Israel kaijaꞌari varani vihina hida
9
Kaꞌoa hiki hida oathi.
Cristo kaijaꞌari ohina mani ida korijanahia hora kanavaranirija.
Maꞌonahai Jahaki ovaꞌi-ra nahonariahihivini vani hora navaꞌisohidanokivini hija hida korijanahi-ra vara ovaniꞌaravini.
2 Kaꞌoa hiꞌoamanija hida ovaꞌi mokara nini arafiani.
Hari hirihi ida ovaꞌi asaraꞌahapikini Israel kaijaꞌari vakadimoni.
Kodijaꞌari vihiki adani.
Ariamana,
arimana hoarani vihiki adani.
3 Onofiki ida Cristo-ra vavakaijokavinia vaꞌora oakodiavini.
Vakadihojai asohiriki abosini ogathanivini vakadimoni okaabokaja vaha;
Cristo hora kavaꞌipahinivini-ra onofihi vaha.
Ni-okaabokaki ida vaꞌora okajoamoravini.
4 Deus vani vaꞌora nagathogathoꞌboꞌdaꞌara adani Israel kaijaꞌari.
Deus vaꞌora kanaisaihaꞌaha,
binanokiabakhiaꞌihi ida danona,
vagana,
jahana vakadiania.
Vaꞌora navaꞌisohivini hiꞌihi ida kidivaꞌiponahi aꞌboꞌdaki afohanana,
vakadiDeus hira kaimoni.
Vaꞌora navaꞌisohivini hiꞌihi ida vaꞌisohihi jiriki vanaabaja kaimoni.
Israel kaijaꞌari Deu-ra vakanamasivivini-ra avigavini niha ninini Deua binofivini.
Deus vaꞌora navaꞌisohijoravini hiꞌiki jaboni ida niha ninini vaꞌora kajoamorara kaimoni.
5 Abraão kohana,
Isaque kohana,
Jacó kohana vihiki vakadijaꞌari vanamitharonisiagaki adani Israel kaijaꞌari.
Avigavahaki adani vakadiꞌarahoda kohana miroꞌa.
Cristo ijaꞌari vahararana hojaꞌina kari,
ovari jaboni Israel kaijaꞌari hiꞌiki.
Deua bivakaꞌdaꞌdiki ida hahavi hojaki afohaꞌoadaha.
Asohiki ida ijaꞌari hahavi Deu-ra khai vaniꞌahahaꞌoadahavini.
Nimania hida binofiki.
6 Kodivarani hirihi ida Deus kidivaꞌiponahi aꞌboꞌdaki-ra kavaꞌipahinivini.
Binanamithaꞌoamanija ida vakadiania.
Ni-Deus vaꞌora nagathogathohahaviꞌiki adani Israel kaijaꞌari,
kidijaꞌari vihira kaimoni.
7 Ni-Deus vaꞌora kanaisaihaki adani Abraão kohana kahanodi vanamitharonisiagaki hahavi.
Deua biniꞌaꞌboꞌdaꞌaha ada Abraão:
“Kadaisai kaꞌoa adani Isaque,
Isaque kaisai vanamitharonisiagaki vihiki.
Kadaisai vahoariha ni-vaꞌora onaoniki kadaijaꞌari vanamitharonisiagakia.”
Niha ada Deus.
8 Deua binavaꞌisohijoraꞌiki ada Abraão kidivaꞌiponahi aꞌboꞌdakia,
oniani ida isai-ra vanamonahavini hiꞌia kidigamo khama.
Ovari isai Deus kaisai kaꞌoa kaimoni.
Abraão kahanodi vanamitharonisiagaki kaꞌoa vihiki adani kidihanodi.
Hari.
Deus Abraão-ra navaꞌisohiravini oadani kidivaꞌiponahi aꞌboꞌdakia,
Abraão vaꞌora namonahaꞌaha adani isai vahoariha.
Deus kaisai kaꞌoa vihiriha adani.
9 Nimania hida Deus kavaꞌiponahi aꞌboꞌdaki varani hini Abraão-ra navaꞌisohijoravini hiꞌiki:
“Badara hoariha onanokiaki bana hida odanona
avakadiania.
ꞌBanaki bana ida Sara.
Makhira isani mani bana ada isai.”
Niha ada Deus.
10 Asia hiki hida varani.
Viꞌbamiki adani Rebeca kaisai.
Hoarana ada isai vakadiabiꞌi,
Isaque oniki.
Akadijaꞌari okhananavaki ada Isaque kohana.
11-12 Deua binagathogathoꞌiki ada Rebeca kaisai hoarana.
Ni-binagathogathoꞌiki ada hoariha.
Hoarana-ra nagathogathovini-ra nofivini mani ida hoarana-ra nagathogathovini hiꞌia.
Oniania Deua biniꞌaꞌihi ida Rebeca,
kidisai vaꞌbanana viahania:
“Kajoꞌojahiki kahonai abono kaimoni ada aajojahiki.”
Vara nina kabaꞌi,
ni-vaꞌbanaꞌiaki kaho.
Ni-hojai jahakia vakahojaiꞌiaki kaho.
Ni-hojai jaharikia vakahojaiꞌiaki kaho jaboni.
Deus oavani abono-ra navaꞌisohijoravini hija ida isai hana hina-ra nofivini kaimoni,
oniani ida binagathogathovini hija.
Vabadanirina oadani Deua bianiꞌiki ada hoarana.
Kidibadani abosini hirihi ida gathogathoꞌina.
13 Deus athi kapapirania hojaki hida athi:
“Onagathogathoꞌiki ada Jacó.
Okajoniꞌiki ada Esaú.”
Nihi ida Deus athi.
14 Nahina mani hida kodivarani haria kaꞌojomoꞌivini hija?
Asohiriki avavanihamanija koda ida Deus kahojai?
Asohiki ida kidihojai.
15 Deua biniꞌaꞌaha ada Moisés kohana:
“Onofihi ida ijaꞌari-ra okajoamoravini;
okajoamoramanihi.
Onofihi ida ijaꞌari-ra
ovaꞌadivini;
ovaꞌadimanihi.”
Niha ada Deus.
16 Ni-Deua bikavaꞌibodiki ida nahina ijaꞌaria binofivini binofiravini.
Ni-Deua bikavaꞌibodiki ida ijaꞌari kabadani.
Deua bivaꞌadivini-ra nofihi;
bivaꞌadimanihi ida ijaꞌari.
17 Deua biniꞌaꞌaha ada Faraó kohana.
Deus athi kapapirania hojaki hida athi:
“Ira onaibaviki i Egito
kaarabonia
vaꞌora ivakaꞌdaꞌdira kaimoni adani ijaꞌari Egito kaarabonia vahojaki.
Onofiꞌiki ida kaꞌdaꞌdi ihini inanokiaja kaimoni ida odanona arafiaki.
Onofiꞌiki jaboni ida kaꞌdaꞌdi ihini,
oonina-ra avigara kaimoni adani arabo hahavi
kaijaꞌarini.”
Faraó kohana-ra niꞌaꞌiki ada Deus.
18 Deua binofiki ida ijaꞌari-ra vaꞌadivini;
bivaꞌadimanihi.
Deua binofihi ida ijaꞌari-ra namorobohariki fori hini;
binamorobohariki fori binihamanihi.
Deus vaꞌora vaꞌadiki adani ijaꞌari vahoariha, vaꞌora vaꞌadiriki adani ijaꞌari vahoariha
19 Hari.
Hora nanaꞌdohiki vahabini ida ijaꞌari oathi-ra kamithaki.
—Kaꞌoa hihi ida Deus kahojaia ikavaranini;
nahina mani ida Deus ijaꞌari hojai jaharikia kahojaini-ra kahivini hija?
Ijaꞌaria bikaabokamanija koda ida Deu-ra kaathirivini binofikia?
— hora inanaꞌdohiki vahabini bana i.
20 Kodivaꞌahi,
ni-asohipaꞌitxiki ida nahina Deua binofiki-ra ikajonivini.
Okavarajomiki bana hida nami kabavihi amonahani.
Nami kabavihia ni-binanaꞌdohiki ida namonahani hiki:
—Nahina kaimoni hora inamonahaki i onina?
21 Makhira kamoti kanamonahava abonoa binamonahahi ida bavi binofiki.
Ovari kaꞌoa biogaki ida bavi binofiki-ra namonahavini niha biniꞌaꞌavini.
Oniania binabiinimananiꞌihi ida nami kaꞌbakaꞌbaki,
binapitaꞌihi,
bavi ꞌbamiki-ra namonahaꞌaha.
Nami pitani hoarania binamonahaki ida bavi nokiani jahaki,
kaidivaki.
Binaibavijahajahakivini hiki binakaidivavini.
Nami pitani hoariha binamonahaki ida mahi hahavi ꞌbai-ra nabavivini kaimoni.
22 Onivani fori bana Deus vaꞌora nihara adani ijaꞌari.
Bavi hoariha fori vihiki adani ijaꞌari vahoariha.
Deua binofiki ida ihamahina-ra nanokiavini vakadiania.
Binofiki ida jaboni danona-ra nanokiavini.
Binofiki ida bavi fori hiki-ra nihimajorakivini.
Vakadihojai jahariki bikaihamahivini kabaꞌi,
ni-jorakia vaꞌora nihimaꞌiki,
vaꞌora nokhamaniha mahi ipohikia.
23 Onivani fori haria nihara ada Deus jaboni.
Bavi hoariha fori arihiki hari.
Deua binofiki ida haria vaꞌadivini.
Binofiki ida vagana,
jahana,
danona,
ogahana arafiaki-ra nanokiavini akadiania,
oniani ida haria naibavijahajoravini hija,
agathanija kaimoni ida vagana,
jahana,
danona,
kidiꞌogahai hiki.
24 Deus haria aniꞌaha judeus kaijaꞌari vahararana.
Vaꞌora aniꞌaha jaboni adani vahoariha judeus kaijaꞌari vihiriki vahararana,
kidijaꞌari arihija kaimoni.
25 Nimania hida Deus athi Oséias kohana binajiriꞌboꞌdaꞌiki:
“Vara vaꞌora ovaniꞌaꞌboꞌdaꞌiki adani kodijaꞌari
vihiriki.
Hari maha.
Vaꞌora vara oniꞌaki bana adani:
‘Kodijaꞌari avihiꞌiki aꞌoni.’
Oniki bana ho.
Vara vaꞌora ovaniꞌaꞌboꞌdaꞌiki adani ijaꞌari vaꞌora onakaidivariki.
Hari maha.
Vaꞌora vara oniꞌaki bana adani:
‘Aꞌonira onakaidivaꞌoamanija.’
Oniki bana ho.
26 Hiꞌoni ibavia Deus vara vaꞌora niꞌaꞌiki adani ijaꞌari:
‘Kodijaꞌari avihiriki aꞌoni.’
Hihida ibavia afoꞌiana Deus vara vaꞌora niꞌaꞌianaki bana adani:
‘Kodisai avihiꞌiki aꞌoni.’
Vaꞌora niꞌaki bana ada Deus ijaꞌari-ra nahokiki.”
27 Isaías kohana jaboni vara vaꞌora vaniꞌaki adani Israel kaijaꞌari:
“Vaipohiki adani Israel
kaijaꞌari.
Kaasi ꞌbaꞌdani ipohini fori
vihina kabaꞌi,
ni-vaipohiki bana adani Deus vaꞌora akavaꞌijoaki.
28 Jorakia hoaranija bana Deus vaꞌora noꞌahahaviki
bana adani arabo hahavi kaijaꞌarini
vakadihojai asohiriki abosini hahavia.”
29 Isaías kohana vara bivaniꞌajoraꞌiki ida hojai abosini kamahini.
“Deus vaꞌora vaꞌaharara
vaha adani akadijaꞌari
vanamitharonisiagaki
vaipohiriki vahokina;
akadijaꞌari hahavi vaabiniha
vaha,
ni-hoarana aaniki.
Sodoma sidaji kaijaꞌarini,
Gomorra sidaji kaijaꞌarini fori arihihi vaha.”
Israel kaijaꞌari vakadimoni jaboni ida moni jahaki
30 Nahina mani hida kodivarani haria kaꞌojomoꞌivini hija?
Israel kaijaꞌari vihirikia ni-vakavaꞌibodiki ida ijaꞌari kamahi sohikaꞌoani Deus vaꞌora kapoarira kaimoni.
Deu-ra vavakaijokavini vani Deua binasohija ida vakadimahi,
vaꞌora kapoariꞌaha.
31 Israel kaijaꞌari vani adani Deu-ra vanakoꞌdira.
Vakavaꞌibodiki ida vaꞌisohihi jiriki-ra vanaabavini,
Deus vakadimahi sohikaꞌoani bikahira kaimoni.
Ni-vakaragaki ida Deus vaꞌora kapoarivini kaimoni.
32 Avananaꞌdohiki vahabini ida:
Nahina mani ida vakaragaravini hiꞌia?
Deus vaꞌora akavaꞌijoavini-ra vavakaijokaravini mani ida vaꞌisohihi-ra varagarivini hiꞌia.
Vakaijoꞌaꞌiki ida vaabono avakavaꞌijoavini vaꞌisohihi-ra vanaabavinia.
Ni-nikia Deua bikapoariki ida ijaꞌari.
Vaꞌora kaꞌdamanokhoꞌiki fori vihiki adani judeus kaijaꞌari.
Vaꞌora naadariꞌiki fori vihiꞌiki adani judeus kaijaꞌari jaꞌdi fori hiki namania.
33 Deus athi kapapirania vara bivaniꞌaki ada jaꞌdi fori hiki:
“Mitha vaniꞌa.
Onaibaviki bana ida jaꞌdi Sião sidaji bodinia.
Ijaꞌari-ra kaꞌdamanokhoki
bana ida jaꞌdi.
Jaꞌdi vaꞌora naadariki
bana adani.
Ijaꞌaria bivakaijokaha ada
jaꞌdi fori hiki;
ni-onavaꞌiponiꞌimariniki bana ida ijaꞌari.”
Niha ada Deus Cristo-ra vara vaniꞌajoravini jaꞌdi fori hina.