Judeus kaijaꞌari vakadihojai hiki hida
15
Hari.
Jesus kania avikhaꞌaha adani farisio vaipohiriki,
judeus kaijaꞌari vakaꞌojomoꞌiva abono khama.
Jerusaléa vikhaki adani,
Jesu-ra vara vaniꞌara kaimoni.
Jesu-ra vananaꞌdohiꞌaha:
2 —Akadijaꞌari avikhananavaki vakadihojai hiki ida ijaꞌari saꞌani-ra kosokovini arafiaki paha karahoa ꞌbaini viahania.
Nimania ida Deua bivajahavini vakahiki.
Ni-niki ida iipohini vakadihojai.
Nahina mani ida kadaipohi akadijaꞌari avikhananavaki vakadihojai-ra vakajonivini hija?
Ni-asohiki ida vakadihojai.
Ni-viꞌbaina viahania vasaꞌa-ra vakosokovini arafiaki,
oniani ida akadijaꞌari avikhananavaki kahojai-ra vanaabaravini hija.
3 Hari.
Jesus vaꞌora niꞌaha adani farisio:
—Aꞌonivani,
nahina mani ida Deus kavaꞌisohihi jiriki-ra avanaabaravini hija?
Avarigavini kabaꞌi ida Deua binofiki bada avaniꞌavini,
avakajonibakhiaki ida.
Avaranahoarihaki ida Deus athi,
bada avaniꞌaja kaimoni ida badani avakadijaꞌari avikhananavaki aꞌonira vakaꞌojomoꞌivini hiꞌiki.
4 Asia vara niha ada Jesus:
—Deus kavaꞌisohihi jiriki ijaꞌari-ra honariahi:
“Vaꞌora vanakaidiva adani avakadiamia,
avakadiabiꞌi vihiki.”
Deus kavaꞌisohihi jirikia bivahonariahivini abinini ida ijaꞌari kidiamia,
kidiabiꞌi vihiki-ra kanavaranihaki varani jaharikia.
Nimania ida Deus kavaꞌisohihi jiriki — vaꞌora niꞌaha ada Jesus.
5-6 Asia vara niha ada Jesus:
—Avaranahoarihaki ida Deus athi asohijanaria kaimoni.
Nimania bana hida avakadiꞌojomoꞌihi athini asohiriki:
Ijaꞌari kajiniroki Deu-ra kanavaꞌigavini hini ida kidijiniro pitani.
Ni-makhaniki ida kidiabiꞌi,
kidiamia vihiki-ra vaꞌora kaijahitaravini,
vakadinahina-ra vakainamovini kabaꞌi.
Deu-ra kanavaꞌigavini hini mani ida vaꞌora kaijahitaravini namakhanirini hija.
Ojomoꞌihi athini nikia ijaꞌari-ra avakaꞌojomoꞌivini jaharihi,
ni-asohirihi ida.
Nirihi ida Deus athi.
Deua bihonariaki ida avakadiamia,
avakadiabiꞌi vihiki-ra avanakaidivavini.
Avakadimoni ni-makhaniki ida vaꞌora avanakaidivaravini.
Ni-avanofiki ida Deus athi-ra avanaabavini.
Avanofimanihi ida avakadijaꞌari avikhananavaki vakadihojaia avakahojaini — vaꞌora niꞌaha ada Jesus.
7 Asia vara niha ada Jesus:
—Deus athi-ra avanofivini-ra avakahiꞌbadaraki aꞌoni.
Aꞌonira vara vaniꞌaꞌboꞌdaꞌiki ada Deus.
Deus athi kapapirania Isaías kohana binajiriꞌiki ida athi:
8 “Vaꞌini bodinia hora vanofipaꞌitxiravini kabaꞌi,
ojahana-ra khai vaniꞌabakhiaki adani ijaꞌari afoꞌbadara,
varani jahakia vara hora vavaniꞌabakhiaki adani.
9 Ni-nahina kaimoni hora vakanamasiviki.
Vakadijaꞌari avikhananavaki vahojana-ra vanofivini mani ida oathi-ra vanaabaravini hija.
Vakadihojaia vakahojaina vaꞌora ohonariaꞌboꞌdavini-ra vakahivini.
Kodihonari hirihi ida vakadihojai hija.”
Nimania ida Deus athi,
papira hojaki athini — niha ada Jesus.
Ijaꞌari-ra najahariki varani hini hida
10 Hari.
Oniaroa,
Jesus vaꞌora baranahaꞌaha adani ijaꞌari vaipohiki,
vikhara kaimoni kidiania.
Vara vaꞌora niꞌaha:
—Aꞌonivani afohahavi mitha vaniꞌa hida kodivarani mahija avarigajahakivini.
11 Ni-ꞌbaia binamakhaniki ida ijaꞌari Deus viaha.
Ijaꞌari varani jaharikia kavaranini mani ida ijaꞌari-ra najaharija Deus viaha.
12 Oniaroa,
Jesu-ra vanamaakariꞌaha adani ipohina,
vaniꞌaha:
—Iogamanija koda ida farisio kadavarani-ra vavajaharavini?
13 Jesus vaꞌora niꞌaha:
—Deus jaharikia vaꞌora arakhaki bana adani.
Hogoi ꞌbaꞌdani fori vihiki adani.
Ni-hogoi ꞌbaꞌdani-ra rakhaiki ada kodiabiꞌi.
Movahi ida baꞌbaꞌda kodiabiꞌia birakhairiki,
birasohahi,
binahokahihi.
14 Hariꞌa vaꞌora vakavaꞌibodi adani farisio.
Kamaodorohaki fori vihiki adani.
Ijaꞌari vasohiva abono vakamaodorohaki adani.
Makhira kamaodorohakia bibananiki ada hoariha kamaodorohaki;
hodi bodinia avavoronijakosiꞌbamakhamaꞌaha.
15 Oniaroa,
Pedro Jesu-ra niꞌaha:
—Haria nanamithajahakivinihi bana hida ꞌbai kavaranihi vara vaꞌora iniꞌavini hiꞌiki.
16 Jesus vaꞌora niꞌaha:
—Vahoariha fori avihimania koda?
Ni-nahina-ra avarigaria koda?
17 Ijaꞌaria biobaihi ida kidiꞌbai bodinia,
bikidafihi,
kaijonia okhahi,
kiaꞌihi.
Ni-ꞌbaia binamakhaniki ida ijaꞌari.
18 Ijaꞌari vaꞌini bodinia hojaki ida vaꞌini bodini vara nini jahariki.
Varani jahariki-ra vara vaniꞌavini mani ida ijaꞌari-ra najaharija Deus viaha.
19 Bikavaꞌibodivaraniꞌimidiaki ida hojai jahariki.
Binofihi;
bada biniꞌahi.
Hida vani mani vaꞌi bodini vara nini jaharikaꞌoaki.
Binofiki ida kaabinina.
Binofiki ida kidigamo hiriki-ra viꞌomavini.
Binofiki ida kidimakhira hiriki-ra viꞌomavini.
Binofiki ida gamo-ra odoraonivini.
Bikavaꞌibodivaraniꞌimidiaki jaboni ida hojai asohiriki hoariha,
oniani ida hojai asohirikia kanahojaini hija.
Biboꞌdiaki ida hoariha kanahina.
Korijanahia kavaranibakhiaki ida ijaꞌari,
onii jaharikia kanavaraniki ida ijaꞌari hoariha.
20 Hojai asohirikia kahojaini mani ida ijaꞌari-ra najaharija Deus viaha.
ꞌBai viahania ijaꞌari saꞌani-ra kosokohi arafiarihi,
ni-ijaꞌari-ra najahariki Deus viaha.
Jesua bikajoamoraki ida gamo
21 Hari.
Ai vihiꞌaha adani Jesus,
Tiro sidaji,
Sidom sidaji kaaraboni-ra avanikhahavini avamaakariꞌaha.
22 Oniaroa,
avakhanoꞌaha,
Jesu-ra namaakariꞌihi ida gamo.
Israel kaijaꞌari hirihi ida gamo,
Canaã kaaraboni kaijaꞌarini ida.
Binamaakariꞌaha ada Jesus,
bodiꞌbaraꞌihi:
—Jesus,
ivani kaꞌdaꞌdi i,
Davi kohana kahanodi namitharonisiagaki i.
Hora vaꞌadi bana.
Kabajadiki ida kodisai,
bajadia binajaharikarahoki ida kodisai kamahi.
23 Jesua ni-bigathaniki ida athini.
Oniaroa,
kidipohia vanamaakariha ada Jesus,
vaniꞌaha:
—Ihonaria bana oni gamo akaraꞌoꞌini.
Anaothia kasiagahaꞌoadahaki oni,
bodiꞌbarahaꞌoadahaki ida jaboni.
24 Oniaroa,
Jesua biniꞌahi ida gamo:
—Deus hora honariavini hiki Israel kaijaꞌari-ra vaꞌora okajoamoravini.
Ovilia avakamadaki fori vihiki adani.
Ni-hora honariaki kaho ijaꞌari vahoariha-ra vaꞌora okajoamoravinia.
25 Jesus viaha kajoꞌatharariꞌihi ida gamo,
biniꞌaha:
—Hora kajoamora bana!
26 Jesua biniꞌaꞌihi:
—Isai-ra vaꞌora anoꞌavini hiki ida ꞌbai.
Jomahi-ra vaꞌora onoꞌavini hiki ida ꞌbai isaia vakaiꞌdariki.
Jahariki ida isai viꞌbairina kabaꞌi,
jomahi-ra vaꞌora anoꞌavini hini isai vakadiꞌbaia — niha ada Jesus.
Jesus judeus kaijaꞌari-ra kavarajomivini isai fori vihina.
Judeus kaijaꞌari vihiriki-ra vaꞌora kavarajomivini jomahi fori vihina.
27 Oniaroa,
gamoa bigathaniꞌihi ida Jesus athi:
—Hai oamani.
Jomahi fori ohiki ho.
Ijaꞌari viꞌbaina kabaꞌi,
jomahi vaitxanava vahahi hida ijaꞌari vakadiꞌbai moramorani gora naboꞌania vararaki.
Kadaijaꞌari ohirina kabaꞌi onofiki ida kodisai-ra ikajoamoravini.
28 Jesua biniꞌaꞌihi:
—Gamo,
hora ikajariꞌdariꞌoamanija.
Ida akaraꞌoꞌihi bajadi kadaisai kania — gamo-ra niꞌaha ada Jesus.
Vara nina kabaꞌi ada Jesus,
aihotaꞌihi ida gamo kaisai.
Jesus vaꞌora anaihotaki adani vakavamoniki
29 Oniaroa,
ajihiꞌaha,
okhaha,
Galiléia kaaraboni kaꞌdakonia kaikahiꞌaha ada Jesus.
Gaimoriꞌaha arabo namahikia vithimaꞌoꞌaha.
30 Jesus kania avikhaꞌaha adani ijaꞌari vaipohiki.
Vaꞌora vavikhaꞌaha adani ijaꞌari vakavamoniki,
vajoꞌo abaꞌoronisiagaki,
vatonorohaki,
vakamaodorohaki,
vaabani aꞌdakharariki vihiki.
Kavamoni ipohiki-ra vavahojaki adani ijaꞌari vaꞌora vavikhaꞌaha Jesus viaha.
Jesus vaꞌora anaihotahahavimaniꞌaha.
31 Vakavaꞌibodivaranikarahoꞌihi ida Jesus kabadani danoki.
Vaꞌora vanokiꞌaha adani vaabani aꞌdakhararijanariki vavaravaraꞌina.
Vaꞌora vanokiki jaboni adani ijaꞌari vajoꞌo abaꞌoronisiagaki,
ijaꞌari vatonorohaki vaadahaꞌina.
Vaꞌora vanokiki jaboni adani ijaꞌari vakamaodorohaki vanokho avagahaꞌini.
Ijaꞌari Jesus kabadani danoki-ra vanokivini mani ida Deu-ra khai vaniꞌavini hija.
Jesus ꞌbaia vaꞌora noꞌaꞌianaki adani ijaꞌari vaipohiki
32 Hari.
Jesus vaꞌora anaihotaꞌaha adani ijaꞌari vaipohiki naothinia,
ipohina-ra vaꞌora baranahaꞌaha,
vaꞌora niꞌaha:
—Vaꞌora onakaidivaki vaꞌoani ijaꞌari vaipohiki.
Mahi ahoarabakosikia kodiania vahojana.
Vakadiꞌbai-ra vakainamovini hiki,
napaja vikhana.
Viꞌbairina oadani ni-onofiki ida ai vihina vaꞌora ohonariavini.
Vaibavia avakakhakhamana vaha vaꞌora ohonariara vaha;
vajarona binafajafajahamaniha vaha;
hagihia vaiꞌami vaꞌora naraiꞌahamaniha vaha.
33 Ipohina vaniꞌaha ada Jesus:
—Pão kahojarihi bana hihida ibavia kakapavakari vahaki kaimoni.
Niha akaniꞌaꞌaki koda bana hida pão vaꞌora anoꞌavini kihiki kaimoni?
34 —Nihafori kihimanija ida pão avakavahojaki?
— vaꞌora niꞌaha ada Jesus.
Jesus athi-ra vagathaniꞌaha:
—Akavahojaki ida 7 pão kihiki kaipohini,
avahojaki abaisana ꞌbamiki kaꞌoa jaboni — vaniꞌaꞌaha.
35 Oniaroa,
Jesus vaꞌora honariaꞌaha adani ijaꞌari vaipohiki vavithionahana.
36 Biagathaniꞌihi ida pão,
abaisana hiki,
Deu-ra niꞌaꞌaha:
—Deus,
ivani ijahaki i,
pãoa haria inoꞌaꞌiki i.
Hari.
Bikanapitahatahaꞌihi,
ipohina-ra vaꞌora noꞌavini kihiꞌihi vakaravinaja kaimoni.
Oniania,
vakaravinaꞌihi ijaꞌari vaipohiki vakadimoni kihini.
37 Jesua bianaipohiꞌianaha ada abaisana,
pão kihiki.
Viꞌbaihahaviꞌaha,
vaakhariꞌaha.
Viꞌbaina naothinia Jesus ipohina vanajoroniꞌihi ida ꞌbai ahabarini.
Vanajiꞌbijiꞌbihaꞌihi ida 7 soꞌoro ipohini.
38 Makhira 4 mil vaipohina viꞌbaiki,
gamo,
isai vihiki viꞌbaiki jaboni.
Ijaꞌari vaꞌahapina oamani adani viꞌbaira.
39 Hari.
Jesus vaꞌora kaaminaꞌaha adani ijaꞌari vaipohiki,
naothinia vakiꞌdamaꞌaha adani Jesus,
ai vakihiꞌaha,
avakakafianiha,
Magadã kaarabonia avakoꞌomisiꞌaha.