Maꞌonahai Jahaki avaꞌi-ra nahonariahihivini
8
Hari.
Jokoa Deua bikaronarihi ida bana ijaꞌari Jesus Cristo kania akaramisiki Ibavi Jaharikaꞌoakia okhani.
2 Jesus Cristo kania aakaramisina mani ida akadimahi jaꞌdini-ra avahojavini hija.
Maꞌonahai Jahaki avaꞌi-ra nahonariahihivini mani ida haria akavaꞌijoavini hiꞌia,
hojai asohiriki kavaꞌisohihi avaꞌi-ra nahonariahihijanaria kaimoni,
oniani ida Ibavi Jaharikaꞌoakia haria arakhajanarija.
3 Ijaꞌari kamahi ꞌboꞌda danorini mani ida Deus kavaꞌisohihi jiriki haria kakodiavini-ra kaabokaravini hija.
Deus vania bikaabokaja ida hojai ꞌboꞌda-ra nihimavini.
Deua bikaronaꞌaha ada kidisai,
binihimaja kaimoni ida hojai asohiriki.
Kidisai namithaꞌiki ijaꞌari hiꞌina.
Kidimahi ijaꞌari hahavi kamahi fori hiꞌiki ida.
Cristo-ra rakhaꞌiki ijaꞌari vakadiania hojai asohiriki-ra nihimahavini,
4 oniani ida Deus danona haria noꞌavini hija,
akaabokaja kaimoni ida hojai asohiki Deus kavaꞌisohihi jiriki haria honariavini hiꞌiki.
Avaꞌahaki ada Maꞌonahai Jahaki avaꞌi-ra nahonariahihivini.
Ni-avaꞌahajanaki ida akadimahi ꞌboꞌda avaꞌi-ra nahonariahihivini.
5 Ijaꞌari kamahi ꞌboꞌda vaꞌini binahonariahihihi;
bikavaꞌibodivaranihi ida kidimahi ꞌboꞌda binavaꞌisohivini hiꞌiki,
oniani ida bada biniꞌavini hija.
Maꞌonahai Jahaki ijaꞌari vaꞌini-ra nahonariahihihi;
bikavaꞌibodivaranihi ida Maꞌonahai Jahakia binavaꞌisohivini,
oniani ida bada biniꞌavini hija.
6 Ijaꞌari kidimahi ꞌboꞌda vaꞌini binahonariahihihi;
abinini kamahini Ibavi Jaharikaꞌoakia okhahi.
Maꞌonahai Jahaki ijaꞌari vaꞌini-ra nahonariahihihi;
bivahojahi ida kidimahi jaꞌdini,
vaꞌini jahajahani hiki jaboni.
7 Ijaꞌari kidimahi ꞌboꞌda vaꞌini binahonariahihivini mani ida Deu-ra kaimajaharavini hija.
Ni-binaabaki ida Deus kavaꞌisohihi jiriki.
Ni-bikaabokaki binaabavini.
8 Ijaꞌari kidimahi ꞌboꞌda athini-ra naabakia ni-bikaabokaki ida hojai Deua khai biniꞌaki.
9 Deus Maꞌonahana Jahaki avavaꞌini bodinia ibaviha;
athi aꞌonira navaꞌisohibakhiavini hiki-ra avanaabahi.
Ni-avanaabajanaki ida athi avakadimahi ꞌboꞌda aꞌonira navaꞌisohibakhiavini hiꞌiki.
Ijaꞌari vaꞌini bodinia ibaviriha ada Deus Maꞌonahana;
ni-Cristo kaijaꞌari hiki.
10 Cristo avaꞌi bodinia ibaviha;
Maꞌonahai Jahaki amaꞌonahana-ra nahokikaꞌoaha.
Hojai asohirikia akahojaiꞌina mani ida ariabono niha nini hahavi-ra naabinija bana.
Deus akadimahi-ra nasohikaꞌoavini mani ida Maꞌonahai Jahaki amaꞌonahana-ra nahokikaꞌoavini hiꞌia.
11 Deus vania bianahokiꞌara ada Jesus abiniꞌina naothinia.
Avaꞌi bodinia Deus Maꞌonahana Jahaki ibaviha;
ariabinina naothinia ovaria bianahokiki bana ida ariabono niha nini hahavi.
Jesus Cristo-ra anahokivini vani fori hini,
danona haria anahokivini bana jaboni.
12 Hari.
Oigamina,
Deus haria kajoamoravini mani ida hojai bivajaharikia akabadanina-ra najaharija.
Haria kajoamoravini mani ida hojai bivajahakia akabadanina-ra najahaja.
13 Avahokini oadani hidiaja avakadimahi ꞌboꞌda athini-ra avanaabahi;
avaabiniki bana aꞌoni,
Ibavi Jaharikaꞌoakia avarikhaki bana aꞌoni.
Avahokini oadani hidiaja avavaꞌahaha ada Maꞌonahai Jahaki aꞌonira kakodiavini avakadihojai ꞌboꞌda-ra avanihimavinia;
avahokihaꞌoadahahi Deus Ibavi Jahakaꞌoakia.
14 Deus kaisai vihiki adani ijaꞌari Maꞌonahai Jahaki vaꞌora bananiki.
15 Deua bikaronaꞌiki ada Maꞌonahai Jahaki akadiania.
Honai abono gathaki kakaꞌdaꞌdia bihonariavini fori hirihi ida Maꞌonahai Jahaki aꞌonira honariavini.
Ni-aꞌonira avadadamiki ada Maꞌonahai Jahaki.
Ni-aꞌonira naofiniki.
Ovani ada Deus kaisai haria nihara.
Maꞌonahai Jahaki danona avaꞌi bodinia hojani mani ida akadikhaiinia Deu-ra aniꞌavini hija:
“Biꞌi kaꞌoa i!”
16 Deus kaisai arihina-ra aogavini hiki Maꞌonahai Jahaki avaꞌi bodini-ra anigahivini.
17 Deus kaisai arihina mani ida kidinahina kidijaꞌari-ra kaibavijahahijoravini hiki-ra agathanivini hija bana.
Cristo khama agathaniki bana ida Deua binaibavijahaꞌiki kidimoni jaboni.
Hidiaja akapoariki ida avaꞌi rogo inini,
aimana ꞌbanani hiki,
Cristoa bikapoarivini fori hiki,
oniani ida danona,
jahana,
ogahana,
vagana hiki-ra agathanijabanavini hija Cristo kania.
Deus kaisai vakadimahi jahakaꞌoani kamahini kavaranihi
18 Hari.
Araboja arihojana oadani akamithabakhiaki ida avaꞌi rogo inini,
aimana ꞌbanani hiki.
Deus ibavia arihojana kamahini khai aniꞌakarahoki bana ida jahana,
danona,
vagana,
ogahana hikia haria noꞌavini.
Oogajahakiki ida akadikhaiini avaꞌi rogo inini-ra aradavini arafiani bana.
19 Hahavi Deua binamonahaꞌikia vanaviahanokhavini vakavaꞌijorojorovini avakavaꞌidadadakarahoki ida Deua bivavaꞌisohihijoraki bana:
—Hihadani ijaꞌari aꞌonira onanokiahivini vihiki kodisai vihiki hadani.
Vakadimahi jahani kodisai kaꞌoa kamahi jahani fori vihiki hadani — vaꞌora niꞌaki bana adani kidiamonahi hahavi.
20-21 Makhira miroꞌa Deus athi-ra naabaravini kari kamaꞌdaꞌiki ida Deus kamonahi hahavi jaharini,
oniani ida kidinahina hahavi najaharini hija.
Kamaꞌdaꞌiki ida abini,
araꞌokhoꞌini,
aꞌbaxaꞌini,
imani ꞌbanani jaboni.
Hojaꞌimariniki fori hiki ida.
Gathaki fori hiki ida Deus kamonahi hahavi.
Deus kamonahia ni-binofiki ida hojaꞌimarinini.
Deus vania bihonariaja ida.
Deua binaviahanokhaki ida mahi kidiamonahi-ra najahaꞌianavini,
gathaki fori hijanaria kaimoni.
Deua binihimahahaviki bana ida ijaꞌari kamahi-ra najahariki.
Deua bianajaꞌdihahaviki bana jaboni ida kidiamonahi.
Deus kaisai hahavi,
kidiamonahi khama vavahojajabanaja kaimoni ida vakadimahi jahani arafiaki.
22 Kidiamonahia binokhavini oadani,
bikamithaki ida imai ꞌbanani,
gamo ꞌbanarahaki imani ꞌbanani-ra kamithavini fori hiki,
oniani ida bodini naꞌithoni hija.
23 Kidiamonahi kaꞌoa hirihi ida bodini ithoki.
Harivani jaboni abodi ithoki hari.
Harivani agathaniꞌiki ada Maꞌonahai Jahaki Deus haria kakaronavini hiꞌiki,
aogaja kaimoni ida kidinahina hoariha haria noꞌavini hiki bana.
Harivani abodi ithoki anokhavini oadani ida Deus haria kanaisaihavini kamahini,
bianajaꞌdiki jaboni ida ariabono niha nini hahavi.
24 Ajahakaꞌoana-ra anokhavini oadani,
Deus haria akavaꞌijoaꞌiki hari.
Aogaki ida haria navaꞌiponiꞌimariniravini.
Asia anaviahanokhaki ida namithaki akadiania.
Anokhaki-ra agathanija vaha;
ni-anokhajanaki vaha.
Haria najahakaꞌoavini namithaja vaha;
ni-anokhajanaki vaha.
25 Anokhaki ida nokiaꞌiariki namithani akadiania.
Ni-akavaꞌipahiniki ida anokhavini.
26 Maꞌonahai Jahaki haria kakodiavini hiki ida Deu-ra vara aniꞌavini.
Deu-ra avakaijokavini danorini mani ida Deu-ra vara aniꞌavini niha ninini-ra aogajahakiravini hija.
Avaꞌi bodinia Maꞌonahai Jahakia bikanikhariadanokiki ada Deus akadimoni hina.
Bodi ithoni fori hiki hida Maꞌonahai Jahaki athi ijaꞌaria biogariki nahina hini.
27 Deua biogahahaviki ida ijaꞌari kavaꞌibodivarani.
Biogaki ida Maꞌonahai Jahaki kakanikhari kavarani Deu-ra kanikhariadanokivini kidijaꞌari vakadimoni.
Maꞌonahai Jahakia biogajahakiki ida Deua binofikia haria noꞌavini.
28 Aogaki ida nahina hahavi namithaki Deus kaijaꞌari vakadiania,
Deua binajahaki ida.
Hivaꞌoani ijaꞌari Deu-ra vanofijahakiki,
vaꞌora kaboaꞌiki badani binofikia vakabadanina.
29 Hivaꞌoani ijaꞌari Deus vaꞌora nagathogathoꞌboꞌdaꞌiki,
Deus vaꞌora anahoarihaꞌboꞌdaꞌiki adani jaboni kidisai kaꞌoa kahojaia vakahojaira kaimoni.
Ovari miroꞌa vakadiꞌaajo hira kaimoni igamina vaipohiki vahararana.
30 Oniaroa,
Deus vaꞌora kaboaꞌiꞌaha adani ijaꞌari vaꞌora anahoarihaꞌiki.
Deua binasohikaꞌoaki ida ijaꞌari bikaboaꞌiꞌiki vakadimahi,
vaꞌora kapoarira kaimoni.
Deus vaꞌora noꞌaꞌiki adani vaꞌora kapoariꞌiki jahana,
danona,
vagana,
ogahana hikia,
ovari fori vihira kaimoni.
Deus haria nanokiahivini hiki ida haria nakaidivavini arafiani
31 Hari.
Nahina mani hida kodivarani haria kaꞌojomoꞌivini hija?
Asia vara aꞌonira oniꞌaki ho avarigaja kaimoni.
Deus akadiania hojaki haria kajoamorara kaimoni,
oniani ida nahina haria kaabokaravini hija.
32 Ni-Deus haria kaathirivini hiki ada kidisai kaꞌoa,
bivaꞌahaꞌiki ada abiniꞌina akadimoni hahavi hina.
Abosirina vani bivaꞌahaꞌara ada kidisai akadimoni hina.
Bivaꞌahaꞌiki bana jaboni ida nahina hahavi akainamoki.
33 Hana hini vani vaꞌora akaraganahara adani Deus kaijaꞌari?
Deus haria nagathogathoꞌiki hari,
akadimahi sohikaꞌoani-ra kahivini,
oniani ida ijaꞌari Deus viaha haria akaraganahavini-ra kaabokaravini hija.
34 Hana hini vania bikaabokaja ida akadihojai jahariki abosini haria arakhavini?
Ni-nahina bikaabokaki ida Ibavi Jaharikaꞌoakia haria karonavini akadihojai abosini.
Jesus Cristo abiniꞌiki akadimoni hina,
ahokiꞌiki jaboni ada,
okasiꞌiki ada Deus pitana aniaja hojaꞌaha.
Kaꞌdaꞌdi danoki kani ida ibavi.
Jesus Cristoa bikanikhariabakhiaki akadimoni Deus viaha.
35 Ni-nahina bikaabokaki ida Cristo saꞌa kabodinia haria saarivini,
binadabaja kaimoni ida haria nakaidivavini.
Nahina avaꞌi-ra rogo aniꞌavini kabaꞌi,
Cristo asia haria nakaidivaki hari.
Aimana ꞌbanani kabaꞌi,
Cristo asia haria nakaidivaki hari.
Ajahariharina kabaꞌi,
avaiꞌamina kabaꞌi,
akanahinarina kabaꞌi,
Cristo asia haria nakaidivaki hari.
Nahina haria kahidakamarivini kabaꞌi,
ariabinina kabaꞌi,
asia Cristo haria nakaidivaki hari.
Ni-nahina bikaabokaki ida Cristo haria nakaidivavini-ra nadabavini.
36 Deus athi kapapirani kania hojaki hida athi:
“Kadaijaꞌari arihina
mani ida mahi hahavi
ijaꞌari haria vanaabinivini-ra vanofivini hija.
Ovilia osahi hina abinira
kaimoni onivani fori hija
ida haria vanajahariharibakhiavini.”
Nihi ida athii.
37 Ni-nahina bikaabokaki ida Cristo saꞌa kabodinia haria saarivini haria nakaidivajanarara kaimoni.
Cristo haria kakodiahaꞌoadahavini,
akaabokaki ida nahina hahavi namithaki akadiania.
38 Oogajahakiki ida nahina haria saarivini-ra kaabokaravini Cristo saꞌa,
haria nakaidivajanarara kaimoni.
Ni-makhaniki ida ariabinina,
arihokina,
asia haria nakaidivavini.
Ni-Deus ibavi kaijaꞌarini,
ni-kaꞌdaꞌdi vanokiariki nama vahojaki,
ni-nahina hoariha danoki nama hojaki,
ni-nahina bikaabokaki ida Cristo saꞌa kabodinia haria saarivini.
Ni-nahina namithaki hidakabaꞌi,
ni-nahina namithaki kaimoni mahi hoariha,
ni-bikaabokaki ida Cristo saꞌa kabodinia haria saarivini.
39 Ni-nahina ibavi arabo namania hojakia,
ni-nahina ibavi arabo naboꞌania hojakia,
ni-bikaabokaki ida haria saarivini Cristo haria nakaidivajanaria kaimoni.
Ni-hahavi amonahani hararania hojakia bikaabokaki bana ida Deus haria nakaidivavini-ra nadabavini.
Akadikaꞌdaꞌdi Jesus Cristo haria nanokiahivini hiki ida niha ninini Deus haria nakaidivavini arafiani.