Akadimahi niha ninini Deua binofivini
12
Hari.
Oniaroa,
oigamina,
Deus haria vaꞌadivini arafiani mani ida aꞌonira okanikhariadanokivini hija.
Avaabononi hahavia Deu-ra vakanavaꞌigaꞌa bana.
Igitha abononi ijaꞌari Deu-ra kanavaꞌigavini vani fori hini,
onofija ida avakadimahi avahokini oadani Deus kaimoni.
Avaabononi vavaꞌaha bana mahija Deus kabadania avakabadaniꞌavini,
Deua khai biniꞌaja kaimoni ida avaabononi avavaꞌahavini kidimoni avihini.
Nimania hida Deu-ra akanamasivikaꞌoavini binofiki.
2 Hariꞌa avakadihojai hijanava bana ida hojai Deu-ra vanofirikia vavajahaki.
Vavaꞌaha bana ida Deus avakadivaꞌibodivarani-ra anajaꞌdihahavivini mahija Deus kavaꞌibodivarani fori hivini.
Deus avavaꞌini bodinia varani-ra anajaꞌdihi;
nahina Deua binofiki-ra avarigahi.
Jahaki ida nahina Deua binofiki.
Asohikaꞌoaki ida hahavi Deua binofiki.
3 Deus hora kajoamoravini vani biobaija ida ogahai danoki ovaꞌi bodinia,
oniani hida aꞌonira onavaꞌisohivini hija:
Vakavaꞌibodivarani ida avakadimahi afohanana.
Hariꞌa avajahania avaabononi vavaboraborahaꞌimarini.
Vanasohi bana ida avaabononi avakavaꞌibodivaranivini.
Aꞌonivani afohanana vakavaꞌibodivarani bana ida nihafori hini ahapini avakadiꞌogahai danoki Deus aꞌonira noꞌavini hiꞌiki.
4 Hari.
Hojaki ida ijaꞌari abononi niha nini hahavi,
hihavija kaimoni ida ijaꞌari.
Ijaꞌari saꞌani kabadani fori hirihi ida ꞌdamani kabadani.
Ijaꞌari nokhoni ꞌbaꞌdani kabadani fori hirihi ida moroboni kabadani.
5 Onivani fori arihija.
Aripohina kabaꞌi Cristo abono hoarani arihiki hari.
Cristo kania aakaramisihahavina mani ida Cristo abono hoarani haria nihaja.
Cristo niha nina arihihahavina mani ida ariabono akanakaramisikhamavini hija.
Cristo abono hoaranini kabaꞌi,
Cristo niha nina hoarani ni-Cristo niha nina hoariha fori hiki.
6 Hari.
Deus haria noꞌavini hiꞌiki ida kidiꞌogahai danoki paꞌitxi hoarahanana.
Haria honariavini hiꞌiki ida ogahai danokia akabadanina.
Deus kidijaꞌari hoarahanana-ra noꞌavini hiꞌihi ida ogahai danoki Deus athi-ra vanamonira kaimoni.
Athi anamonivini akaabokahi;
Deu-ra avakaijokahi;
vara avaniꞌahi ida moni haria navaꞌisohivini hiꞌiki.
7 Haria noꞌavini hiꞌiki vahabini ida ogahai danoki,
akaabokaja kaimoni ida hoariha-ra aakodiavini,
oniaroa aakodiava bana.
Haria noꞌavini hiꞌiki vahabini ida ogahai danoki,
akaabokaja kaimoni ida hoariha-ra akaꞌojomoꞌivini,
oniaroa akaꞌojomoꞌiva bana.
8 Haria noꞌavini hiꞌiki vahabini ida ogahai danoki,
akaabokaja kaimoni ida ijaꞌari khaii nijanariki-ra akajoamoravini,
oniaroa khaii niꞌianaki bana ida hoariha.
Ijaꞌaria bikaabokahi ida hoariha-ra kajoamoravini kidinahina ravinania.
Khaii nini vani bana ravinahava.
Ijaꞌaria bikaabokaki ida vahoariha-ra vaꞌora vakaꞌdaꞌdivini,
vajaforia bada biniꞌajahakiva bana hida badani.
Ijaꞌaria bikaabokaki ida athii forakia kavaranini.
Viꞌdi nini vani bikajoamorava ida hoariha.
9 Ijaꞌari-ra avanakaidivahi;
hariꞌa vaꞌini vavajahaꞌimarini.
Vakaramonaꞌa bana ida hojai jaharikaꞌoaki.
Vanofijahakiꞌa ida Deua bivajahaki.
10 Avaabononi vakanakaidivakhama bana afojahaki,
Cristo igamina aꞌoni.
Khai vaniꞌa ida varani jahakia avaabononi vara avakaniꞌakhamavini bana mahija vahoariha-ra avavaꞌahavini vanofikia jaboni.
11 Avakadibadania vakabadanijahakiꞌa bana.
Hariꞌa vakajoniaha.
Khai avakhanini vani jorakia avanikha bana ida badani Deua binofiki.
12 Khai vaniꞌahahaꞌoadaha bana ida Deus aꞌonira kaibavijahahivini hiꞌiki avanokhaki.
Avavaꞌini rogo inini radahani-ra avanokhavini oadani hariꞌa avavaꞌini vidavidahava.
Hariꞌa vakavaꞌipahini bana ida Deu-ra vara avaniꞌavini.
13 Avakadinahina pitania vaꞌora vanoꞌa bana adani avaigamini Cristo kaniaja nahina vakainamokia.
Vaꞌora vakaijahita bana adani Cristo igamina napaja vikhaki avagorania vakaikahiki.
14 Deu-ra vakanikharia bana mahija vaꞌora kajoamoravini adani aꞌonira vanajaharihariki.
Hai oamani.
Vakanikharia bana vaꞌora kajoamoravini.
Hariꞌa bana vakanikharia ida vaꞌora napohimajavini.
15 Vaꞌora avanokiha adani ijaꞌari khai vakhaniki,
khai vakhanijabana bana.
Vaꞌora avanokiha adani vaasaraki,
vaasarajabana bana jaboni.
16 Avaabononi vakanajahamisikhama bana.
Hariꞌa avaabononi vavaboraboraha bana nahina avihinia.
Vaꞌora vakanavaꞌahiha bana adani ijaꞌari vakanahinariki.
Hariꞌa avaabononi vakavaꞌibodivarani afohanana bana avakadiꞌogahai vahoariha vakadiꞌogahai-ra aradavinia.
17 Hariꞌa bana ianaabosi ida ijaꞌari hojai jaharikia kahojaiki kadania,
kidibadani fori hikia ikabadanini jaboni.
Bada vaniꞌa ida badani ijaꞌari hahavia vavajahaki.
18 Vakaijoꞌa bana vahoariha khama avaabononi avarakanajahamisikhamavini.
19 Oigamina,
hariꞌa iabono naꞌdaꞌdiabosi.
Deus vani ada ira bana naꞌdaꞌdiabosira,
nahina jaharikia biarakhaki ida ijaꞌari.
Hojaki hida athi Deus athi kapapirania:
“Ira onaꞌdaꞌdiabosiki bana i.
Onaabosiki bana ida jahariki-ra vanamonahaki
vakadihojai.”
“Vaiꞌamihi ida ira napohimajavini-ra nofiki;
ꞌbaia inoꞌa bana.
Kanabidini akaaforaꞌihi;
paha inoꞌa biꞌaviki
kaimoni.
Ira vapohimajavini-ra nofiki-ra ikajoamorahi,
oniani ida ianavaꞌiꞌaipahihivini hija.”