Jesua bianaihotaki ada makhira adahariki
2
Hari.
Mahi hoariha Cafarnaum sidajia ajoiꞌaha ada Jesus.
Jorakia okhaoniꞌihi ida varani gorana bodinia hojaꞌina.
2 Hari.
Vajoroniꞌaha adani ijaꞌari vaipohiki,
vanajiꞌbiniꞌihi ida gora bodini.
Ni-hojajanaki ida ibavi gora bodinia.
Gora kaathani banininija vahojaki jaboni adani ijaꞌari vaipohiki.
Jesus vaꞌora kanamonivini hiꞌihi ida Deus athi.
3 Hari.
Jesus kania vavikhaꞌaha ada makhira joꞌo abaꞌoronisiagaki,
makhira avakoꞌbamahakhamakia vakaibaꞌiꞌaha.
4 Gora jiꞌbiniki ijaꞌari vâipohikia,
ni-nihanikia makhira joꞌo abaꞌoronisiagaki-ra avaviꞌoiki gora bodinia.
Ni-vakaabokaki ida Jesus kania vamaakarina.
Oniaroa,
avavikasiha gora ꞌdaꞌdini aꞌani sohiriamaꞌokia avavikasiꞌaha.
Vanaꞌbakhamananiꞌihi ida gora ꞌdaꞌdini aꞌani,
kharaniꞌihi,
jorai damomisikia avanahiririrariꞌaha ada makhira Jesus viaha.
5 Jesus abono-ra niꞌaha:
—Vakajariꞌdarihi hida makhira joꞌo abaꞌoronisiagaki-ra oanaihotavini-ra okaabokavini.
Oniaroa,
makhira kavamoniki-ra niꞌaꞌaha:
—Kodisai.
ꞌBiraꞌiki ida kadahojai asohiriki — niha ada Jesus.
6 Hari.
Vavithiriahana vakaroiribaniꞌaha adani judeus kaijaꞌari vakaꞌojomoꞌiva abono.
Vaabono vaniꞌaꞌaha:
7 —Jahariki ida Jesus kavarani.
Deus kaꞌoa bikaabokaki ida hojai asohiriki naꞌbirani.
Deus hiriha ada Jesus.
8 Jesua biogaki ida vakavaꞌibodivaranivini,
vaꞌora niꞌaha:
—Jahariki ida kodivarani-ra avakajariꞌdavini.
9 Oanaihotaki bana ada makhira.
Oanaihotavini avanokiha;
avarigaki jaboni ida kidihojai asohiriki onaꞌbiraꞌavini okaabokaꞌavini.
10 Deus hora karonavini hiki ijaꞌari kahojai asohiriki-ra onaꞌbiravini.
Hovani ijaꞌari hahavi vakadiꞌaajo ho — vaꞌora niꞌaha ada Jesus.
11 Hari.
Makhira joꞌo abaꞌoronisiagaki-ra niꞌaha:
—Gaaꞌa!
Ijorani-ra nabiiniꞌa,
igorania okhaꞌa bana!
12 Hari.
Vanokivini kabaꞌi,
jorakia aihotaꞌaha ada makhira.
Gaaꞌaha,
jorana-ra nabiiniꞌaha,
gorana okhaꞌaha.
Oniaroa,
ijaꞌari vanokiva vakavaꞌibodivaranikarahoꞌaha.
Deu-ra khai vaniꞌaꞌaha:
—Jahaꞌoamanija hida Deus kabadani anokibiininiki hidakabaꞌi.
Jesua bikaboaꞌiki ada Levi vaipohihana hira kaimoni
13 Hari.
Ajihiꞌianaha ada Jesus.
Galiléia kaꞌdakonia okhanaiꞌianaha.
Ijaꞌari vaipohiki vajoroniꞌaha kidiania,
vaꞌora kaꞌojomoꞌiꞌaha.
14 Adahana kabaꞌi binokiha ada Levi.
Alfeu kaisai ada Levi.
Imposto gathaniva abono ada Levi.
Imposto kajinironi ida arabo kakaꞌdaꞌdini kabadani kaimoni.
Hari.
Imposto kagorania vithiꞌaha ada Levi.
Jesua biniꞌaꞌaha:
—Hora vaipohihaꞌa bana.
Gaaꞌaha ada Levi,
Jesu-ra vaipohihaꞌaha.
15 Oniaroa,
naothinia,
Levi gorana avikhaꞌaha adani Jesus,
vakaikahiꞌaha,
avikhajakosiꞌaha.
Viꞌbaiha adani Jesus,
kidipohi khama.
Viꞌbaiki kidiania jaboni adani imposto gathaniva abono vaipohiki.
Vakadiania vahojaki jaboni adani ijaꞌari hojai jaharikia vakahojaiki.
Vaꞌoaniaro Jesu-ra vavaipohihaki jaboni.
16 Hari.
Judeus kaijaꞌari vakaꞌojomoꞌiva abono vaꞌora vanokiha adani Jesus viꞌbaijabanaki.
Farisio vihiki adani ijaꞌari kaꞌojomoꞌiva abono.
Farisio vaꞌora vanokiha adani Jesus viꞌbaijabanana,
Jesus ipohina-ra vaꞌora vananaꞌdohiꞌaha:
—Niha nimanira ada Jesus ꞌbaijabanaki imposto gathaniva abono vakadiania?
Hojai jahariki namonahava abono vahoariha vakadiania ꞌbaijabanaki jaboni ada.
Akadihojai hipaꞌitxirihi hida aꞌbaina vakadiania — Jesus ipohina-ra vaꞌora vaniꞌaha adani farisio.
17 Jesua bikamithaꞌihi ida vakadinaꞌdohi.
Vaꞌora niꞌaꞌaha:
—Onofiki ida vaꞌora oakavaꞌijoavini,
oniani ida vakadiania hora noꞌbaijabanaja.
Kavamoni vani fori hija ida ijaꞌari kahojai asohiriki.
Ni-vaꞌora obaranahaki adani hojai asohikia vakahojaiki.
Mijiko fori ohiki ho.
Vakavamoniki vani adani mijiko-ra vanofira.
Vakavamonirikia ni-vanofiki ada mijiko.
Hojai asohirikia vakahojaiki vani hadani vaꞌora obaranahara vakavaꞌipahinija kaimoni ida vakadihojai asohiriki — vaꞌora niꞌaha ada Jesus.
Ijaꞌari viꞌbairina vahojana varani hini hida
18 Hari.
João Batista ipohina ni-mahi hahavi viꞌbaiki.
ꞌBai-ra vavahojavini kabaꞌi,
viꞌbairina vahojana Deu-ra vara vaniꞌara kaimoni.
Farisio vahojana hiki ida jaboni.
Hari.
Vahoariha vaniꞌaha ada Jesus:
—Viꞌbairina vahojaki adani João ipohina,
farisio khama,
Deu-ra vara vaniꞌakaꞌoara kaimoni.
Vahojana oamani oni.
Kadaipohi vakadihojai hirihi hida.
Niha vakhanimanira adani kadaipohi viꞌbairina vahojariki Deu-ra vara vaniꞌakaꞌoara kaimoni?
19 Oniaroa,
Jesua bigathanihi ida vaathi:
—Vakadiania ohojahahaꞌoadahana mani ida viꞌbairina vaꞌora nahojarija.
Maisa fori ohiki ho.
Kanori abono ihinika kania vahojana vani fori vihira adani oipohina.
Viꞌbaijahakiki adani kanori abono.
Onivani fori vihira adani oipohina.
20 Khaki bana ida mahi vakadiania oakaraꞌona kamahini,
oniaroa,
ni-ꞌbai havahani-ra vanofiki mahi hahavi Deu-ra vara vaniꞌakaꞌoara kaimoni — niha ada Jesus.
Jesua vara bivaniꞌaki ida kidihojai makari jaꞌdini fori hini
21 Hari.
Jesus vaꞌora niꞌaha:
—Vakavaꞌipahinikaꞌoa bana ida avakadihojai ꞌboꞌda mahija kodihojaia avakahojaivini.
Ni-kabodihadihaki ida hojai ꞌboꞌda kodihojai jahakia.
Ijaꞌaria ni-biakarabajaki ida makari ꞌbiraki makari pitani jaꞌbiririꞌiarikia.
Makari pitani jaꞌdinia akarabajaja vaha;
sokoahi ida makari,
jaꞌbiririmanihi vaha ida pitani jaꞌdini,
ꞌbiraꞌianahi vaha ida makari ꞌboꞌda;
aꞌahapimanihi vaha ida makari ꞌbirani — vaꞌora niꞌaha ada Jesus.
Jesua vara bivaniꞌaki ida kidihojai vinho jaꞌdini fori hini
22 Hari.
Jesus vaꞌora niꞌaha:
—Vakavaꞌipahinikaꞌoa bana ida avakadihojai ꞌboꞌda mahija kodihojaia avakahojaivini.
Ni-kabodihadihaki ida hojai ꞌboꞌda kodihojai jahakia.
Ni-ijaꞌaria binaibaviki ida vinho jaꞌdini igitha asafini ꞌboꞌda bavi hikia.
Thoromanihi ida vinho jaꞌdini.
ꞌDakhaki ida baasafi kabavihi ꞌboꞌda,
ni-abitxajanaki.
Ijaꞌaria binaibavija vaha ida vinho igitha asafini ꞌboꞌda;
akaꞌbararakhamamanihi vaha;
kavithimamanihi vaha ida vinho.
Ni-jahajanaki ida bavi.
Ijaꞌaria binaibaviki ida vinho jaꞌdini igitha asafini jaꞌdini bavi hikia.
Ni-akaꞌbararakhamajanaki ida igitha asafini,
ni-ahovarijanaki ida vinho — niha ada Jesus.
Ijaꞌari akoirini kamahini kavaranihi
23 Hari.
Oniaroa,
judeus kaijaꞌari vakadiꞌakoiri kamahini vani,
avikafianiribaniꞌaha adani Jesus trigo kasiroinia.
24 Oniaroa,
farisioa vanokiꞌihi ida Jesus ipohina trigo bononi-ra varisivini,
vaniꞌaha ada Jesus:
—Deus kavaꞌisohihi jiriki ijaꞌari-ra honariavini hiki ijaꞌari bada nirini aakoirina kamahini.
Nahina mani ida iipohini Deus kavaꞌisohihi jiriki-ra vanaabaravini hija?
25 Jesua bigathanihi ida vaathi:
—Aꞌonira vara oniꞌavini hiki ada Davi kohana.
Deus athi kapapirania hojaki ida Davi varani hina.
ꞌBoꞌdakari vavaiꞌamiꞌaha adani Davi kohana kidipohi khama,
ni-vavahojaki ida vakadiꞌbai.
26 Oniaroa,
Deu-ra khai vaniꞌavini kagorani kania avikhajakosiꞌaha adani Davi.
Hari.
Gora bodinia kahojaꞌiki ida pão sasidotxia kaꞌoa vakahaki kaimoni.
Sasidotxi Deu-ra kanavaꞌigaꞌimidiavini kihiki ida pão.
Sasidotxi vaoniki adani Deus kabadani abono.
Davi kohana hokina kari,
Abiatar oniki ada sasidotxi vakaꞌdaꞌdiva.
Deus kavaꞌisohihi jirikia biniꞌaha:
“Sasidotxi kaꞌoa vakahaki kaimoni ida pão
Deu-ra khai vaniꞌavini kagorani bodinia kahojaki.”
Nimania ida Deus kavaꞌisohihi jiriki athini.
Sasidotxi vihiriha adani Davi kohana kidipohi khama.
Kabaꞌi,
Davia bikahaki ida pão gora bodinia kahojaki.
Kidipohi-ra vaꞌora noꞌavini kihiꞌihi jaboni.
Ni-Deua bivajahariki ida pão-ra vakahavini.
27 Oniaroa,
Jesus vaꞌora niꞌaha: