Jesua bianaihotaha ada sorara vakadikaꞌdaꞌdi kahonai abono
7
Hari hiꞌihi ida Jesus ijaꞌari-ra kaꞌojomoꞌivini kavaranihi,
okhaꞌaha,
Cafarnaum sidajia akhanoꞌaha.
2 Cafarnaum sidajia hojaha ada Roma sidaji kakaꞌdaꞌdini kasorarani.
Kavamonikarahoki ada kidihonai abono,
abinina amaakariki ada.
Binakaidivaki ada kidihonai abono.
Lucas 7:1-50
3 Oniaroa,
Roma sidaji kakaꞌdaꞌdini kasorarania bikamithahi ida Jesus varani hina.
Vaꞌora niꞌaha adani judeus kaijaꞌari vanavaꞌisohiva abono:
—Avikha Jesus kania mahija avibaranahavini.
Vakanikharia bana kodihonai abono-ra anaihotara kaimoni — niꞌaha.
4 Oniaroa,
vaꞌajihiꞌaha.
Jesus kania avakhanoꞌaha.
Vakanikhariadanokiꞌaha:
—Jesus,
akadiania khaꞌa bana.
Kavamoni karahoki ada sorara vakadikaꞌdaꞌdi kahonai abono,
abinihana amaakariki ada.
5 Akadijaꞌari hiriha ada sorara vakadikaꞌdaꞌdi,
kabaꞌi akadijaꞌari-ra nofijahakiha.
Amonahani bivahonariahiki ida akadijaꞌari Deu-ra vara vaniꞌavini kagorani akadimoni.
Kidihonai abono ikajoamoravini jahaki — vakhaniha adani judeus kaijaꞌari vanavaꞌisohiva abono.
6 Hari.
Okhaꞌaha ada Jesus vakadiania.
Jesua bianikhaki gora-ra vanamaakariꞌaha.
Oniaroa,
Roma sidaji kakaꞌdaꞌdini kasorarani vaꞌora niꞌaha adani kidivaꞌahi:
—Jesus kania avikhaꞌa mahija oathia avanavaꞌisohivini:
“Jesus,
ni-onofiki ida ira onadabavini kodiania ikhani.
Ijahani fori ohirina mani ida
ogorana ioꞌoini-ra okaboaꞌiravini hija.
7 Ivani kaꞌdaꞌdi i.
Nahina ohirina mani ida
kadania okhana-ra
onofiravini hija.
Vara ira oniꞌavini-ra okaipahiki ho.
Ogorana iokharini kabaꞌi,
napaja ihojani kabaꞌi,
ihonaria bana ida
kavamoni akaraꞌoni,
aihotara kaimoni ada
kodihonai abono.
8 Hovani jaboni onaabaki ida athi hora vakaꞌdaꞌdiki
hora honariabakhiavini hiki.
Vaꞌora ovakaꞌdaꞌdiki adani vahoariha,
oathi-ra vanaababakhiaki adani.
Okhana ohonariaha ada
sorara,
okhamaniha.
Hida khana obaranahaha ada hoariha,
khamaniha.
Kodihonai abono-ra ohonariahi hihida badani-ra namonaha,
binamonahamanihi.
Oathi-ra vanaabaki adani vaꞌora ovakaꞌdaꞌdiki.
Ivani jaboni kaꞌdaꞌdi i.
Nahina-ra ihonariahi;
iathini-ra naabahi.
Kavamoni akaraꞌoni-ra
ihonariahi bana
kodihonai abono kania,
akaraꞌomanihi bana.”
9 Jesua bikamithaꞌihi ida sorara vakadikaꞌdaꞌdi kavarani,
bikavaꞌibodivaranikarahoꞌihi.
Roiribaniꞌaha ada Jesus,
ijaꞌari vaipohiki Jesu-ra vavaipohihaki-ra vaꞌora niꞌaha.
—Ni-okaragaꞌiaki kaho ada judeus kaijaꞌari hoarana hora kajariꞌdariki,
hihada Roma sidaji kakaꞌdaꞌdini kasorarani hora kajariꞌdaravini fori hiki — vaꞌora niꞌaha ada Jesus.
10 Hari.
Avajoiꞌaha adani Roma sidaji kakaꞌdaꞌdini kasorarani kavaꞌahi.
Gorana vakaikahiꞌaha vanokiꞌaha ada honai abono aihotaꞌina.
Jesu-ra kajariꞌdaravini mani ida kidihonai abono anaihotana hija.
Jesua bianahokiki ada kaariha kaisai
11 Hari.
Oniaroa,
Roma sidaji kakaꞌdaꞌdini kasorarani kavaꞌahi vaꞌajihina naothinia,
avikhaꞌaha adani Jesus,
kidipohi khama.
Ijaꞌari vaipohiki vaꞌora vavaipohihaꞌaha.
Naim sidaji onikia avikhajabanaꞌaha.
12 Hari.
Abiniꞌaha ada imakhinava.
Kaariha ida imakhinava kaamia.
Kaariha bivahojaki isai hoarana kaꞌoa.
Abiniꞌiki ada kidisai.
Naim sidaji kavasiribanini kaathania avamaakariꞌaha adani Jesus.
Vamaakarina kabaꞌi Jesus vaꞌora nokiha adani abaꞌoi-ra vakaibaꞌiki vikhaonanina.
Ai vavanihavini hiki ida abaꞌoi vakaꞌdamaja kaimoni.
Ijaꞌari vaipohiki vaꞌora vavaipohihaha adani abaꞌoi-ra vakaꞌdamahaki.
13 Vakaikahiꞌaha adani Jesus kaariha kania,
binakaidivamanihi ida gamo,
biniꞌahi:
—Hariꞌa asarajana kaho.
14 Oniaroa,
bikanamaakarihi ida abaꞌoi bavini,
biakadasaꞌihi.
Avigaakosoaꞌaha adani abaꞌoi-ra vakaibaꞌiki.
Biniꞌahi ida imakhinava abaꞌona:
—Imakhinava,
ira ohonariahi,
gamamananiꞌa bana!
15 Gamamananiꞌaha ada imakhinava,
vara niꞌaha.
Jesua binoꞌaꞌianahi ida kaariha kidisaia.
16 Hari.
Imakhinava-ra vanokiki varapataꞌiki.
Deu-ra khai vaniꞌaꞌaha.
Vakhaniꞌaha:
—Hidakabaꞌi akadiania kaikahiꞌiki hada Deus athi namoniva abono.
Danoki ida kidibadani.
Deua bikaronaki ada ovari vaꞌora kajoamorara kaimoni adani kidijaꞌari.
17 Oniani ida Judéia kaarabonia ibavi maakaria Jesus monina-ra akanarafarakhamaja.
João Batista vaꞌora karonaki adani ipohina Jesus kania
18 Hari.
João Batista ipohina vanavaꞌisohiꞌaha,
kaariha kaisai-ra anahokiꞌavini ada Jesus.
João Batista bikamithahi ida vakadivarani,
vaꞌora baranahaha adani kidipohi viꞌbamiki kidiania vikhana.
19 João Batista vaꞌora niꞌaha:
—Avikhaꞌa bana akadikaꞌdaꞌdi Jesus kania.
Jesu-ra vara vaniꞌa bana:
“Anokhaki ada aihotahi abono Deua bikaronaki.
Ivani aihotahi abono Deus ira karonaki i?
Hoariha-ra anokhamania koda?”
Vakhani bana — vaꞌora niꞌaha ada João Batista.
20 Ai vihiꞌaha adani João Batista ipohina viꞌbamiki.
Jesus kania vakaikahiꞌaha.
Vaniꞌaha:
—João Batista haria karonaki hari kadania,
ira nanaꞌdohiki ada:
“Anokhaki ada aihotahi abono Deua bikaronaki.
Ivani aihotahi abono Deus ira karonaki i?
Hoariha-ra anokhamania koda?”
— vakhaniha.
21 Oniaroa,
Jesus vaꞌora anaihotaꞌaha adani vakavamoniki vaipohiki.
Vakabajadiki vakadibajadi bihonariaꞌiki akaraꞌoꞌini.
Vakamaodorohaki vaipohiki jaboni vanokho Jesua bianavagahaꞌiki.
22 Naothinia,
Jesua bigathaniꞌihi ida viꞌbamiki vakadinaꞌdohi.
Vaꞌora niꞌaha:
—João Batista kania avajoiꞌa.
Vananamithaꞌa bana ida kodibadani danoki avanokiꞌiki,
kodivarani avakamithaꞌiki jaboni mahija aihotahi abono ohina-ra ogavini.
Ijaꞌari vakamaodorohaki vanokho-ra oanavagahaꞌiki ho.
Ijaꞌari vakabaha katonorohaki okanajahaꞌiki vaadahaꞌiki.
Asafi namani-ra najaharikia kakavamoniki ijaꞌari onajahaꞌiki jaboni.
Ijaꞌari vamorobo kamokhihaki oakanavagahaꞌiki,
athi-ra vakamithaꞌiki.
Ijaꞌari vaabiniki oanahokiꞌiki.
Ijaꞌari vakanahinariki-ra onanamithavini hiki ida Deus monina jahaki.
23 Deus vaꞌora kajoamoraki bana adani ijaꞌari oathi-ra vakajariꞌdariki — Jesus vaꞌora niꞌaha adani viꞌbamiki.
24 Hari.
João Batista ipohina viꞌbamiki vaꞌajihina naothinia,
Jesus vaꞌora vara niꞌaꞌaha adani ijaꞌari vaipohiki vajoroniki.
Kidivarani hiꞌaha ada João Batista.
Jesus vaꞌora niꞌaha:
—Amasia hojana kari ada João Batista.
Nahina mani ida João Batista kania avanavanavanahaja?
Avarigaki ida João Batista mosori sirisirikia bikanadarahaki fori hirina.
25 Avanavanavanahavini kari avarigaki ada João Batista makhira kanahinaki fori hirina.
Ni-João Batista bikaimahaki ida makari kaidivaki.
Amasia ibaviriha ada makhira makari kaidivaki-ra kaimahaki.
Arabo kakaꞌdaꞌdini gorana vania hojara ada makhira makari kaidivaki-ra kaimahaki.
Makhira kanahinaꞌahapikiki fori hiriha ada João Batista.
26 João Batista-ra avanavanavanahavini kari avarigaki ada Deus athi namoniva abono hina.
Deus athi namoniva abono oamani.
João Batista vaꞌora aradahaki adani Deus athi vanamoniva abono ijaꞌari vahoariha khama.
Ovari miroꞌa vara bivaniꞌaki ida Deus ijaꞌari-ra vakaꞌdaꞌdivini kavaranihi — vaꞌora niꞌaha ada Jesus.
27 Hari.
Jesus vaꞌora vara niꞌaꞌianaha adani ijaꞌari vajoroniki.
—Deus athi kapapirania hojaki ida João Batista varani hina Deua biniꞌaha ada kidisai:
“Okaronaki bana ada
oathi namoniva abono
iviahania okhananavana
vaꞌora navaꞌisohiki bana adani ijaꞌari
vakadimahi-ra vanasohivini
ikaikahini viahania.”
Nihi ida João Batista varani hina Deus athi kapapirania hojaki.
28 Hari.
Asia vara niꞌaha ada Jesus:
—Akadijaꞌari avikhananavakia ni-avigahahaviki ida Deus ijaꞌari-ra vakaꞌdaꞌdivini kavaranihi.
Ni-avigaki ida niha ninini Deu-ra vagathanivini vakadikaꞌdaꞌdi kaimoni hina.
João Batista vania biogaja ida,
oniani ida João Batista aagahai akadijaꞌari avikhananavaki vakadiꞌogahai aradavini hija.
Kabaꞌi,
ni-João Batista binokiki ida mahi vara bivaniꞌajoraki.
Ni-kamaꞌdaꞌiaki kaho ida Deus kania ijaꞌari vaabono gahinai vanihavini vakadikaꞌdaꞌdi hira kaimoni.
João Batista naothia ijaꞌaria vagathaniki bana ada Deus vakadikaꞌdaꞌdi hina,
oniani ida vakadimahi nasohini hija.
Ijaꞌari nahina hirini kabaꞌi,
kidimahi jahania biaradahaki ida João Batista kamahi jahani — vaꞌora niꞌaha ada Jesus.
29 Ijaꞌari vaipohiki,
imposto gathaniva abono khama vajoronikia mitha vaniꞌaꞌihi ida Jesus kavarani.
Vaꞌoaniaroa vakamithaꞌimidiaꞌiki ida João Batista kavarani.
João Batista kavarani hiki ida badani asohiki Deua binofiki.
Athi-ra vanaabavini-ra vanofivini,
oniani ida João Batista vaꞌora kanavini hija.
30 Vahoariha vanofirihi ida João Batista vaꞌora kanavini.
Vaꞌoaniaro farisio,
vahoariha judeus kaijaꞌari vakaꞌojomoꞌiva abono.
Vakhanimanira adani Deua binofiki-ra vakajoniki.
31 Hari.
Jesus vara vaꞌora niꞌaꞌianaha adani ijaꞌari vajoroniki:
—Vaꞌora okavarajomiki adani ijaꞌari hahavi hidakabaꞌi vahokiki.
32 Isai vakasivanahaki fori vihiki hadani ijaꞌari.
Ijaꞌari vajoroniki kania vakasivanahaki adani isai.
Vaabono vakabodiꞌbarahararahakhamaki adani isai:
“Akadikasivanahi ida akarai kaihinikani.
Aꞌithohahi;
ni-avikhajoꞌiki.
Akadikasivanahi hoariha ida ijaꞌari abiniꞌiki.
Akaasarahi ida abaꞌoi,
ni-avaasarajabanaꞌiki.
Ni-avavajahaki ida khai akhanina,
ni-avavajahaki jaboni ida avaꞌi mokara nini.”
Vakhaniha adani isai vakasivanahaki.
Jesus vaꞌora niꞌaha:
—Avakhanini vani isai kasivanahi-ra nofiriki fori avihija.
Ni-avanofipaꞌitxiki ida Deus athi-ra avanaabavini.
33 João Batista khaꞌaha avakadiania,
ni-bihaki ida ꞌbai mahi hahavi.
Ni-biꞌaviki jaboni ida vinho.
Kidihojai avanokiha;
avaniꞌaha:
“Kabajadiki ada João
Batista.”
34 Okhaꞌihi avakadiania,
kodihojai fori hirihi ida kidihojai.
Hovani ohaki ida ꞌbai,
oꞌaviki jaboni ida vinho.
Hora avanokihi,
ni-hora avanofiki.
Nimania ida hora avakanavaranihavini.
“Vada vaniꞌa o hiꞌo koꞌbai nofiki o,
hiꞌo vinho-ra nofiki o jaboni.
Kidivaꞌahi vihiki adani
imposto gathaniva abono,
Jahari kabadani-ra bada
vaniꞌaki-ra nofiki o
jaboni.”
Nimania ida hora avakanavaranihavini.
35 Hari.
Ijaꞌaria bikajariꞌdarihi ida Deus kaꞌogahai jahani;
sohikaꞌoani biogahi — vaꞌora niꞌaha ada Jesus.
Simão gorana ꞌbaiki ada Jesus
36 Hari.
Simãoa bikaboaꞌiha ada Jesus kidiania ꞌbaira kaimoni.
Farisio ada Simão.
Farisio vaoniki vavajahaki ida vakadijaꞌari avikhananavaki vakadihojai.
Oniaroa,
Simão gorana okhaꞌaha ada Jesus.
Okhajakosiha,
vithiha,
viꞌbaiꞌaha.
37 Sidajia hojaki ida gamo.
Kamakhirarini kabaꞌi makhira ipohikia kabadanibakhiaki ida.
Asohiriꞌoamanija ida gamo kahojai.
Hari.
Gamoa bikamithahi ida Jesus varani hina,
Simão gorana ꞌbaina.
Okhahi,
biavikhaꞌihi ida misai bavini jiꞌbiniki.
38 Okhajakosihi,
Jesus kaida kaikahiꞌihi.
Jesus ꞌdama kaꞌdihania kabajoꞌokhonarariꞌihi,
asaraꞌihi.
Kidihojai asohirikia vaꞌini bianaipahihivini mani ida naasarani hija.
Bikanaꞌbahi ida Jesus ꞌdama nokhoni aꞌbania,
bikanajohaꞌihi ida ꞌdama kaꞌdaꞌdini kaafania.
Bikaramosihi ida Jesus ꞌdama,
biakamisaiꞌihi.
39 Hari.
Simãoa binokihi ida gamo Jesu-ra kamisaivini,
bikavaꞌibodivaranihi ida gamo.
Simão abono-ra niꞌaha:
—Asohiriꞌoamanija ida gamo kahojai.
Ni-Jesua biogaki ida gamo hojai asohirikia kahojaini.
Gamo kahojai asohiriki-ra ogara vaha;
ni-abono-ra khai vaniꞌaki vaha gamoa bikamisaivini.
Jesus gamo kabadani-ra ogaravini mani ida Deus athi namoniva abono hina okajariꞌdavini hija — abono-ra niꞌaha ada Simão.
40 Oniaroa,
Jesua biniꞌaha ada Simão:
—Simão,
vara ira oniꞌavini-ra onofiki bana ho.
—Hai — niha ada Simão.
41 Hari.
Jesua biniꞌaha rajomi kavaranihia:
—Makhira kajiniroꞌahapikiki kania jiniro-ra varihaha adani makhira viꞌbamiki.
Hoariha birihahi ida jiniro prata amonahaki karaho 500 hiki kaidivani.
Hoariha birihahi ida jiniro prata amonahaki paꞌitxi 50 hiki kaidivani.
42 Ihimiꞌihi ida jiniro varihaki,
ni-nahina-ra vavahojajanaki vakadirihai-ra vanaabosivini kaimoni.
Vaꞌora kanarihaiki vaꞌora vaꞌadimaniꞌaha,
vaꞌora niꞌaha:
“Ni-onofiki ida jiniro
aꞌonira okanarihaivini hiki aabosini.
Ni-nahina abosiriki
hojajanaki.”
Vaꞌora niꞌaha.
Oniaroa,
Jesua biniꞌaha ada Simão:
—Simão,
hana hina vania binofikarahora ada vaꞌora kanarihaiki?
Hana hina vania binofipaꞌitxira ada vaꞌora kanarihaiki?
43 —Jiniro karaho-ra rihakia vahabini binofikarahoki ada vaꞌora kanarihaiki — niha ada Simão.
—Kaꞌoa oamani ida iniꞌaki — Jesua biniꞌaha.
44 Hari.
Roiribaniꞌaha ada Jesus,
gamo-ra vada niꞌaꞌaha,
Simão-ra niꞌaha:
—Simão,
vada iniꞌa hida gamo.
Jiniro karaho fori hiki hida gamo kabadani asohiriki ipohiki.
Kidihojai asohiriki ipohiki onaꞌbiravini mani ida hora nofijahakivini hija.
Akadihojai oamani ida kaikahiki-ra paha anoꞌavini ꞌdamani-ra kosokovini kaimoni.
Igorania okaikahihi,
ni-paha hora inoꞌaki oꞌdama kosokoani kaimoni.
Gamo vania bikosokoꞌihi ida oꞌdama nokhoni aꞌbania,
bikanajohaꞌihi kaꞌdaꞌdini kaafania.
45 Akadihojai hiki ida gora kakaꞌdaꞌdinia biramosivini ida kaikahiki.
Akadihojai hini kabaꞌi,
ni-hora iramosiki okaikahina.
Gamo vani ida oꞌdama-ra karamosihaꞌoadahaꞌihi kaikahiꞌini.
46 Akadihojai ida gora kakaꞌdaꞌdinia bikavamisaihavini ada ꞌbaiki kidiania.
Ni-hora misaia inoꞌaki oꞌdaꞌdi-ra oakamisaivini kaimoni.
Gamo vani ida oꞌdama-ra kavamisaihahi misai kaidivakia.
47 Simão,
ira onavaꞌisohivini hiki bana ho,
kidihojai asohiriki ipohiki onaꞌbiravini mani ida hora nofikarahovini hija.
Ijaꞌari hoariha kahojai asohiriki ipohiriki-ra onaꞌbiravini mani ida hora nofipaꞌitxivini hija — Simão-ra niꞌaha ada Jesus.
48 Hari.
Gamo-ra niꞌaha ada Jesus:
—Kadahojai asohiriki-ra onaꞌbiraꞌiki ho.
49 Vahoariha vavithijabanaki vakadiania vaabono vaniꞌaha:
—Jesua bikaabokamanija koda ida gamo kahojai asohiriki-ra naꞌbiravini?
Deus kaꞌoa bikaabokaki ida hojai asohiriki naꞌbirani.
50 Jesua biniꞌahi ida gamo:
—Hora ikajariꞌdaravini mani ida Deus ira akavaꞌijoavini hija.
Ivaꞌini jahajahani,
okhaꞌa bana — niha ada Jesus.