Paulo vaꞌora kaꞌivanitiki adani igamina
16
Vara aꞌonira oniꞌavini hiki ida arigamina Febe oniki.
Vakaijokavahaki ida.
Biakodiaki ida Jesus Cristo kaijaꞌari Cencréia vajoroniki-ra vaꞌora akadavaꞌavini.
2 Vagathanijahaki bana.
Jesus kaijaꞌari ida.
Jahaki ida Jesus kaijaꞌari vaabono vaagathanikhamajahakivini.
Nahina-ra kainamohi,
vanoꞌa bana mahija avakajoamoravini.
Kidihojai afobakhia ida ijaꞌari-ra kajoamoravini,
avakadivaꞌahi hihi,
kodivaꞌahi hihi jaboni.
3 Vaꞌora okaꞌivanitiki vaꞌoani arigamina Priscila,
Áquila vihiki.
Jesus Cristo kabadania akabadanina,
hora vavaipohihaꞌiki adani.
4 Vapohimajakamariki adani hora vaakodiavinia.
Jahaki ida hora vaakodiavini.
Jesus kaijaꞌari ibavi ipohikia vajoronibakhiana khai vaniꞌaki ida vakadihojai jaboni.
Judeus kaijaꞌari vihiriki jaboni khai vaꞌora vaniꞌaki adani Áquila.
5 Vaꞌora akaꞌivanitiki vaꞌoani Jesus kaijaꞌari vajoronibakhiaki Áquila vagorana.
Okaꞌivanitiki jaboni ada kodivaꞌahi Epenêto oniki.
Ovari miroꞌa Ásia kaarabonia hojaꞌiki ada Cristo-ra vakaijokaꞌavini.
6 Okaꞌivanitiki jaboni ida Maria.
Karaho ida kidibadani aꞌonira kakodiavini.
7 Vaꞌora okaꞌivanitiki jaboni adani Andrônico,
Júnias vihiki.
Judeus kaijaꞌari adani.
Cadeia ohojana kari vahojaki adani jaboni.
Jesus athi avavaadahaoniva abono vaꞌora avigajahakiki adani.
Jesus Cristo-ra ovakaijokavini viahania vaꞌoaniaro miroꞌa Jesus kaijaꞌari vihiꞌiki adani.
8 Okaꞌivanitiki ada Amplíato.
Kodivaꞌahi ada.
Onakaidivaki ada oigamina.
9 Okaꞌivanitiki ada Urbano.
Cristo kabadania akabadanijabanaki hari.
Okaꞌivanitiki jaboni ada kodivaꞌahi jahaki Estáquis oniki.
10 Okaꞌivanitiki jaboni ada Apeles.
Jahariharina kabaꞌi,
ni-bikavaꞌipahinipaꞌitxiriha ada Cristo.
Vaꞌora okaꞌivanitiki jaboni vaꞌoani Aristóbulo gorana vahojaki.
11 Okaꞌivanitiki ada Herodião.
Judeus kaijaꞌari hari.
Vaꞌora okaꞌivanitiki vaꞌoani oigamina Narciso gorana vahojaki.
12 Vaꞌora okaꞌivanitiki jaboni vaꞌoani Trifena,
Trifosa vihiki.
Cristo kabadania vakabadaniki adani gamo.
Okaꞌivanitiki jaboni ida kodivaꞌahi onakaidivaki Pérside oniki.
Karaho ida kidibadani Cristo kaimoni.
13 Vaꞌora okaꞌivanitiki vaꞌoani Rufo,
kidiamia khama.
Jahaki ida badani Rufoa bada biniꞌabakhiaki Cristo kaimoni.
Kidiamia hora naibavijahajahakiꞌiki kidisai fori ohiꞌina.
14 Vaꞌora okaꞌivanitiki vaꞌoani Asíncrito,
Flegonte,
Hermes,
Pátrobas,
Hermas,
oigamina vahoariha vakadiania vahojaki.
15 Vaꞌora okaꞌivanitiki vaꞌoani Filólogo,
Júlia vihiki,
Nereu,
kidiadia khama.
Vaꞌora okaꞌivanitiki jaboni vaꞌoani Olimpas,
Deus kaijaꞌari hahavi vakadiania vahojaki.
16 Avaabononi avakakaꞌivanitikhamavini avaabononi vananokiahivinihi bana ida avaabononi avakanakaidivakhamajahakivini bana.
Aꞌonira vakaꞌivanitiki adani Jesus kaijaꞌari ibavi hahavia avajoronioniki.
Paulo vaꞌora navaꞌisohiki adani
17 Oigamina,
aꞌonira bana onavaꞌisohivini hiki ida avaabononi avarakavaꞌigairivini bana.
Hariꞌa vanaipohi bana ida ijaꞌari ijaꞌari vahoariha-ra vaꞌora kanapitakhamaki,
vaabono avakanaathidanoararikhamara kaimoni.
Hariꞌa vanaipohi bana ida ijaꞌari ijaꞌari vahoariha Jesu-ra vavakaijokavini-ra nadabaki.
Hariꞌa vanaipohi bana ida ijaꞌari akadiꞌojomoꞌihi athini avakamithabakhiaki-ra kanavaranihaki varani jaharikia.
18 Hari.
Hivaꞌoani ijaꞌari aꞌonira okaabanivini vihiꞌiki ni-Cristo kabadania vakabadaniki.
Vakavaꞌibodivaraniki ida nahina vahaki vahariki kaimoni.
Vakadivarani kamithavahani jahaki vanivaha.
Vajahana-ra vakahiꞌimariniki adani vahoariha vavaꞌi-ra vavajahara kaimoni.
Vakhanina vani vavaꞌi-ra vanakidakidara adani ijaꞌari avigahariki.
19 Ijaꞌari vaipohiki varani avihini-ra vakamithabakhiaki,
avakavaꞌipahinipaꞌitxiravini ida Cristo athi-ra avanaabavini,
oniani ida avakadihojai khai hora niꞌavini hija.
Onofiki ida hojai jahaki ogava abono avihini.
Onofiki jaboni ida hojai asohiriki ogariva abono avihini.
20 Deua binakamaꞌdaki ida vaꞌi jahajahani avaꞌi bodinia.
Jorakia bana Deua bianaꞌboroki ada Satanás avaꞌdamani kanaboꞌania.
Onofiki ida akadikaꞌdaꞌdi Jesus aꞌonira kajoamorabakhiavini.
21 Aꞌonira kaꞌivanitiki hada oipohina Timóteo.
Aꞌonira vakaꞌivanitiki hadani Lúcio,
Jasão,
Sosípatro,
judeus kaijaꞌari hora vavaipohiki hadani.
22 Hovani Tércio oniki onajiriꞌia hida Paulo athi vara bivaniꞌaꞌiki.
Aꞌonira okaꞌivanitiki ho jaboni.
23 Gaio aꞌonira kaꞌivanitiki aꞌoni.
Gaio gorana oibaviki ho.
Jesus Cristo kaijaꞌari vavajoroniki jaboni hida gorana.
Aꞌonira vakaꞌivanitiki hadani Erasto,
arigamina Quarto khama.
Erasto kabadani hiki ida sidaji kajinironi-ra akadavaꞌavini.
24 Onofiki ida akadikaꞌdaꞌdi Jesus Cristo aꞌonira kajoamoravini.
Nimania hida anofiki.
Pauloa khai biniꞌaki ada Deus
25 Khai aniꞌava ida Deus jahana,
danona,
ogahana,
vagana hiki.
Nimania hida moni jahaki kavaranihi vara ovaniꞌabakhiaꞌiki.
Jesus Cristo varani hina ida moni jahaki.
Deua bikaabokaki ida avajariꞌdarini-ra nakaravini.
Deua bianigahivini hiꞌiki ida athi kaꞌoa hini ijaꞌaria avigariki.
Badara îpohikia ogavaharihi ida moni jahaki.
26 Hari maha.
Deus athi namoniva abonoa vanajiribakhiaꞌiki ida moni jahaki kavaranihi,
oniani ida ijaꞌari vâipohikia avigavini hiꞌia.
Deus hojahahaꞌoadahakia bivahonariahiꞌiki ida moni jahaki arabo hahavi kaijaꞌarinia avigavini,
vakajariꞌdarara kaimoni ada Cristo,
athi vanaabara kaimoni jaboni.
27 Hoarana ada Deus.
Ovani oa biogahahavija ida nahina hahavi niha ninini,
nahina kaimoni hini.
Jesus Cristo haria kajoamoravini vani akanamasivihaꞌoadahara ada Deus.
Khai aniꞌahahaꞌoadahava ida jahana,
danona,
vagana,
ogahana hiki mahi anokhomirikia.
Nimania hida Deua binofiki.