2 Hari.

Jesus akadikaꞌdaꞌdi hina karajomini kaimoni ida kanai.

Onivani fori hija ida namithaꞌiki vakadiania.

Avikasiagaꞌina bahi vaforiki naothia,

avikafianina ꞌdakoa,

vakadikanai fori hiki ida.

Vakadikaꞌdaꞌdi Moisés athi-ra vanaabaꞌavini mani ida kanai karajomini fori hikia vaꞌora kanarajomihahavija.

3 Vaꞌoaniaro hahavia vahaꞌiki ida ꞌbai kiivi fori hiki Deua bikaronaꞌiki.

4 Viꞌavihahaviꞌiki jaboni ida paha Deua bikaronaꞌiki.

Paha jaꞌdi kania khaonaniꞌiki viꞌavibakhiaꞌiki.

Deus vaꞌora noꞌavini hiꞌiki ida jaꞌdi,

paha hiki.

Cristo fori hiki ida hiꞌida jaꞌdi paha bivikhaonaniki kani.

Vaadahaꞌina amasia vaꞌora vaipohihaꞌaha ada jaꞌdi fori hiki Deua bikaronaꞌiki.

5 Hari.

Namithahahaviꞌiki ida vakadiania vara ovaniꞌaꞌiki,

kabaꞌi,

ni-Deua bivajahaꞌiki ida vakadihojai,

oniani ida akadijaꞌari avikhananavaki vaipohiki-ra amasia vaꞌora naabiniꞌia.

6 Hari.

Jahaki ida vakadiania namithaꞌiki-ra akavaꞌibodivaranivini,

vaꞌoaniaro fori arihiria kaimoni.

Vaꞌoaniaroa vakavaꞌinofinofibakhiaki ida nahina jaharikaꞌoaki.

Deus haria kaabanivini hiꞌiki ida Jahari kahojai-ra akavaꞌinofinofiria kaimoni.

7 Ni-jahapaꞌitxiki ida deus amovana-ra akanamasivivini.

Deus athi kapapirania hojaki ida varani vihina:

8 Ni-asohipaꞌitxiki ida makhira vakadigamo vihiriki khama vaabono vakaviꞌomakhamavini jaboni.

Nikia vakabadanina mani ida vaipohiki-ra vaꞌora naabiniꞌia.

Mahi hoarani 23 mil ijaꞌari vaipohina jorakia vaabiniꞌiki.

9 Hari.

Ni-asohipaꞌitxiki ida Deu-ra akaijoꞌaꞌimarinivini,

aogaja kaimoni ida akadihojai bivajahariki abosini-ra karonavini karonaravini.

Nikia vakabadanina vani makha vaipohiki vaꞌora naabiniꞌara adani ijaꞌari vaipohiki amasia.

10 Hariꞌa bana Deu-ra vakaꞌdaꞌdigaria mahija ijaꞌari avikhananavaki fori avihiravini.

Ijaꞌari vaipohiki Deu-ra vakaꞌdaꞌdigariaꞌiki;

maꞌonahai Abinia oniki vaꞌora nihimaꞌiki adani.

11 Hari.

Jahaki ida vakadiania namithaꞌiki-ra akavaꞌibodivaranivini.

Oniaro kari Moisés kohana binajiriꞌiki ida varani vihina haria kaabaniki,

ariabono akaꞌojomoꞌija kaimoni,

vaꞌoaniaro fori arihiria kaimoni.

Amaakariki ida mahi anokhomini araboja.

Arihokina oadani anokhaki ida mahi kharonisiagaki.

12 Vaꞌini ogairiva bana ida ijaꞌari abononi kavaꞌibodivaraniki gaaki fori hini,

danova ida Cristo-ra vakaijokavini mahija badani Deua bivajaharikia kabadaniravini.

13 Avavaꞌini kaborohirohi hini vani vakavaꞌihoki bana ida ijaꞌari vahoariha vavaꞌi kaborohi vihina jaboni.

Nahina jahariki namithaki avakadiania,

onivani fori hiki ida namithaki vakadiania.

Deus aꞌonira navaꞌiponivini hiki ida avavaꞌini kaborohirohi hini arafiani-ra vaꞌaharavini.

Avavaꞌini kaborohi hini kamahini aꞌonira nadanoki ada Deus,

avakaabokaja kaimoni ida Jahari athi-ra avanaabaravini,

avaraihotaja kaimoni Jahari katapajo fori kihikia.

14 Hari.

Oniaroa,

kodivaꞌahi,

aꞌonira onakaidivaki ho.

Avakaraꞌo bana ijaꞌari deus amovana-ra vakanamasiviki vakadiania mahija vakadihojaia avakahojairavini.

15 Ijaꞌari kodivarani nahina nini-ra ogaki-ra vara oniꞌavini fori hiki ida aꞌonira vara oniꞌavini.

Aꞌonivani jaboni vakavaꞌibodivarani bana hida oathi,

avarigaki kaimoni ida asohini.

16 Hari.

Vakavaꞌibodivarani bana ida vinho bavini hoarani ajoronina kania hojaki.

Aꞌavivini viahania Deu-ra aniꞌavini:

—Deus,

ijahaki i.

Haria inoꞌavini hida vinho ama karajomini kaimoni — akhaniꞌiki hari.

Akavaꞌihokiki ida Jesus amana ahovariꞌini,

haria najahavini afohanana,

ariabono akanakaramisikhamahahavija kaimoni aꞌavijabanavinia.

Pão kahoarani-ra aagathanivini vani akanapitahatahavini akavaꞌihokija ida Cristo abono ahahakarahoꞌini,

haria akavaꞌijoaki kaimoni afohanana,

ariabono akanakaramisikhamahahavija kaimoni pão-ra akahajabanavinia.

17 Pão kahoarani-ra akahajabanavini mani ida ijaꞌari abononi hoarani fori haria nihaja jaboni.

Ijaꞌari vaipohiki arihina kabaꞌi,

akahaki ida pão kahoarani,

oniani ida ariabono akanakaramisikhamavini hiꞌia.

18 Vakavaꞌibodivarani bana ida judeus kaijaꞌari vakadihojai.

Ijaꞌari igitha abononia Deu-ra kanavaꞌigavini vani pitahani ahaꞌdiki altar namania,

pitahani hoariha sasidotxia vahaki kaimoni,

pitahani hoariha ijaꞌari Deu-ra kanavaꞌigaki kaimoni.

Judeus kaijaꞌari vaabono vakanakaramisikhamavini hiki ida igitha abononi Deus kanavaꞌigana hiki havahani.

19 Nahina mani hida kodivarani hija?

Kodivarani hirihi ida deus amovana kania deus hojana.

Ni-nahina kaimoni hiki ida deus amovana.

Ni-nahina kaimoni hiki ida ꞌbai ijaꞌaria vanahojaki deus amovana viahania.

20 Ijaꞌari deus amovana-ra kanamasivikia binaibavihi ida igitha abononi deus amovana-ra kanavaꞌigavini viahania.

Kodivarani hiki hida baimana Deus kaꞌoa kaimoni hirini.

Jahari kahonai abono vanokiariki vakadimoni ida.

Ni-onofiki ida Jahari kahonai abono vanokiariki khama avaabononi avakanakaramisikhamavini.

21 Aꞌaviki ida vinho Jesus kaijaꞌari vajoroniki vakadiania.

Ni-asohipaꞌitxiki ida copo hoariha daiki deus amovana viahania hojaki-ra aꞌavivini jaboni Jahari kahonai abono vanokiariki vaviaha.

Akahaki ida pão kahoarani kapitahatahaki.

Ni-asohipaꞌitxiki jaboni ida ꞌbai-ra arihavini Jahari kahonai abono vanokiariki vaviaha hojaki.

22 Anofimanija koda ida Deu-ra anaihamahivini,

Jahari-ra vakavaihinikavini kania arihojana?

Iniani.

Adanona Deus danona-ra aradamanija koda?

Iniani.

23 Nikia vakavaraniki adani ijaꞌari:

—Bada aniꞌava ida hahavi anofiki — vakhaniha.

Kaꞌoa hini kabaꞌi ida vakadivarani,

ni-badani hahavi asohikia akabadaniki kaimoni.

—Bada aniꞌava ida hahavi anofiki — vakhaniki adani.

—Ni-badani hahavi ijaꞌari-ra kakodiaki — oniki ho.

24 Ni-asohiki ida akavaꞌibodivaranihaꞌoadahavini ida nahina jahaki anofiki akadimoni hini.

Asohiki ida ijaꞌari vahoariha-ra vaꞌora akavaꞌibodivaranivini nahina jahaki vakadimoni jaboni.

25 Hari.

Ni-makhaniki avakadimoni hini ida baimana kapavakarivahaki-ra avahavini.

Hariꞌa bana vananaꞌdohi:

Hihida baimana deus amovana viaha hojamaniꞌia koda hida?

Hariꞌa vananaꞌdohi bana mahija avarigaravini.

Avarigaravini mani ida avavaꞌini-ra kosakhamaravini hija.

26 Deus athi kapapirani haria navaꞌisohivini:

27 Ijaꞌari Cristo-ra ogariki aꞌonira kaboaꞌivini kidiania aviꞌbaini,

avarikhani-ra avanofihi;

avarikhahi.

Vaha bana ida ꞌbai avaviahania binahojaki.

Hariꞌa bana vananaꞌdohi ida baimana deus amovana kanavaꞌigana hini mahija avavaꞌini-ra kosakhamaravini.

28-29 Ijaꞌari vahabini aꞌonira navaꞌisohivini hiki ida baimana deus amovana kanavaꞌigana hiꞌini.

Oniania,

hariꞌa vaha bana mahija aꞌonira navaꞌisohiki vaꞌini-ra kosakhamaravini.

Makhanirini kabaꞌi ida havahani,

kidimoni hini ida baimana havahani asohirini,

oniani ida avahavini anasohirini hija.

Hora avananaꞌdohiki vahabini aꞌoni:

—Kidivaꞌikaabanahihia bivaꞌahariki ida hiꞌida havahani.

Kodivaꞌikaabanahihia ni-bivamakhaniki ida havahani.

Nahina mani ida oharavinia oabono ovaꞌaharavini hija?

Jokoa onamakhanirihi ida kidivaꞌikaabanahihi.

30 Oꞌbaina viahania Deu-ra khai oniꞌabakhiavini hiki ida ꞌbai hora noꞌavini hiꞌiki.

Deu-ra khai oniꞌavini hiꞌiki ida ꞌbai ohaꞌiki.

Asohimanija koda ida oabono okaathirivini ꞌbai hoariha kakaaji hiki?

Hoariha hora kanavaraniharavini kaimoni mani ida oabono okaathirivini hija.

31 Aviꞌbaini,

nahina-ra aviꞌavivini,

badani hoariha-ra avanamonahavini;

Deus jahana-ra vananokia bana mahija vahoariha avakadihojai-ra vanokiki Deu-ra khai vaniꞌavini.

32 Hojai asohikia vakahojaihaꞌoadaha bana judeus kaijaꞌari vaviaha,

judeus kaijaꞌari vihiriki vaviaha;

Jesus Cristo kaijaꞌari vaviaha jaboni mahija hojai asohirikia vaꞌora avakabororavini.

33 Hofori vihi bana.

Onofiki ida kodihojai,

kodibadani hiki hivaꞌoani Cristo-ra avigaꞌiariki-ra vaꞌora khai niꞌavini.

Ni-okavaꞌibodivaraniki ida nahina onofiki kodimoni hini.

Vaꞌora okavaꞌibodivaraniki adani vahoariha Cristo-ra avigaꞌiariki niha vaꞌora oniꞌaꞌavini vaꞌora okajoamoravini,

vanofija kaimoni ida Deus vaꞌora akavaꞌijoavini.