Ijaꞌari Jahari kahojai-ra kavaꞌipahinirihi; abinihi
13
Hari.
Vara nina kabaꞌi ada Jesus,
vakaikahiꞌaha adani ijaꞌari vahoariha,
vara Jesu-ra vaniꞌaha:
—Ikamithamanija ida Galiléia kaaraboni kaijaꞌarini vamonina?
Arabo kakaꞌdaꞌdini Pilatos oniki vaꞌora vahonariahiki adani vaabinina.
Deu-ra khai vaniꞌavini kagorani bodinia igitha abononi ahaꞌdikia Deu-ra vakanavaꞌigavini oadani,
Pilatos kahonai abono vaꞌora vanaabiniꞌiki adani.
2 Oniaroa,
Jesus vaꞌora niꞌaha:
—Vaꞌora avakavaꞌibodivaraniki adani judeus kaijaꞌari Galiléia kaarabonia vikhaki.
Vakadihojai asohiriki aradahaki avavanihamania,
oniani ida vaꞌora napohimajaja?
Lucas 13:1-35
Kaꞌoa hiki hida kodivarani.
Avakadihojai asohiriki-ra avakavaꞌipahinirihi;
aꞌonivani jaboni avaabiniki bana aꞌoni,
vaꞌoaniaro fori avihini.
4 Vaꞌora vakavaꞌibodivarani adani ijaꞌari 18 vaipohina Siloé ibavi onikia vahojaki.
Gora namahiki adariꞌiki vanamana,
vaꞌora naabiniꞌiki adani.
Vakadihojai asohiriki arafiaki vaꞌora avavanihavini,
oniani ida vaꞌora napohimajaja.
Vakadihojai asohiriki ni-aradahaki adani Jerusalém sidaji kaijaꞌarini.
5 Kaꞌoa hiki hida kodivarani.
Avakadihojai asohiriki-ra avakavaꞌipahinirihi;
aꞌonivani jaboni avaabiniki bana aꞌoni,
vaꞌoaniaro fori avihini.
Figira avani bonoriki varani hini
6 Hari.
Oniaroa,
Jesus rajomi kavaranihi-ra vara vaniꞌaꞌaha:
—Uva avani kasiroini-ra vahojaha ada makhira.
Uva avani hararania hojaki ida figira avani.
Hari.
Makhira kasiroikia binakoꞌdihaꞌihi ida figira bononi,
ni-bonoki ida avani.
7 Oniaroa,
biniꞌaha ada siroi akadavaꞌava abono:
“Vada iniꞌa hida figira avani.
Badara ahoarabakosikia
onakoꞌdihi hida figira
bononi,
ni-nahina-ra okaragaꞌiaki kaho.
Iavaꞌboa hida avani.
Ni-nahina kaimoni
kodisiroia hojaki hida figira avani bonoriki.”
8 Hari.
Siroi akadavaꞌava abonoa biniꞌaha ada makhira:
“Jakaho hojava afoꞌimidia hida figira avani badara hoarani kaꞌoa.
Okhoriribanaoniki bana hida avani ꞌdamani.
Onaibaviki bana ida nami
jahaki hoariha,
bonoja kaimoni hida figira avani.
9 Badara hoariha bonohi hida avani;
ni-oavaꞌboaki bana.
Bonorihi;
aꞌboani ivahonariahihi.”
Niha ada siroi akadavaꞌava abono.
— Rajomi kavaranihi-ra ananokhomiꞌaha ada Jesus.
Jesua bianaihotaki ida gamo
10 Hari.
Ijaꞌari akoiri kamahini okhaha ada Jesus judeus kaijaꞌari Deu-ra vara vaniꞌavini kagorania,
vaꞌora kaꞌojomoꞌiꞌaha adani ijaꞌari vajoroniki.
11 Oniaroa,
kaikahiꞌihi ida gamo kavamoniki.
18 badara ipohini vani bajadia binakavamonija ida gamo.
Vatxinini adahaki ida gamo.
Ni-bikaabokaki ida abononi nasohimananivini.
12 Oniaroa,
Jesua binokiꞌihi ida gamo,
kidiania khamini bikaboaꞌiꞌihi,
biniꞌaꞌihi:
—Xoni,
hida kha kodiania,
iaꞌaihotaꞌiki i.
13 Oniaroa,
Jesua bikanaibavihi ida saꞌa gamo namania.
Jorakia abononi nasohiꞌihi.
Deu-ra khai niꞌaꞌihi ida gamo.
Biniꞌahi:
—Jahaki ada Deus,
danoki ada.
Hora anaihotaꞌiki ada.
14 Hari,
ihamahiꞌaha ada judeus kaijaꞌari Deu-ra vara vaniꞌavini kagorani akadavaꞌava abono.
Akoiri kamahini gamo-ra anaihotavini mani ida Jesu-ra kaihamahivini hija.
Oniania,
vaꞌora niꞌaha adani ijaꞌari vajoroniki:
—6 mahi ipohini vani ijaꞌari bada vakhanina jahaja.
Hojaki ida mahi hoarani akadiꞌakoiri kamahini kaimoni.
Hariꞌa akoiri kamahini vikha avaraihotaja kaimoni.
Ijaꞌari bada vakhanina kamahini vikha bana.
15 Oniaroa,
Jesua bigathaniꞌihi ida athi:
—Deus athi-ra avanaabavini-ra avakahiꞌbadaraki aꞌoni.
Aakoirina kamahini hahavi bada avakhaniki aꞌoni.
ꞌDaama kahidari vagorana avarikhaki aꞌoni,
vaꞌora avakokharihaki adani avakadiꞌdaama kahidari,
burro vihiki,
vaꞌora avarisavini vaha kania viꞌavija kaimoni ida paha.
16 Hihida gamo oanaihotaꞌiki Abraão kahanodi namitharonisiagaki hida.
18 badara ipohini vani Jaharia bidabomisiki fori hija hida.
Nahina mani ida aakoirina kamahini aihotani najaharini hija?
— niha ada Jesus.
17 Oniaroa,
Jesu-ra vavajahariki vavaꞌi-ra anaipahihiꞌihi ida Jesus vara vaꞌora niꞌavini hiꞌiki.
Ijaꞌari vaipohiki vani adani khai vakhanira Jesus kidibadani danoki-ra bada niꞌabakhiavinia.
Mostarda ꞌbaꞌdani avijavani karajomihi varani hini hida
18 Hari.
Vara niꞌianaha ada Jesus:
—Aꞌonira vara oniꞌavini hiki ida bana rajomi kavaranihi.
Mostarda ꞌbaꞌdani avijavani vani fori hiki ida Deus ijaꞌari-ra vakaꞌdaꞌdivini.
19 Ijaꞌaria birakhaihi ida mostarda ꞌbaꞌdani kidisiroia.
Movahi,
avijavahi,
karahoꞌoamanija ida mostarda avani.
Vadini avijavani naꞌbahaki jaboni.
Igitha raboki kagorahaki vadinia.
Nimania ida Deus ijaꞌari-ra vakaꞌdaꞌdivini avijavani — niha ada Jesus.
Pão-ra kanathoramananiki karajomihi varani hini
20 Hari.
Asia vara niha ada Jesus:
—Okavarajomiki bana ida Deus ijaꞌari-ra vakaꞌdaꞌdivini.
Pão kaimani-ra kanathoramananiki vani fori hija ida Deus ijaꞌari-ra vakaꞌdaꞌdivini.
21 Gamo vania bigathija ida pão-ra kanathoramananiki paꞌitxi,
binaibaviꞌihi ida trigo karaho,
biaraꞌbiraꞌihi bavi hoarani bodinia.
Paꞌitxini kabaꞌi ida pão-ra kanathoramananiki,
biaraꞌbiravini naothinia kathoramananiꞌihi ida pão kaimani hahavi.
Nimania ida Deus ijaꞌari-ra vakaꞌdaꞌdivini avijavani — vaꞌora niꞌaha ada Jesus.
Bakatha karabodiriki varani kihini
22 Hari.
Aadahaoniꞌaha ada Jesus sidaji karaho,
sidaji paꞌitxi hikia,
Jerusalém sidaji-ra anikhahaꞌavini.
Ijaꞌari vaibavia akhanoꞌaha vaꞌora akaꞌojomoꞌioniꞌaha.
23 Ijaꞌaria binanaꞌdohiꞌaha:
—Ijaꞌari vaipohiriki vani koda adani Deus vaꞌora akavaꞌijoara bana?
24 Jesua bigathaniꞌihi ida kidinaꞌdohi:
—Hariꞌa vavaꞌaha ida nahina aꞌonira nadabavini bakatha karabodirikia avariꞌoini.
Kaꞌoa hiki hida aꞌonira vara oniꞌavini hiki.
Ijaꞌari vaipohikia vanofiki ida aviꞌoina,
ni-vakaabokaki bana.
25 Oniaroa,
rajomi kavaranihia vara vaꞌora niꞌaꞌaha ada Jesus.
Kidivarani hiki ida ijaꞌari Deus athi-ra naabariki.
Vaꞌora niꞌaha:
—Gora kakaꞌdaꞌdini fori hiki ada Deus.
Deus ibavi fori hiki ida gora.
Hari.
Gaamananiꞌaha ada gora kakaꞌdaꞌdini,
biakaꞌoahaꞌihi ida gora kaathani.
Hari.
Aꞌonivani gora banininia avahojaki bana aꞌoni,
too too avakhanihaꞌoadahani:
“Akadikaꞌdaꞌdi,
anofiki ida aoꞌoina!”
Aꞌonira niꞌaki bana ada:
“Ni-aꞌonira oogaki,
ni-hana hini kaijaꞌari
avihini-ra oogaki.”
26 Avagathanihi ida athi:
“Aꞌbaiꞌiki hari kadania.
Akadisidajia haria ikaꞌojomoꞌiki hari jaboni.”
27 Aꞌonira niꞌaꞌianaki bana ada:
“Ni-aꞌonira oogaki,
ni-hana hina kaijaꞌari
avihini-ra oogaki.
Avakadihojai asohirihi
afobakhia,
avakaraꞌo bana kodiania!”
— vaꞌora niꞌaha ada Jesus.
Hari.
Jesus vaꞌora niꞌaha adani vajoroniki:
28 —Vaꞌora avaranokijakosiki bana adani Abraão,
Isaque,
Jacó,
Deus athi namoniva abono hahavi vihiki Deus kania.
Aꞌonivani baniniaja avahojaki bana aꞌoni.
Avariꞌoini-ra avakaabokaravini mani ida aꞌonira naasaraꞌahapikija bana,
avakanadani-ra avakanakiroromisiki bana aꞌoni!
29 Hari.
Oniaroa,
vajoroniki bana jaboni adani ijaꞌari vaipohiki arabo hahavia vikhaki Deus athi-ra vanaabaki.
Vavithirariki bana adani vajoronina mesa kaiꞌoarinia Deus ibavi kania viꞌbaijabanara kaimoni.
30 Hari.
Ijaꞌari vaipohiki Deus vaꞌora baranahasiagavini vaꞌoaniaro miroꞌa aviꞌoiki bana adani Deus ijaꞌari-ra vakaꞌdaꞌdivini kania.
Ijaꞌari vahoariha vaꞌoaniaro miroꞌa Deus vaꞌora baranahavini kabaꞌi,
aviꞌoisiagaki adani vahoariha,
Deus ijaꞌari-ra vakaꞌdaꞌdivini kania.
Jesua vaꞌora nakaidivaki adani Jerusalém sidaji kaijaꞌarini
31 Hari.
Vara nina kabaꞌi ada Jesus,
vamaakariha adani farisio vaipohiriki,
vaniꞌaha:
—Ajihiꞌa bana hihida ibavia.
Irojia binofiki bana ida ira naabinivini.
32 Hari.
Jesus vaꞌora niꞌaha:
—Jahari kabadani namonahava abono ada Iroji.
Avikha bana kidiania.
Vananamithaꞌa bana hida kodivarani okaronaki:
“Hidakabaꞌi bajadi akaraꞌoꞌini-ra ohonariaki ho,
ijaꞌari vakavamoniki-ra vaꞌora oanaihotaki ho jaboni.
Afokajoma oniani
kodibadani hiꞌianahi.
Afokajoma hoariha bana
onaꞌdiahiki hida
kodibadani.”
Iroji-ra vaniꞌa bana.
33 Hari.
Asia vara niha ada Jesus:
—Deua binofiki ida Jerusaléa ookhana,
oniani ida hidakabaꞌi,
afokajoma,
afokajoma hoariha hora anaadahaonija.
Jerusalém sidaji kaꞌoa Deus athi namoniva abono-ra vaꞌora vanaabinibakhiavini,
oniani ida Jerusaléa hora arakhaja.
34 Oniaroa,
Jesus vaꞌora niꞌaha:
—Jerusalém sidaji kaijaꞌarini!
Vaꞌora avanaabinibakhiaꞌiki adani Deus athi namoniva abono.
Jaꞌdia vaꞌora avanagahabakhiaꞌiki adani athi avikhava abono Deus vaꞌora karonaꞌiki avakadiania.
Kabaꞌi,
aꞌonira onakaidivaki ho,
onofiki ida aꞌonira oakavaꞌijoavini.
Arakava kidisai-ra bihini naboꞌania najoroniki fori aꞌonira onihavini-ra onofihi,
ni-avanofipaꞌitxiki.
35 Aꞌonira oakavaꞌijoavini-ra avanofiravini mani ida Deus avakadisidaji-ra kavaꞌipahinivini hija bana.
Kaꞌoa hiki hida kodivarani Jerusalém sidaji kaijaꞌarini aꞌonira vara oniꞌavini hiki.
Ni-jorakia okhaꞌianaki bana ho avakadiania.
Hora vanokiꞌianavini kamahini Jerusalém sidaji kaijaꞌarini hora vanofiki adani,
vara vavaniꞌaki bana hida varani ohina:
“Khaki ada ovari
Deua bikaronaki
ijaꞌari-ra vakaꞌdaꞌdira kaimoni.
Deua bikajoamoraki bana ada khaki.”
— niha ada Jesus.