Avaigamini kahojai varani hini hida
14
Hari.
Vakapoari bana ida hoariha Cristo-ra vakaijokavini kabaꞌi ajahamisijahakiriki kidiania.
Kaarariki fori hiki ida Cristo-ra vakaijokavini.
Hariꞌa kidiania aathidanoarari kidivaꞌibodivarani danorikia.
2 Hari.
Ijaꞌari hoariha Cristo-ra vakaijokakia bihaki ida ꞌbai hahavi.
Ijaꞌari hoariha Cristo-ra ogajahakiriki ni-bihaki ida baimana.
Bihaki ida rakhajahi joꞌdoni,
bononi,
afani,
ihiꞌai hiki kaꞌoa.
Kidikaaji-ra kaviꞌbaivini ida.
3 Hariꞌa ijaꞌari ꞌbai hahavi-ra hakia bikaihimorava ida ijaꞌari hoariha baimana kakaajiki.
Hariꞌa ijaꞌari baimana kakaajikia biniꞌava ida hoariha:
—Asohiriki ida kadahojai ꞌbai hahavi-ra ihavini.
Deua bikapoariki ida ijaꞌari ꞌbai hahavi-ra haki,
oniani ida ikaabanivini nasohirini hija.
4 Hariꞌa vara ivaniꞌa ida hoariha kahonai abono kakaaji asohini asohirini ikahivini.
Deus kahonai abono ida ijaꞌari kaajiki kaajiriki hiki.
Kidikaꞌdaꞌdi kaꞌoa vara bivaniꞌaki ida kidihonai abono kahojai,
bivajahavini bivajaharavini bikahivini.
Jahaki bana ida honai abono kabadani.
Deua biakodiavini mani ida badani bivajahaki-ra namonahavini hija.
5 Ijaꞌari vahoariha vakavaꞌibodivaraniki ida hojani mahi bivakaajiki kaimoni.
Ijaꞌari vahoariha vani adani vajariꞌdaha.
Vakavaꞌibodivaraniki ida mahi karaho hojarini.
Jahaki ida ijaꞌari hahavi vaꞌini vara nini,
biogaja kaimoni ida afohanana kaaji asohiki kaaji asohiriki,
vaꞌini kosakhamani hijanaria kaimoni.
6 Ijaꞌari mahi-ra vakaajiki abononi niꞌahi:
—Hojaki hida mahi karaho Deus jahana-ra khai oniꞌavini kaimoni — nihi.
Ijaꞌari ꞌbai-ra vakaajiriki abononi niꞌahi:
—Jahaki ada Deus,
hora noꞌavini hiki ida baimana ohaki kaimoni.
Ijaꞌari baimana kakaajiki abononi niꞌahi:
—Jahaki ada Deus,
hora noꞌavini hiki ida rakhajahi bononi,
joꞌdoni,
ihiꞌai hiki ohaki kaimoni.
7 Ni-avakaꞌdaꞌdiki hida akadimahi.
Ni-avakaꞌdaꞌdiki jaboni ida ariabinina.
8 Arihokina oadani Cristo kaimoni hida akadimahi.
Ariabinina kamahini Cristo kaimoni jaboni hida ariabinina.
Arihokina,
ariabiniꞌina Cristo haria vakaꞌdaꞌdiki hari.
9 Cristo abiniꞌina naothinia ahokiꞌina,
ijaꞌari vahokiki,
ijaꞌari vaabiniꞌiki vihiki vakadikaꞌdaꞌdi kaimoni ada.
10 Hari.
Aꞌonivani avaigamini kaajia kahojaini asohirini-ra avakahivini.
Ni-jahaki ida avaigamini-ra avakaihimoravini.
Harivani afohahavi Deus viaha arihojaki bana hari,
Deua biniꞌaja kaimoni ida ijaꞌari hana hini kahojai asohiki hana hini kahojai asohiriki.
11 Hojaki hida athii Deus athi kapapirania:
“Niki ada Deus:
Kaꞌoa hiki hida ohokina.
Kaꞌoa hiki jaboni hida kodivarani
ovavaꞌisohihijoraꞌiki.
Ijaꞌari hahavi vakajoꞌatharariki bana oviaha,
vara hora vaniꞌaki bana:
‘Deus oamani i.’
Vakhaniki bana adani.”
12 Harivani afohahavi Deu-ra ananamithavini hiki bana ida afohanana akadivarani,
akadibadani,
akadihojai hiki niha ninini.
Hariꞌa avanaadariki fori hiva ada avaigamini
13 Hariꞌa arigamina-ra akanavaranihava hojai avajaharikia.
Avaabononi vara vaniꞌa bana:
—Jokoa bada oniꞌarihi hida badani oigamina-ra kaꞌdamanokhoki fori hiki.
Ni-onofiki ida kodihojai oigamina-ra kaboroborovini hojai asohirikia — vakhani bana afohanana.
14 Kodikaꞌdaꞌdi Jesus kania oakaramisina mani ida kaaji hojarini-ra oogajahakivini hija.
Kaaji hirini kabaꞌi ida mahi,
ꞌbai hiki,
ijaꞌari kaaji hojani-ra kavaꞌibodivaranihi;
ni-asohiki ida kidimoni hini bivakaajiravini.
Kidikaaji hiꞌoamanija ida.
15 ꞌBai iigamini kakaaji hiki-ra ihavini,
iigamini vaꞌini-ra fai ianiꞌahi.
Ihahi;
iigamini-ra inakaidivaravini-ra inanokiahi.
Hariꞌa bana iigamini vaꞌini-ra fai aniꞌa ꞌbai kidikaaji hiki-ra ihavinia.
Iigamini kaimoni ida Cristo abiniꞌina.
16 Vakavaꞌibodivarani bana ida niha ninini avakadihojai jahakia avakahojaini mahija varani jaharikia vahoariha avakadihojai-ra vakanavaraniharavini.
17 Vara avaniꞌavini hiki ida Deus ijaꞌari-ra vakaꞌdaꞌdivini,
akadivarani hirihi ida ꞌbai havahaki ꞌbai havahariki,
nahina aavahaki nahina aavahariki.
Ni-niki hida akadivarani.
Akadivarani hiki ida hojai Deua binofikia akahojaina.
Akadivarani hiki jaboni ida Deus avaꞌi-ra najahajahavini,
Deus avaꞌi-ra khai niꞌavini.
Maꞌonahai Jahaki haria kajoamoravini hiki hida arihojana.
Nimania hida ijaꞌari kamahi Deua bivakaꞌdaꞌdiki.
18 Deua khai biniꞌaki ida ijaꞌari Cristo kabadani nikia kabadaniki.
Ijaꞌari vahoariha khai vaniꞌaki jaboni ida kidibadani.
19 Hari.
Hojai haria kakodiakia akahojaiva mahija ariabono akanavaꞌijahajahakhamavini.
Hojai niki haria kakodiavini hiki jaboni ida ariabono akanadanokhamavini ajariꞌdarina.
20 Bada niki ada Deus ijaꞌari vaꞌini bodinia.
Hariꞌa Deus kabadani-ra najahari hoariha kania,
ꞌbai ijaꞌari kakaaji hiki-ra ihavinia.
Havahani kabaꞌi ida ꞌbai hahavi,
ni-asohiki ida ijaꞌari-ra okaboroborovini badani asohirikia kabadanini,
ꞌbai kidikaaji hiki-ra ohavinia.
21 Akadibadania bikaborohi ida arigamina badani asohiriki-ra nabadanivini;
jahaki ida bada aniꞌavini akajonivini.
Akajoniva ida ꞌbai kaaji hiki-ra arihavini,
vinho-ra aꞌavivini jaboni mahija arigamina-ra akabororavini,
badani asohiriki-ra nabadaniria kaimoni.
22 Avanahojaꞌa bana ida avakadivaꞌibodivarani nahina asohini-ra avakajariꞌdaravini mahija aꞌonivani kaꞌoa Deus khama avarigavini.
Vahoariha ni-avigaki.
Ijaꞌari vaꞌini kaabanahahania bivaꞌahahi ida kaaji-ra kavaꞌipahinivini;
khaii nihi ida ijaꞌari.
23 Ijaꞌari vaꞌini-ra kosakhamaki ida ꞌbai kaaji hini kaaji hirini,
kidimoni hini ni-asohiki bihavini.
Bihavini asohini bikajariꞌdavini mani ida bihavini asohirini Deua bikahivini hija.
Akajariꞌdavini oadani ida badani hana hinia akabadanina asohini akadimoni,
ni-asohiki ida bada aniꞌavini.