2 Hari.

Khai oniꞌaki ida hora avakavaꞌihokibakhiavini.

Avanaabaꞌiki jaboni ida Cristo kavaranihia aꞌonira okaꞌojomoꞌiꞌboꞌdavini hiꞌiki.

3 Aꞌonira onavaꞌisohiki bana ho:

Cristo vaꞌora vakaꞌdaꞌdiki adani makhira hahavi,

vanaabaja kaimoni ida athi.

Makhira bivakaꞌdaꞌdiki ida kidigamo,

binaabaja kaimoni ida athi.

Deua bivakaꞌdaꞌdiki ada Cristo,

binaabaja kaimoni ida athi.

4 Hari.

Jesus kaijaꞌari vajoroniki Deu-ra khai vaniꞌara kaimoni,

ni-asohiki ida makhira kaꞌdaꞌdi-ra kakarahobavini Deu-ra vara niꞌavini,

vajoroniki-ra vaꞌora nanamithavini Deua vara biniꞌavini hiꞌikia.

Kaꞌdaꞌdi-ra kakarahobaha;

ni-Cristo-ra vavaꞌihaki.

5 Jesus kaijaꞌari vajoroniki Deu-ra khai vaniꞌara kaimoni,

asohiki ida gamo kaꞌdaꞌdini-ra kakarahobavini makaria;

Deu-ra vara niꞌavini,

vajoroniki-ra vaꞌora nanamithavini Deua vara biniꞌavini hiꞌikia.

Kaꞌdaꞌdini-ra kakarahobarihi makaria;

ni-kidimakhira-ra vavaꞌihaki.

Vaꞌini aipahihiki ida gamo kaꞌdaꞌdini kaafani koꞌdavirahaki.

Vaꞌini aipahihiki jaboni ida gamo kaꞌdaꞌdini kakarahobariki.

6 Gamo kaꞌdaꞌdini-ra kakarahobavini-ra kajonihi;

kaꞌdaꞌdini kaafani kaꞌboani jahahi.

Gamo vaꞌini-ra anaipahihiki ida kaꞌdaꞌdini kaafani koꞌdavirahani,

kaꞌdaꞌdini kaafani kaꞌboani riboriboni.

Hojai asohirikia kahojaiꞌini karajomini ida.

Hari.

Gamo kahojai asohiki-ra nanokiaja kaimoni,

jahaki ida kaꞌdaꞌdini-ra kakarahobavini,

vaꞌini aipahihiria kaimoni.

7 Ni-nahina kaimoni makhira kaꞌdaꞌdi-ra kakarahobaki.

Makhira kania hojaki ida Deus jahana nokiani,

makhira kahojaia binanokiaja kaimoni ida Deus kahojai jahaki,

oniani ida kaꞌdaꞌdi-ra kakarahobavini Deua binofiravini hija.

Deua binamonahaꞌiki ida gamo,

binanokiaja kaimoni ida kidimakhira kahojai jahaki.

8 Ni-gamo kania namithaki ada makhira miroꞌa.

Deua bianiꞌihi ida makhira imana,

gamo-ra namonahavini hiꞌihi.

9 Makhira miroꞌa bikainamoki ida ꞌbamina,

oniani ida Deus gamo-ra namonahavini hiꞌia.

Ni-gamo miroꞌa bikainamoki ida ꞌbamina.

10 Deu-ra khai aniꞌavini-ra avajoronivini vani Deus ibavi kaijaꞌarini haria vada vaniꞌahi,

oniani ida gamo kaꞌdaꞌdini-ra kakarahobavini-ra najahaja.

Nikia vaꞌora nanokiahira kaimoni kidimakhira athi-ra naabavinia.

11 Hari.

Makhira,

gamo arihiki aakaramisihahaviki hari Cristo kania.

Hojariha ada makhira;

gamo ni-abononi vahokivini-ra kaabokaki afojahaki.

Hojarihi ida gamo;

makhira ni-abono-ra vahokivini-ra kaabokaki afojahaki.

12 Kamaꞌdani kari makhira kaꞌaha kaavania amonahaki ida gamo.

Naothinia gamo jahani bodinia vanamithaꞌiki adani makhira.

Deus vani ada hahavi-ra nakamaꞌdaꞌara.

13 Aꞌonivani vakavaꞌibodivarani bana hida kodivarani,

asohini asohirini gamo kaꞌdaꞌdini-ra kakarahobariki Deu-ra vara niꞌavini Deus khai niꞌana kagorania.

14 Ni-akavaꞌiꞌoꞌanivahaki ida makhira kaꞌdaꞌdi kaafani kaꞌoadaki-ra kavahojavini.

Nikia kahojaiha;

abono-ra anavaꞌiꞌaipahihiha.

15 Gamo vani ida nikia kahojaini jahaja.

Gamoa khai biniꞌaki ida kaꞌdaꞌdini kaafani kaꞌoadaki kanokiani kajahaki.

Deua binoꞌaꞌiki ida gamo kaꞌdaꞌdini kaafani kaꞌoadakia,

kaꞌdaꞌdini kakarahobani hiki kaimoni.

16 Hari.

Ijaꞌari hora anaathidanoararivini-ra nofivini hiki bikajariꞌdavini ida gamo kaꞌdaꞌdini-ra kakarahobaki kavaranihi.

Onavaꞌisohihi ida ijaꞌari:

Jesus kaijaꞌari avajoronioniki vakadihojai hiki ida.

Akadihojai kaꞌoa ida Deu-ra akanamasivivini-ra avajoronivini.

17 Hari.

Vara aꞌonira oniꞌavini hiki bana ida avakadihojai hoariha ovajahariki.

Avajoronini vani Deu-ra khai avaniꞌaja,

ni-avaabononi avakakakodiakhamaki Jesu-ra avavakaijokavini.

Avaabononi avakanadabakhamaꞌoamanija.

Aꞌonira onavaꞌisohivini hiki bana ida niha ninini asohini.

18 Hari.

Okamithaꞌiki ida varani avihini.

Jesus kaijaꞌari vajoronina vani vaabono vakanapitakhamaki fori vihira adani vaabono avakanaathidanoararikhamavini.

Kaꞌoa hiki vahabini ida varani avihini.

19 Asohirini kabaꞌi ida avaabononi avakanapitakhamavini,

Deua bivaꞌahaki ida,

vanokiara kaimoni adani ijaꞌari avahararania hojai asohikia vakahojaiki.

20 Avajoronihahavini,

aviꞌbaini mani ida aꞌonira najoronija.

Ni-Jesus abiniꞌina-ra avakavaꞌihokiki.

21 Avahoarahanana avaravasokoki ida ꞌbai.

Aꞌonimiroꞌa avakaikahiki avahavini arafiaki ida ꞌbai.

Aꞌonivani avarakhanosiagaki ni-aviꞌbaiki.

Hoariha asia vaiꞌamiki.

Hoariha ꞌbaini arafiaki.

Hoariha asia kanabidini akaaforaki.

Hoariha koꞌavahani arafiaki.

22 Hojaria koda ida avagorani avaviꞌbaiki ibavini kaimoni?

Vaꞌora avakaihiponiriki adani Cristo kaijaꞌari Deus khai niꞌana kagorania vajoroniki.

Avakadihojai niki ijaꞌari vakanahinariki vavaꞌi-ra anaipahihiki ida.

Nahina aꞌonira oniꞌaja koda bana?

Khai oniꞌamanija koda ida avakadihojai?

Ni-khai oniꞌapaꞌitxiki.

23 Hari.

Jesus kania ogathaniꞌiki ida ojomoꞌihi kavaranihi aꞌonira onavaꞌisohivini hiꞌiki.

Mithani Judas Jesu-ra arakhavini viahania viꞌbaiꞌaha kidipohi khama.

Jesua bikanabiiniꞌihi ida pão kaabononi.

24 Deu-ra niꞌaꞌaha:

—Deus,

ivani ijahaki i.

Pãoa haria inoꞌaꞌiki i — niha ada Jesus.

Vara nina naothinia bikanapitahatahaꞌihi,

vaꞌora niꞌaꞌaha:

—Oimana hida pão.

Pitahatahaꞌiki fori hiki ida oimana avakadimoni,

aꞌonira oakavaꞌijoaja kaimoni.

Vakahabakhia bana hida pão mahija oabiniꞌina-ra avakavaꞌihokihaꞌoadahavini.

25 Viꞌbaina naothinia onivani fori hiꞌianaha ada Jesus.

Vinho bavini-ra nabiiniꞌaha,

Deu-ra khai niꞌaꞌaha.

Deu-ra vara niꞌavini naothinia vaꞌora niꞌaha adani ipohina:

—Rajomi hida vinho.

Oabiniꞌina sakahi ohina oamana ahovariki bana ho.

Oabinina mani ida Deus kavaꞌiponahi aꞌboꞌdaki jaꞌdini-ra nakamaꞌdaja bana.

Oabinina mani ida Deus kania kidijaꞌari avajahamisina-ra vakaabokavini hija bana.

Nimania ida vaꞌiponahi aꞌboꞌdaki jaꞌdini athini.

Hari.

Vinho-ra aviꞌavibakhiavini vani vakavaꞌihokibakhia bana ida oamana ahovarini oabiniꞌina — vaꞌora niꞌaha ada Jesus.

26 Hari.

Rajomi hiki hida pão-ra avakahabakhiavini,

vinho-ra aviꞌavibakhiavini jaboni.

Jesus joirina oadani,

nikia avakabadanibakhiahi,

avanamoniki ida abiniꞌina kidijaꞌari-ra vaꞌora akavaꞌijoara kaimoni.

27 Hari.

Ijaꞌaria bikahahi ida pão,

biꞌavihi jaboni ida vinho,

bikavaꞌihokiravini kabaꞌi ida Cristo imana ꞌbanaꞌini arafiani kidimoni hini,

amana ahovariꞌini jaboni;

Deua biniꞌahi:

—Hojai asohirikia ikahojaiki i,

ni-inakaidivaki ida Cristo imana,

amana hiki.

28 Oniaroa,

ijaꞌari hahavia vakavaꞌibodivaraniva ida vavaꞌi bodini vara nini asohiki asohiriki Deus viaha.

Vakadimahi-ra vanasohihananavini naothinia vakahaki ida pão,

viꞌaviki ida vinho.

29 Ijaꞌaria bikavaꞌibodivaranirihi ida Cristo imana amana fori hini;

ni-asohipaꞌitxiki ida pão-ra kahavini,

vinho-ra aavivini.

Nikia kahojaihi;

abononi arakhahi nahina jaharikia.

30 Oniani ida avahoarahanana aꞌonira nakavamonija,

avajaroni-ra nafajafajahaja,

vahoariha vaabiniꞌiki.

31 Ijaꞌaria bikavaꞌipahinihi ida vaꞌini bodini vara nini asohiriki,

pão-ra kahavini,

vinho-ra aavivini viahania,

ni-Deua bikaronaki ida hojai asohiriki abosini.

32 Akadihojai asohirini-ra kahiha ada Cristo,

oniani ida haria kapataki fori haria nihavini hija,

akavaꞌipahinija kaimoni ida hojai bivajahariki.

Ni-binofiki ida hojai asohiriki abosini-ra agathanivini Deu-ra vanofiriki vakadiania afojabana.

33 Hari.

Oigamina,

avajoronini kamahini Cristo abiniꞌina-ra avakavaꞌihokija kaimoni,

avaabononi vakanokhakhama bana aviꞌbaijabanani.

34 Vaiꞌamihi ida ijaꞌari;

gorania hojani oadani ꞌbaiva bana.

Nihi;

ni-Deus avajoronini asohirini-ra kahiki.

Hari.

Avakadiania okaikahina vani onasohija ida varani hoariha.