Deus ijaꞌari vakaijokana hiki kamahi sohikaꞌoani-ra kahiki
5
Hari.
Oniaroa Deus haria kapoarivini hiꞌiki avakaijokavini,
akadimahi sohikaꞌoani-ra kahiꞌiki ada.
Nimania hida akadikaꞌdaꞌdi Jesus Cristo haria kajoamoraꞌavini.
Akhanina vani Deus kania aajahamisija.
2 Cristo-ra avakaijokavini mani ida Cristo haria vamaakarivini hija Deus kania,
agathanija kaimoni ida Deus haria kajoamorahaꞌoadahavini.
Akhanina vani arihojaja.
Anokhavini oadani khai aniꞌaki ida Deus jahana,
vagana,
danona,
aagahai hikia haria noꞌavini bana.
3 Anokhavini oadani khabakhiaki ida avaꞌi-ra rogo aniki.
Avaꞌi rogo inini haria kaꞌojomoꞌivini hiki ida Deu-ra anokhavini-ra akavaꞌipahiniravini,
oniani ida avaꞌi rogo inini kabaꞌi,
khai haria niꞌaja.
4 Avaꞌi pahinirini-ra akaꞌojomoꞌivini naothinia Deus haria khai niꞌaki,
haria niꞌaha:
—Jahaki ida avavaꞌini pahinirini-ra avarigavini — oniani ida Deus haria navaꞌisohijoravini hiki-ra anokhavini hija.
5 Deu-ra anokhahi;
ni-haria navaꞌiponiꞌimariniki.
Deua bikaronaꞌiki ada Maꞌonahai Jahaki avaꞌi bodinia ibavira kaimoni.
Maꞌonahai Jahaki vani haria nanokiahivini hija ida niha ninini Deus haria nakaidivajahakivini karahoni.
6 Deua bikanamahiꞌiki ida Cristo abiniꞌina akadimoni.
Cristo abono-ra vaꞌahaꞌiki abiniꞌina ijaꞌari hojai jaharikia vakahojaiki vakadimoni hina.
Oniaro kari ni-akaabokaki ida ariabono akavaꞌijoavini.
7 Ni-ijaꞌari abononi vaꞌahaki abinini,
abiniria kaimoni ida hoariha vaꞌisohihi jiriki-ra naababakhiaki.
Ijaꞌari abononi vahabini vaꞌahaki abinini,
abiniria kaimoni ida ijaꞌari kakodiava abono.
8 Deus vania binanokiaja ida ijaꞌari-ra nakaidivavini arafiani.
Hojai Deus bivajaharikia akahojaibakhiana oadani vani Cristo abono-ra vaꞌahaꞌaha abiniꞌina akadimoni hina.
9 Jesus amana ahovariꞌini mani ida Deus haria kapoarivini hija,
akadimahi sohikaꞌoani-ra kahivini hija jaboni.
Akadimahi sohirini kari nimania hida Cristo haria kajoamoravini hiꞌiki.
Hari maha.
Cristo haria kajoamoravini arafiaꞌiki bana hari afoꞌiana.
Deus kidihamahi-ra nanokiavini kamahini Cristo haria akavaꞌijoaki bana hari,
agathaniria kaimoni ida hojai asohiriki abosini.
10 Deu-ra akaimajaharavini kari Cristo abiniꞌina mani ida Deus kavaꞌahi haria nihaꞌia.
Hari maha.
Deus kavaꞌahi ariꞌiki hari.
Cristo ahokiꞌina mani ida haria akavaꞌijoavini hiꞌia bana.
11 Ida asia hojahi haria kajoamoravini kavaranihi.
Deu-ra khai aniꞌavini hiki ida akadikaꞌdaꞌdi Jesus Cristo haria kajoamoraꞌavini Deus kavaꞌahi arihija kaimoni.
Adão kohana Cristo khama varani vihina hida
12 Hari.
Oniaroa,
makhira hoarana imidia binakamaꞌdaꞌia ida hojai Deua bivajahariki.
Makhira miroꞌa-ra naabiniꞌiki hojai Deua bivajahariki-ra namonahavini.
Ijaꞌari hahavi vanamitharonisiagaki vaꞌoaniaro maina hojai Deua bivajaharikia vakahojaiki,
oniani ida vaꞌora naabinihananaja jaboni.
13 Deus kidivaꞌisohihi jiriki-ra vavaꞌisohihivini viahania ijaꞌari hahavi araboa vahojakia bada vaniꞌabakhiaki ida hojai Deua bivajahariki.
Hojarini oadani ida vaꞌisohihi jiriki,
ni-Deua bianavathaki ida ijaꞌari kahojai asohiriki.
14 Moisés namithaꞌiarina oadani,
vahoarahanana vaabiniꞌiki adani Adão kaijaꞌari vanamitharonisiagaki.
Adãoa ni-binaabaki ida honari Deua binavaꞌisohijoravini hiꞌiki.
Ni-ijaꞌari hahavi vakadihojai asohiriki Adão kahojai asohiriki fori hiki.
Kabaꞌi,
hojai Deua bivajaharikia vakahojaiꞌina mani ida vaꞌora naabinihananaꞌia.
Vaꞌora okavarajomiki adani Adão,
makhira hoariha khama.
Oniaro kari khaꞌiariha ada ovari.
Adão fori hiriha ada Jesus Cristo.
15 Deus kakajoamorahi fori hirihi ida Adão kahojai asohiriki.
Kaꞌoa hiki hida varani.
Makhira hoarana kahojai asohiriki ijaꞌari vaipohiki-ra vaꞌora najahariꞌiki,
oniani ida vaꞌora naabinihananaꞌia.
Hari.
Jahani arafiaki ida Deus ijaꞌari-ra kajoamoravini.
Makhira hoarana Jesus Cristo onikia binanokiajahakiki ida Deus kakajoamorahi jahani.
Ijaꞌari vaipohiki vagahinana hiki ida Deus vaꞌora kajoamoravini.
Ni-vanaabosiki.
16 Deus kakajoamorahi fori hirihi ida hojai asohiriki makhira hoarana bada biniꞌaꞌiki.
Hojai asohiriki hoarani-ra namonahavini naothinia Deua biniꞌaꞌaha:
—Kadamahi sohirini mani ida hojai asohiriki abosini-ra igathanivini hija bana — Adão-ra niꞌaha ada Deus.
Ijaꞌari hojai asohiriki ipohiki-ra vanamonahavini kabaꞌi,
Deus vaꞌora kajoamoraꞌiki adani.
Jesus Cristo vakadihojai asohiriki bianiꞌavini mani ida vakadimahi sohikaꞌoani Deua bikahivini hija.
17 Kaꞌoa hiki hida varani.
Makhira hoarana hojai asohiriki-ra namonahaꞌiki,
oniani ida ijaꞌari hahavi vahoarahanana vaabinina-ra nakamaꞌdaja.
Ni-vakaabokaki ida vaabinirina.
Hari.
Makhira hoariha vania binakamaꞌdaꞌia ida ijaꞌari abinirini.
Arafiaki ida Jesus Cristo ijaꞌari-ra kajoamoravini jahani.
Ijaꞌari Deua bikapoariki,
kidikajoamorahia gahinaki,
kidimahi sohikaꞌoani Deua bikahiki,
oniani ida ijaꞌari kidimahi jaꞌdini-ra vakaꞌdaꞌdivinia Cristoa biakodiavini hija.
18 Oniaroa.
Makhira kabadani hoarani asohirikia binakamaꞌdaꞌiki ida ijaꞌari hahavi nahina jaharikia vagahinana Ibavi Jaharikaꞌoakia.
Makhira hoariha kabadani sohikaꞌoaki vania binakamaꞌdaꞌia ida hojai asohiriki-ra naꞌbiravini.
Ni-vagahinajanaki vakadihojai asohiriki abosinia,
oniani ida vakadimahi anahokikaꞌoani hija.
19 Hari.
Makhira hoarana Deus athi-ra naabariki,
oniani ida ijaꞌari vaipohiki hojai jahariki namonahava abono vaꞌora nihaja.
Ovari fori hiriha ada makhira hoariha Jesus Cristo oniki.
Ovari Deus athi-ra naabakaꞌoaꞌiki,
oniani ida ijaꞌari vaipohiki vakadimahi sohikaꞌoani Deua bikahivini hija,
vaꞌora kapoariki adani jaboni.
20 Deua binanamithavini hiki ida kidivaꞌisohihi,
aꞌbaꞌdija kaimoni ida hojai asohiriki.
Aꞌbaꞌdihi ida ijaꞌari kahojai asohiriki,
aꞌbaꞌdini arafiahi ida Deus ijaꞌari-ra kajoamoravini jaboni.
21 Hari.
Nimania hida varani anokhomihaꞌini.
Danoki ida hojai asohiriki.
Ijaꞌaria ni-bikaabokaki ida bada biniꞌaravini,
oniani ida naabinini hiꞌia.
Danoni arafiaki ida Deus kakajoamorahi.
Akadikaꞌdaꞌdi Jesus Cristoa bikaabokaki ida hojai asohiriki-ra anivini,
ijaꞌari kamahi-ra nasohikaꞌoavini Deus viaha,
oniani ida Deus ijaꞌari-ra kapoarivini hija,
kidijaꞌari vihira kaimoni.
Jesus Cristoa binoꞌaꞌiki ida ijaꞌari kidimahi jaꞌdini anokhomirikia.