Cristo ava akasanakhamakia abiniꞌina varani hini
2
Hari,
oigamina,
vara ovaniꞌaki bana ida avakadiania ohojabiininina kari.
Oniaroa aꞌonira vara oniꞌavini hiꞌiki ida Deus monina kaꞌoa hini.
ꞌBoꞌdakari ogavaharihi ida varani nahina hini.
Onanamithaja kaimoni ida Cristo monina,
ni-odioniki ida varani ipohiki.
Vajaforia aꞌonira onavaꞌisohivini hiki.
Ni-ijaꞌari ogahakarahoki kavarani fori hirihi ida kodivarani.
2 Oabono oniꞌahi:
Vakadiania ohojana oadani vaꞌora okaꞌojomoꞌivini hiki bana ida Jesus Cristo varani hina.
Jesus ava akasanakhamakia abiniꞌina kavaranihi kaꞌoa okavaraniki ho.
Jokoa varani hoariha vaꞌora okaꞌojomoꞌiriha adani — oabono oniꞌaꞌiki ho.
3 Hari.
Oniaroa avakadiania okaikahina odanorina oofinina otharararana.
4 Aꞌonira okaꞌojomoꞌivini vani Cristo monina kaꞌoa hini-ra vara ovaniꞌaꞌia.
Ni-okaijoꞌaki ida varani ogavahakia okavaranina.
Ni-aꞌonira okaboroki kodivarania.
Vara onina vani Maꞌonahai Jahakia binanokiaꞌia ida danona avahararania.
Avarigaꞌiki ida Maꞌonahai Jahaki danona-ra avanokivini,
oniani ida Cristo monina kaꞌoa hini-ra avarigavini hija.
5 Ijaꞌari ogahaki kavarani hirihi ida aꞌonira najariꞌdarija.
Deus danona avavaꞌini bodinia hojani mani ida aꞌonira najariꞌdarija.
Deus aagahai varani hini
6 Hari.
Ijaꞌari Cristo-ra vavakaijokavini avijavaki vakadiania arihojana,
Deus aagahai kaꞌoa akavaraniki hari.
Hari.
Ijaꞌari Deu-ra vanofiriki vakadiꞌogahai araboja kamaꞌdaki.
Deus aagahai kaꞌoa fori hirihi ida vakadiꞌogahai.
Deus aagahai fori hirihi jaboni ida arabo kakaꞌdaꞌdini ijaꞌari-ra vahonariabakhiaki vakadiꞌogahai.
Vaꞌoaniaro vadanona ihimiraraoniki.
7 Deus kani ida ogahai kaꞌoa hini vara ovaniꞌaꞌiki.
Badara ipohikia Deua bianahojaki ida kidiꞌogahai ijaꞌaria avigaria kaimoni.
Hahavi amonahani viahania Deus abono-ra navaꞌisohijoravini hiꞌiki ida namithaki kaimoni akadiania.
Bikavaꞌibodivaranijoraꞌiki ida niha ninini jahana,
vagana,
ogahana hiki agahinana hiki kaimoni kidiania.
8 Arabo kakaꞌdaꞌdini ijaꞌari-ra vahonariakia ni-avigaki ida Deus aagahai.
Avigaja vaha;
ni-vavahonariahiki vaha ada akadikaꞌdaꞌdi jahakaꞌoaki ava akasanakhamakia abiniꞌina.
Vaꞌoaniaroa ni-avigaki ida Deus aagahai.
9 Nimania hida athii Deus athi kapapirania hojaki:
“Hojaki ida nahina ijaꞌaria binokiꞌiariki,
bikamithaꞌiariki,
bikavaꞌibodivaraniꞌiariki hiki jaboni.
Oniania Deua binaibavijahajoraja ida ijaꞌari nofina vihiki vakadimoni.”
Nihi ida athii.
10 Deua bikaronaꞌiki ada Maꞌonahai Jahaki akadiania haria anigahivini hiꞌiki ida kidiꞌogahai ahojaki.
Maꞌonahai Jahaki hahavi-ra nokiki,
hahavi-ra ogaki.
Deus kavaꞌibodivarani-ra ogaki jaboni.
11 Ijaꞌari maꞌonahani kaꞌoa biogahahaviki ida ijaꞌari kavaꞌibodivarani niha ninini.
Hoariha ni-biogaki.
Onivani fori hira ada Deus Maꞌonahana Jahaki.
Ovari kaꞌoa biogahahaviki ida Deus kavaꞌibodivarani.
12 Hari.
Ni-agathaniki ida ogahai araboja kamaꞌdaki Deu-ra vanofirikia vavahojaki.
Agathaniꞌiki ada Maꞌonahai Jahaki Deua bikaronaꞌiki akadiania,
haria anigahira kaimoni hahavi Deus haria noꞌavini hikia.
13 Oniaroa,
ijaꞌari-ra akaꞌojomoꞌivini vani akadivarani fori hirihi ida ijaꞌari Deu-ra avigariki vakadivarani.
Vakadiꞌogahai kamaꞌdani araboja.
Maꞌonahai Jahaki vani ada haria kaꞌojomoꞌira,
haria anigahivini Deus aagahaia.
Harivani,
anamonija ida Deus monina kaꞌoa hini,
varani Maꞌonahai Jahaki haria kaꞌojomoꞌivini hiꞌiki.
14 Ijaꞌari Maꞌonahai Jahaki-ra vahojarikia ni-bikaabokaki ida ogahai danoki-ra gathanivini.
Ni-nahina hini biogaki.
Ni-nahina kaimoni jahani bikahiki ida nahina Maꞌonahai Jahakia binoꞌavini.
Maꞌonahai Jahaki vaꞌini bodinia hojarina mani ida nahina Maꞌonahai Jahakia binoꞌavini hiki-ra avakharanaipaꞌitxiravini hija.
15 Maꞌonahai Jahaki ijaꞌari vaꞌini-ra nahonariahihihi;
bikaabokahi ida nahina hahavi jahani jaharini-ra ogavini.
Ijaꞌari Maꞌonahai Jahaki-ra vahojarikia ni-bikaabokaki ida Deus kabadani avaꞌi bodinia hojaki-ra ogavini,
jahani jaharini bikahija kaimoni.
16 Nimania hida athii Deus athi kapapirania hojaki:
“Ni-ijaꞌaria biogaki ida Deus kavaꞌibodivarani.
Ni-ijaꞌaria bikaabokaki ida Deu-ra kaꞌojomoꞌivini
biogarikia.”
Niki ida athii.
Harivani,
Maꞌonahai Jahaki avaꞌi-ra nahonariahihivini mani ida akadivaꞌibodivarani Cristo kavaꞌibodivarani fori nihaja.