Hoariha-ra khai niꞌava ida akadihojai jahaki
15
Harivani Cristo-ra avakaijokadanokiki hari.
Avakaijokajahakivini mani ida vahoariha Cristo kania avajahamisiriki-ra vaꞌora aakodiavini-ra najahaja.
Ni-asohiki ida nahina-ra anofivinia akabadanihaꞌoadahana.
2 Jahaki ida arigamina binofikia akabadanina jaboni,
anadanoja kaimoni ida Cristo-ra vakaijokavini,
khai biniꞌaja kaimoni jaboni ida akajoamoravini.
3 Cristo jaboni ni-abono-ra kagathogathohiki badani binofikia.
Bada biniꞌaki ida badani Deua binofiki.
Hojaki ida Cristo athi Deus athi kapapirania:
“Kodiabiꞌi,
ijaꞌari varani jaharikia
ira vakanavaranihavini vani fori hija
ida hora vakanavaranihavini jaboni.”
Nihi ida athi.
4 Haria kaꞌojomoꞌiki kaimoni ida athii hahavi ijaꞌaria binajiriꞌboꞌdaꞌiki Deus athi kapapirania.
Haria kaꞌojomoꞌiki ida khaii akhanina akavaꞌipahiniravinia.
Deus athi kapapirani jiriki haria nadanovini akavaꞌipahiniria kaimoni ida anokhavini.
5 Deus vania binadanoja ida ijaꞌari binokhahahaꞌoadahavini bikavaꞌipahiniria kaimoni.
Binadanoki jaboni ida ijaꞌari khaii nini.
Deu-ra okanikhariavini hiki ida aꞌonira kakodiavini ijaꞌari hoarani kavaꞌibodivarani fori hija kaimoni ida avakadivaꞌibodivarani afohanana,
avakabanafoja kaimoni ida Jesus Cristo kahojai.
6 Oniani ida avahihavini Deus jahana-ra khai avaniꞌavini hija.
Khai avaniꞌajabanaki ada akadikaꞌdaꞌdi Jesus Cristo kaabiꞌi athii hoarani fori hikia.
Nimania hida onofiki avakadiania.
Judeus kaijaꞌari vihiriki vakadimoni ida Jesus monina jahaki
7 Cristo aꞌonira kapoariꞌavini vani avaabononi vaakapoarikhama bana mahija ijaꞌari Deus jahana,
danona,
ogahana-ra khai vaniꞌavini.
8 Aꞌonira onanamithavini hiki:
Cristo khaꞌina judeus kaijaꞌari vakadiania vaꞌora kakodiara kaimoni,
vaꞌora nanokiahivini hiki ida Deus vaꞌora navaꞌiponiꞌimariniravini.
Oniania Deua bada biniꞌaꞌiki ida varani akadijaꞌari vaꞌoaniaro miroꞌa-ra vaꞌora navaꞌisohijoravini hiꞌiki,
hiꞌadani Abraão kohana,
Isaque kohana,
Jacó kohana vihiki.
9 Cristo khaꞌina judeus kaijaꞌari vakadiania judeus kaijaꞌari vihirikia khai vaniꞌaja kaimoni ida Deus vaꞌora vaꞌadivini jaboni.
Hojaki hida athii Deus athi kapapirania:
“Vara ovaniꞌaki bana ida
kadahojai jahaki
judeus kaijaꞌari vihiriki
vakadiania.
Oahiaki bana ho jaboni.
Kodimoro kaathi hiki hida ijahakaꞌoani.”
10 Hojaki hida athii hoariha jaboni:
“Aꞌonivani judeus kaijaꞌari avihiriki,
khai vakhaniꞌa bana judeus kaijaꞌari
vakadiania.
Deus vaꞌora nagathogathoꞌboꞌdaꞌiki adani.”
11 Hojaki ida athii hoariha:
“Aꞌonivani judeus kaijaꞌari avihiriki,
khai vaniꞌa bana ida Deus jahana.
Arabo hahavi kaijaꞌarini,
khai vakhanikaraho jaboni bana.”
12 Isaías kohana vara bivaniꞌajoraꞌiki ada Cristo jaboni:
“Khaki bana ada Jessé kahanodi namitharonisiagaki.
Deua bikaronaki bana ada,
vaꞌora vakaꞌdaꞌdira
kaimoni adani judeus
kaijaꞌari vihiriki.
Vavakaijokaki bana ada vaꞌora kajoamorara kaimoni.”
Niha ada Isaías kohana.
13 Deu-ra okanikhariavini hiki ida aꞌonira kakodiavini mahija aꞌonira kaibavijahahivini hiki-ra avanokhahahaꞌoadahavini.
Onofiki ida Deu-ra avavakaijokavini,
avagathanija kaimoni ida vaꞌi khaii nini,
vaꞌi jahajahani hiki,
oniani ida Maꞌonahai Jahaki danona avakadiviahanokhai-ra anaꞌbaꞌdivini hija bana.
Ofinirina vani Pauloa vara bivaniꞌia hida papira athini
14 Oigamina,
aꞌonira okavaꞌibodivaranivini vani oabono oniꞌaja:
Jahaki ida vakadihojai,
vakadiꞌogahai hiki.
Avigajahakiki ida hojai Deua binofikia vakabadanina.
Avigaki jaboni ida vaabono vakanavaꞌisohikhamavini.
Nimania hida aꞌonira okavaꞌibodivaranivini.
15 Oofinirina vani onajirija hida oathi kapapirani,
aꞌonira onavaꞌisohivini hiki hida varani ipohiki,
avakavaꞌihokija kaimoni.
Deus hora nagathogathoꞌavini mani ida oofinirina aꞌonira onavaꞌisohivini hija.
16 Deus hora nagathogathovini hiꞌiki Jesus Cristo kahonai abono ohina,
vaꞌora oakodiara kaimoni adani judeus kaijaꞌari vihiriki.
Kodibadani hiki ida sasidotxi kabadani fori hiki,
vaꞌora okanamonivini hiki ida Deus monina jahaki.
Onofiki ida Deu-ra onoꞌavini vihina Deus khaii nina vaꞌora kapoarivini.
Maꞌonahai Jahaki vaꞌora aniki adani judeus kaijaꞌari vihiriki,
binajahaki ida vakadimahi,
Deus kaijaꞌari vihikaꞌoara kaimoni.
17 Jesus Cristo kania oakaramisina mani ida Deus kabadania okabadanina-ra khai oniꞌakarahovini hija.
18-19 Oipahihirina vani vara ovaniꞌaja hida niha ninini Cristo hora kakodiaꞌavini afojahaki bada oniꞌina kidimoni.
Ogahaia hora noꞌavini mani ida judeus kaijaꞌari vihiriki Deus athi-ra vanaabavinia vaꞌora oakodiavini hija.
Kodivarania okavaraniꞌina,
badania okabadaniꞌina jaboni,
badani ijaꞌari-ra navaꞌibodivaraniꞌikia okabadaniꞌina jaboni,
Maꞌonahai Jahakia bada biniꞌaꞌiki ida kidibadani danoki jaboni,
oniani ida judeus kaijaꞌari vihiriki Deus athi-ra vanaabavini hija.
Oaꞌaadahaonina kamaꞌdani Jerusaléa.
Anokhomini Ilíria kaarabonia.
Oaꞌaadahaonina oadani ibavi hahavia okaikahiꞌina,
vara ovaniꞌaꞌiki ida Cristo monina jahaki hahavi.
20 Onofivini arafiaki ida Cristo varani hina jahaki-ra onamonivini ijaꞌari Cristo monina-ra vakamithaꞌiariki vakadiania.
Vahoariha avavaadahaoniki ida Cristo monina ibavi ipohikia.
Cristo monina-ra vakamithaꞌiki vakadiania ookhana-ra onofirihi.
21 Hojaki hida athi Deus athi kapapirania:
“Ijaꞌari varani-ra mitha
vaniꞌaꞌiarikia
vakamithaki bana ida
varani hina.
Ijaꞌari varani-ra vakamithaꞌiarikia
avigaki bana ada.”
Pauloa binofiki ida Roma sidajia okhana
22 Hari.
Onofibakhiaki ida avakadiania ovaaꞌahahana.
Onofivini kabaꞌi ni-okaabokaꞌiaki kaho.
23-24 Hari.
Aꞌdiahiꞌihi ida kodiadahai Cristo monina-ra oanamonionivini.
Badara ipohikia aꞌonira onavanavanahavini-ra onofiꞌiki ho.
Oahoroaꞌina mani ida avakadiania ookhajorakina-ra okavaꞌibodivaranivini hija.
Espanha kaaraboni maina-ra oanikhahaki bana ho.
Avavahojaki kania oradahana vani onofija ida aꞌonira onavanavanahavini.
Onofiki ida masiko ipohiriki avakadiania aꞌonira onavaaꞌahavini naothinia onofiki bana ida hora avakakodiavini Espanha kaarabonia okaikahina.
25 Hari.
Aꞌonira onavanavanahavini viahania Jerusalém sidajia ookhaki ho,
jiniroa vaꞌora oakavikhara kaimoni adani Deus kaijaꞌari.
26 Cristo kaijaꞌari Macedônia vahojaki,
vahoariha Grécia kaarabonia vahojaki jaboni vaabono vakanavaꞌisohikhamavini hiꞌiki ida vakadijiniro pitahani-ra vakaronavini,
vaꞌora vakanavaꞌigara kaimoni adani Deus kaijaꞌari vakanahinariki Jerusaléa vahojaki.
27 Vaꞌoaniani oa vaabono vakanavaꞌisohikhamaꞌaha,
ni-ijaꞌari vaꞌora navaꞌisohifiahaki jiniro-ra vakaronavinia.
Asohiki ida vakadinahina vaꞌora vakajoamoravini adani judeus kaijaꞌari vakanahinariki.
Judeus kaijaꞌari vaꞌoaniaro miroꞌa varavinafiahavini fori hiki ida nahina jahaki Deus vaꞌora kajoamoravini hiꞌiki judeus kaijaꞌari vihiriki vakadiania.
Oniania,
jahaki ida judeus kaijaꞌari vihiriki vakadinahina paꞌitxi vavahojaki-ra varavinavini judeus kaijaꞌari vakadiania.
28 Jerusalém sidajia okaikahina oarakhaki bana ida jiniro hahavi vahoariha vaꞌora vakajoronihivini hiꞌiki.
Aꞌdiahini naothinia ida kodibadani,
Espanha kaaraboni maina-ra oanikhahaki bana ho.
Ookhana kabaꞌi,
aꞌonira onavanavanahaki bana ho.
29 Avakadiania okaikahina vani oogaki ida Cristo hora kakodiajahakivini aꞌonira kajoamorajahakivini.
30 Oigamina,
onofiki ida hora iakodiavini Deu-ra akanikhariajabanavinia.
Akadikaꞌdaꞌdi Jesus Cristo-ra avakaijokavini vani Maꞌonahai Jahaki haria kakodiaja jaboni ariabono akanakaidivakhamavinia,
oniani ida Deus hora akadavaꞌavini-ra avakanikhariavini-ra onofivini hija.
31 Deu-ra vakanikharia bana mahija Judéia kaarabonia oaꞌaadahaonina Cristo-ra vanofiriki hora vanajaharihariravini,
oaꞌaihotaja kaimoni.
Deu-ra vakanikharia jaboni bana mahija Deus kaijaꞌari Jerusaléa vahojaki kodikajoamorahi-ra vagathanivini khai vakhanina.
32 Oniaro naothinia Deua binofihi ida avakadiania okaikahina;
okaikahihi.
Jiꞌbiniki fori hiki ida ovaꞌi bodinia khaii onina.
Ovaaꞌahahi ida avakadiania khaii onina oabono oanakoirivini jaboni.
33 Deua binakamaꞌdaki ida vaꞌi jahajahani avaꞌi bodinia.
Onofiki ada Deus avakadiania hojana.
Nimania hida anofiki.