10
Oigamina,
onofidanokiki ida judeus kaijaꞌari Deus vaꞌora akavaꞌijoavini-ra vanofivini.
Kodijaꞌari vihiki adani.
Deus kania okanikhariadanokiki afobakhia ida vaꞌora akavaꞌijoavini.
2 Vara ovaniꞌaki ida vakadihojai onokibakhiaꞌiki.
Vanofiꞌiki ida Deu-ra khai vaniꞌavini afojahaki.
Vanofivini kabaꞌi,
ni-avigaki ida niha ninini Deua binofiki-ra khai vaniꞌavini.
3 Ni-avigaki ida niha ninini Deus ijaꞌari kamahi-ra nasohikaꞌoavini,
bikapoarija kaimoni ida ijaꞌari.
Avigaravini mani ida vakadimahi-ra vanasohikaꞌoavini-ra vakaijoꞌavini hija,
Deus vaꞌora kapoarira kaimoni.
Deus ijaꞌari-ra vaꞌora navaꞌisohivini hiki ida vakadimahi sohikaꞌoani niha ninini viaha.
Judeus kaijaꞌaria vakajoniki ida Deus vaꞌora kapoarivini niha ninini binofikia.
4 Cristo khaꞌina mani ida Deus kavaꞌisohihi jiriki-ra nihimaꞌia,
oniani ida Deus ijaꞌari Cristo-ra vakaijokaki kamahi-ra nasohikaꞌoaꞌia,
bikapoariki ida jaboni kidijaꞌari hija kaimoni.
Deua bikaabokaki ida ijaꞌari nofina hiki hahavi-ra akavaꞌijoavini
5 Hari.
Moisés kohana vara bivaniꞌaki ida ijaꞌari Deus kavaꞌisohihi jiriki-ra naabavini,
oniani oa kidimahi-ra nasohikaꞌoavini-ra nofihi ida ijaꞌari Deus viaha.
Moiséa binajiriki hida athi:
“Ijaꞌari Deus kavaꞌisohihi jiriki-ra ragaririhi;
Deus kavaꞌisohihia bibananihi ida ijaꞌari Deus
kania,
kidimahi anokhomirija
kaimoni.”
Niha ada Moisés kohana.
6 Deus athi kapapirani kania hojaki ida athi pitani hoariha.
Vara bivaniꞌaꞌiki ida ijaꞌari Deu-ra vakaijokaki kamahi-ra nasohikaꞌoavini.
Nihi ida athii:
“Hariꞌa iabono nanaꞌdohi:
‘Nahina vania koda bianikasira ada Cristo nama,
joirarira kaimoni?’
7 Hariꞌa iabono nanaꞌdohi
jaboni:
‘Nahina vania koda bianigarira ada Cristo
ijaꞌari kohana vaibavia,
bivajoisira kaimoni?’ ”
“Ni-napaja hojaki hida moni
Deus aꞌonira navaꞌisohivini hiꞌiki.
Avamaakarinia hojaki hida.
Avabodinia hojaki hida moni vara avavaniꞌaja kaimoni.
Avavaꞌini bodinia hojaki
jaboni ida moni.”
Deua bivavaꞌisohihiki ida ijaꞌari vakaijokana hiki kavaranihi.
Onivani fori hiki ida Deus kavarani vara avaniꞌabakhiaki vahoariha mitha vaniꞌaja kaimoni.
9 Ivaꞌini bodinia ikajariꞌdarihi ida Deus Jesu-ra anahokivini abiniꞌina naothinia;
vahoariha vaviaha vara ivaniꞌahi jaboni:
—Kodikaꞌdaꞌdi ada Jesus — inihi,
Deus ira akavaꞌijoahi.
10 Avaꞌi bodinia Deu-ra avakaijokahi;
binasohikaꞌoahi ida akadimahi;
haria kapoariha.
Vahoariha vaviaha ajariꞌdarina-ra vara avaniꞌahi;
Deus haria akavaꞌijoahi.
11 Hojaki hida athi Deus athi kapapirania:
“Deua binavaꞌiponiꞌimarinirihi ida ijaꞌari vakaijokana hiki.”
12 Ijaꞌari hahavi vakadimoni hida athi.
Judeus kaijaꞌari vakadimoni hida athi.
Judeus kaijaꞌari vihiriki vakadimoni jaboni hida athi.
Ni-bianahoarihaki hida athi vaꞌora akavaꞌijoara kaimoni adani judeus kaijaꞌari vihiriki.
Hojaki ada kaꞌdaꞌdi hoarana kaꞌoa ijaꞌari hahavi vakadimoni.
Ovari vaꞌora kajoamorajahakiki adani ijaꞌari hahavi Deu-ra vakanikhariaki.
13 Hojaki hida athi hoariha Deus athi kapapirania:
“Akadikaꞌdaꞌdi vaꞌora akavaꞌijoaki bana adani ijaꞌari hahavi kanikhariana vihiki.”
Niki hida athii.
14 Ijaꞌaria vakaabokarihi ida Cristo-ra vakanikhariavini,
vajariꞌdana oadani.
Ijaꞌaria vakaabokarihi ida Cristo-ra vakajariꞌdaravini,
vakamitharavini oadani ida monina.
Ijaꞌaria vakaabokarihi ida monina vakamithavini,
vahoariha vara vavaniꞌaravini oadani.
15 Athi avikhava abonoa vakaabokarihi ida monina avavaadahaonivini,
vahoariha vaꞌora vakaronaravini oadani.
Deus athi kapapirania hojaki hida athi hoariha:
“Jahaꞌoamanija ida
moni jahaki
avavaadahaoniva abonoa
vavikhavini.”
16 Hari.
Ni-ijaꞌari hahavia vakapoariki ida moni jahaki-ra vakamithavini.
Isaías kohana binanaꞌdohiꞌaha:
“Kodikaꞌdaꞌdi,
hana vihina vania vakajariꞌdarija ida akadivarani?”
Niha ada Isaías.
17 Ijaꞌari Cristo monina-ra vakamithavini vani binakamaꞌdaja ida vakajariꞌdaravini.
Ijaꞌari vania vara vavaniꞌaja ida Cristo monina ijaꞌari-ra najariꞌdariki.
18 Hari.
Onaꞌdohihi:
Vakamitharia koda ida moni jahaki?
Haꞌa,
vakamithaꞌoamaniꞌia ida.
Deus athi kapapirania hojaki hida athi hoariha:
“Ijaꞌari arabo hahavia vahojakia vakamithaki ida monina vakavaranina athi ꞌbarakia.
Aakhanakhamaꞌiki ida vaathi arabo napaja.”
19 Onaꞌdohiꞌianahi:
Israel kaijaꞌaria avigaria koda ida moni?
Haꞌa,
avigaki ida.
Moisés kohana miroꞌa vaꞌora vara vaniꞌaꞌiki adani Israel kaijaꞌari:
“Deus avakadijaꞌari vihiriki-ra vaꞌora kajoamoraki bana,
kidijaꞌari vihira kaimoni,
oniani ida bana aꞌonira anakabajahaja.
Deus ijaꞌari vavaꞌi bodinariki fori vihiki-ra vaꞌora kakodiaki bana,
oniani ida aꞌonira naihamahija.”
Nimania hida Moisés kohana judeus kaijaꞌari vihiriki-ra vara vaꞌora vaniꞌavini.
20 Isaías kohana jaboni ofinirina vara bivaniꞌaꞌiki ida Deus athi:
“Hora vakaragaꞌaha adani judeus kaijaꞌari vihiriki hora vanakoꞌdiriki.
Hora vananaꞌdohiriki vakadiania oabono onanokiaꞌihi.”
“Mahi oadani ovadi-ra oanaviramiꞌihi,
kodiania vajoira kaimoni.
Vamorobohariki fori vihiki adani.
Vakajoniꞌoamanija hida oathi-ra vanaabavini.”