Ijaꞌari kamahi jaꞌdini anokhomirini varani hini
6
Asohimanija koda ida hojai asohirikia akahojaibakhiana,
Deua bianaꞌbaꞌdija kaimoni ida haria kajoamoravini?
Iniani.
Ni-asohipaꞌitxirihi ida naꞌdohi.
2 Ihimiꞌiki ida akadimahi ꞌboꞌda hojai asohiriki-ra vajahaki.
Ni-asohipaꞌitxiki ida asia hojai Deua bivajaharikia akahojaibakhiana.
3 Avarigaria koda ida kanai karajomihi kavaranihi?
Akanaꞌina vani aakaramisiꞌia Jesus Cristo kania.
Jesus Cristo abono-ra vaꞌahaꞌiki abiniꞌina akadimoni hina.
Akanaꞌina kari avaꞌahaꞌiki ida akadimahi ꞌboꞌda abiniꞌini kidiania.
4 Abiniꞌina naothinia kaꞌdamahaꞌaha ada Cristo.
Akanaꞌina vani paha akaꞌdamahaꞌiki fori arihija.
Kaꞌdamahaki fori hiki ida akadimahi ꞌboꞌda Cristo abaꞌona kaꞌdamahani ꞌdihania.
Abiniꞌina naothinia akadiabiꞌia binanokiaꞌiki ida danona jahaki arafiaki,
bianahokiꞌiki ada kidisai.
Onivani fori hija ida namithaki akadiania.
Deus haria anahokiꞌiki hari,
bianajaꞌdiꞌiki ida akadimahi,
hojai jaꞌdinia akahojaija kaimoni.
5 Cristo abiniꞌina vani ariabiniꞌiki fori arihija jaboni,
oniani ida Cristo khama ariabono akanakaramisikhamavini hija.
Cristo kania aakaramisina mani ida Deus haria anahokivini hija bana,
Cristo-ra anahokivini fori hikia.
6 Aogaki ida ava akasanakhamakia Cristo abiniꞌina,
akadimahi ꞌboꞌda abiniꞌiki jaboni kidiania.
Abiniꞌiki ida akadimahi ꞌboꞌda,
haria kaabokajanaria kaimoni ida hojai Deua bivajahariki,
hojai asohiriki danoni avaꞌi-ra nahonariahihijanaria kaimoni.
7 Ijaꞌari abiniꞌihi;
ni-kidihojai asohirikia bikaabokajanaki ida vaꞌini honariahahani.
8 Cristo abiniꞌina kania ariabiniꞌiki fori arihihi;
ni-aahokina-ra akajariꞌdaki bana jaboni kidiania.
9 Aogaki ida Cristo abiniꞌina naothinia Deua bianahokiꞌavini.
Ni-abinijanaki.
Ni-abinia bikaabokajanaki ida Cristo-ra naabiniꞌianavini.
10 Hoaranija kaꞌoa abiniꞌina,
ni-hojai asohirikia bikaabokapaꞌitxiriha ada.
Ahokiꞌina naothinia Deus kania ajahamisikaꞌoaꞌiki ida kidimahi.
11 Vakavaꞌibodivarani bana ida avakadimahi kidimahi fori hini.
Avakadimahi ꞌboꞌda ihimiꞌiki,
hojai asohiriki avavaꞌini-ra nahonariahihijanaria kaimoni.
Avakadimahi jaꞌdini hokini Jesus Cristo kania avarakaramisikaꞌoaki aꞌoni,
avarajahamisikaꞌoaja kaimoni Deus kania.
12 Hariꞌa vavaꞌahajana ida hojai asohiriki avaabononi niha nini-ra honariavini mahija avakadimahi ꞌboꞌda bikavaꞌinofinofiki-ra avanaabaravini.
Ni-hokihahaꞌoadahaki bana ida ijaꞌari abononi niha nini.
13 Hariꞌa vakavaꞌaha ida avasaꞌani,
avaꞌdamani,
avabodini,
avaabononi niha nini hahavi bada biniꞌaria kaimoni ida hojai Deua bivajahariki.
Deus kania avaabononi niha nini hahavi-ra vavaꞌahaꞌa.
Ijaꞌari abaꞌoki fori avihijanarihi.
Deus aꞌonira anahokiꞌiki aꞌoni.
Deus kania avaabononi niha nini hahavi-ra vavaꞌahaꞌa mahija badani asohikaꞌoaki Deua binofikia avakabadanini aꞌonira kakodiara kaimoni.
14 Hariꞌa vavaꞌaha bana ida hojai Deua bivajahariki avavaꞌini-ra nahonariahihivini.
Ni-Deus kavaꞌisohihi jirikia bihonariafiahajanaki ida akadimahi.
Deus haria kajoamoravini hiki ida akadimahi-ra nasohikaꞌoavini avakaijokara kaimoni.
Deua binofiki ida hojai jahakia akahojaina.
15 Nahina nimania hida kodivarani?
Avaꞌi-ra nahonariahihijanaravini kabaꞌi ida vaꞌisohihi jiriki,
ni-jahapaꞌitxiki ida hojai asohirikia akahojaina.
Deus haria kajoamoravini mani ida avaꞌi-ra nahonariahihija.
16 Hari.
Avarigaki ida hoariha avavaꞌini-ra nahonariahihivini-ra avavaꞌahavini,
ovari avakadikaꞌdaꞌdi hiki bana,
aꞌonivani kidihonai abono gathaki avihiki aꞌoni jaboni.
Hari.
Hojai asohiriki-ra avanaabahi;
avakadikaꞌdaꞌdi fori hihi;
avaabinihi.
Deus athi-ra avanaabahi;
avakadikaꞌdaꞌdi hiha;
avakadimahi sohikaꞌoani-ra kahiha.
17 ꞌBoꞌdakari hojai Deua bivajahariki kahonai abono gathaki avihiꞌiki aꞌoni.
Hari maha.
Khai aniꞌaꞌiki hada Deus.
Avakamithaꞌihi ida moni kaꞌoa hini,
avavaꞌini bodinia avavakaijokahi,
avanaabajahakiꞌihi ida ojomoꞌihi athini avakaꞌojomoꞌiꞌiki.
18 Deus aꞌonira akavaꞌijoaꞌiki aꞌoni,
hojai asohiriki avavaꞌini-ra nahonariahihijanaria kaimoni.
Deus kahonai abono gathaki maina avihiꞌiki aꞌoni,
bada avaniꞌaja kaimoni ida hojai sohikaꞌoaki aꞌonira honariavini hiki.
19 Avakamithabakhiaꞌavini kabaꞌi,
ni-avarigajahakiꞌiaki kaho hida varani,
oniani hida athii ijaꞌaria biogahahaviki-ra vara ovaniꞌavini hija bana.
Aꞌonira okavarajomivini hiki honai abono gathaki fori avihini,
kodivarani nahina nini-ra avarigaja kaimoni.
Cristo-ra avarigaravini kari avakavaꞌahaꞌiki ida avasaꞌani,
avabodini,
avaabononi niha nini hahavi hiki,
bada avaniꞌaja kaimoni ida hojai jahariki,
badani karamonavahaki hiki.
Oniaro kari hojai jahariki kahonai abono gathaki avihiꞌiki aꞌoni.
Hari.
Onivani fori hija hida aꞌonira ohonariavini hiki,
avasaꞌani,
avabodini,
avaabononi niha nini hahavi hiki-ra avavaꞌahavini Deus kaimoni,
bada avaniꞌaja kaimoni ida kidibadani sohikaꞌoani,
kidihojai hiki,
Deus kahonai abono gathaki avihija kaimoni.
20 Hojai asohiriki kahonai abono avihini kari,
ni-avakavaꞌibodiki ida Deua binofikia avakabadanini,
ni-kidihojaia avakahojaiki jaboni.
21 Ni-nahina jahaki-ra avagathaniki,
avakadihojai ꞌboꞌda abosini.
Hari maha.
Avavaꞌini-ra anaipahihiki ida avakadihojai ꞌboꞌda.
Abiniꞌiki bana ida ijaꞌari nikia kahojaiki.
22 Hari.
Deus aꞌonira akavaꞌijoaꞌiki aꞌoni,
hojai asohiriki avavaꞌini-ra nahonariahihijanaria kaimoni.
Avakaabokaki ida hojai asohiriki-ra avakajoniꞌavini.
Deus kahonai abono gathaki avihimainaꞌia.
Avagathaniꞌiki ida avakadimahi sohikaꞌoaki,
kidiania avaabononi gahinai avanihaꞌavini,
oniani ida avakadimahi jahaki,
jaꞌdini,
anokhomiriki-ra avavahojavini hija bana Deus kania.
23 Abosiki bana ida hojai asohiriki.
Hojai Deua bivajahariki abosini ida ijaꞌari abinini kamahini Ibavi Jaharikaꞌoakia okhani.
Ni-abosiki ida Deus haria kajoamoravini.
Deua binoꞌaꞌiki ida ijaꞌari bikajoamoraꞌiki kidimahi jahaki,
jaꞌdini,
anokhomirikia.
Akadikaꞌdaꞌdi Jesus Cristo kania akaramisiki ida ijaꞌari.