Deus vaꞌora vaꞌadiki bana adani Israel kaijaꞌari
11
Hari.
Onaꞌdohihi:
Deus vaꞌora kajonimanira adani Israel kaijaꞌari?
Iniani.
Vaꞌora kajonipaꞌitxiriha adani kidijaꞌari.
Hovani jaboni Israel kaijaꞌari ho.
Abraão kohana kahanodi namitharonisiagaki ho.
Kodijaꞌari okhananavaki ada Abraão kahanodi kaisai Benjamim oniki kohana.
Kodijaꞌari avikhananavaki adani Benjamim kaijaꞌari vanamitharonisiagaki.
2 Ni-Deus vaꞌora kajoniki adani kidijaꞌari.
Hahavi kamaꞌdani viahania Deus vaꞌora nagathogathoꞌiki adani.
Avarigaki ida Elias kohana varani hina Deus athi kapapirania hojaki.
Elias kohana vara bivaniꞌaꞌiki ida Israel kaijaꞌari vakadihojai bivajahariki.
Deu-ra niꞌadanokiꞌaha:
3 “Kodikaꞌdaꞌdi,
vaꞌora vanaabinibakhiaꞌiki adani iathini namoniva abono vaꞌora ikaronaꞌiki.
Vanathararaꞌiki ida ibavi ipohiki jaꞌdi aaroisiki
ijaꞌari igitha abononi
ahaꞌdikia ira vanoꞌavini ibavini.
Hovani oa oahoaraniꞌia
iathini namoniva abono ohina oaꞌaaniꞌia.
Vanofiki jaboni ida hora
vanaabinivini.”
“Vaꞌora oaniꞌiki adani 7 mil ijaꞌari vihiki kodimoni
vihina.
Ni-vakanamasiviki ida deus amovana Baal oniki.
Vaipohiriki adani 7 mil
ijaꞌari.”
Niha ada Deus.
5 Oniaro kari fori hiꞌianaki hida hidakabaꞌi.
Vahojaki adani Israel kaijaꞌari vaipohiriki Deus vaꞌora aniꞌiki.
Vaꞌora kajoamoravini vaꞌora nofiha,
oniani ida vaꞌora vaꞌadivini hija.
6 Deua binofiki ida ijaꞌari-ra vaꞌadivini,
oniani ida vaꞌora nagathogathovini hija.
Ni-Deua bikavaꞌibodivaraniꞌimidiaki ida ijaꞌari kahojai jahani jaharini,
bikajoamoraja kaimoni ida ijaꞌari binofiki.
Ijaꞌari kahojai-ra kavaꞌibodivaraniꞌimidiara vaha;
abosimanihi vaha ida vaꞌora vaꞌadivini hojai jahakia.
Deua binoꞌakaꞌoamanihi kidikajoamorahia.
7 Hari.
Nahina mani hida varani haria kaꞌojomoꞌivini hija?
Israel kaijaꞌaria ni-vakaragaki ida Deus vaꞌora kapoarivini niha ninini,
vakadimahi sohikaꞌoani kaimoni.
Ijaꞌari vaipohiriki Deus vaꞌora aniꞌiki vania vakaragaja ida.
Vahoariha vamorobo kamokhihaꞌiki fori vihiki.
Ni-vakaabokaki ida Deus vaꞌora kaboaꞌivini-ra vakamithavini.
8 Hojaki hida Deus athi kapapirania varani hina:
“Ijaꞌari Deus athi-ra vakajoniꞌiki Deus vavaꞌi bodini
binasadoki fori hiki vaꞌora kanamaodorohaki
fori vihiki,
vamorobo bikanamokhihaki fori vihiki jaboni adani.
Asia nikia vakahojaiki
hadani.”
Nihi ida athii.
9-10 Davi kohana vara vaꞌora vaniꞌaki jaboni adani:
“Onofiki ida vakadihinika kania
nahina jahakia vaꞌora inoꞌavini
vaꞌora anagithiki fori hira kaimoni,
tapajo kabodinia avagithiki fori vihina.
Onofiki ida vaꞌdama karobarimanini vaadariki fori vihira kaimoni,
vakadihojai jahariki abosini-ra vagathanivini.
Onofiki jaboni ida vanokho ꞌbaꞌdani
modo niki fori hini
vakamaodorohaki fori
vihira kaimoni.
Onofiki jaboni ida vavatxivatxina vaadahana
ijaꞌari daji khanaki-ra kaibaꞌiki fori vihina vahojahahaꞌoadahana.”
Nimania ida Davi kohana athi vaꞌora vara vaniꞌavini.
11 Hari.
Onaꞌdohiꞌianahi:
Kaꞌdamanokhoki fori vihina naothinia adani judeus kaijaꞌari,
vahojahahaꞌoadahamanira adani vaadariꞌina?
Iniani.
Badani asohirikia vakabadaniki adani judeus kaijaꞌari Cristo-ra vakajonivinia,
oniani ida Deus judeus kaijaꞌari vihiriki maina-ra vaꞌora akavaꞌijoavini hija.
Deus vaꞌora akavaꞌijoaꞌiki adani judeus kaijaꞌari vihiriki,
judeus kaijaꞌari vaꞌora avakabaira kaimoni.
12 Judeus kaijaꞌari Jesu-ra vakajonivini mani ida arabo hahavi kaijaꞌarini Deus kanahina jahakia vaꞌora nagahinaja.
Judeus kaijaꞌari Deus kanahina jahakia vagahinarina mani ida judeus kaijaꞌari vihiriki Deus kanahina jahaki-ra vagathanivini hija.
Jahaki ida Deus judeus kaijaꞌari vihiriki-ra vaꞌora kajoamorabakhiaꞌavini niha ninini.
Jahani arafiaki bana ida judeus kaijaꞌari hahavi vaꞌora nagathogathoꞌiki Deus vaꞌora kajoamoravini niha ninini.
Deus vaꞌora akavaꞌijoaki adani judeus kaijaꞌari vihiriki
13 Judeus kaijaꞌari avihiriki aꞌoni.
Aꞌonimaina vara aꞌonira oniꞌaki ho.
Deus hora niꞌaha:
—Iavaadahaoni bana ida Cristo monina mahija judeus kaijaꞌari vihiriki-ra vaꞌora inakamithahivini — hora niꞌaha.
Deu-ra khai oniꞌavini hiꞌiki hihida badania hora noꞌaꞌavini.
14 Kodijaꞌari vihiriki-ra okanamonivini mani ida kodijaꞌari vaꞌora avakabaivini hija vahabini.
Judeus kaijaꞌari vaꞌora avakabaiki adani vakadijaꞌari vihiriki,
vaꞌoaniaro maina vahoarahanana vanofiꞌihi jaboni ida Deus vaꞌora akavaꞌijoavini.
15 Deus judeus kaijaꞌari-ra vaꞌora kajoniꞌavini vani vaꞌora kaboaꞌiꞌaha adani arabo hahavi kaijaꞌarini,
kidivaꞌahi vihira kaimoni.
Jahaꞌoamanija bana ida mahi Deus judeus kaijaꞌari-ra vaꞌora kapoarivini kamahini.
Ijaꞌari abiniꞌini naothinia ahokini vani fori hija bana ida mahi jahani.
16 Vaꞌora okavarajomiki adani judeus kaijaꞌari pão kaimani fori vihina.
Okavarajomiki ada vakadijaꞌari okhananavaki pão kaimani kapitani kapaꞌitxi fori hina.
Deu-ra vakanavaꞌigavini kihiki ida pão kaimani kapitani kapaꞌitxi;
kidiani hahavi ida pão kaimani.
Ava ꞌdamani abohani fori hiki ada Abraão jaboni.
Deu-ra vakanavaꞌigavini hiki ida ava ꞌdamani abohani,
kidiani jaboni ida ava vadini hahavi.
17 Vaꞌora okavarajomiki bana adani judeus kaijaꞌari oliveira avani rakhajahaꞌiki vadinia.
Ijaꞌaria biꞌdaniꞌiki ida ava vadini.
Aniani ibavinia binaibaviki ida oliveira rakhajahariki vadini moananamaꞌoja kaimoni.
Oliveira avani rakhajahariki vadinia bigathaniki ida oliveira avani rakhajahaki dohania binahokija kaimoni.
Aꞌonivani judeus kaijaꞌari avihiriki,
oliveira avani rakhajahariki vadini fori avihiki aꞌoni.
Deus kania avagathaniki ida judeus kaijaꞌari-ra nahokijahakiki,
vaꞌora nadanoki hiki.
18 Hari.
Hariꞌa vakaihiponiri ida ava vadini fori hiki Deua biꞌdaniꞌiki.
Hariꞌa avaabononi vavaboraboraha avajahania,
vaꞌoaniaro vajaharina vaꞌora avakahiki.
Ava vadini fori avihiki aꞌoni.
Ni-avanahokiki fori hiki ida ava ꞌdamani abohani.
Ava ꞌdamani abohani vani ida aꞌonira nahokija.
19 Oathi-ra gathaniki vahabini ida hoarani avahararania hojaki:
—Deua biꞌdaniꞌiki ida ava vadini,
hojaki ida ibavi hora anakaramisivini ibavini kaimoni — nihi.
20 Kaꞌoa hiki ida ava vadini aꞌdaniki fori vihina judeus kaijaꞌari.
Cristo-ra vavakaijokaravini mani ida Deus vaꞌora ꞌdaniki fori vaꞌora nihavini hiꞌia.
Avavakaijokavini mani ida ava vadinia akaramisiki fori Deus aꞌonira nihavini hija.
Hariꞌa avaabononi vavaboraboraha vaibavia avahojania.
Avaabononi avakavaꞌigairi bana.
21 Ni-Deus vaꞌora vaꞌadiki adani judeus kaijaꞌari vajariꞌdaki.
Ava vadini movabiininini vani fori vihira adani.
Avakavaꞌipahinihi ida Deu-ra avavakaijokavini;
judeus kaijaꞌari-ra vaꞌadiravini fori avihihi.
22 Vakavaꞌibodivarani bana hida Deus kahojai.
Athii forakia vara vaꞌora niꞌaki adani vahoariha.
Athii khanakia vara vaꞌora niꞌaki adani vahoariha.
Athii khanakia vaꞌora niꞌaki adani ijaꞌari hojai bivajaharikia vakahojaiki.
Vaadariꞌiki fori vihiki adani.
Athii forakia Deus aꞌonira niꞌaꞌiki aꞌoni.
Avavakaijokavini oadani,
asia athii forakia vara aꞌonira niꞌaki ada.
Avavakaijokavini avakavaꞌipahinihi;
aꞌonira ꞌdaniki fori aꞌonira nihaha ada Deus.
23 Judeus kaijaꞌaria vakavaꞌipahinihi ida vakadijariꞌdi;
Deus vaꞌora anakaramisiꞌianaha vaibavia vahojaꞌianara kaimoni.
Deus vania bikaabokaja ida vaꞌora anakaramisiꞌianavini kidiania.
24 Kodivarani hiki hida aꞌonivani judeus kaijaꞌari avihiriki oliveira avani rakhajahariki vadini fori avihiki aꞌoni.
Ijaꞌaria biꞌdaniki hida vadini,
bianakaramisiki ida nokhoni oliveira avani rakhajahaki aꞌdaniki kania,
moananamaꞌoja kaimoni ida vadini ajaꞌdini.
Oliveira avani rakhajahaki fori vihiki adani judeus kaijaꞌari.
Deua bikaabokaki ida oliveira avani rakhajahariki vadini-ra anakaramisivini oliveira avani rakhajahaki vadini aꞌdaniki ibavinia.
Bikaabokajahakivini arafiaki ida oliveira avani vadini aꞌdaniki-ra anakaramisiꞌianavini aꞌdaniki ibavinia.
Deus vaꞌora nakaidivaki adani ijaꞌari hahavi
25 Oigamina,
hojaki ida moni kaꞌoa hini ijaꞌari vahoariha avigariki.
Onofiki ida avarigavini.
Moni-ra avakamithavini vani ni-ogahai abono avihinia avaabononi avakavaꞌibodivaraniki.
Nimania hida moni ahojaki vahoariha avigariki.
Ni-vamorobohariki fori vihihaꞌoadahaki bana adani Israel kaijaꞌari.
Deu-ra vanofihahaviki adani Israel kaijaꞌari vihiriki Deus vaꞌora nagathogathoꞌiki.
Kamaꞌdaki bana ida Israel kaijaꞌari maina Deu-ra vavakaijokavini.
26 Hari.
Oniaroa,
Deus vaꞌora akavaꞌijoaki bana adani Israel kaijaꞌari hahavi.
Hojaki hida Deus athi papira:
“Sião sidajia khaonaniki bana ada aihotahi abono.
Bianiki bana ida hojai hahavi Deua bivajahariki
Jacó kaijaꞌari vanamitharonisiagaki vakadiania.
27 Vakadihojai asohiriki oanivini kamahini,
vaꞌora onavaꞌisohivini hiki bana hida kodivaꞌiponahi aꞌboꞌdaki.”
Niha ada Deus.
28 Hari.
Judeus kaijaꞌari Cristo monina jahaki-ra vakajonivini mani ida Deu-ra vakaimajaharavini hija.
Nimania hida Deua binofiki vaꞌora kajoamorara kaimoni adani judeus kaijaꞌari vihiriki.
Hari.
Judeus kaijaꞌari-ra vaꞌora nagathogathoꞌboꞌdaꞌavini mani ida Deus kavaꞌahi vaꞌora nihaja.
Kidivaꞌahi vaꞌora nihavini mani ida Abraão kohana-ra vaꞌora navaꞌisohiꞌboꞌdavini hiki-ra nanamithavini hiꞌia.
29 Deus vaꞌora aniꞌiki adani ijaꞌari hana vihina vaꞌora nofiki vaꞌora kajoamorara kaimoni.
Ni-bianahoarihaki ida kidivaꞌibodivarani.
30 Aꞌonivani judeus kaijaꞌari avihirihi,
ꞌboꞌdakari avanaabarihi ida Deus athi.
Hari maha.
Deus aꞌonira vaꞌadiꞌiki aꞌoni.
Judeus kaijaꞌari Deus athi-ra vakajoniꞌavini mani ida Deus aꞌonira vaꞌadivini hiꞌia.
31 Nini vani namithaꞌia ida judeus kaijaꞌari vakadiania,
Deu-ra vakajonivini.
Deus aꞌonira vaꞌadivini mani ida judeus kaijaꞌari Deus athi-ra vakajonivini hija,
oniani bana ida Deus judeus kaijaꞌari-ra vaꞌora vaꞌadivini hija jaboni.
32 Ijaꞌari hahavi vamorobohariki fori vihina mani ida avagithiki fori vaꞌora nihaja.
Deus nikia vaꞌora vaꞌahaꞌiki adani.
Ni-vakaabokaꞌiki ida athi vanaabavini.
Onivani fori hija ida namithaꞌiki ijaꞌari hahavi vakadiania,
Deus vaꞌora vaꞌadihahavira kaimoni.
Khai aniꞌava ida Deus jahana
33 Jahaꞌoamanija ida Deus kakajoamorahi!
Jahani arafiaki ida Deus ijaꞌari hahavi-ra kajoamoravini arafiani afojahaki.
Karahoꞌoamanija ida Deus aagahai arafiaki.
Biogahahaviki ida ogahai.
Ni-nahina bikaabokaki ida Deus kavaꞌibodivarani-ra ogavini.
Deus kavaꞌibodivarani ijaꞌari kavaꞌibodivarani-ra aradaki.
Ni-nahina bikaabokaki ida kidibadani,
kidihojai hiki ogavahani niha ninini.
34-35 Hojaki hida athii Deus athi kapapirania:
“Ni-nahina biogaki ida Deus kavaꞌibodivarani niha
ninini.
Ni-nahina bikaabokaki ida Deu-ra navaꞌisohivini
biogarikia.
Ijaꞌari Deu-ra noꞌavini hiꞌini kabaꞌi ida kidinahina,
akadiania ni-nahina abosiki hojaki.
Deus kani ida hahavi hojaki.”
36 Deua binakamaꞌdaki ida hahavi hojaki,
binadadahaꞌoadahaki ida kidiamonahi.
Kidimoni ida kidiamonahi hahavi.
Jahaki ida Deu-ra akanamasivihaꞌoadahavini.
Nimania hida binofiki.