2 ꞌBoꞌdakari Deus vaꞌora navaꞌisohijoraꞌiki adani athi namoniva abono kohana monina jahakia,

oniani ida Deus athi-ra vanajirivini hiꞌia.

Deus athi kapapirania hojaꞌboꞌdaꞌiki ida vaathi jiriki.

3 Vakadivarani hijoraki ada Jesus Cristo.

Akadikaꞌdaꞌdi ada Deus kaisai.

Ijaꞌari hiꞌina namithaki ada Deus kaisai.

Kidiꞌarahoda okhananavaki ada arabo kakaꞌdaꞌdini Davi kohana oniki.

4 Deus kahojai jahakaꞌoakia kahojaiki ada Jesus.

Deua binanokiaꞌihi ida danona arafiaki Jesus kania bianahokiꞌiki ada abinina naothinia,

oniani ida Deus kaisai hina aogavini hija.

5 Jesus Cristo hora anivini hiki hora honariara kaimoni,

monina oavaadahaonivini kidimoni.

Deus hora nagathogathovini hiꞌiki vahoariha vahararana athi oavaadahaonivini,

bada oniꞌaja kaimoni ida kidibadani.

Binofiki ida arabo hahavi kaijaꞌarini Jesus varani hina-ra vakajariꞌdaravini,

vavakaijokavini,

athi vanaabavini jaboni.

6 Aꞌonivani Roma sidaji kaijaꞌarini,

Deus aꞌonira nofiki jaboni aꞌoni.

Aꞌonira nagathogathoꞌiki ada,

Jesus Cristo kani avihija kaimoni,

7 oniani ida aꞌonira okajirihivini hija.

Roma sidajia avahojaki avakadimoni hida oathi.

Deus aꞌonira nakaidivaki aꞌoni,

aꞌonira kaboaꞌiꞌiki ada,

kidijaꞌari avihija kaimoni.

Vara vaꞌora oniꞌaki adani akadiabiꞌi Deus,

akadikaꞌdaꞌdi Jesus Cristo khama aꞌonira vakajoamorara kaimoni,

aꞌonira vanoꞌaki adani jaboni vaꞌi jahajahania.

8 Hari.

Aꞌonira onavaꞌisohiꞌimidiavini hiki hida kodivarani Deu-ra vara oniꞌavini hiki.

Jesus Cristo hora kakodiavini mani ida Deu-ra khai oniꞌavini hija.

Khai oniꞌabakhiaki ida aꞌonira kajoamorajahakivini.

Arabo ipohiki kaijaꞌarinia vakamithaꞌiki ida Jesu-ra avavakaijokaꞌavini kavaranihi afojahaki,

oniani ida khai hora niꞌaja.

9 Deus kodivaꞌibodivarani hahavi-ra ogaki,

biogaki hida kodivarani kaꞌoa hini vara aꞌonira oniꞌavini hiki.

Khaii onina vani Deus kabadania okabadanija,

vara oavaniꞌaonivini hiki ida Deus kaisai monina jahaki,

ijaꞌaria vakamithaja kaimoni.

Deua biogaki ida kidiania varani avihini-ra vara ovaniꞌavini,

ni-aꞌonira oakavaꞌiꞌbirinipaꞌitxiki.

10 Onofiki ida avakadiania ookhana.

Ni-okaabokaꞌiaki kaho.

Deu-ra okanikhariavini hiki ida hora kakodiavini okaikahija kaimoni avakadiania.

Deus ookhana-ra nofihi;

onofihi jaboni.

11 Onofikarahoki ida aꞌonira onokivini,

aꞌonira okajoamoraja kaimoni,

Maꞌonahai Jahaki aꞌonira noꞌaja kaimoni kidiꞌogahaia,

danoja kaimoni ida avajariꞌdarini.

12 Kodivarani hiki Maꞌonahai Jahaki haria kakodiavini ariabono aakajoamorakhamavini.

Avajariꞌdarini-ra onadanovini hiki ida niha ninini Deu-ra ovakaijokavini.

Aꞌonivani jaboni,

ojariꞌdarina-ra avanadanovini hiki ida niha ninini Deu-ra avavakaijokavini.

13 Oigamina,

avarigavini onofiki ida aꞌonira onavanavanahavini-ra okaijoꞌabakhiavini.

Nahina namithaki ookhana-ra nadabaki afobakhia.

Onofiki ida Jesus monina jahakia okavaranina avakadiania Jesus kania vaabono gahinai vanihara kaimoni adani Jesu-ra avigaꞌiariki.

Nimania hida kodibadani ibavi ipohikia judeus kaijaꞌari vihiriki vakadiania.

14 Jesus hora kajoamoraꞌavini mani ida homaina hora naadahaja ijaꞌari hahavi vakadiania,

joima vihiki,

joima vihiriki-ra vara vaꞌora oniꞌaja kaimoni.

Ijaꞌari papira-ra ogaki,

ijaꞌari papira-ra ogariki vihiki-ra vara vaꞌora oniꞌaja kaimoni.

15 Oniaroa,

onofijahakiki ida avakadiania Jesus monina jahaki-ra vara ovaniꞌavini Roma sidaji kaijaꞌarinia mitha vaniꞌaja kaimoni.

16 Ni-okaipahiki ida Jesus monina jahaki.

Deua binanokiaki ida danona,

vaꞌora akavaꞌijoahahavira kaimoni adani ijaꞌari monina jahaki vakaijokani vihiki.

Vaꞌora akavaꞌijoaꞌimidiaki adani judeus kaijaꞌari,

naothinia vaꞌora akavaꞌijoaki adani judeus kaijaꞌari vihiriki jaboni.

17 Deus haria nanamithavini hiki ida monina jahaki niha ninini akadimahi-ra nasohikaꞌoavini viaha.

Ijaꞌari Jesu-ra vakaijokahaꞌoadahaki,

ni-bikavaꞌipahiniki ida bivakaijokavini,

oniani ida kidimahi nasohikaꞌoani hija Deus viaha.

Nimania bana hida Deus athi kapapirani athini:

18 Hari.

Deus nama hojakia binanokiaki ida ihamahina.

Bikaihamahiki ida hojai asohiriki ijaꞌari kahojai hiki,

vaꞌi bodini vara nini jahariki hiki,

oniani ida hojai asohiriki abosini-ra karonavini hija bana.

Ijaꞌari hojai jaharikia kahojaini mani ida vahoariha Deus kaꞌoa hina-ra avigavini-ra vanadabavini hija.

19 Deus ijaꞌari hahavi-ra nanokiahivini hiki afojahaki ida hojana,

jahana,

danona,

ogahana hiki.

Ovari kaꞌoa vaꞌora nanokiahiꞌaha.

Ijaꞌaria biogavini kabaꞌi bikajonihi,

oniani ida Deus nahina jahariki-ra karonavini hija bana.

20 Deus hahavi-ra namonahavini kari binanokiajahakiꞌihi ida kidihojai nokiariki niha ninini.

Nokiaꞌihi ida Deus danona mahi hahavi anokhomiriki-ra vahojavini.

Nokiaki jaboni ida Deus kahojai jahani niha ninini.

Ijaꞌari Deus kamonahi-ra vada niꞌahi;

Deus kahojai niha ninini-ra ogahi.

Kaꞌoa hirihi ida ijaꞌari athini Deu-ra ogaravini-ra kahivini.

Kidiamonahi vada biniꞌahi;

biogaha.

21 Ijaꞌari Deus hojana-ra ogavini kabaꞌi,

ni-Deu-ra niꞌaki:

—Ivani kodiDeus i,

idanoki i,

ira ovajahaki i.

Ovajahaki jaboni ida nahina hahavi jahaki hora inoꞌavini hiki,

ijahaki i kodimoni ihini — ni-nikia kavaraniki.

Vaꞌihariki fori hiki ida ijaꞌari.

Ni-asohiki ida kidivaꞌibodivarani.

Kidivaꞌibodivarani asohirini mani ida bakibakinia adahaki fori nihani hija.

22 Ogahai abono hini-ra kahiꞌimarinihi ida ijaꞌari,

vaꞌihariki fori hiꞌoamanija ida.

23 Ni-bikanamasiviki ada Deus kaꞌoa hokihahaꞌoadahaki.

Deus amovana vani ida bikanamasivija.

Ijaꞌaria binamonahaꞌiki ida deus amovana afohanana.

Ni-ijaꞌari hokihahaꞌoadahaki,

kabaꞌi binamonahaki ida Deus amovana makhira nokiana fori hiki.

Deus amovana hoariha igitha raboki nokiani fori hiki.

Deus amovana hoariha igitha adahaki nokiani fori hiki.

Deus amovana hoariha makha,

kasiꞌi kihiki kanokiana fori hiki.

Binamonahavini naothinia bikanamasivikarahoki ida kidiamonahi,

kidideus hini bikahiki ida afohanana.

24 Makhira vaꞌihariki fori hiꞌina mani ida Deua biarakhavini hija,

bada biniꞌaja kaimoni ida badani karamonavahaki bikavaꞌinofinofiki.

Makhira vaabono vakanabadanihakhamavini badani kaipahivahakia jaboni.

25 Avakanaabosikhamaꞌiki ada Deus kaꞌoa hina,

deus amovana kaꞌoa hirikia.

Ijaꞌaria bikavaihinikaki ida.

Bikanamasiviki ida Deus kamonahi kidideus hini.

Ni-bikanamasiviki ada hahavi namonahava abono,

kidiDeus hina.

Asohiki ida ijaꞌari hahavi Deu-ra vakanamasivivini varani jahakia vara vavaniꞌavini kidiania mahi hahavi.

Nimania hida binofiki.

26 Ijaꞌari Deus kaꞌoa hina-ra akanabosikhamaki deus amovana,

oniani ida Deus ijaꞌari-ra arakhavini hija,

bada biniꞌaja kaimoni ida vaꞌini bodinia bikavaꞌinofinofiki.

Kaipahivahaki ida badani binofiki.

Gamoa jaboni bikavaꞌipahiniki ida kidimakhira-ra viꞌomavini.

Gamo hoariha vani ida biviꞌomaja.

Ni-asohipaꞌitxiki ida gamo hoariha-ra kanabadanihavini.

27 Niki jaboni ida makhira kahojai.

Bikavaꞌipahiniki ida hojai asohiki kidigamo-ra viꞌomavini.

Siho akahaꞌdiki fori hiki ida makhira vaꞌi bodinia bikavaꞌinofinofiki hojai kaipahivahaki.

Makhira makhira hoariha-ra viꞌomavini-ra nofiki.

Makhira vaabono vakanabadanihakhamaki.

Kaipahivahaki ida vakadihojai,

oniani ida vakadihojai jahariki abosinia vaꞌora vagahinahija imai ꞌbanania.

28 Ijaꞌaria ni-binofiki ida Deus varani hina kaꞌoa hini-ra ogavini,

oniani ida vaꞌi bodini vara nini asohirikia Deua bivaꞌahavini hija.

Ijaꞌaria ni-bikaabokajanaki ida bikavaꞌibodivaranijahakivini,

oniani ida badani bada niꞌavaharikia kanabadanini hija.

29 Jiꞌbiniki fori hiki ida kidimahi hojai asohirikia.

Ijaꞌaria bivajahaki ida hojai jahariki Deua bikaramonaki.

Aakabajahinofiki ida ijaꞌari.

Jahari kabadania vaꞌini binahonariahihivini.

Akaraganahinofiki ida ijaꞌari.

Kaabiniki jaboni ida ijaꞌari.

Ijaꞌari abononi akanaathidanoararikhamaki.

Korijanahi abono ida ijaꞌari.

Bikavaꞌibodivaranibakhiaki ida hoariha-ra niha niꞌaniꞌavini binajahariharivini.

Ijaꞌari athii masini-ra akanarafarakhamaki.

30 Ijaꞌari abononi kanavaranihakhamavini korijanahi kavaranihia.

Ijaꞌaria binofipaꞌitxiriha ada Deus.

Ijaꞌaria binaꞌdamoꞌdamoki ida hoariha.

Ijaꞌari oniani kaꞌoa abononi nofivini arafiaki,

abononi vaboraborahaki.

Bikavaꞌibodivaranibakhiaki ida badani jaharikaꞌoaki jaꞌdini bada biniꞌaja kaimoni.

Ijaꞌari kidiamia,

kidiabiꞌi vihiki vaathi-ra kamithariki.

31 Makhira kidigamo hiriki khama vaabono vakaviꞌomakhamaki.

Binavaꞌiponiꞌimariniki ida hoariha.

Ijaꞌaria ni-binakaidivaki ida ijaꞌari hoariha,

ni-bivaꞌadiki,

ni-biakariakaki.

32 Vakhanimanira adani ijaꞌari hahavi Deu-ra vanofiriki.

Deus kavaꞌisohihi jirikia bivavaꞌisohihijoraki ida abinini asohini ijaꞌari hojai nikia kahojaiki.

Asohiki ida ijaꞌari kidihojai jahariki abosini-ra gathanivini.

Biogavini kabaꞌi ida Deus kakaabanahi athini,

asia binofiki ida kidihojai asohirikia kahojaini.

Bivajahaki ida hoariha nikia kahojaiki jaboni.