João Batista vaꞌora karonaki adani ipohina Jesus kania
11
Hari hiꞌihi ida Jesus kavarani vaꞌora navaꞌisohiꞌiki adani 12 vihiki vaipohina,
ibavi ipohikia avikhana.
Vaꞌajihiꞌaha.
Oniaroa,
ajihiꞌaha ada Jesus jaboni,
sidaji hoariha maakarinia aadahaoniꞌaha.
Vaꞌora akaꞌojomoꞌioniꞌaha adani sidaji kaijaꞌarini,
vara bivaniꞌaki ida Deus varani hina.
2 Hari.
Cadeia hojaki ada João Batista.
Oniaroa,
bikamithaꞌihi ida Jesus Cristo kabadani varani hini.
Vaꞌora baranahaha adani kidipohi kidiania vikhana.
3 Vaꞌora niꞌaha:
—Avikhaꞌa bana Jesus kania.
Jesu-ra vara vaniꞌa bana:
“Anokhaki ada aihotahi abono Deua bikaronaki.
Ivani aihotahi abono,
Deus ira karonaki i?
Hoariha-ra anokhamania koda?”
Vakhani bana — vaꞌora niꞌaha ada João Batista.
Ai vihiꞌaha adani João Batista ipohina.
Jesus kania vakaikahiꞌaha.
Vaniꞌaha:
—João Batista haria karonaki hari kadania,
ira nanaꞌdohiki ada:
Anokhaki ada aihotahi abono Deua bikaronaki.
Ivani aihotahi abono Deus ira karonaki i?
Hoariha-ra anokhamania koda?
— vakhaniha.
4 Jesus vaꞌora niꞌaha:
—João Batista kania avajoiꞌa,
vananamithaꞌa bana ida kodibadani danoki avanokiꞌiki,
kodivarani avakamithaꞌiki jaboni mahija aihotahi abono ohina-ra ogavini.
5 Ijaꞌari vakamaodorohaki vanokho-ra oanavagahaꞌiki ho.
Ijaꞌari vakabaha katonorohaki okanajahaꞌiki vaadahaꞌiki.
Asafi namani-ra najaharikia kakavamoniki ijaꞌari onajahaꞌiki jaboni.
Ijaꞌari vamorobo kamokhihaki oakanavagahaꞌiki,
athi-ra vakamithaꞌiki.
Ijaꞌari vaabiniki oanahokiꞌiki.
Ijaꞌari vakanahinariki-ra onanamithavini hiki ida Deus monina jahaki.
6 Deus vaꞌora kajoamoraki adani ijaꞌari aihotahi abono ohina-ra vakajariꞌdariki — Jesus vaꞌora niꞌaha adani João Batista ipohina.
7 Hari.
João Batista ipohina vaꞌajihina naothinia,
Jesus vaꞌora vara niꞌaꞌaha adani ijaꞌari vaipohiki vajoroniki.
Kidivarani hiꞌaha ada João Batista.
Jesus vaꞌora niꞌaha:
—Amasia hojana kari ada João Batista,
nahina mani ida João Batista kania avanavanavanahaja?
Avarigaki ada João Batista mosori sirisirikia bikanadarahaki fori hirina.
8 Avanavanavanahavini kari avarigaki ada João Batista makhira kanahinaki fori hirina,
ni-João Batista bikaimahaki ida makari kaidivaki.
Amasia ibaviriha ada makhira makari kaidivaki-ra kaimahaki.
Arabo kakaꞌdaꞌdini gorana vania hojara ada makhira makari kaidivaki-ra kaimahaki.
Makhira kanahinaꞌahapikiki fori hiriha ada João Batista.
9 João Batista-ra avanavanavanahavini kari,
avarigaki ada Deus athi namoniva abono hina.
Deus athi namoniva abono oamani ada João Batista.
João Batista vaꞌora aradaki adani Deus athi vanamoniva abono ijaꞌari vahoariha khama.
Ovari miroꞌa vara bivaniꞌaki ida Deus ijaꞌari-ra vakaꞌdaꞌdivini kavaranihi — vaꞌora niꞌaha ada Jesus.
10 Hari.
Jesus vaꞌora vara niꞌaꞌianaha adani ijaꞌari vajoroniki.
—Deus athi kapapirania hojaki ida João Batista varani hina.
Deua biniꞌaha ada kidisai:
“Okaronaki bana ada oathi namoniva abono iviahania okhananavana,
vaꞌora navaꞌisohiki bana adani ijaꞌari vakadimahi-ra vanasohivini ikaikahini viahania.”
Nihi ida João Batista varani hina Deus athi kapapirania hojaki.
11 Hari.
Asia vara niꞌaha ada Jesus:
—Vakavaꞌibodivarani bana hida kodivarani.
Akadijaꞌari avikhananavaki ni-avigahahaviki ida Deus ijaꞌari-ra vakaꞌdaꞌdivini kavaranihi.
Ni-avigaki ida niha ninini Deu-ra vagathanivini vakadikaꞌdaꞌdi kaimoni hina.
João Batista vania biogaja ida,
oniani ida João Batista aagahai akadijaꞌari avikhananavaki vakadiꞌogahai-ra aradavini hija.
Kabaꞌi,
ni-João Batista binokiki ida mahi vara bivaniꞌajoraki.
Ni-kamaꞌdaꞌiaki kaho ida Deus kania ijaꞌari vaabono gahinai vanihavini vakadikaꞌdaꞌdi hira kaimoni.
João Batista naothia ijaꞌari vagathaniki bana ada Deus vakadikaꞌdaꞌdi hina,
oniani ida vakadimahi nasohini hija.
Ijaꞌari nahina hirini kabaꞌi,
kidimahi jahania biaradaki ida João Batista kamahi jahani — vaꞌora niꞌaha ada Jesus.
12-13 Hari.
João Batista kavarani hida:
“Kamaꞌdaꞌiki ida Deus
ijaꞌari-ra vakaꞌdaꞌdivini.”
Ijaꞌaria mitha vaniꞌavini vani Deus kania vaabono gahinai vanihaki vakadikaꞌdaꞌdi hira kaimoni.
João Batista khana viahania Deus athi namoniva abono kohana hahavi vakadivarani hini:
“Khaki bana ida mahi Deus ijaꞌari-ra vaꞌora vakaꞌdaꞌdivini kamahini.
Ni-kamaꞌdaꞌiaki kaho ida mahi.”
Vakhaniha.
Nimania jaboni ida Deus kavaꞌisohihi jiriki.
João kavarani hiꞌiki ida mahi kaikahiꞌiki.
Deu-ra vanofiriki vaꞌora vanadabaki adani Deu-ra vanofiki vakadikaꞌdaꞌdi kaimoni hina.
Ijaꞌari abono-ra nadanohi;
aviꞌoiki ida Deus ijaꞌari-ra vaꞌora vakaꞌdaꞌdivini kania.
14 Deus athi namoniva abono kohana vara vavaniꞌaꞌiki ada Elias kohana miroꞌa khaꞌina.
Ovaria bivavaꞌisohihijoravini ida Deus ijaꞌari-ra vakaꞌdaꞌdivini kamahini kamaꞌdani.
Hovani aꞌonira onavaꞌisohivini hiki bana ada Elias hana hina.
Kodivarani-ra avakajariꞌdaravini-ra avanofihi;
avarigaha ada João Batista Elias kohana fori hina.
15 Avamorobohahi;
mitha vaniꞌajahaki hida oathi — vaꞌora niꞌaha ada Jesus.
16 Jesus vara vaꞌora niꞌaꞌianaha adani ijaꞌari vajoroniki:
—Vaꞌora okavarajomiki adani ijaꞌari hahavi hidakabaꞌi vahokiki.
Isai vakasivanahaki fori vihiki hadani ijaꞌari.
Ijaꞌari vajoroniki kania vakasivanahaki adani isai.
Vaabono vakabodiꞌbarahararahakhamaki adani isai:
17 “Akadikasivanahi ida akarai kaihinikani.
Aꞌithohahi;
ni-avikhajoꞌiki.
Akadikasivanahi hoariha ida ijaꞌari abiniꞌiki.
Akaasarahi ida abaꞌoi,
ni-avaasarajabanaꞌiki.
Ni-avavajahaki ida khai akhanina,
ni-avavajahaki jaboni ida avaꞌi mokara nini.”
Vakhaniha adani isai vakasivanahaki.
Jesus vaꞌora niꞌaha:
—Avakhanini vani isai kasivanahi-ra nofiriki fori avihija.
Ni-avanofipaꞌitxiki ida Deus athi-ra avanaabavini.
18 João Batista khaꞌaha avakadiania,
ni-bihaki ida ꞌbai mahi hahavi.
Ni-biꞌaviki jaboni ida vinho.
Kidihojai avanokiha;
avaniꞌaha:
“Kabajadiki ada
João Batista.”
19 Okhaꞌihi avakadiania,
kodihojai fori hirihi ida kidihojai.
Hovani ohaki ida ꞌbai,
oꞌaviki jaboni ida vinho.
Hora avanokihi,
ni-hora avanofiki.
Nimania ida hora avakanavaranihavini:
“Vada vaniꞌa o hiꞌo koꞌbai nofiki o,
hiꞌo vinho-ra nofiki o jaboni.
Kidivaꞌahi vihiki adani imposto gathaniva abono,
Jahari kabadani-ra bada vaniꞌaki-ra nofiki o jaboni.”
Nimania ida hora avakanavaranihavini.
Hari.
Ijaꞌaria bikajariꞌdarihi ida Deus kaꞌogahai jahani;
sohikaꞌoani biogahi — vaꞌora niꞌaha ada Jesus.
Ijaꞌari vajariꞌdaki varani vihina hida
20 Oniaroa,
Jesus vara vaꞌora vaniꞌaꞌaha adani sidaji ipohiki kaijaꞌarini kidibadani danoki vakajariꞌdavinia.
Nihaha:
—Kodibadani ipohiki danoki-ra vanokibakhiavini kabaꞌi hora vakajariꞌdaki adani.
Ni-vaabono vakaꞌdaꞌdigariavini hiki ida Jahari kabadania vakabadanibakhiana,
ni-vakavaꞌipahinipaꞌitxiki jaboni.
21 Aꞌonivani,
Corazim sidaji kaijaꞌarini,
jahariki bana ida avakadimoni.
Aꞌonivani,
Betsaida sidaji kaijaꞌarini,
jahariki jaboni bana ida avakadimoni.
Bada oniꞌavini kabaꞌi ida Deus kabadani danoki ipohiki avakadiania,
ni-avakavaꞌipahiniꞌiaki kaho ida Jahari kabadania avakabadanibakhiani.
Bada oniꞌaja vaha ida Deus kabadani danoki Tiro sidaji,
Sidom sidaji hikia;
Jahari kabadani-ra vakavaꞌipahiniꞌboꞌdamaniha vaha,
vakaimahamanihi vaha ida makari jarojaroki,
vanaibavimanihi vaha ida ofoꞌofoni vakaꞌdaꞌdi kanamania.
Vakhanina vani Deu-ra vananokiahivini hihi hida Jahari kabadani-ra vakavaꞌipahinivini.
22 Aꞌonira onavaꞌisohiki bana ho.
Deus ijaꞌari hahavi-ra nasohivini kamahini bihonariaki bana ida imai ꞌbanani ijaꞌari hojai asohirikia vakahojaiki Ibavi Jaharikaꞌoaki kania avikhana.
Deus vaꞌora vaꞌadipaꞌitxiki bana adani Tiro sidaji kaijaꞌarini,
Sidom sidaji kaijaꞌarini vihiki.
Hojai asohirikia vakahojaina kabaꞌi,
Deus vaꞌora vaꞌadipaꞌitxiki adani.
Aꞌonivani Corazim,
Betsaida sidajia avahojaki.
Ni-Deus aꞌonira vaꞌadipaꞌitxirihi bana.
23 Aꞌonivani Cafarnaum sidaji kaijaꞌarini,
jahariki bana ida avakadimoni.
Ni-avakavaꞌipahinipaꞌitxiki ida Jahari kabadani.
Avakavaꞌibodivaranimanija koda ida Deus kania avarikhani Ibavi Jahakaꞌoakia.
Ni-avarikhapaꞌitxiki.
Deus ijaꞌari hahavi-ra nasohivini kamahini,
Deus aꞌonira nahokahiki bana aꞌoni Ibavi Jaharikaꞌoakia.
Bada oniꞌavini kabaꞌi ida Deus kabadani danoki ipohiki avakadiania,
ni-avakavaꞌipahiniꞌiaki kaho ida Jahari kabadania avakabadanibakhiani.
Bada oniꞌaja vaha ida Deus kabadani danoki Sodoma sidajia;
Jahari kabadani-ra vakavaꞌipahiniꞌboꞌdamaniha vaha;
ni-Deus vaꞌora nihimaki vaha adani Sodoma kasidajini kaijaꞌarini.
Asia hojahi vaha ida sidaji.
24 Vakavaꞌibodivarani bana ida.
Deus ijaꞌari hahavi-ra nasohivini kamahini bihonariaki bana ida imai ꞌbanani ijaꞌari hojai asohirikia vakahojaiki vakadimoni.
Sodoma sidaji kaijaꞌarini ni-vanokiꞌiaki kaho ida kodibadani danoki,
oniani ida bana Deus vaꞌora vaꞌadipaꞌitxivini hija.
Aꞌonivani kodibadani-ra avanokivini kabaꞌi,
asia hora avakajariꞌdahi,
oniani bana ida Deus aꞌonira vaꞌadipaꞌitxiravini hija — vaꞌora niꞌaha ada Jesus.
Khai niki ada Jesus
25 Oniaroa,
Deu-ra vara niꞌaha ada Jesus:
—Kodiabiꞌi,
ivani ivakaꞌdaꞌdiki ida ijaꞌari hahavi nama,
arabo hikia vahojaki.
Khai ira oniꞌavini hiki ida idanoni-ra inanokiavini.
Ijaꞌari vaabono vavaboraborahariki-ra vaꞌora inanokiahiꞌiki idanonia.
Vakadiꞌogahai paꞌitxini-ra avigaki adani.
Vahoariha vani adani vakadiꞌogahai karaho-ra vakavaꞌibodivaranira,
ni-vakadiania idanoni-ra inanokiaki.
26 Hai oamani,
kodiabiꞌi,
jahaki hida inofiꞌiki.
Vaꞌora inofiki adani vakadiꞌogahai paꞌitxini-ra avigaki idanoni-ra avigavini.
27 Hari.
Jesus vaꞌora niꞌaha adani vajoroniki:
—Kodiabiꞌi hora noꞌavini hiꞌiki ida kidiꞌogahai,
kidinahina hahavi hiki.
Ni-ijaꞌaria biogaki ida Deus kaisai ohina.
Kodiabiꞌi kaꞌoa biogaki ida.
Ni-ijaꞌaria biogaki ada kodiabiꞌi.
Hovani kaꞌoa oogaki ada.
Ijaꞌari kodiabiꞌi-ra ogavini-ra onofihi;
oanigahihi,
biogara kaimoni ada kodiabiꞌi.
28 Hari.
Asia vara niha ada Jesus:
—Daji khanaki-ra kaibaꞌiki fori hiki ida ijaꞌari abononi akavaꞌijoavini-ra kaijoꞌavini.
Vaꞌora obaranahaki adani daji khanaki fori hiki-ra vakaibaꞌiki kodiania vikhana,
oanija kaimoni ida vadaina.
Avadaini-ra oanivini-ra avavaꞌahahi;
ni-nahina-ra avarakavaꞌisokonijanaki.
29 Hora vavaipohihaꞌa mahija kodihojai-ra avakaꞌojomoꞌivini.
Ovajahaki ida hoariha-ra okajoamoravini,
vaꞌora onakaidivaki adani ijaꞌari.
Oipohina avihihi;
avakadihojai asohiriki-ra onaꞌbirahi,
avavaꞌini soko inijanaria kaimoni.
30 Daji khanariki fori hiki ida hojai aꞌonira ohonariavini hiki.
Daji horihoriki fori hiki ida hojai jahakia avakahojaini-ra ohonariavini — vaꞌora niꞌaha ada Jesus.