Paulo karajomi ida makhira kidigamo khama vaabono vakavahojakhamavini
7
Hari.
Oigamina,
avarigajahakiꞌiki hida varani aꞌonira vara oniꞌavini hiki bana.
Avarigaki ida arabo kakaꞌdaꞌdini kavaꞌisohihi jiriki nahina binofiki nahina binofiriki,
kidiarabo kaijaꞌarinia bada vaniꞌaja kaimoni.
Arihokina oadani anaabaki ida arabo kakaꞌdaꞌdini kavaꞌisohihi jiriki.
Ariabiniꞌina naothinia ni-anaabajanaki.
2 Vara ovaniꞌaki bana ida vaꞌisohihi jiriki hoarani,
gamo kamakhiraki-ra honariaki.
“Kadamakhira
hokina oadani
hariꞌa inahojaha.”
Niki hida vaꞌisohihi athini.
Kidimakhira abiniꞌina naothinia ni-vaꞌisohihi jirikia bihonariajanaki ida gamo kaariha hiꞌini kidimakhira kohana kania hojani.
3 Hari.
Gamoa biviꞌomaha ada makhira hoariha,
kidimakhira kaꞌoa hokina oadani,
gamoa binaabarihi ida vaꞌisohihi jiriki.
Adultério oniki ida kidihojai asohipaꞌitxiriki.
Vaꞌisohihi jirikia bivaꞌahaki ida gamo akajaꞌdihiꞌianani,
kidimakhira abiniꞌina naothinia.
4 Oigamina.
Hari hiꞌiki hida kodirajomi.
Nini vani namithaja bana ida avakadiania.
Akavaꞌibodivaraniki ida Deus kavaꞌisohihi jiriki.
Abiniꞌiki ada Cristo.
Cristo kani aꞌoni.
Aꞌonivani Cristo abono niha nini hahavi aꞌoni,
oniani ida aꞌonira naabinijabanaja kidiania.
Ariabiniꞌina mani ida vaꞌisohihi jiriki haria kaabokajanaravini hija.
Cristo kaijaꞌari aꞌoni.
Cristo ahokiꞌina mani ida hojai jahaki Deua binofikia haria kanahojaiꞌia.
5 Cristo-ra aogaravini kari avaꞌahaꞌiki ida akadimahi ꞌboꞌda badani binofikia haria honariavini.
Deus kavaꞌisohihi jiriki haria kaabanivini mani ida hojai Deua bivajaharikia akahojaina-ra anaꞌbaꞌdija,
oniani ida asaꞌa,
abodi,
ariabono hahavia binofiki-ra bada aniꞌaꞌahapikivini hiꞌia.
Bada aniꞌavini mani ida amaꞌonahana-ra abaꞌoki fori nihaja.
6 Deus kavaꞌisohihi haria daboki fori hiki.
Hari.
Akadimahi ꞌboꞌda abiniꞌini mani ida Deus kavaꞌisohihi jiriki haria dabojanaravini hija.
Ni-Deus kavaꞌisohihi jiriki haria honariafiahajanaki.
Ihimiꞌiki ida vaꞌisohihi-ra anaabavini Deua binasohikaꞌoaja kaimoni ida akadimahi.
Maꞌonahai Jahaki maina ada avaꞌi-ra nahonariahihira.
Deus kavaꞌisohihi jiriki varani hini hida
7 Nahina mani hida kodivarani haria kaꞌojomoꞌivini hija?
Jaharia koda ida Deus kavaꞌisohihi jiriki?
Haꞌa.
Jahaki ida.
Deus kavaꞌisohihi jiriki hora kaꞌojomoꞌivini hiki ida nahina hini hojai asohiriki.
“Hariꞌa iakabai
ida hoariha kanahina”.
Vaꞌisohihi jiriki hora
kaabanirija vaha;
ni-oogaki vaha ida akabajahi nahina hini.
8 Kodimahi ꞌboꞌda hora navaꞌihokivini hiꞌiki ida Deus kahonari hora kaabanivini,
oniani ida nahina ipohiki-ra oakabaivini hija.
Hojarihi ida vaꞌisohihi hora kaabanivini;
ni-hojai asohirikia bikaabokaki ida hora kaboroborovini.
9-10 Oogaravini oadani ida Deus kavaꞌisohihi jiriki,
hokiki ida omaꞌonahana.
Deus hora kaabanivini-ra okamithaꞌavini vani onofivini arafiaꞌia ida hora kaabanivini hiki-ra onaabavini,
oniani ida omaꞌonahana-ra naabiniki fori nihaja.
Deus hora navaꞌisohivini hiꞌiki ida kidikaabanahi,
ohokihahaꞌoadahaja kaimoni viaha.
Oniaro kari kodihojai asohiriki-ra onofivini mani ida Deus kakaabanahi hora kakodiaravini hija.
Oniaro kari hojai asohiriki-ra onofivini mani ida omaꞌonahana-ra naabiniki fori nihaja.
11 Hojai asohiriki ovaꞌi bodinia ahojani mani ida hora korijanahaꞌia.
Jahaki ovanihaki ida kodihojai Deus viaha.
Deus kahonari-ra onaabavini-ra okaabokarihi,
oniani ida kodihojai asohiriki omaꞌonahana-ra naabiniki fori nihaꞌia.
12 Hari.
Jahakaꞌoaki ida Deus kavaꞌisohihi.
Jahakaꞌoaki,
asohiki ida Deus kahonari afohanana.
Ijaꞌari-ra kakodiaki kaimoni ida.
13 Kodivarani himanija koda ida Deus kavaꞌisohihi jahaki omaꞌonahana-ra naabiniꞌavini?
Iniani.
Ni-vaꞌisohihi jirikia binaabiniki.
Hojai asohiriki ovaꞌi bodinia ahojaꞌini mani ida omaꞌonahana-ra naabiniki fori nihaꞌia.
Oniaro kari hojai asohiriki hora navaꞌihokivini hiki ida Deus kavaꞌisohihi jiriki athini,
oniani ida kodihojai asohiriki omaꞌonahana-ra naabiniki fori nihaꞌia,
binanokiaja kaimoni ida hojai asohiriki jaharini arafiaki.
Deus kavaꞌisohihi jiriki hora nanokiahivini hiki ida hojai asohiriki ovaꞌi bodinia,
niha ninini kodimahi-ra najaharikaꞌoavini Deus viaha.
Ni-okaabokaki ida hojai asohiki-ra onofiki
14 Aogaki ida Deus kania kidivaꞌisohihi khani.
Ovari fori ohirina.
Kodivaꞌibodivarani ijaꞌari araboa namithaki kavaꞌibodivarani.
Honai abono kapavakarivahaki fori ohiꞌiki ho.
Oniaro kari kodihojai ꞌboꞌda asohiriki hora gathiki fori ohiꞌiki ho.
15 Ni-oogaki hida kodihojai niha ninini.
Ni-bada oniꞌaki ida badani onofiki.
Badani okaimajahariki vani ida bada oniꞌaja.
16 Hojai onofiriki-ra bada oniꞌavini vani ovaꞌi bodinia oogaja ida asohini Deus kavaꞌisohihi jiriki.
17 Ni-hovani oa bada oniꞌaki ida hojai ovajahariki.
Kodihojai ꞌboꞌda ovaꞌi bodinia ibaviki vania bada biniꞌaja ida.
18 Oogaki ida kodimahi ꞌboꞌda-ra ovahojavini oadani,
ni-nahina jahaki hojaki ovaꞌi bodinia.
Onofivini kabaꞌi ida hojai jahakia okahojaina,
ni-okaabokaki.
19 Ni-bada oniꞌaki ida hojai jahaki onofiki.
Hojai jahariki onofiriki vani ida bada oniꞌaja.
20 Bada oniꞌahi ida hojai onofiravini,
kabaꞌi ni-hovani oa bada oniꞌaki.
Kodihojai ꞌboꞌda ovaꞌi bodinia hojaki vania bada biniꞌaja ida.
21 Oogaki ida vaꞌisohihi namithani ovaꞌi bodinia.
Onofivini kabaꞌi ida hojai jahakia okahojaina,
ni-okaabokaki.
Okaabokaki ida hojai jahariki-ra bada oniꞌavini.
22 Hovani oa khai oniꞌaja ida Deus kavaꞌisohihi jiriki.
23 Ovaꞌi bodinia ovajahaki ida.
Kabaꞌi,
okamithaki hida vaꞌisohihi hoariha ovaꞌi bodinia.
Hojai asohiriki kavaꞌisohihi ida.
Hojai asohiriki kavaꞌisohihi,
Deus kavaꞌisohihi khama vaabono vakanadanodanokhamaki fori vihijamaꞌoki.
Hojai asohiriki kavaꞌisohihi hora gathiki fori ohina mani ida kodihojai ꞌboꞌda ovaꞌi-ra nahonariahihivini hija.
24 Makhira khaii niriki ohiꞌoamanija!
Nahina vani oabono-ra akavaꞌijoaꞌia oarakhavaharija kaimoni Ibavi Jaharikaꞌoakia?
25 Khai oniꞌaki ada Deus.
Ovani oa ada hora kajoamorara.
Bikaronaꞌiki ada akadikaꞌdaꞌdi Jesus Cristo hora akavaꞌijoara kaimoni.
Hari.
Nimania hida kodimahi vara ovaniꞌaꞌiki.
Hovani oa ovajahaja ida Deus kavaꞌisohihi jiriki.
Kodivaꞌibodivarania onaabavini onofiki vanivaha ida.
Kabaꞌi,
kodimahi ꞌboꞌda bada biniꞌaki ida hojai asohiriki kavaꞌisohihi hora honariaki.