Kaariha rajomi hini varani hini
18
Hari.
Oniaroa,
Jesua vara bivaniꞌaꞌihi ida rajomi kavaranihi kidipohi kaꞌojomoꞌini hiki kaimoni,
Deu-ra vara vaniꞌahahaꞌoadahara kaimoni.
Bigathaniravini oadani ida Deu-ra kanikhariahaꞌoadahavini hiki,
vakanikhariaki ida.
Niha ada Jesus:
2 —Hari.
Sidajia hojaha ada ijaꞌari nasohiva abono jahariki.
Vaꞌi bodinia vara niꞌaha:
“Ni-onofiki ada Deus.
Ni-okavaꞌibodiki ida vahoariha kodibadani-ra vavajaharavini.”
Lucas 18:1-43
3 Hari.
Hojaki jaboni ida kaariha.
Ijaꞌari nasohiva abono kania okhabakhiaꞌihi ida kaariha,
biniꞌaha:
“Hora kajoamora bana.
Ijaꞌari hora nofirikia binofiki ida kodinahina-ra saarivini.
Hora kakodia bana mahija hora najahariharijanaravini.”
Nihi ida gamo.
4-5 Hari.
Masiko ipohiki radahaha.
Kaariha bikanikhariabakhiavini kabaꞌi ida kajoamorahi hini,
ni-binofiki ida kaariha-ra najaharihariki-ra kaabanivini.
Oniaroa,
abono-ra niꞌaha:
“Deu-ra onofiravini kabaꞌi,
ni-okavaꞌibodiki ida vahoariha kodibadani-ra vavajaharavini,
kabaꞌi ni-okaabokajanaki ida kaariha hora kanikhariabakhiavini.
Kaariha ovaꞌi-ra kaiꞌdokabakhiavini mani ida kidiꞌaathidanoarari athini onasohivini hija,
kidinahina bikanabadanihajanaria kaimoni.
Hora kanikhariabakhiavini hora kanabajadiꞌiki fori ohiki ho.”
Abono-ra niꞌaha.
6 Hari hihi ida rajomi kavaranihi,
Jesus vaꞌora navaꞌisohiꞌaha:
—Vakavaꞌibodivaranijahaki ida ijaꞌari nasohiva abono athi.
Kidihojai asohirini kabaꞌi,
bikajoamoraꞌiki ida gamo,
athinia vaꞌi bikaiꞌdokarara kaimoni.
7 Hari.
Jahaꞌoamanira ada Deus.
Ovaria bikamithaki bana ida kidijaꞌari mahi,
joma hikia kanikhariabakhiana hiki.
Ni-bikajoniki bana ida vaꞌora kajoamoravini.
Jorakia bigathaniki ida vakanikhariavini hiki.
8 Kaꞌoa hiki hida kodivarani.
Ijaꞌaria vanofiki ida Deus kaijaꞌari-ra vaꞌora vanajahariharivini,
kidijaꞌaria vakanikhariavini hiki ida vaꞌora kajoamoravini,
bona vaꞌora kajoamorajorakiki adani.
Hovani ijaꞌari hahavi vakadiꞌaajo ho.
Ojoina kamahini vaꞌora okaragamanira koda adani ijaꞌari Deu-ra vakajariꞌdariki?
Farisio, imposto gathaniva abono khama rajomi vihina kavaranihi
9 Hari.
Oniaroa,
vahojaha adani ijaꞌari vaabono vakavaꞌibodivaraniki afohanana:
—Hovani ojahakaꞌoaki ho,
ni-ijaꞌari hoariha fori ohirihi.
Hoariha ni-jahapaꞌitxiki — vahojana hiki ida vakadivaꞌibodivarani.
Oniaroa,
Jesua vara bivaniꞌaꞌianahi ida rajomi kavaranihi hoariha.
Jesus vara vaꞌora niꞌaha adani ijaꞌari vahojana jahani-ra vakahiꞌbadaraki:
10 —Deu-ra khai vaniꞌavini kagorania avikhaha adani makhira viꞌbamiki.
Farisio ada hoarana.
Imposto gathaniva abono ada hoariha.
11 Avikhajakosiꞌaha adani viꞌbamiki.
Ijaꞌari vaviaha gaakosoaꞌaha ada farisio hoarana,
abono-ra niꞌaha:
“Deus,
khai ira oniꞌavini hiki ida ohojana.
Ni-hoariha kanahina-ra
oakabaiki,
ni-oboꞌdiaki ida hoariha kanahina,
ni-korijanahia okavaraniki,
ni-ovavadiki ida hoariha kagamo.
Khai oniꞌaki ida ijaꞌari vahoariha vakadihojai jaharikia okahojairina.
Khai ira oniꞌavini hiki jaboni ida imposto gathaniva abono fori ohirina.
Kaboꞌdinofiki ada.
12 Deus,
mahi ꞌbamiki,
semana hahavi oꞌbairina ohojabakhiana vara ira oniꞌakaꞌoaja kaimoni.
Kodibadani abani hahavi-ra ogathanivini vani,
onapitavini ida saꞌai koꞌbamihani hini.
Oanajoiribaniki pitani hoarani kadania.”
Niha ada farisio.
13 Hari.
Imposto gathaniva abono ni-okhajakosijahakiki.
Bakatha kania hojana kabaꞌi,
Deu-ra vara niꞌaꞌaha.
Kidihojai asohirini-ra kaipahivini mani ida nama vada niꞌamananirina hija.
Makhoꞌini-ra kakapataꞌaha,
biniꞌaha:
“Deus,
hora vaꞌadi bana,
asohiriꞌoamanija ida kodihojai.”
Niha ada imposto gathaniva abono.
14 Jesus vaꞌora niꞌaha adani ijaꞌari:
—Kaꞌoa oamani hida kodivarani.
Vaꞌi jahajahani gorana joiꞌaha ada imposto gathaniva abono.
Deua biakariakaki ada.
Ni-biakariakaki ada farisio.
Ijaꞌari abononi niꞌahi:
“Hovani hojai jahakia okahojaikaꞌoaki ho.”
Deua biniꞌahi hida ijaꞌari:
“Ni-jahaki ida kadahojai.
Ni-khai oniꞌaki ida iabononi ivaboraborahavini.”
Ijaꞌari jahania abononi vaboraborahavini mani ida Deua binavaꞌiꞌaipahihivini hija bana.
Ijaꞌari abononi niꞌahi:
“Ovaꞌi-ra anaipahihiki hida kodihojai asohiriki.”
Deua biniꞌahi:
“Oviaha ivaꞌini aipahihini mani ida
khai ira oniꞌavini hija.”
— Jesus vaꞌora niꞌaha adani vajoroniꞌiki.
Jesus vaꞌora kajoamoraki adani isai
15 Hari.
Oniaroa,
ijaꞌari vaꞌora vavikhaꞌaha adani vakadisai Jesus kania.
Vanofiki ida Jesus vakadisai-ra vaꞌora kajoamoravini.
Oniaroa,
kidipohi vaꞌora vanokiha adani ijaꞌari,
vaꞌora vakaabaniꞌaha:
—Hariꞌa vaꞌora vavikha vaꞌoani isai.
16 Oniania,
Jesus vaꞌora baranahaꞌaha adani isai kidiania,
vaꞌora niꞌaꞌaha adani ipohina:
—Jakaho kodiania vikhava vaꞌoani isai.
Hariꞌa vaꞌora vakaabani kodiania vikhana.
Hiꞌadani isai fori vihiki vani hadani Deu-ra vanofijahakira.
Isai vania vanofira ada Deus vaꞌora vakaꞌdaꞌdira kaimoni.
17 Vakavaꞌibodivarani hida oathi.
Isai fori vihiꞌa mahija Deu-ra avagathanivini avakadikaꞌdaꞌdi hiꞌara kaimoni.
Isai fori avihirihi;
jokoa avakadikaꞌdaꞌdi hiriha ada Deus,
jokoa Deus ibavia avarikharihi — vaꞌora niꞌaha ada Jesus.
Makhira kanahinaꞌahapikiki varani hina hida
18 Hari.
Jesus kania khaha ada judeus kaijaꞌari vanavaꞌisohiva abono.
Biniꞌaha:
—Jesus,
ijahaꞌoamanija.
Onofiki bana ida kodimahi anokhomirini.
Onofiki ida oabinina kamahini Deus kania ookhana.
Hana hini badani jahaki ida bada oniꞌaja kaimoni,
oabinina kamahini Ibavi Jahakaꞌoakia ookhaja kaimoni?
19 Jesua bigathaniꞌihi ida kidinaꞌdohi:
—Nahina ida ojahana-ra ikahivini hija?
Deus oavani ada jahara.
Ni-nahina hoariha jahaki.
20 Iogaki ida Deus kavaꞌisohihi jiriki:
“Hariꞌa iviꞌoma oni makhira hoariha kagamo.
Hariꞌa hoariha-ra naabini.
Hariꞌa boꞌdia.
Hariꞌa hoariha-ra korijanahia akaraganaha.
Ikamithaꞌa oni kadabiꞌi,
kadamia vihiki ira vara
vaniꞌavini.”
Nimania hida Deus kavaꞌisohihi jiriki.
21 Niha ada makhira:
—Jesus,
isai ohina kari vani onaabahahaꞌoadahaja hida Deus kavaꞌisohihi jiriki.
22 Hari.
Jesua mitha biniꞌahi ida kidivarani,
biniꞌaha:
—Ida asia mani hojahi badani ahoaraniki bada iniꞌaki kaimoni.
Kadanahina-ra pavakari nihaꞌa afohahavi.
Ijaꞌari vakanahinariki-ra vaꞌora noꞌavinihi ida kadajiniro.
Deus ibavia nama iokhani kamahini,
ni-nahina-ra bana ikainamoki.
Kadapavakarihi naothinia,
hora vaipohihaꞌa.
23 Hari.
Makhira mitha biniꞌahi ida Jesus athi.
Kidinahina ahapini gahinai hini varani hini mani ida vaꞌi mokara niꞌani hija.
Ni-noꞌai hini binofiki.
24 Oniaroa,
Jesua binokiha ada makhira,
vaꞌi mokara niꞌina,
oniania biniꞌaha:
—Vakanahinaꞌahapikiki vakadinahina ipohiki-ra vanofivini mani ida Deu-ra vagathaniravini hija,
vakadikaꞌdaꞌdi kaimoni hina — vaꞌora niꞌavini.
25 Oniaroa,
Jesus vaꞌora kavarajomiki adani ijaꞌari cavalo avi joꞌonia okhajavarina-ra kaabokaravini fori vihina:
—Avi joꞌonia cavalo okhajavarina-ra kaabokariki fori vihiki adani vakanahinaꞌahapikiki.
Vakadinahina-ra vanofijahakivini mani ida Deus vakadikaꞌdaꞌdi hina-ra vagathaniravini hija,
oniani ida Deus ibavia vaꞌora arakharija.
Ni-vakaabokaki ida avikhana.
Ijaꞌari vakadinahina-ra vavakaijokavini oadani,
ni-vakaabokaki ida Deus ibavia avikhana.
26 Ijaꞌaria vakamithaꞌihi ida Jesus kavarani,
vananaꞌdohiꞌaha:
—Kaꞌoa mani ida koda iathini,
ni-nihanikia ijaꞌari abononi akavaꞌijoaki,
Ibavi Jaharikaꞌoakia okharia kaimoni?
27 Oniaroa,
Jesus vaꞌora niꞌaha:
—Ni-ijaꞌari abononi akavaꞌijoavini-ra kaabokaki.
Deus kaꞌoa ijaꞌari-ra akavaꞌijoavini-ra kaabokaki — niha ada Jesus.
28 Hari.
Pedroa biniꞌaha:
—Mitha iniꞌa.
Harivani akadinahina,
agorana,
akadijaꞌari vihiki-ra vaꞌora anahojahahahaviꞌiki hari,
ira avaipohihaja kaimoni.
29 Jesua bigathaniꞌihi ida Pedro athi:
—Hai oamani.
Aꞌonira onavaꞌisohivini hiki bana,
kodipohia binahojahaꞌiki ida gorana,
kidigamo,
igamina,
kidisai,
kidijaꞌari hoariha vihiki,
vara biavaniꞌakaꞌoaja kaimoni ida omonina jahaki,
30 ovari abinirina oadani gahinaki bana nahina ipohikia.
Nahina gahinana hiki binahojahaꞌiki-ra aradaki.
Abinina naothinia gahinaki jaboni ada bana kidimahi jahaki anokhomiriki Deus kania.
Jesua vara bivaniꞌaꞌianaki ida abinina kamahini
31 Hari.
Oniaroa,
Jesus vaꞌora avikhananavapaꞌitxiha adani kidipohi,
vaꞌora niꞌaꞌaha:
—Mitha vaniꞌa,
Jerusalém sidaji-ra anikhahaki bana hari.
Jerusaléa akaikahina vani,
namithahahavija bana ida Deus athi namoniva abono vara hora vavaniꞌaꞌboꞌdavini hiꞌiki.
Deus athi kapapirania hojaki ida ijaꞌari hahavi kaꞌaajo varani hina.
32 Ijaꞌari Deu-ra avigariki vasaꞌa kabodinia akadijaꞌari hora avarakhaki bana.
Vaꞌoaniaro hora avigarahaki bana,
varani jaharikia vara hora vaniꞌaki,
hora vakaiꞌbaivini.
33 Hora vidafiavini naothinia hora vanaabiniki bana adani.
Hari,
mahi ahoarabakosiki radahaꞌihi,
oahokiki bana ho.
34 Hari.
Jesus kavarani-ra vakamithavini kabaꞌi adani kidipohi,
ni-avigapaꞌitxiki ida nahina hini vaꞌora vara niꞌavini hiki.
Ahojaki ida kidivarani.
Ni-avigaki ida Jesus vaꞌora navaꞌisohijoravini kavaranihi.
Jesua bianaihotaki ada makhira kamaodorohaki
35 Hari.
Jericó sidaji onikia maakarinia avakhanoꞌaha adani Jesus,
ipohina khama.
Oniaroa,
makhira kamaodorohaki hagihi vadinia vithimaꞌoki.
Jiniro-ra kanikhariabakhiaki ada.
36 Hari.
Vaꞌora kamithaꞌaha adani ijaꞌari vaipohiki varadahana,
vaꞌora nanaꞌdohiꞌaha:
—Nahina kaimoni mani ida ijaꞌari vaipohiki-ra vaꞌora najoronija?
37 Hari.
Ijaꞌaria vagathanihi ida makhira kanaꞌdohi:
—Jesus mani ada radahara — vaniꞌaha.
38 Oniaroa,
bodiꞌbarahaha ada makhira kamaodorohaki:
—Jesus,
ivani Davi kohana kaijaꞌari namitharonisiagaki i,
hora vaꞌadi bana!
39 Hari.
Avikhananavakia vakaabaniꞌaha:
—Avisoniꞌa bana.
Hariꞌa bodiꞌbarahajana.
Ni-avisonipaꞌitxiki ada makhira.
Vakaabaniha anaꞌbarahana hiꞌoamanihi.
—Jesus,
hora vaꞌadi bana!
40 Ogaakosoaha ada Jesus,
vaꞌora honariaꞌaha:
—Avanikha bana ada makhira kamaodorohaki.
Akhanoꞌaha,
Jesua binanaꞌdohiꞌaha:
41 —Nahina mani hida inofija kodiania?
—Jesus,
onofiki hida onokho-ra ianavagahavini — biniꞌaha.
42 Oniaroa,
Jesua biniꞌaha:
—Inokhoni haꞌdini avagaꞌava!
Hora ikajariꞌdaravini mani ida inokhoni-ra najahaꞌia.
43 Hari.
Jorakia vagahaꞌihi ida nokho ꞌbaꞌdani.
Jesus naothia kasiagajabanaꞌaha.
Deu-ra khai niꞌaha ada makhira.
Ijaꞌari vaipohikia vanokiha ada makhira nokho avagahaꞌiki,
Deu-ra khai vaniꞌahahaviꞌaha jaboni.