ida badani danoki-ra kaabokavini hija — niha ada Iroji.

João Batista kohana joiꞌiki Irojia bivanihaki ada Jesus.

3 Irojia bivahonariahiꞌiki ada João Batista kohana gathaꞌina,

saꞌa kodabohani.

Cadeia avibaiꞌiki ada.

João Batista kohana cadeia avibaivini viahania,

Irojia bikanagamohaꞌiki ida kidikajoꞌo kagamo.

Filipea oniki ada Irojia kakajoꞌo.

Irodisi oniki ida Filipe kagamo Irojia bisaariꞌiki.

4 João Batista kohana biniꞌabakhiaꞌaha ada Iroji:

—Ni-jahapaꞌitxiki ida kadakajoꞌo kagamo-ra ivahojavini.

Nimania ida Deus kavaꞌisohihi jiriki athini — niha ada João Batista.

Iroji João Batista athi-ra vajaharavini mani ida João gathana-ra vahonariahivini hija.

5 Irojia binofiki ida João Batista-ra naabinivini.

Judeus kaijaꞌari Deus athi namoniva abono hina vakahiki ada João Batista.

Iroji ni-binofiki ida judeus kaijaꞌari-ra vaꞌora naihamahivini,

oniani ida João Batista-ra naabiniravini hija.

6 Hari.

Mahi bivaꞌbanaki kamahini vani,

ihinika karaho amonahani-ra honariaꞌaha ada Iroji.

Vaꞌora kaboaꞌiha adani ijaꞌari vakanahinaꞌahapikiki.

Vajoronihahaviꞌaha,

khajakosihi ida Irodisi kaisai,

khajoꞌihi.

Irojia khai biniꞌahi ida kidinabadiahi khajoni.

7 Khajoꞌini naothinia,

Irojia biniꞌahi:

—Nahinaro-ra inofihi;

ira onoꞌahi.

Jokoa ira onavaꞌiponiꞌimarinirihi,

ikaꞌdomakia ira onoꞌahi.

8 Irodisia bihonariaꞌihi ida kidisai João Batista kaꞌdaꞌdi akaꞌboani-ra kanikhariahavini.

Oniania,

kidinabadiahia bikanikhariahaꞌaha ada Iroji:

—Onofiki hidakabaꞌi João Batista kaꞌdaꞌdia hora inoꞌavini bavia kabaviki.

9 Hari.

Vaꞌi mokara niꞌaha ada Iroji.

Ni-binofiki ida João Batista kaꞌdaꞌdi akaꞌboani.

Kidikanori abonoa vakamitharija vaha ida athi;

ni-binoꞌaki vaha ida kidinabadiahi bikanikhariakia.

10 Oniania,

bihonariaha ada sorara:

—Iakavaꞌboaha bana ida João Batista kaꞌdaꞌdi.

Ikavikha hida — biniꞌaha.

Ajihiha ada sorara,

cadeia okhaha,

João Batista kaꞌdaꞌdi-ra akavaꞌboahaꞌavini.

11 Bavi bodinia bikanahojaꞌihi.

Bikavikhaꞌihi,

imaꞌinavi-ra noꞌavini kihiꞌihi.

Bigathanihi ida bavi bakaꞌdaꞌdia daiki,

biakosahi,

kidiamia-ra noꞌavini kihiꞌihi.

12 Hari.

João Batista kohana ipohina vakamithaꞌihi ida monina,

cadeia avikhaꞌaha abaꞌona avanikhaꞌavini.

Jaꞌdi hodijamaꞌokia avibaihaꞌihi ida abaꞌona.

Naothinia Jesu-ra vananamithavini hiꞌihi ida João Batista pohimajaꞌina.

13 Hari.

Oniaroa,

Jesua bikamithaꞌihi ida João Batista kohana pohimajaꞌina varani hini.

Bikamithavini naothinia ovani oa kiꞌdamaꞌaha aakhaꞌaha ibavi kaijaꞌaririki-ra akanikhaꞌaha.

Ijaꞌari vaipohikia avigaki ida ibavi hana hini Jesus okhana.

Oniaroa,

vaibavia ai vihinanaꞌaha adani ijaꞌari vaipohiki afohanana ꞌdako vadinia vikhabaoniꞌaha.

Jesus viaha avikhananavaꞌaha.

14 Hari.

Akoꞌomisiꞌaha ada Jesus,

ogaimoriꞌaha,

vaꞌora nokiꞌaha adani ijaꞌari vaipohiki vaviahanokhaki.

Vaꞌora nakaidivamaniha.

Ijaꞌari vakavamoniki-ra vaꞌora anaihotaꞌaha.

15 Safini ajoraꞌina vani kidipohia vanamaakariꞌaha ada Jesus,

vaniꞌaꞌaha:

—Kamahijanarihi.

Kagorarihi bana hida ibavi.

Ni-hojaki ꞌbai vakadimoni.

Vaꞌora honaria ai vihiꞌina mahija ijaꞌari vahoariha vaibavia ꞌbai-ra vakapavakarihavini.

16 —Iniani,

ni-nahina kaimoni vaꞌora ohonariariha adani ai vihina.

Aꞌonivani ꞌbaia vaꞌora vanoꞌa — niha ada Jesus.

17 Vagathaniꞌihi ida Jesus athi:

—Pão saꞌai kahoarani kihiki oavani-ra akavahojaja.

Abaisana ꞌbamiki oavani-ra jaboni avahojaja — Jesu-ra vaniꞌaha.

18 —Kodiania vavikha bana o abaisana,

pão kihiki — vaꞌora niꞌaha ada Jesus.

19 Oniaroa,

Jesus vaꞌora honariaha adani ijaꞌari vaipohiki arabo namania kahogoini itxani vavithithionahana.

Jesua biagathaniꞌihi ida pão saꞌai kahoarani abaisana ꞌbamiki kihiki,

nama vada nimananiha,

Deu-ra vara niꞌaꞌaha:

—Deus,

ivani ijahaki i.

ꞌBaia haria inoꞌaꞌiki i — niha ada Jesus.

Bikanapitahatahahi ida pão,

abaisana ꞌbamiki hiki.

Kidipohi-ra vaꞌora noꞌavini kihiꞌihi,

vakaravinaja kaimoni ijaꞌari vaipohiki vakadiania.

Oniaroa,

vakaravinaꞌihi.

20 Viꞌbaihahaviꞌaha,

vavaꞌi naꞌbihahavimaniꞌaha.

Viꞌbaina naothinia Jesus ipohina vanajoroniꞌihi ida ꞌbai ahabarini.

12 soꞌoro-ra vanajiꞌbijiꞌbihaꞌaha ꞌbai ahabarinia.

21 Makhira 5 mil vaipohina viꞌbaiki,

gamo,

isai vihiki viꞌbaiki jaboni.

Ijaꞌari vaꞌahapina oamani adani viꞌbaira.

22 Hari.

Pão-ra vakanajoronivini naothinia,

Jesus ipohina-ra vaꞌora honariaha:

—Vakiꞌdamaꞌa mahija avarakhananavaꞌavini,

avarakafianija kaimoni — vaꞌora niꞌaha.

Hari.

Ai vihiꞌaha.

Avakakafianina kabaꞌi Jesus vaꞌora honariaha adani ijaꞌari vaipohiki avajoina vagorana.

23 Vaꞌora kaaminavini naothinia,

arabo namahikia gaimoriha ada Jesus,

Deu-ra vara niꞌavini kaimoni.

Arabo namanija jominikosoaꞌaha ada Jesus.

24 Hari.

ꞌDako bodi pania vakavanamina kabaꞌi adani ipohina,

vakajominiꞌaha.

Kanava-ra aagathaniki ida sirisiriki danoki,

komini kanaꞌbahakia bikosonafarahavini.

25 Avagarini vani,

khaꞌaha ada Jesus kidipohi vakadiania,

adahana paha namania.

26 Vanokihahaviꞌaha ada Jesus paha namania adahana,

vakaimahidaꞌaha.

Paha kapamoarihi vavanihaꞌavini.

Vaofinina,

vakabarariariaꞌaha:

—Paha kapamoarihi bana o khara!

—Khai hora vakaniꞌa!

Hovani Jesus ho.

Hariꞌa vaimahida!

28 Oniaroa,

niha ada Pedro:

—Jesus,

ivani oa i koda,

hora honaria paha namania oadahana kadania ookhana.

29 —Khaꞌa — Jesua biniꞌaha ada Pedro.

Hari.

Kanava kabodinia akiꞌdafina ada Pedro.

Paha namania adahaꞌaha Jesus kania okhana.

30 Hari.

Pedroa bikamithaꞌihi ida sirisiriki danoki,

ofinimaniꞌaha.

Ofinina mani ida aniꞌomarina nakamaꞌdani hija.

Oniaroa,

bodiꞌbaraꞌaha:

—Jesus,

hora akavaꞌijoa bana!

31 Jorakia Jesua bigathiꞌaha ada Pedro,

biniꞌaha:

—Paꞌitxiꞌoamanija ida hora ikajariꞌdaravini.

Nahina mani ida hora ivakaijokajanaravini hija?

32 Hari.

Oniaroa,

vakiꞌdamaꞌbamakhamaꞌaha.

Radahaꞌihi ida sirisiriki danoki.

33 Kidipohia vakanamasiviꞌaha ada Jesus,

vaniꞌaha:

—Kaꞌoa oamani ida Deus kaisai ihini.

34 Hari.

Vakajoifianiꞌaha adani Jesus.

Genesaré ibavi onikia avakoꞌomisiꞌaha.

Avigaimoriꞌaha.

35 Genesaré ibavi kaijaꞌarini vaꞌora vanokiꞌaha,

Jesu-ra avigajorakiꞌaha.

Ijaꞌari Jesu-ra vanokiꞌiki avakahoaraharahanakhamaꞌiki vakavamoniki-ra vaꞌora vanavaꞌisohihaꞌavini afohahavi.

Ijaꞌari vaipohiki vaꞌora avavikhaꞌaha adani vakavamoniki Jesus kania vaꞌora anaihotara kaimoni.

36 Vakanikhariaha afohanana:

—Jakaho kadamakari ihini-ra vakaabadava — vaniꞌaha.

Jesus kamakari ihini-ra vakaabadabadarisahakhamaha avaihotahahaviꞌaha.