Abraão kohana varani hina hida
4
Hari.
Oniaroa vara ovaniꞌaki bana ada Abraão kohana.
Akadijaꞌari kaꞌarahoda okhananavaki ada.
Aꞌonira onanamithavini hiki ida nahina namithaꞌiki kidiania.
2 Badani sohikaꞌoaki abosini hija vaha ida Deus Abraão-ra kapoarivini;
Abraãoa bikaabokahi vaha ida kidibadani sohikaꞌoania abono-ra vaboroborohavini.
Ni-sohikaꞌoaki ida kidibadani afohaꞌoadaha Deus viaha.
3 Deus athi kapapirania hojaki hida Abraão varani hina:
“Abraão Deu-ra vakaijokavini mani ida
kidimahi sohikaꞌoani Deua bikahivini hiꞌia.”
Nimania hida Deus athi.
4 Hari.
Ijaꞌari kidikariva kabadania kabadanikia bigathaniki ida kidibadani abosini.
Ni-kariva kidihonai abono-ra kanavaꞌigavini hirihi ida badani abosini.
Honai abono kajiniro oamani ida.
5 Ijaꞌari Deus kabadania kabadanirini oadani abononi niꞌavini:
—Ni-ovakaijokaki ida kodibadania okabadanina,
kodimahi sohikaꞌoani Deua bikahija kaimoni.
Deu-ra ovakaijokavini mani ida hora kapoarivini hija,
kodimahi sohikaꞌoani-ra kahivini hija jaboni — nimania ida ijaꞌari Cristo-ra kavaꞌibodivaraniki,
oniani ida Deua bikapoarivini hija.
Ijaꞌaria biragarivini kabaꞌi ida hojai asohikia kahojaini,
Jesu-ra vakaijokavini mani ida kidimahi sohikaꞌoani Deua bikahivini hija.
6 Hari.
Davi kohana jaboni vara bivaniꞌaꞌboꞌdaꞌiki hida ijaꞌari khaii nini kavaranihi.
Ijaꞌaria bada biniꞌavini kabaꞌi ida hojai Deua bivajahariki,
Deua binasohikaꞌoaꞌiki ida ijaꞌari kamahi,
oniani ida kidimahi sohikaꞌoani Deua bikahivini khai niꞌani hija.
7 Davi kohana binajiriꞌiki hida athi:
“Vaꞌini khaii niki ida ijaꞌari
kidihojai asohiriki Deua bianiꞌiki,
Deua biakavaꞌiꞌbiriniꞌavini jaboni.
8 Vaꞌini khaii niki ida ijaꞌari
kidihojai jahariki Deua
bianavathariki,
ni-Deua bikavaꞌihokijanaki.”
Nihi ida Davi kohana athi.
9 Ijaꞌari siikosida karajomihi-ra vavahojaki vakadimoni kaꞌoa hirihi ida vaꞌi khaii nini Davia vara bivaniꞌaꞌiki.
Vahoariha vakarajomiriki vakadimoni ida jaboni vaꞌi khaii nini.
Vara aꞌonira oniꞌavini hiꞌiki hida Abraão varani hina Deus athi kapapirania hojaki:
“Abraão Deu-ra vakaijokavini mani ida
kidimahi sohikaꞌoani Deua bikahivini hiꞌia,
oniani ida Abraão-ra
kapoarivini hiꞌia.”
Nihi ida athii.
10 Abraão kohana karajomirina oadani Deua bikapoariki ada.
Ni-Deua binokhaꞌimidiaki ada Abraão siikosida karajomihia karajomina bikapoarira kaimoni.
11 Deua bikapoarivini naothinia siikosida karajomihia karajomiꞌaha ada Abraão.
Deus athi-ra kajariꞌdaravini mani ida Abraão-ra kanarajomivini hiꞌia siikosida karajomihia.
Abraão siikosida karajomihi-ra vahojavini mani ida Deu-ra vakaijokavini-ra nanokiavini hiꞌia,
oniani ida Deus Abraão-ra kapoarivini hija.
Oniaroa,
ijaꞌari hahavi Deu-ra vakaijokavini vakadiabiꞌi okhananavaki fori hiki ada Abraão kohana.
Siikosida karajomihi-ra vavahojaravini kabaꞌi,
Deus vaꞌora kapoariki adani ijaꞌari vakaijokana vihiki,
vakadimahi sohikaꞌoani Deua bikahiki adani.
12 Siikosida karajomihi-ra vavahojaki vakadiabiꞌi okhananavaki jaboni ada Abraão kohana.
Vakadirajomi kaꞌoa hirihi ida Abraão kohana-ra vakadiabiꞌi nihaja.
Deu-ra vavakaijokavini,
Abraão Deu-ra vakaijokavini fori hini,
oniani ida vakadiabiꞌi nihana hija.
Vakabanafoꞌiki ida Abraão kamahi karajomirina oadani,
ovari fori vihiꞌina Deu-ra vavakaijokahaꞌoadahavini.
Deua bivavaꞌisohihijorakia vagahinaki adani vakaijokana vihiki
13 Hari.
Deus vaꞌora navaꞌiponijoraꞌiki adani Abraão,
kidihanodi vanamitharonisiagaki vihiki:
“Aꞌonira onoꞌavini hiki bana ida hahavi
arabo hahavia hojaki
avavakaꞌdaꞌdija kaimoni.”
Niha ada Deus.
Deus kavaꞌisohihi jiriki-ra naabavini abosini hirihi ida Deus Abraão-ra navaꞌiponivini kaꞌdaꞌdi vihina kavaranihia.
Deu-ra vakaijokavini mani ida arabo hahavi-ra kavanoꞌaivini kavaranihia Abraão-ra navaꞌisohijoravini hija,
kidimahi sohikaꞌoani Deua bikahivini hija,
bikapoarivini hija jaboni,
oniani ida kidivaꞌiponahia binavaꞌisohivini hiꞌia jaboni.
14 Ijaꞌari hahavia varagariki ida Deus kavaꞌisohihi jiriki-ra vanaabavini.
Deus kavaꞌisohihi jiriki-ra naabavini abosini hija vaha ida kaꞌdaꞌdi vihina kavaranihi;
ni-ijaꞌaria vagathaniki vaha.
Vaꞌisohihi jiriki-ra vanaabaki vakadimoni hija vaha ida varani;
ni-Deu-ra vavakaijokaki vakadimoni hiki vaha.
Vakadimoni hija vaha;
ni-nahina kaimoni hiki vaha ida vakaijokana vihiki-ra navaꞌiponivini.
15 Deua bikaihamahiki ida ijaꞌari kidivaꞌisohihi naabarini hiki,
oniani ida nahina jahariki-ra karonavini hija bana ijaꞌari kania.
Hojarihi ida vaꞌisohihi;
ni-ijaꞌaria varagariki.
Hojahi;
varagarihi.
16 Abraão kohana Deu-ra vakaijokavini mani ida Abraão kaijaꞌari-ra vaꞌora kajoamoravini kavaranihi-ra vavaꞌisohihijoravini hiꞌia.
Deu-ra vavakaijokaha;
vaꞌora kajoamoraha.
Ni-ijaꞌaria vanaabosiki ida Deus kakajoamorahi.
Deus vaꞌora kajoamoraꞌoamanira adani Abraão kaijaꞌari vanamitharonisiagaki.
Nimania ida Deus Abraão-ra navaꞌisohijoravini hiꞌiki.
Vaꞌora kajoamoraki adani kidivaꞌisohihi naabani vihiki.
Vaꞌora kajoamoraki jaboni adani Deu-ra vavakaijokaki,
Abraão vani fori vihiki.
Ijaꞌari hahavi Deu-ra vavakaijokaki vakadiabiꞌi okhananavaki ada Abraão.
17 Deus athi kapapirania hojaki hida Abraão kohana varani hina:
“Arabo ipohiki kaijaꞌarini bana ira vanaonivini
akadiabiꞌi.”
Nihi ida athii.
Kaꞌoa hiki ada Deus,
oniani ida varani bivavaꞌisohihijoraki-ra nanamithavini hija bana.
Ovari Deus Abraãoa bivakaijokaki.
Ovari vaꞌora anahokiki adani ijaꞌari vaabiniꞌiki.
Ovaria jaboni bivahonariahiki ida nahina hojaꞌiariki hojani.
18 Abraãoa bivakaijokahaꞌoadahaki ada Deus.
Nokiaꞌiarini kabaꞌi ida Deua vara bivaniꞌaꞌiki,
Abraãoa bikajariꞌdarihi ida.
Binokhaki ida namithani,
oniani ida arabo ipohiki kaijaꞌarini vakadiabiꞌi nihana hiꞌia.
Nimania bana hida varani Deus athi kapapirania hojaki:
“Vâipohiki bana adani
kadaijaꞌari vanamitharonisiagaki.”
Niki hida Abraão varani hina.
19 Hari.
100 hini ipohini amaakariki ida Abraão kabadarana.
Asia bivakaijokadanokiki ada Deus.
Abono-ra kavaꞌibodivaraniha:
—Oꞌboꞌda hiꞌina abiniꞌiki hida oabono.
Ni-kodigamo Sara bikaabokaki ida isani — abono-ra niꞌaꞌaha.
20 Kabaꞌi,
ni-bikavaꞌipahiniki ida Deu-ra vakaijokavini.
Bikajariꞌdarihaꞌoadahahi ida varani namithaki kaimoni Deua bivavaꞌisohihijoraꞌiki.
Ni-vaꞌi kosakhamani hiki.
Deu-ra vakaijokavini mani ida Abraão jariꞌdarina-ra nadanoja.
Abraãoa bikanamasiviꞌoamanira ada Deus.
21 Abraão abono-ra niꞌaꞌaha:
—Oogaki ida Deus hora navaꞌisohijoravini hiꞌiki-ra kaabokavini.
22 Nina vani Deua bikapoarira ada Abraão.
Deu-ra vakaijokavini mani ida kidimahi sohikaꞌoani Deua bikahivini hija.
23 Deus athi jirikia vara bivaniꞌaki ada Abraão,
kidimahi sohikaꞌoani Deua bikahivini.
Kidimoni kaꞌoa hirihi hida athii.
24 Akadimoni jaboni hida athii jiriki.
Deus Abraão-ra kapoarivini hiki Deu-ra vakaijokavini.
Haria kapoarivini hiki jaboni bana Deu-ra avakaijokavini.
Akajariꞌdariha ada Deus.
Ovaria bianahokiꞌiki ada akadikaꞌdaꞌdi Jesus,
abiniꞌina naothinia.
25 Hojai Deua bivajaharikia akahojaibakhiana mani ida Deus Jesus abiniꞌina-ra vaꞌahavini hiꞌia.
Abiniꞌina naothinia Deua bianahokiꞌiki ada Jesus,
haria kapoarira kaimoni,
akadimahi sohikaꞌoani-ra kahira kaimoni ada Deus.