Asohikaꞌoaki ida Deus kahojai
3
Hari.
Vara ovaniꞌaki ida judeus kaijaꞌari vihikia vavahojaki,
judeus kaijaꞌari vihirikia ni-vavahojaki.
Judeus kaijaꞌaria vavahojaki ida siikosida karajomihi.
Vaꞌora kakodiamanija ida rajomi Deus viaha?
2 Haꞌa.
Jahaꞌoamanija ida judeus kaijaꞌari arihina.
Avahojaki ida nahina ipohiki,
vavahojariki.
Judeus kaijaꞌari avikhananavaki vaꞌoaniaro miroꞌa Deus vaꞌora navaꞌisohiꞌimidiavini hiki ida athi,
avakadavaꞌaja kaimoni ida athi jiriki.
3 Judeus kaijaꞌari vaipohikia vakavaꞌipahinivini kabaꞌi ida Deus vaꞌora noꞌavini hiꞌiki,
ni-Deua bikavaꞌipahinipaꞌitxiꞌiki ida athi vaꞌora navaꞌisohijoravini hiꞌiki.
4 Korijanahia vakavaranina kabaꞌi adani ijaꞌari hahavi,
Deus vani ada kaꞌoa hihahaꞌoadahara.
Ovaria bada biniꞌaki ida vaꞌora navaꞌisohijoravini hiꞌiki athi.
Deus athi kapapirania hojaki hida Deus varani hina pitani:
“Deus,
vara inini vani
ijaꞌari hahavia avigaja ida iathini kaꞌoa hini.
Ijaꞌaria vanofivini kabaꞌi
ida ira avakaraganahavini,
ni-nahina jahariki-ra
vakaragaki.
Asohikaꞌoaki ida kadahojai.”
Nihi ida athi Deus athi kapapirania hojaki.
5 Makhaniriki avavanihamanija ida hojai jaharikaꞌoaki,
nokiajahakija kaimoni ida Deus kahojai jahani arafiaki?
Joma bakibakinia binanokiajahakiki ida boviri vagana.
Onivani fori hija ida akadihojai jahariki Deus kahojai asohikaꞌoaki-ra nanokiajahakivini.
Jahamanija koda ida badani jaharikia akabadanina,
vahoariha vakaabokaja kaimoni ida Deus kabadani asohiki-ra vanokivini?
Iniani.
Asohirihi hida varani.
Asohiriki avavanihamanija koda ida Deus ijaꞌari-ra jaharikia arakhavini,
kidihojai jahariki abosini kaimoni hini?
Ijaꞌari Deu-ra ogariki kavarani fori hiki hida naꞌdohi.
6 Asohiꞌoamanija ida Deus ijaꞌari hahavi kahojai jahariki abosini-ra karonavini vakadiania.
Asohikaꞌoarara vaha ada Deus;
ni-bikaabokaki ida hojai asohiriki abosini-ra nasohivini.
7 Kodiꞌojomoꞌihi athini hirihi hida athii:
Korijanahia okavaranibakhiana ijaꞌaria vanokijahakihi ida Deus jahana,
vagana kaꞌoa hini,
oniani ida Deu-ra oakodiaki fori hora nihaja.
Kodihojai asohiriki Deu-ra kakodiahi;
ni-asohiki ida hora arakhavini nahina jaharikia kodihojai jahariki abosini hini.
Kodivarani hija vaha;
ni-asohipaꞌitxiki vaha hida oathi.
Ni-nikia okavaranirihi.
8 Jahamanija koda hida varani nikia akavaranina:
Hojai jaharikia akahojaina arafiava mahija Deus jahana nokiajahakivini?
Iniani.
Ni-asohipaꞌitxiki hida varani.
Ijaꞌari hora vakanavaranihavini nikia okavaranina-ra vakahivini.
Vagathaniki bana ida vakadivarani jahariki abosini.
Ni-hojaki ida ijaꞌari jahakaꞌoaki
9 Nimania hida kodivarani aꞌonira onavaꞌisohivini hiꞌiki.
Ijaꞌari hahavia bada vaniꞌaki ida hojai Deua bivajahariki.
Judeus kaijaꞌaria bada vaniꞌaki ida.
Judeus kaijaꞌari vihirikia bada vaniꞌaki ida jaboni.
Judeus kaijaꞌari arihina kabaꞌi,
ni-akaabokaki ida hojai asohirikia akahojairina,
oniani ida judeus kaijaꞌari arihina haria kakodiaravini hija Deus viaha.
10 Deus athi kapapirania hojaki hida athii:
“Ni-hojaki ida ijaꞌari
jahakaꞌoaki hojai Deua
bivajahaki-ra ragaririki.
11 Ni-hojaki ida ijaꞌari ogahaki.
Ni-hojaki ida ijaꞌari Deu-ra nakoꞌdiki.
12 Ijaꞌari hahavi vaadahajanariki Deus kahagihia,
vaabono avanakamadaki adani,
oniani ida vakadimahi-ra vanajaharavini hija.
Ni-hojaki ida ijaꞌari hojai
jahakia kahojaiki.
Ni-hoarani hojaki.
13 Karamonavahaki ida
vakadivarani.
Kaꞌdamahi ibavini kaꞌoahaꞌiariki ꞌbaxani fori hiki ida vakadivarani.
Vanofihahaꞌoadahaki ida hoariha-ra vakorijanahavini,
hoariha vaꞌini-ra vavajahara kaimoni.
Makha ꞌbanana ijaꞌari-ra napohimajavini fori hiki
ida vakadivarani jahariki vabodia khaonaniki.
14 Vabodia hojaki ida varani arapaki fori hiki.
Jahari-ra vibaranahavini
ijaꞌari hoariha-ra napohimajara kaimoni.
15 Ijaꞌaria binofijorakiki ida hoariha-ra nasiivini,
hoariha-ra naabinivini.
16 Ijaꞌari hojai jaharikia
vakahojaiki vanaothia
hojaki ida hahavi-ra vanajahariharivini,
nahina-ra vanihimavini.
17 Ni-avigaki ida hagihi fori hiki vaꞌi jahajahani
kania okhaki,
Deus kania avajahamisira kaimoni.
18 Ni-vakavaꞌibodivaraniki ida Deu-ra vifinivini.”
Nimania hida Deus athi kapapirania hojaki ijaꞌari hahavi-ra vara vaniꞌavini.
19 Hari.
Aogaki ida Deus kavaꞌisohihi jiriki hahavi judeus kaijaꞌaria vanaabaki kaimoni.
Deus athi-ra vanaabaravini mani ida arabo hahavi kaijaꞌarini-ra vaꞌora osanija Deus viaha,
oniani ida vakadivarani viso niꞌani hija.
Asohiriki ida avigaravini vakahivini.
Ijaꞌari hahavia vagathaniki bana ida vakadihojai asohiriki abosini Deua bikaronaki.
20 Deus ijaꞌari-ra noꞌavini hiꞌiki ida kidivaꞌisohihi jiriki,
ijaꞌaria biogaja kaimoni ida hojai asohiriki nahina hini.
Ni-Deua bikapoariki ida ijaꞌari kidivaꞌisohihi jiriki naabani hiki.
Ni-Deus athi naabani hirihi ida ijaꞌari-ra akavaꞌijoavini hija.
Ni-jahakaꞌoaki Deus viaha ida ijaꞌari.
Deus akadimahi-ra nasohikaꞌoavini varani hini hida
21 Hari.
Deua binanokiaki ida ijaꞌari kamahi-ra nasohikaꞌoavini niha ninini,
bikapoarija kaimoni ida ijaꞌari.
Ijaꞌaria binaabavini kabaꞌi ida vaꞌisohihi jiriki,
ni-Deus ijaꞌari kamahi sohikaꞌoani-ra kahiki.
Moisés kohana Deus kavaꞌisohihi-ra najiribiininivini kari vara bivaniꞌaꞌiki ida Deus ijaꞌari kamahi-ra nasohikaꞌoavini.
Deus athi namoniva abono kohana vahoariha vara vavaniꞌaꞌboꞌdaꞌiki hida ijaꞌari kamahi sohikaꞌoani kavaranihi jaboni.
22-23 Ijaꞌari Jesus Cristo-ra vakaijokavini mani ida Deua kidimahi sohikaꞌoani bikahivini hija,
oniani ida bikapoarivini hija.
Deua binasohikaꞌoaki ida Cristo-ra vakaijokaki kamahi hahavi.
Nimania ida ijaꞌari hahavi-ra vaꞌora nahojavini.
Ijaꞌari hahavi,
judeus kaijaꞌari vihiriki,
judeus kaijaꞌari vihiki,
hahavia bada vaniꞌaki ida hojai Deua bivajahariki.
Ijaꞌari hahavia varagariki ida Deus jahana,
danona,
vagana-ra vavahojavini.
24 Deus vaꞌora kapoarihahaviki adani ijaꞌari Jesus Cristo-ra vavakaijokaki.
Ni-abosiki ida vakadimahi binasohikaꞌoavini.
Kidikajoamorahi oamani ida.
Jesus Cristo vaꞌora akavaꞌijoaꞌiki adani Jahari saꞌa kabodinia.
25-26 Deua bivaꞌahaꞌiki ada Jesus abiniꞌina ijaꞌari vakadimoni hina,
vagathaniria kaimoni ida hojai asohiriki abosini.
Ava akasanakhamakia abiniꞌina mani ida Deus ijaꞌari kahojai jaharikaꞌoaki-ra anivini-ra kaabokavini hija.
Ijaꞌari Jesu-ra vakaijokavini vani Deua bianija ida hojai jaharikia kahojaini.
Nimania hida Deus kabadani,
ijaꞌari-ra nanokiahivini hiki kidihojai asohikaꞌoakia.
Cristo khaꞌina viahania Deua bikavaꞌiradaadaki fori hiki ida ijaꞌari kahojai asohiriki,
ni-bikaronajorakiki ida hojai asohiriki abosini vakadiania.
Hari.
Ni-oniaro kari fori hiki hida hidakabaꞌi.
Deus haria nanokiahivini hiꞌiki ada Cristo,
aogaja kaimoni ida Deus hojana sohikaꞌoani.
Deus sohikaꞌoana mani ida ijaꞌari Jesu-ra vavakaijokaki-ra kapoarivini hija,
vakadimahi binasohikaꞌoavini hija jaboni.
27 Ni-akaabokaki ida ariabono avaboraborahavini ajahakaꞌoana.
Ni-akaabokaki ida ariabono avaboraborahavini Deus kavaꞌisohihi jiriki-ra anaabavinia.
Ni-nikia Deus haria kapoariki.
Deus haria kapoarivini hiki ida Jesus Cristo-ra avakaijokavini.
28 Akadivarani hiki ida ijaꞌari Cristo-ra vakaijokaki Deua kidimahi sohikaꞌoani bikahivini,
bikapoariki ida ijaꞌari,
bianajaꞌdiki jaboni ida kidimahi.
Ni-sohikaꞌoani Deua bikahiki ida ijaꞌari kamahi kidivaꞌisohihi jiriki naabani hiki.
29 Judeus kaijaꞌari vakadiDeus hiki ada Deus.
Judeus kaijaꞌari vihiriki vakadiDeus jaboni ada Deus.
30 Hoarana ada Deus.
Judeus kaijaꞌari Jesu-ra vakaijokahi;
Deua bikapoarihi,
kidimahi sohikaꞌoani bikahihi.
Nimania jaboni ida judeus kaijaꞌari hiriki.
Judeus kaijaꞌari hirikia bivakaijokaha,
Deua bikapoarihi,
kidimahi sohikaꞌoani bikahihi.
31 Akadivarani hiki ida Deus ijaꞌari vakaijokana hiki-ra kajoamoravini.
Akadivarani hirihi ida Deus kavaꞌisohihi jiriki-ra anaꞌbiravini.
Ni-nikia akavaraniki.
Asia Deua binofiki ida kidivaꞌisohihi jiriki anakaidivavini.