Jesus vaꞌora karonaki adani ipohina
10
Hari.
Oniaro kari,
Jesus vaꞌora nagathogathoꞌaha adani 72 vihiki vaipohina vahoariha.
Vaꞌora karonaꞌaha adani viꞌbamiꞌbaminanana avikhananavaki.
Jesus vaꞌora honariaꞌaha avikhana sidaji,
ibavi hikia avikhananavaꞌina.
2 Vaꞌora karonavini viahania vaꞌora niꞌaha:
—Vaipohiki adani ijaꞌari Deus varani hina-ra vakamithaꞌiariki kaho.
Vaipohiriki adani Deus varani hina-ra vara vavaniꞌaki.
Deu-ra vakanikharia mahija vaꞌora karonavini adani ijaꞌari vaipohiki Deus athi-ra vara vavaniꞌara kaimoni,
ibavi ipohikia.
Lucas 10:1-42
3 Hari.
Avikhaꞌa bana.
Aꞌonira okaronavini ovilia fori avihini,
jomahi vaihamahiki fori vihiki vakadiania avarikhani.
4 Hariꞌa avavikha ida jiniro bavini,
ꞌbai bavini,
sandália kihiki.
Avarikhani oadani hariꞌa bana ijaꞌari-ra vakaꞌivaniti mahija avavaravararini aꞌonira agathiniravini.
5 Ijaꞌari vagorana avakaikahihi gora kakaꞌdaꞌdini-ra vaniꞌaꞌimidia:
“Anofiki ida Deus ira
noꞌavini vaꞌi jahajahania.”
6 Gora kakaꞌdaꞌdinia bigathanijahakihi ida vara avaniꞌavini hiki,
vanavaꞌisohihaꞌa:
“Deus ira noꞌaki bana i
vaꞌi jahajahania.”
Gora kakaꞌdaꞌdinia bikapoaririhi ida avakadivarani,
avaꞌajihini viahania vaniꞌa bana:
“Jokoa Deus ira noꞌarihi
vaꞌi jahajahania.”
7 Gora hoarani vania bana vahojaꞌa mahija aviꞌbaivini,
aviꞌavivini jaboni ida aꞌonira noꞌavini hiki,
oniani ida avakadibadani abosini aꞌonira kaijahitavini hija.
Hariꞌa bana gora hahavia viꞌbaiꞌa.
8 Hari.
Sidajia avakaikahini aꞌonira vagathanijahakiha;
vaha bana ida ꞌbai aꞌonira vanoꞌavini hiki.
9 Vaꞌora avanaihota bana adani ijaꞌari vakavamoniki sidajia vahojaki.
Vaꞌora vaniꞌa adani ijaꞌari:
“Deua binofiki ida
aꞌonira vakaꞌdaꞌdivini.”
10 Ibavi hoariha avakaikahihi,
sidaji kaijaꞌarini aꞌonira vagathanijahakirihi,
vaꞌajihi bana!
Avaꞌajihini kabaꞌi,
vaꞌora vaniꞌa bana:
11 “Aꞌdama-ra akanaꞌdaraꞌdaravini hiki,
aniaja kaimoni hida arabo khomakhomani aꞌdama hojaki,
avarigaja kaimoni ida
jaharini ariathi-ra
avakajonivini.
Vakavaꞌibodivarani bana hida:
Deua binofiki ida aꞌonira vakaꞌdaꞌdivini,
athi avanaabara kaimoni.”
Vaꞌora vaniꞌa bana — Jesus vaꞌora niꞌaha adani 72 vihiki vaipohina.
12 Hari.
Vara niꞌianaha ada Jesus:
—Kaꞌoa oamani hida kodivarani.
Deus ijaꞌari hahavi-ra nasohivini kamahini vaꞌora honariaki bana adani ijaꞌari hojai asohirikia vakahojaiki,
Ibavi Jaharikaꞌoaki kania avikhana.
Hojai asohirikia vakahojaina kabaꞌi adani Sodoma sidaji kaijaꞌarini,
Deus vaꞌora vaꞌadipaꞌitxiki bana adani.
Ni-vaꞌora vaꞌadipaꞌitxiki bana adani sidaji hoariha kaijaꞌarini avaathini-ra vakajoniki — niha ada Jesus.
Ijaꞌari vajariꞌdaki varani vihina hida
13 Hari.
Vara niꞌianaha ada Jesus:
—Aꞌonivani Corazim sidaji kaijaꞌarini,
jahariki bana ida avakadimoni.
Aꞌonivani Betsaida sidaji kaijaꞌarini,
jahariki jaboni bana ida avakadimoni.
Bada oniꞌavini kabaꞌi ida Deus kabadani danoki ipohiki avakadiania,
ni-avakavaꞌipahiniꞌiaki kaho ida Jahari kabadania avakabadanibakhiani.
Bada oniꞌaja vaha ida Deus kabadani danoki Tiro sidaji,
Sidom sidaji hikia,
Jahari kabadani-ra vakavaꞌipahiniꞌboꞌdamaniha vaha,
vakaimahamanihi vaha ida makari jarojaroki,
vanaibavimanihi vaha ida ofoꞌofoni vakaꞌdaꞌdi kanamania.
Vakhanina vani Deu-ra vananokiahivini hihi ida Jahari kabadani-ra vakavaꞌipahinivini.
14 Oniaroa,
Deus ijaꞌari hahavi-ra nasohivini kamahini,
vaꞌora honariaki bana adani ijaꞌari hojai asohirikia vakahojaiki Ibavi Jaharikaꞌoaki kania avikhana.
Deus vaꞌora vaꞌadipaꞌitxiki bana adani Tiro sidaji kaijaꞌarini,
Sidom sidaji kaijaꞌari vihiki.
Hojai asohirikia vakahojaina kabaꞌi,
Deus vaꞌora vaꞌadipaꞌitxiki adani.
Aꞌonivani Corazim,
Betsaida sidajia avahojaki,
ni-Deus aꞌonira vaꞌadipaꞌitxirihi bana.
15 Aꞌonivani Cafarnaum sidaji kaijaꞌarini,
jahariki bana ida avakadimoni.
Ni-avakavaꞌipahinipaꞌitxiki ida Jahari kabadani.
Avakavaꞌibodivaranimanija koda ida Deus kania avarikhani Ibavi Jahakaꞌoakia?
Ni-avarikhapaꞌitxiki.
Deus aꞌonira nahokahiki bana aꞌoni Ibavi Jaharikaꞌoakia — vaꞌora niꞌaha ada Jesus.
16 Hari.
Jesus vaꞌora niꞌaha adani kidipohi:
—Ijaꞌari hana hini avaathini-ra kamithahi;
oathi-ra kamithahi jaboni.
Ijaꞌari hana hini aꞌonira kapoaririhi;
ni-hora vakapoariki jaboni.
Ijaꞌari hora kapoaririhi;
ni-bikapoariki jaboni ada hora karonaꞌiki — vaꞌora niꞌaha ada Jesus.
Jesus ipohina vajoiꞌiki kidiania
17 Hari.
Oniaroa,
Jesus kania vajoiꞌaha adani 72 vihiki vaipohina.
Khai vakhaniꞌaha,
Jesu-ra vaniꞌaha:
—Bajadi ai vihina-ra ahonariahi;
ai vihiꞌaha afonana.
Bajadi-ra aniꞌahi:
“Jesus ira honariavini
iakaraꞌoni,”
oniani ida bajadi ariathi-ra vanaabavini hija.
18 Oniaroa,
Jesua bigathaniꞌihi ida vaathi:
—Hai oamani.
Onokiꞌiki ada Jahari nama voroniꞌina.
Bahi tararariki fori hina nama gaariꞌina.
19 Mitha vaniꞌa,
aꞌonira onoꞌavini hiki ida Deus danona.
Makha,
akoro hiki-ra avakadaꞌahahi;
ni-avamakhaniki.
Avakadibadani danoki arafiani mani ida Jahari kabadani danoki-ra avakadaꞌahavini hija,
oniani ida aꞌonira namakhaniravini hija.
20 Hari.
Khai avaniꞌapaꞌitxi bana ida bajadi avakadikaabanahi-ra kamithaꞌavini.
Khai avaniꞌavini arafiava bana ida kodijaꞌari avihini.
Deua binajiriꞌiki ida avaonini kidiania.
Khai niki ada Jesus
21 Oniaroa,
Maꞌonahai Jahaki danona Jesus kania hojani mani ida Jesu-ra khai niꞌakarahoja.
Biniꞌaha:
—Kodiabiꞌi,
ivani ivakaꞌdaꞌdiki ida ijaꞌari hahavi nama,
arabo hikia vahojaki.
Khai ira oniꞌavini hiki ida idanoni-ra inanokiavini.
Ijaꞌari vaabono vavaboraborahariki-ra vaꞌora inanokiahiꞌiki idanonia.
Vakadiꞌogahai paꞌitxini-ra avigaki adani.
Vahoariha vani adani vakadiꞌogahai karaho-ra vakavaꞌibodivaranira,
ni-vakadiania idanoni-ra inanokiaki.
Hai oamani,
kodiabiꞌi,
jahaki hida inofiꞌiki.
Vaꞌora inofiki adani vakadiꞌogahai paꞌitxini-ra avigaki idanoni-ra avigavini.
22 Hari.
Jesus vaꞌora niꞌaha adani vajoroniki:
—Kodiabiꞌi hora noꞌavini hiꞌiki ida kidiꞌogahai,
kidinahina hahavi hiki.
Ni-ijaꞌaria biogaki ida Deus kaisai ohina.
Kodiabiꞌi kaꞌoa biogaki ida.
Ni-ijaꞌaria biogaki ada kodiabiꞌi.
Hovani kaꞌoa oogaki ada.
Ijaꞌari kodiabiꞌi-ra ogavini-ra onofihi;
oanigahihi,
biogara kaimoni ada kodiabiꞌi.
23 Hari.
Roiribaniꞌaha ada Jesus,
vahoariha vakamitharia kaimoni ida ipohina-ra vaꞌora vara niꞌavini:
—Deus vaꞌora kajoamoraki bana adani ijaꞌari vahoariha kodibadani danoki-ra vanokivini,
avanokivini vani fori hiki.
24 Aꞌonira onavaꞌisohivini,
Deus athi namoniva abono kohana vaipohiki,
arabo vakaꞌdaꞌdiva kohana vaipohiki khama vanofiꞌiki ida avanokiki-ra vanokivini,
ni-vanokiꞌiki.
Vanofiꞌiki ida avakamithaki-ra vakamithavini jaboni.
Ni-vakamithaꞌiki — vaꞌora niꞌaha ada Jesus.
Ijaꞌari kajoamorani varani hini hida
25 Hari.
Jesus kania khaꞌaha ada judeus kaijaꞌari kaꞌojomoꞌiva abono.
Binofiki ida Jesu-ra kaborovini,
bianahoarihaja kaimoni ida kidivarani,
oniania,
binanaꞌdohiꞌaha:
—Jesus,
ivani ijaꞌari kaꞌojomoꞌiva abono i.
Nahina-ra koda bana bada oniꞌaja ovahojaja kaimoni ida kodimahi anokhomiriki Deus kania?
26 Hari.
Jesua bigathanihi ida kidinaꞌdohi:
—Deus athi kapapirani haria navaꞌisohivini hiki ida Deua binofiki bada aniꞌaki kaimoni,
kidiania aokhaja kaimoni.
Nahina mani ida Deua binofija,
athi kapapirani haria niꞌavini hiꞌiki?
27 Judeus kaijaꞌari kaꞌojomoꞌiva abonoa biniꞌaha:
—Deus athi kapapirani haria navaꞌisohivini hiki:
“Akadikaꞌdaꞌdi hiki ada Deus.
Inofijahakiꞌa afohaꞌoadaha o Deus.
Bada inini oadani
inofijahakiꞌa o Deus.
Ivaꞌini bodini vara nini
oadani inofijahakiꞌa o Deus.
Mahi,
joma hiki
inofijahakiꞌa afohaꞌoadaha.
Iabononi inofijahakivini vani
fori vaꞌora niha vaꞌoani
ijaꞌari hahavi.”
Nimania ida athi Deus athi kapapirania hojaki — Jesu-ra niꞌaha.
28 Oniaroa,
Jesua biniꞌaha:
—Asohiki ida iniꞌaki.
Inaabaꞌa oni Deus athi iniꞌaꞌiki mahija mahi jaꞌdini anokhomiriki-ra ivahojavini — niha ada Jesus.
29 Judeus kaijaꞌari kaꞌojomoꞌiva abono vaꞌi aipahirara kaimoni biniꞌaꞌaha ada Jesus:
—Hana hini ijaꞌari hoariha ida onakaidivaja?
30 Oniania,
Jesua vara biniꞌaha rajomi kavaranihia,
biniꞌaha:
—Hari.
Jerusalém sidajia ajihiꞌaha ada makhira,
Jericó sidajia okharafoniꞌaha.
Hagihi vadinia vahojamaniha adani makhira vakaabiniꞌiki avahojaki.
Vanofiki ida ijaꞌari radahaki-ra vidafiavini,
avanahoroaja kaimoni ida ijaꞌari daini.
Oniaroa,
kharafoniꞌaha ada makhira daiki.
Vakaabiniki avahojaki vakadiania akhanoꞌaha,
vikhaonaniꞌaha,
makhira-ra vagathiꞌaha,
vidafiahaha,
avanahoroahi ida daina.
Abinina amaakarini vanahojahaha ada makhira.
Ai vavanihahi ida daina.
31 Hari.
Sasidotxi maina ada hagihia okharafonisiagaꞌaha.
Binamaakariha ada makhira kidai hiꞌiki.
Deus kabadani abono hina kabaꞌi,
ni-binakaidivaki ada makhira kidai hiꞌiki.
Bianokiha,
ni-binofiki bikajoamoravini,
oniani ida biakakaraꞌofianiribanivini hija,
radahaꞌaha.
32 Oniaroa,
mitihini okharafonisiagaha ada judeus kaijaꞌari kaꞌojomoꞌiva abono jaboni.
Okharafonina kabaꞌi bianokiha ada makhira kidai hiꞌiki.
Deus athi-ra ogavini kabaꞌi,
ni-binakaidivaki ada makhira kidai hiꞌiki.
Bianokiha,
bikajoamoraravini vani ovari maina biakakaraꞌofianiribaniꞌaha,
radahaꞌaha.
33 Hari.
Mitihini okharafonisiagaha ada Samaria kaaraboni kaijaꞌarini.
Makhira kidai hiki kania akhanoꞌaha,
binavanavanahaꞌaha.
Binakaidivakarahomaniha.
Judeus kaijaꞌarini hirina kabaꞌi,
binaabaꞌihi ida Deus athi.
34 Oniaroa,
binaihahi ida siina ipohiki basina,
vinho hikia.
Binaihavini naothinia bidabohi ida siina.
Siina bidabovini naothinia kidicavalo namana biarakasiꞌaha ada makhira.
Bivaꞌajihiꞌaha.
Vada ibavini kania biosaꞌaha.
Vakaikahina biakadavaꞌaha.
35 Hari.
Kaꞌafokajomani ajihina viahania,
Samaria kaaraboni kaijaꞌarinia binoꞌaha ada gora kakaꞌdaꞌdini jiniro ꞌbaꞌdani ꞌbamikia.
Mahi ꞌbamiki kavabadanini abosini fori hiki ida jiniro.
Biniꞌaha:
“Iakadavaꞌa bana hada
makhira.
Ikapavakari bana ida bikainamoki kidimoni hini.
Arajomarihi hida jiniro
kidinahina abosini
kaimoni hini,
kadania ojoiꞌianana
kamahini ira onoꞌaꞌianaki bana ho jiniroa.”
36 Hari hiꞌihi ida rajomi kavaranihi,
Jesua binanaꞌdohiꞌaha ada judeus kaijaꞌari kaꞌojomoꞌiva abono:
—Makhira avahoarabakosikia vanokiha ada kidai hiꞌiki.
Hana hina vania binakaidivara ada?
37 Judeus kaijaꞌari kaꞌojomoꞌiva abonoa biniꞌaha:
—Samaria kaaraboni kaijaꞌarini vania binakaidivara ada makhira.
Jesua biniꞌaha:
—Asohiki ida iniꞌaki.
Deua binofiki ida ijaꞌari hoariha-ra akajoamoravini.
Imaina,
ijaꞌari-ra jaboni nakaidiva bana — niha ada Jesus.
Maria, Marta khama vagorana okhaki ada Jesus
38 Hari.
Avikhaꞌianaha adani Jesus,
kidipohi khama.
Ijaꞌari vaibavia avakhanoꞌaha.
Marta vaꞌora kaboaꞌiꞌaha gorania aviꞌoina.
39 Marta kakajoꞌo onini Maria.
Hari.
Vithiꞌaha ada Jesus vaꞌora kaꞌojomoꞌiꞌaha.
Jesus maakarina vithiriamaꞌoꞌihi ida Maria.
Mitha biniꞌahi ida Jesus kavarani.
40 Oniaroa,
gora bodinia bada nihaꞌoadahaki ida Marta.
Jesus kania maakariꞌihi,
biniꞌaha:
—Ikavaꞌibodiria koda hida kodikajoꞌo hora kakodiaravini.
Hovani ohoarana bada oniꞌaki hida gora bodini kabadanihi karaho.
Ihonaria bana mahija hora kakodiavini.
41 Hari.
Jesua bigathanihi ida athini:
—Marta,
ivaꞌini aitapiaꞌiki i ijaꞌari vaipohiki-ra vaꞌora ikabadanivini.
42 Ira onavaꞌisohivini hiki ida badani jahani arafiaki.
Badani jahani arafiaki ida kodiania hojani oathi-ra kamithavini.
Maria binagathogathoꞌiki ida nahina jahani arafiaki.
Jokoa ohonariarihi hida kodiania ajihini — Marta-ra niꞌaha ada Jesus.