Ijaꞌari kajoamorahini varani hini
6
Asia vara niꞌaha ada Jesus:
—Avaabononi avakavaꞌigairi bana!
Hariꞌa avaabononi vavaboraboraha!
Hariꞌa avaabononi vara vaniꞌa afohanana:
“Onofiki ida vahoariha ojahana-ra vanokivini,
oniani ida kodibadani jahakia vaꞌora onanokiahivini hija.”
Hariꞌa vanokivini vanofi.
Vanokivini avanofihi;
ni-avakadiabiꞌi nama hojakia binaabosiki bana ida avakadibadani jahaki kidinahina jahakia.
2 Kanahinariki-ra inoꞌavini hiki ida kadanahina,
hariꞌa ijaꞌari hoariha-ra nanamitha bana inoꞌavini hikia.
Ijaꞌari abononi vaboraborahakia bivajahaki ida vahoariha avigavini,
oniani ida kagahinaibakhiani-ra kahibakhiavini hija.
Judeus kaijaꞌari Deu-ra vara vaniꞌavini kagorania abononi vaboraborahaki ida,
hagihia adahaki abononi vaboraborahaki jaboni,
ijaꞌari vahoariha-ra vaꞌora ananamithaonivini hiki ida kanahinariki-ra kajoamoraꞌavini.
Binofiki ida kidihojai jahaki-ra vara vaniꞌavini khai vaniꞌavini.
Vakavaꞌibodivaraniꞌa bana hida kodivarani.
Ijaꞌari abononi vaboraborahahi;
ni-Deua binaabosiki ida kanahinariki-ra kajoamoravini kidinahina jahakia.
Kanahinariki-ra kajoamoravini abosinia gahinaꞌiki hida ijaꞌari vahoariha kidihojai jahaki-ra vara vavaniꞌavini.
3 Ijaꞌari kanahinariki-ra ikajoamoravini kamahini,
ahojaia inoꞌa bana mahija ijaꞌari hoariha inoꞌavini biogaravini,
ni-kadavaꞌahi,
ni-kadaijaꞌari igorani maakarinia hojakia biogavini jahaki.
4 Hariꞌa avaabononi vavaboraboraha.
Hariꞌa avakadibadani jahakia vahoariha-ra vaꞌora vananamitha.
Avakadiabiꞌia binokiki ida ahojaia kanahinariki-ra ikajoamoravini,
ovaria binaabosiki bana ida kadabadani jahaki kidinahina jahakia.
Jesus vaꞌora kaꞌojomoꞌivini hiki Deu-ra vara vaniꞌara kaimoni
5 Asia vara niha ada Jesus:
—Deu-ra vara avaniꞌavini,
hariꞌa ijaꞌari abononi vaboraborahaki fori vihi.
Vaꞌoaniaro vavajahaki ida judeus kaijaꞌari Deu-ra vara vaniꞌavini kagorania vigaana,
vahoariha vanokija kaimoni ida Deu-ra vara vaniꞌavini.
Vavajahaki ida ijaꞌari vaipohikia vavaradahaki kania Deu-ra vara vaniꞌavini,
vahoariha vaꞌora vanokira kaimoni.
Vakavaꞌibodivarani bana hida kodivarani.
Ijaꞌari abononi vaboraborahahi;
ni-Deua binaabosiki ida ijaꞌari.
Deu-ra vara niꞌavini abosinia gahinaꞌiki hida ijaꞌari vahoariha kidihojai jahakia vakavaranina.
6 Aꞌonivani,
Deu-ra vara avaniꞌavini,
avagorani katokinia avikha afohanana bana,
vaakaꞌoaha bana ida bakatha mahija hoariha aꞌonira nokiravini.
Nokiariha ada avakadiabiꞌi nama hojaki.
Ahojani kabaꞌi ida vara avaniꞌavini kidimoni,
ovaria binokiki ida,
aꞌonira noꞌavini hiki bana ida avakanikhariavini hiki.
7 Deu-ra vara avaniꞌavini vani hariꞌa vidioniꞌimarini afobakhia ida avaathini Deu-ra avaniꞌavini hiꞌiki.
Vakhanimanira adani ijaꞌari Deu-ra avigariki.
Deua bikamithaki vavanihaki ida vakadivarani vanaꞌoadaki.
8 Hariꞌa vaꞌoaniaro fori vihi.
Deu-ra vara avaniꞌavini viahania,
ovaria biogaki ida nahina avakainamoki.
9 Nimania bana hida varani Deu-ra vara avaniꞌavini kaimoni:
“Akadiabiꞌi nama ihojaki i.
Anofiki ida ijaꞌari hahavi ijahakaꞌoani-ra avigavini.
10 Anofiki ida ijaꞌari hahavi-ra vaꞌora ivakaꞌdaꞌdivini.
Kadania nama vahojakia khai vaniꞌaki ida kadabadania vakabadanina.
Anofiki ida vaꞌoaniaro fori arihina badani inofikia akabadanina jaboni.
11 Hidakabaꞌi haria noꞌa bana ꞌbaia,
arihaki kaimoni.
12 Anofiki ida akadihojai asohiriki-ra inaꞌbiravini.
Vahoariha vakadihojai asohiriki akadiania aakavaꞌiꞌbirinivini vani fori hini anofiki jaboni ida akadihojai asohiriki-ra iakavaꞌiꞌbirinivini jaboni.
13 Haria kajoamora bana mahija kaborohirohi arihina kabaꞌi,
Jahari athi-ra akamitharavini.
Haria kajoamora bana mahija Jahari kahojai-ra anofijanaravini.
Ivani kaꞌdaꞌdi hoarana i,
hahavi-ra ivakaꞌdaꞌdiki i.
Idanoki i,
ikaabokaki ida hahavi inofiki.
Aradahaki ida ijahani vahoariha hahavi ni-vajahanana aradahaki.
Nimania ida kadahojai mahi anokhomirikia.
Hari ida vani oamani.”
14 Vahoariha vakadihojai asohiriki-ra avarakavaꞌiꞌbirinihi;
avakadihojai asohiriki-ra akavaꞌiꞌbiriniha ada avakadiabiꞌi nama hojaki.
15 Vahoariha vakadihojai asohiriki-ra avarakavaꞌiꞌbirinirihi;
ni-avakadiabiꞌi avakadihojai asohiriki-ra akavaꞌiꞌbiriniki jaboni.
Vaꞌora avarakariakarihi;
ni-Deus aꞌonira akariakaki jaboni — vaꞌora niꞌaha ada Jesus.
Ijaꞌari ꞌbairini hojani varani hini
16 Asia vara niha ada Jesus:
—Aviꞌbairini avahojani kamahini Deu-ra vara avaniꞌakaꞌoaja kaimoni,
hariꞌa avanokhoni-ra vanahamara mahija vahoariha aviꞌbairini avahojani-ra avigaravini.
Ijaꞌari abononi vaboraborahakia vanofiki ida vahoariha avigavini.
Vakavaꞌibodivarani bana hida kodivarani.
Viꞌbairina vahojana vahoariha vaꞌora khai vaniꞌara kaimoni,
ni-Deua binaabosirihi bana ida viꞌbairina vahojana.
17 Aviꞌbairini avahojani kamahini Deu-ra vara avaniꞌakaꞌoaja kaimoni,
visoko bana oni avanokhoni,
avakaꞌdaꞌdini-ra vakavamisaiha jaboni
18 mahija vahoariha aviꞌbairini avahojani-ra avigaravini.
Nokiariha ada avakadiabiꞌi.
Ovari hoarana biogaki ida aviꞌbairini avahojani.
Binokihi ida aviꞌbairini avahojani,
oniani ida aꞌonira naabosivini hija bana kidinahina jahakia — vaꞌora niꞌaha ada Jesus.
Nahina nakaidivavahaki varani hini
19 Vara niꞌianaha ada Jesus:
—Vanofi bana ida nahina jahaki Deus aꞌonira noꞌavini hiki bana kidiania.
Hariꞌa avanaꞌbaꞌdi ida bana avakadinahina kaidivaki hidiaja.
Ni-aꞌboꞌdaki ida kadanahina avaranaꞌbaꞌdiki hidiaja.
Vaꞌbaꞌba bana binihimaki bana ida avakadinahina.
Ferrugem jabonia bana binihimaki bana ida avakadinahina.
Ijaꞌaria avanaꞌbakhajakosi hida avagorani,
avakadinahina bavini hiki-ra vaboꞌdiara kaimoni.
20 Avanaꞌbaꞌdi bana ida avakadinahina avanakaidivaki Deus kania nama mahija avanaibavijahavini.
Ni-vaꞌbaꞌba,
ni-ferrugem jabonia binihimaki bana ida avakadinahina.
Ni-ijaꞌaria vakaabokaki ida ibavi-ra vanaꞌbakhanivini,
vaboꞌdiaja kaimoni ida avakadinahina avanakaidivaki.
21 Avakadinahina avanakaidivavini arafiahi;
avakadinahina-ra avakavaꞌibodivaranihaꞌoadahahi.
Deu-ra avanakaidivavini arafiahi;
Deu-ra avakavaꞌibodivaranihaꞌoadahahi — vaꞌora niꞌaha ada Jesus.
Nokhoi ꞌbaꞌdani lamparina fori hini
22 Vara niꞌianaha ada Jesus:
—Lamparina fori hiki ida ijaꞌari nokhoni vagani.
Avanokhoni vagani jahahi;
hahavi-ra avanokihi.
Mahi vagania avaadahani fori hihi;
nahina-ra avanokivini hiki avanokhoni jahani.
23 Avanokhoni ꞌbaꞌdani jaharihi;
ni-nahina-ra avanokiki,
joma bakibakinia adahai fori hiki hida.
Jahari kabadania avakabadanihi;
joma bakibakinia avaadahani fori avihiki bana aꞌoni.
Avavaꞌini ogairiva bana mahija Jahari kabadania avakabadaniravini.
Jahari kabadani-ra avakavaꞌipahinivini naothinia Jahari kabadania avakabadaniꞌianahi,
joma bakibakinia avaadahaꞌianaki fori avihiꞌianahi bana.
Jahariꞌoamanija ida bakibakiki fori hiki avaadahaꞌianani bana — vaꞌora niꞌaha ada Jesus.
Kaꞌdaꞌdi viꞌbamiki varani vihina hida
24 Vara niꞌianaha ada Jesus:
—Honai abonoa ni-bikaabokaki ida kaꞌdaꞌdi viꞌbamiki vaathi-ra naabahahaꞌoadahavini.
Bivajahaki ada kaꞌdaꞌdi hoarana,
athi-ra naabavini jaboni.
Bada biniꞌavini oadani ida kaꞌdaꞌdi kabadani,
ni-bikaabokaki ida kaꞌdaꞌdi hoariha athi-ra naabavini,
oniani ida bikajonivini hija.
Kaꞌdaꞌdi ada Deus.
Kaꞌdaꞌdi fori hiki ida jiniro.
Ijaꞌari vaꞌini-ra nahonariahihivini fori hiki ida jiniro.
Ijaꞌaria bivaꞌahavini oadani ida jiniro vaꞌini navaꞌihonariahihini hini,
ni-bivaꞌahaki ada Deus vaꞌi nahonariahihini hini.
Hariꞌa avavaꞌini soko iniva
25 Oniaroa,
Jesus vaꞌora niꞌaha adani ijaꞌari:
—Aꞌonira onavaꞌisohiki bana ho.
Hariꞌa avakavaꞌisokonihaꞌoadaha ida ꞌbai avahaki kaimoni-ra avagathanivini,
paha aviꞌaviki kaimoni-ra avagathanivini.
Hariꞌa avakavaꞌisokonihaꞌoadaha ida avakadimakari avakaimahaki-ra avavahojaravini.
Avakadimahi hirihi ida avakadiꞌbai.
Ni-avaabononi hirihi ida avakadimakari jaboni.
Jahaki ida avakadiꞌbai-ra avanakoꞌdihavini,
makari-ra avavahojavini jaboni.
Avanofivini kabaꞌi ida ꞌbai,
makari hiki,
hariꞌa avavaꞌini-ra nahonariahihiva bana ida makari,
ꞌbai hiki.
Deus aꞌonira noꞌavini hiꞌiki ida avakadimahi;
aꞌonira kaijahitaki jaboni ada.
26 Vada vaꞌora vaniꞌa bana adani igitha varaboki ꞌbai-ra vanakoꞌdihavini,
kabaꞌi ni-vavaꞌi soko iniki.
Ni-varakhajahaki,
ni-vidoraki ida rakhajahi bononi.
Ni-vanamonahaki ida bavi,
rakhajahi bononi ibavijahani kagorani kaimoni,
kabaꞌi avakadiabiꞌi nama hojaki vaꞌora kaijahitaki adani igitha.
Deus vaꞌora nakaidivaki adani igitha varaboki,
Deus aꞌonira nakaidivavini arafiaki aꞌoni.
27 Avarakavaꞌisokonimanija koda ida avakadimahi-ra avanaꞌoadavini?
Iniani.
Ni-avakaabokaki ida avakadimahi-ra avaranaipohivini.
28 Ni-nahina kaimoni avarakavaꞌisokoniki ida makari-ra avakainamovini.
Vakavaꞌibodivarani bana ida hogoi movani avijavani.
Ni-bada niki ida movai,
ni-binamonahaki ida makari bikaimahaki kaimoni,
kabaꞌi nokiani jahaki ida movai.
29 Kaꞌoa hiki hida kodivarani.
Aꞌonira onavaꞌisohivini hiki ada arabo vakaꞌdaꞌdiva Salomão oniki kohana.
Kanahinaꞌahapikiki ada Salomão.
Kaidivaki ida kidimakari,
nokiani jahaki jaboni ida.
Jahani kabaꞌi ida kidimakari nokiani,
jahani nokiani arafiaki ida movai.
30 Deus vania binamonahaja ida hogoi movani nokiani jahaki.
Hidakabaꞌi hojahi ida hogoi,
afokajoma araꞌokhoꞌiki ida.
Ijaꞌaria bianahaꞌdiꞌiki ida.
Kaidivarini kabaꞌi ida hogoi,
Deua bikahinanikaki ida.
Deus aꞌonira nakaidivavini arafiaki aꞌoni,
oniani ida bana aꞌonira kakodiavini hija avakadimakari avakainamokia.
Deus aꞌonira kaijahitavini-ra avakajariꞌdarihi;
hariꞌa avavaꞌini soko iniva.
31 Hariꞌa vanakamaꞌda ida avavaꞌini soko inihaꞌoadahani.
Hariꞌa vakhaniha:
“Hanaja koda bana oabono oakaragaja ꞌbaia,
paha,
makari hikia?”
32 Deu-ra avigarikia avakavaꞌisokonihaꞌoadahaki ida vakainamoki.
Avakadiabiꞌi nama hojakia biogaki ida nahina avakainamoki.
33 Hariꞌa vakavaꞌibodivaranihaꞌoadahaꞌa bana ida makari,
ꞌbai hiki.
Vakavaꞌibodivarani afoꞌimidia bana ida Deua binofiki.
Vavaꞌaha ida Deus aꞌonira vakaꞌdaꞌdivini.
Athi avanaabahahaꞌoadaha bana;
aꞌonira kaijahitajahakiki ada.
34 Hariꞌa hidakabaꞌi avakavaꞌisokoniꞌa bana ida nahina afokajoma avakainamoki.
Jakaho hojava ida afokajoma.
Arajomaki ida nahina namithaki hidakabaꞌi avavaꞌini kidakidaria kaimoni.
Hariꞌa avakavaꞌisokonijora bana ida afokajoma namithaki kaimoni — vaꞌora niꞌaha ada Jesus.