Jahaki ida arabo vakaꞌdaꞌdiva vaathi-ra anaabavini
13
Ijaꞌari hahavia vanaabaꞌava bana ida arabo kaijaꞌarini vavakaꞌdaꞌdiki vaathi.
Deua bivaꞌahavini mani ida kaꞌdaꞌdi vakadijaꞌari-ra vahonariafiahavini hija.
Vaꞌora vaꞌahariha;
ni-vahojaki adani kaꞌdaꞌdi.
Deus vaꞌora honariafiahaki adani kaꞌdaꞌdi vakadiarabo kaijaꞌarini-ra vavakaꞌdaꞌdivini.
2 Ijaꞌaria bikajonihi ida arabo kakaꞌdaꞌdini athi-ra naabavini;
Deua bihonariavini hiki-ra kajonihi.
Deua bihonariavini hiki-ra kajonihi;
abononi arakhahi jaharikia arabo kakaꞌdaꞌdini saꞌa kabodinia.
3 Ni-nahina kaimoni ijaꞌari hojai jahakia kahojaiki arabo vakaꞌdaꞌdiva-ra vaꞌora finiki.
Ijaꞌari hojai asohirikia kahojaiki vani vaꞌora finira adani.
Arabo vakaꞌdaꞌdiva-ra vaꞌora ifiniravini-ra inofihi;
hojai jahaki-ra bada iniꞌahi,
oniani ida kadahojai jahaki-ra vavajahavini hija.
4 Deus kahonai abono adani arabo vakaꞌdaꞌdiva.
Vakadibadani hiki ida aꞌonira avakadavaꞌavini.
Hojai asohirikia avakahojaihi;
vaꞌora vifini bana.
Vakaabokaki ida avakadihojai vavajahariki-ra vanaabosivini nahina jaharikia aꞌonira avarakhavini.
Deus kahonai abono vihina mani ida ijaꞌari kahojai asohiriki-ra vanaabosivini hija nahina jaharikia.
Nimania ida Deua binofiki kaꞌdaꞌdi kahojai hini,
5 oniani ida arabo vakaꞌdaꞌdiva vaathi-ra avanaabavini-ra ohonariavini hija.
Ohonariaki ida vaathi avanaabavini,
Deus aꞌonira kaihamahiria kaimoni,
avakamithaja kaimoni jaboni ida avavaꞌini kaabanahahani.
6 Arabo vakaꞌdaꞌdiva ijaꞌari-ra vanavaꞌisohivini vani bada vaniꞌaja ida badani Deua binofiki,
oniani ida imposto kajinironi-ra avararakhavini-ra najahaja arabo vakaꞌdaꞌdiva vakadiania.
7 Oniaroa,
avarakhaꞌa bana ida imposto kajinironi vakanikhariaki.
Vaꞌora vanoꞌa bana adani kaꞌdaꞌdi avakadibadani abosini pitania,
arabo kaꞌimpostoni kajinironi hikia jaboni.
Avakadiarabo kakaꞌdaꞌdini vihina mani ida vaꞌora avavavaꞌihavini najahani hija.
Ijaꞌari hoariha-ra naibavijahavini varani hini hida
8 Hariꞌa bana inaabosiravini hojava oni hoariha.
Nahina abosiꞌiariki fori hiki ida hoariha-ra avanakaidivavini.
Hoariha-ra vanakaidivahaꞌoadaha mahija avanaabosiki fori hivini.
Ijaꞌari ijaꞌari vahoariha-ra vaꞌora nakaidivahi;
binaabahahavihi ida Deus kavaꞌisohihi jiriki.
9 Deus kavaꞌisohihi jiriki pitahani ijaꞌari-ra kaabanivini:
“Hariꞌa vaviꞌoma ida
makhira hoariha kagamo.
Hariꞌa vaviꞌoma ada gamo
hoariha kamakhira.
Hariꞌa hoariha-ra naabini.
Hariꞌa boꞌdia.
Hariꞌa iakabai ida hoariha
kanahina.”
Asia hojaki hida honari hoariha,
honari ipohiki-ra aradaki:
“Iabononi inakaidivavini vani fori vaꞌora niha
vaꞌoani ijaꞌari hahavi.”
Hihida vaꞌisohihi hoarani aradahaki-ra avanaabahi;
Deus kavaꞌisohihi hahavi oamani ida avanaabaja.
10 Ijaꞌaria binakaidivahi ida hoariha;
ni-bada biniꞌaki ida hojai asohiriki kidiania.
Vahoariha-ra vaꞌora anakaidivahi;
Deus kavaꞌisohihi hahavi-ra anaabahi.
11 Vanaabaꞌa bana hida aꞌonira vara oniꞌavini hiki athii.
Avarigaki ida mahi hahavi anokhomini kamahini amaakariꞌini.
Avavadiki fori avihiki aꞌoni.
Hari.
Avanokhoni aforajorakiꞌava bana.
Jesu-ra avakaijokabiininivini vani ni-Deus haria akavaꞌijoavini kamahini amaakariki kaho.
Hari maha.
Amaakariꞌiki ida haria akavaꞌijoavini kamahini.
12 Ihimini amaakariki ida joma bakibakini fori hiki.
Kamaꞌdani amaakariki ida mahi vagani.
Hariꞌa bada aniꞌajanava ida hojai asohiriki ijaꞌari bakibakinia vahojakia bada vaniꞌaki.
Anabiiniva ida akadisaꞌai fori hiki mahija nahina jahariki-ra adavini mahi vagania.
13 Mahi vagania arihojaki fori arihina vani hojai Deua bivajahakia akahojaiva.
Hariꞌa avikha kavi ijaꞌari-ra kanabajadiki kania.
Hariꞌa vakahano.
Hariꞌa avidoraonibakhia ida gamo hoariha.
Hariꞌa hojai asohiriki kaipahivahakia vakahojai.
Hariꞌa avaabononi avakanaathidanoararikhama.
Hariꞌa avakaraganaha.
14 Anabiiniva ida akadisaꞌai akadikaꞌdaꞌdi Jesus Cristo haria noꞌavini hiꞌiki.
Hariꞌa avakaijahitaki fori hijanava bana ida avakadimahi ꞌboꞌda mahija hojai bikavaꞌinofinofiki-ra avavaꞌahajanaravini.