Deua bikaronaki bana ida hojai jahariki abosini
2
Aꞌonivani,
kodivarani-ra mitha avaniꞌaki,
hariꞌa vanofi bana ida hoariha kidihojai asohiriki abosini-ra gathanivini.
Hojai asohirikia avakahojaiki jaboni aꞌoni,
oniani ida nikia avakavaranini-ra anasohirija.
Ni-asohiki ida ijaꞌari niki-ra nofivini,
oniani ida aꞌonira okaabanivini hija.
Aꞌonivani jaboni avakadihojai hiki ida kidihojai fori hiki.
Avanofiki vahabini ida avakadihojai asohiriki abosini-ra avagathanivini jaboni.
2 Aogaki ida asohini Deus ijaꞌari kahojai-ra naabosivini.
Ovaria biogaki ida ijaꞌari vakadihojai abosini binasohija kaimoni.
3 Ivani,
kodivarani-ra mitha iniꞌaki,
inofiki ida hoariha kidihojai asohiriki abosini-ra gathanivini.
Ivani jaboni bada iniꞌaki ida kidihojai fori hiki.
Iaꞌaihotaki iabono ivanihamanija,
igathaniria kaimoni ida kadahojai asohiriki abosini?
4 Ikavaꞌibodivaraniria koda ida Deus kahojai jahaki ijaꞌari-ra nakaidivavini.
Ni-jorakia bikaronaki ida hojai jahariki abosini.
Binokhaki ida ijaꞌari kidihojai asohiriki-ra kavaꞌipahinikaꞌoavini.
Iogaria koda ida Deus ira vaꞌadivini,
ira bananivini-ra nofivini,
kadahojai asohiriki-ra ikavaꞌipahinikaꞌoavini.
5 Imorobohariki fori ihiꞌoamanija.
Ni-inofiki ida hojai asohiriki-ra ikavaꞌipahinivini.
Vajaforia ianaꞌbaꞌdiki ida abosini,
igathaniki kaimoni.
Deus ijaꞌari kahojai-ra naabosivini kamahini ijaꞌari hahavi-ra vaꞌora nanokiahivini hiki ida hojai jahariki-ra kaihamahivini,
binasohikaꞌoaja kaimoni ida ijaꞌari hahavi vakadihojai abosini.
6 Deua binaabosiki bana ida ijaꞌari hahavi vakadihojai,
vakadivarani,
vakadibadani hiki.
7 Hari.
Ijaꞌari hoariha bada biniꞌabakhiaki ida badani jahaki.
Binofiki ida Deus kahojai jahakia kahojaini.
Binofiki ida jaboni Deua kidihojai sohikaꞌoani bikahivini.
Binofiki jaboni ida kidimahi ihimirini.
Deua binoꞌaki bana ida ijaꞌari kidimahi jaꞌdini anokhomirikia kidiania.
8 Hari.
Ijaꞌari vahoariha vani adani vakadihojai jahariki abosini-ra vagathanira bana.
Vaꞌoaniani kaꞌoa vaabono vanofivini arafiaki.
Vakajoniki ida Deus athi-ra vanaabavini,
oniani ida hojai jaharikaꞌoaki kani-ra avanikhavini hija.
Deua bikaronaki bana ida nahina jahariki vaꞌora kaihamahivini hiki kaimoni.
9 Ijaꞌari hahavi Jahari kahojaia vakahojaikia vakamithaki bana ida vavaꞌi rogo inini karaho,
imai ꞌbanani hiki Ibavi Jaharikaꞌoakia.
Judeus kaijaꞌari hojai asohirikia vakahojaiki vaꞌoaniaro imidia vakamithaki ida vaimana ꞌbanani.
Judeus kaijaꞌari vihiriki maina vakamithaki ida jaboni.
10 Hari.
Oniaroa,
Deua binaabosiki ida bana ijaꞌari hojai jahakia kahojaiki afohanana.
Deua binoꞌaki bana ida ijaꞌari afohanana danona,
vagana,
ogahana,
kidihojai jahaki hikia.
Deua kidimahi jahani bikahiki ida ijaꞌari vahoariha vaviaha.
Vaꞌi jahajahania binoꞌaki jaboni ida.
Deus vaꞌora naabosiki bana adani judeus kaijaꞌari hojai jahakia vakahojaiki vaꞌoaniaro imidia.
Naothinia judeus kaijaꞌari vihiriki maina-ra vaꞌora naabosiki bana adani.
11 Asohiꞌoamanija ida ijaꞌari hahavi kahojai abosini afohanana.
Abosihi asohikaꞌoakia gahinaki bana ida ijaꞌari afohanana.
12 Judeus kaijaꞌari vihirikia ni-vavahojaki ida Deus kavaꞌisohihi jiriki Moisés kohana-ra navaꞌisohiꞌboꞌdavini hiꞌiki.
Hojai asohiriki-ra vanamonahavini mani ida vaꞌora anakamadaja,
oniani ida Deus kania vaꞌora nakaikahirija.
Judeus kaijaꞌari vani adani Deus kavaꞌisohihi jiriki-ra vavahojara.
Hojai asohiriki-ra vanamonahavini mani ida vaꞌora anakamadaja,
oniani ida Deus kania vaꞌora nakaikahirija.
Vagathaniki bana ida vakadihojai abosini Deus kavaꞌisohihi jiriki vaꞌora kaabanijoravini hiꞌiki.
13 Deua bikapoariki ida ijaꞌari kidivaꞌisohihi jiriki naabani hiki,
kidimahi sohikaꞌoani Deua bikahiki.
Ni-Deua bikapoariki ida ijaꞌari kidivaꞌisohihi kamithani hiki,
binaabaravini oadani.
14 Judeus kaijaꞌari vihirikia avigaravini kabaꞌi ida Deus kavaꞌisohihi jiriki,
ijaꞌari vahoarahanana bada vaniꞌaki ida hojai jahaki vaꞌisohihi jirikia bivavaꞌisohihiki.
Vavajahaki ida hojai jahakia vakahojaina.
Bada vaniꞌaki ida hojai jahaki vavaꞌi bodinia,
oniani kaꞌoa vaꞌora navaꞌisohiki,
avigaravini kabaꞌi ida Deus kavaꞌisohihi jiriki.
15 Deua biobaiꞌiki ida kidivaꞌisohihi ijaꞌari vaꞌini bodinia.
Ijaꞌari hojai Deua bivajahakia kahojaini mani ida Deus kavaꞌisohihi vaꞌini bodinia hojani-ra aogavini hija.
Ijaꞌari vaꞌini kaabanahahani haria nanokiahivini hiki jaboni hida vaꞌisohihi vaꞌini bodinia hojani varani hini sohini.
Vaꞌini kaabanahahania binavaꞌisohibakhiaki ida ijaꞌari kidihojai hana hini asohini hana hini asohirini.
16 Nimania hida moni jahaki vara ovaniꞌabakhiaꞌiki vahoariha vakamithaki kaimoni.
Kodivarani hida hojai abosini kamahini niha ninini bana.
Jesus Cristoa binanamithahahaviki bana ida ijaꞌari hahavi vakadivaꞌibodivarani ahojaki,
hana hini asohiki,
hana hini asohiriki,
oniania Deua bivahonariahiki ida vaꞌi bodini vara nini abosini ijaꞌari vakadiania afohanana.
Judeus kaijaꞌaria vavahojaki ida Deus kavaꞌisohihi jiriki
17 Aꞌonivani judeus kaijaꞌari aꞌoni.
Avaabononi avavaboraborahaki aꞌoni judeus kaijaꞌari avihinia.
Avavakaijokaki ida Deus kavaꞌisohihi jiriki.
Avaabononi avavaboraborahaki aꞌoni Deus kaꞌoa-ra avarigavinia avakadiDeus hina.
18 Avarigaki ida hojai Deua binofikia avakahojaini.
Deus kavaꞌisohihi jirikia avaabononi avakaꞌojomoꞌivini mani ida hojai asohiki-ra avanagathogathovini-ra avarigavini-ra avakahivini hija.
19 Avaabononi avaniꞌavini:
—Kamaodorohaki fori hiki ida ijaꞌari Deu-ra ogariki.
Harivani aogaki ida kamaodorohaki-ra avasohivini.
Harivani mahi vagani fori arihiki hari.
Vahoariha Deu-ra avigariki vani adani bakibakiki fori hikia vaadahara.
Aogaki ida hagihia vaviaha anavagavini — avakhaniki aꞌoni.
20 —Harivani vaꞌora akaꞌojomoꞌiki adani avigahariki.
Isai kaꞌojomoꞌiva abono arihiki hari jaboni.
Deus kavaꞌisohihi jiriki-ra avahojavini mani ida haria anigahihahavija,
kaꞌoa hiki hida akadiꞌogahai — avakhaniki aꞌoni.
Avakadiboraborahi oamani ida.
21 Ivani,
vahoariha-ra vaꞌora ikaꞌojomoꞌiki i,
ni-jahapaꞌitxiki ida iabono ikaꞌojomoꞌiravini.
Hari.
Vahoariha-ra vaꞌora iniꞌaki i:
—Hariꞌa bana vaboꞌdia — iniki i.
Ni-jahapaꞌitxiki ida vaꞌora ikaabanivini kabaꞌi,
iboꞌdiani.
22 Vahoariha-ra vaꞌora iniꞌaki i:
—Hariꞌa bana hoariha kagamo-ra vaviꞌoma — iniki i.
Ni-jahapaꞌitxiki ida vaꞌora ikaabanivini kabaꞌi,
kadagamo hiriki-ra iviꞌomavini jaboni.
Inihi jaboni:
—Okaramonaki ida deus amovana — iniki i.
Ni-jahapaꞌitxiki ida nahina-ra iboꞌdiavini deus amovana-ra vakavaihinikavini kagorani bodinia.
23 Iabononi ivaboraborahaki i Deus kavaꞌisohihi jiriki-ra ivahojavinia,
kabaꞌi Deus vaꞌi-ra ianaipahihivini hiki ida vaꞌisohihi jiriki-ra inaabaravini.
24 Hojaki hida athii Deus athi kapapirania:
“Judeus kaijaꞌari vihirikia vanokibakhiaki ida judeus kaijaꞌari
vakadihojai jahariki,
oniani ida varani jaharikia
Deu-ra vakanavaranihavini hija.”
Niki ida athii.
25 Judeus kaijaꞌari Deus kavaꞌisohihi jiriki-ra naabaha;
jahahi ida siikosida karajomihi-ra vahojavini.
Siikosida karajomihi-ra vahojariki fori hiki ada judeus kaijaꞌari Deus kavaꞌisohihi jiriki-ra naabariki.
26 Judeus kaijaꞌari vihirikia vavahojarihi ida siikosida karajomihi.
Vavahojaravini kabaꞌi,
Deus kavaꞌisohihi jiriki-ra vanaabaha;
siikosida karajomihi-ra vavahojaki fori vihina Deus vaꞌora kahiha.
27 Oniaroa judeus kaijaꞌari vihiriki vaꞌora vaniꞌaki bana adani judeus kaijaꞌari:
—Harivani,
siikosida karajomihia akarajomirina kabaꞌi,
anaabaki ida Deus kavaꞌisohihi aogaꞌiki.
Jahaki bana ida Deus aꞌonira nahina jaharikia arakhavini.
Avarigavini kabaꞌi ida vaꞌisohihi jiriki,
ni-avanaabaki.
Siikosida karajomihia avakarajomini kabaꞌi,
ni-avanaabaki ida Deua binofiki,
oniani bana ida avakadihojai asohiriki abosini-ra avagathanivini-ra najahaja — vakhaniki bana adani judeus kaijaꞌari vihiriki.
28 Judeus kaijaꞌari siikosida karajomihia vakarajomina mani ida Deus kaijaꞌari vaꞌora nihaja.
Makhira Deus kavaꞌisohihi jiriki-ra naabavini mani ida judeus kaijaꞌari kaꞌoa nihana hija.
Judeus kaijaꞌaria bivahojavini kabaꞌi ida siikosida karajomihi asafia,
Deus athi-ra naabarihi;
ni-judeus kaijaꞌari kaꞌoa hiki.
Ni-Deus kaijaꞌari hiriha ada.
Ni-nahina kaimoni asafi namania hojaki ida rajomi.
29 Ni-judeus kaijaꞌari vanamitharonisiagaki hahavi judeus kaijaꞌari kaꞌoa vihiki.
Judeus kaijaꞌari kaꞌoa hikia bivahojaki ida siikosida karajomihi fori hiki vaꞌi bodinia.
Deus kaijaꞌari kaꞌoa ada.
Ni-vaꞌisohihi jirikia bikaabokaki ida makhira vaꞌi bodini-ra karajomivini,
bikavaꞌipahinikaꞌoaja kaimoni ida hojai asohiriki.
Maꞌonahai Jahaki vania bikarajomija ida makhira vaꞌi bodini siikosida karajomihi fori hikia.
Deus vania khai biniꞌaja ida ijaꞌari rajomi kaꞌoa hini-ra vahojaki vaꞌini bodinia.
Ni-ijaꞌari vahoariha khai vaniꞌaki.