2 Aꞌonivani Deus kaijaꞌari aꞌoni,

Corinto sidajia avahojaki,

aꞌonira okajirihivini hiki hida oathi kapapirani.

Jesus Cristo kania avarakaramisini mani ida Deus aꞌonira baranahavini hiꞌia kidijaꞌari avihini.

Aꞌonira anahoariharibaniꞌiki ada,

kidiani avihiꞌiki aꞌoni.

Deus vaꞌora baranahaki jaboni adani ijaꞌari ibavi hahavia vajoroniki,

hivaꞌoani ijaꞌari Jesus Cristo-ra vakanikhariaki vaꞌora kajoamorara kaimoni.

Vakadikaꞌdaꞌdi ada.

Akadikaꞌdaꞌdi jaboni ada.

3 Deus akadiabiꞌi,

Jesus Cristo akadikaꞌdaꞌdi vakadiania okanikhariaki ida aꞌonira vakajoamoravini,

aꞌonira vanoꞌavini jaboni vaꞌi jahajahania.

4 Deu-ra vara oniꞌavini vani khai oniꞌabakhiaja ida Jesus Cristo aꞌonira kajoamorajahakivini.

5 Cristo kania avarakaramisini mani ida Deus kidiꞌogahaia aꞌonira noꞌaꞌahapikivini hiꞌia,

oniani ida Deus kavarania avakavaranini-ra avakaabokavini hija.

Avakaabokaki jaboni ida ogahai Deus aꞌonira anigahivini hiki-ra avarigavini.

6-7 Oniania Deua biobaijahakiki ida Cristo monina avavaꞌini bodinia,

kaaraja kaimoni ida avajariꞌdarini.

Avanokhavini oadani ida akadikaꞌdaꞌdi Jesus Cristo joina kamahini,

ni-avaragariki ida Deus aagahai danoki-ra avagathanivini.

8 Deus avajariꞌdarini-ra nakarahaꞌoadahavini,

avakavaꞌipahiniria kaimoni ida Cristo-ra avavakaijokavini,

oniani ida joina kamahini avajahakaꞌoani Deua bikahivini hija.

Ni-nahina hojaki avakadiania aꞌonira osaniki kaimoni.

9 Vakaijokavahaki ada Deus.

Ovari aꞌonira baranahavini hiki kidisai Jesus Cristo kania avarajahamisini.

Akadikaꞌdaꞌdi ada.

10 Oigamina,

akadikaꞌdaꞌdi Jesus Cristo hora karonavini hiki nahina binofikia avakadiania aꞌonira onavaꞌisohija kaimoni.

Binofiki ida ijaꞌari hoarani fori avihini.

Hariꞌa avaabononi avakanaathidanoararikhama bana mahija avaabononi avakanapitakhamaki fori avihiravini.

Ijaꞌari hoarani fori vihiꞌa bana mahija nahina avakavaꞌibodivaraniki,

nahina avanofiki hiki-ra avanahihavivini.

11 Oigamina,

Cloe gorana kaijaꞌarini hora vakanamonivini hiꞌiki ida avaabononi avarakanaathidanoararikhamavini.

12 Vara ovaniꞌaki bana hida avakadihojai.

Aꞌonivani afohanana Cristo kaijaꞌari hahavi avihini kabaꞌi,

varani hoariha-ra avidioniki aꞌoni.

Niha ada hoarana:

—Hovani Paulo ipohina ho.

—Iniani.

Paulo ipohina ohirihi.

Hovani Apolo ipohina ho.

—Iniani.

Apolo ipohina ohirihi.

Hovani Pedro ipohina ho.

—Iniani.

Pedro ipohina ohirihi.

Hovani Cristo ipohina ho.

13 Nikia avakavaranihi;

Cristo abono pitahatahaki fori hiki.

Hoarani ida Cristo abono.

Kidijaꞌari hahavi adani.

Ni-jahaki ida Cristo abono pitahatahaki fori hini.

Oabinimaniꞌia koda ava akasanakhamakia avakadimoni ohina?

Iniani.

Avikanani kari ijaꞌaria bidionimanija koda ida oonina kodijaꞌari avihija kaimoni?

Iniani.

Oipohina avihirihi.

Cristo ipohina oamani aꞌoni.

14-15 Oniani ida Deu-ra khai oniꞌavini hija ijaꞌari vaipohiki-ra vaꞌora okanaravinia.

Vaꞌora okanaꞌiki adani Crispo,

Gaio vihiki kaꞌoa.

Asohirihi ida vahoariha vakadivarani ijaꞌari-ra okanaꞌavini oipohina kaimoni vihina.

Cristo ipohina kaimoni adani makhira viꞌbamiki vaꞌora okanaꞌiki.

16 Okavaꞌihokiꞌiki jaboni Estéfanas,

gorana kaijaꞌarini vihiki-ra vaꞌora okanaꞌavini.

Ni-okavaꞌihokiki ida ijaꞌari hoariha-ra okanavini.

17 Cristo hora karonavini kari ni-hora honariavini hiki ida kanai karajomihia okabadanina.

Monina jahakia okavaranina vani hora honariara ada.

Deus aagahai ida Cristo monina jahaki.

Ijaꞌaria bikamithahi ida Cristo abiniꞌina ava akasanakhamakia kidimoni hina,

bikajariꞌdarihi,

Deus bianajaꞌdihi ida kidimahi.

Nini vani nokiaja ida Cristo monina danoki.

Cristo hora niꞌahi:

—Kodiꞌogahai fori hirihi ida ogahai araboa kamaꞌdaki.

Araboja vania kamaꞌdaja ida ijaꞌari hora avigariki vakadiꞌogahai.

Omonina-ra vara ivaniꞌavini,

hariꞌa bana vakadivarani fori hikia kavaraniꞌa.

Nikia ikavaranihi;

ni-omonina kaꞌoa bikaabokaki ida ijaꞌari kamahi-ra anajaꞌdivini — nikia hora honariaki ada Cristo.

18 Hari.

Ijaꞌari Ibavi Jaharikaꞌoakia avikhakia vakamithahi ida moni,

Cristo abiniꞌina ava akasanakhamakia ijaꞌari-ra akavaꞌijoara kaimoni.

Vakamithahi,

varani imarini hini vakahihi.

Ni-nihanikia Cristo abiniꞌina ijaꞌari-ra akavaꞌijoavini-ra vakahiki.

Harivani,

akamithahi ida Cristo monina;

akavaꞌibodivaraniꞌihi Deus danona hini.

Cristo abiniꞌina akadimoni hina mani ida Deus haria akavaꞌijoavini-ra kaabokavini hija.

Deus haria akavaꞌijoavini vani haria nanokiahira ada danona.

19 Hojaki hida athii Deus athi kapapirania:

21 Ijaꞌari abononi kavaꞌibodivaraniꞌimarinivini hiki ida ogahani,

abononi niꞌahi:

—Hovani oa okaragara ada Deus,

oogara kaimoni — nihi.

Ni-Deua bivaꞌahaki ida ijaꞌari ogana hini.

Ijaꞌari Deu-ra avigariki haria vaniꞌahi:

—Vara avavaniꞌabakhiaki ida Cristo monina.

Varani ꞌbadara ida Cristo monina — vakhaniha.

Deus vani ada nihara:

—Vanaonivini ida Cristo monina varani ꞌbadara.

Hari.

Ijaꞌaria bikajariꞌdarihi hida hihida varani ꞌbadara;

oakavaꞌijoahi ida ijaꞌari — niha ada Deus.

Nini vani nokiaja ida Deus aagahai.

22 Hari.

Judeus kaijaꞌaria vanofiki ida Deus kabadani danoki-ra vanokivini,

Cristo monina kaꞌoa hini-ra vakajariꞌdarara kaimoni.

Judeus kaijaꞌari vihirikia vakamithavini vanofiki ida ijaꞌari ogahaki kavarani,

vakajariꞌdaria kaimoni ida Cristo monina kaꞌoa hini.

23 Harivani,

akadivarani hiki ida Cristo abiniꞌina ava akasanakhamakia ijaꞌari-ra akavaꞌijoara kaimoni.

Judeus kaijaꞌari-ra vaꞌora kaꞌdamanokhoki fori hiki hida Cristo monina vakaimajaharavini.

Judeus kaijaꞌari vihirikia vaniꞌavini:

—Varani ꞌbadara hini ida Cristo monina avakadivarani hiki.

24 Vahoariha vani adani Cristo monina-ra vakajariꞌdarira.

Deus vaꞌora kaboaꞌiꞌiki adani judeus kaijaꞌari vihiki vahoariha,

judeus kaijaꞌari vihiriki vahoariha.

Cristo abiniꞌina vani binanokiaja ida Deus danona,

Deus aagahai hiki.

25 Deu-ra vanofirikia vaniꞌavini:

—Vaꞌihariki kabadani fori hiki ida Deus kabadani — vakhaniha.

Vaꞌihariki kabadani nokiani fori hini kabaꞌi,

Deus aagahai ijaꞌari vakadiꞌogahai-ra aradaki.

Vakhaniha adani Deu-ra vanofiriki:

—Danoriha ada Deus — vakhaniha.

Danorina vakahivini kabaꞌi,

Deus danona ijaꞌari vadanona-ra aradaki.

26 Oigamina,

vakavaꞌibodivarani bana ida avakadimahi Deus aꞌonira baranahavini kari.

Ni-avaipohiki ogahai karaho-ra avavahojaki.

Ni-avaipohiki kaꞌdaꞌdi danoki avihiki.

Ni-avaipohiki avakanahinaꞌahapikiki,

Deus aꞌonira baranahavini kari.

Nimania ida Deu-ra vanofiriki aꞌonira vakavaꞌibodivaranivini hiki.

27 Deu-ra vanofirikia vaniꞌavini ida ijaꞌari Deua binagathogathoꞌiki vaꞌiharini.

Deua binagathogathoꞌiki ida ijaꞌari vaꞌihariki fori hiki,

ijaꞌari avigahaki vavaꞌi-ra anaipahihira kaimoni ada Deus.

Deu-ra vanofirikia vaniꞌavini ida ijaꞌari Deua binagathogathoꞌiki nahina hirini.

Deua binagathogathoꞌiki ida ijaꞌari nahina hiriki,

ijaꞌari kaꞌdaꞌdi vihiki vavaꞌi-ra anaipahihira kaimoni ada Deus.

28 Deus vaꞌora nagathogathoꞌiki adani ijaꞌari vakaihiponahavahariki,

vadanoriki,

nahina vihiriki.

Binofiki ida nofina vihiriki vakadivaꞌibodivarani asohiriki-ra nihimavini.

29 Oniani ida ijaꞌari abononi vaboraborahavini-ra najaharija.

Ni-ijaꞌaria bikaabokaki ida Deu-ra niꞌavini:

—Ojahana ijahani-ra aradaki.

30 Deus vani haria anakaramisija Jesus Cristo kania.

Kidiania aakaramisina mani ida Deus Cristo aagahaia haria anigahivini hija.

Cristo haria kajoamoravini mani ida Deus akadimahi sohikaꞌoani-ra kahivini hija jaboni.

Deus haria anahoariharibaniki hari,

kidijaꞌari arihija kaimoni.

Jahari saꞌa kabodinia haria akavaꞌijoaꞌiki ada,

31 oniani ida ariabono avaboraboraharavini hija.

Deus athi kapapirania hojaki hida athi: