Deus kabadani abono hari
3
Oigamina,
ni-okaabokaꞌiki ida vara aꞌonira oniꞌavini ijaꞌari Maꞌonahai Jahaki vaꞌora bananiki-ra vara oniꞌavini fori hikia.
Ijaꞌari Deus athi-ra vanaabariki-ra vara oniꞌavini vani fori hija ida aꞌonira vara oniꞌavini.
Ni-avijavaꞌiaki ida Cristo-ra avavakaijokavini,
oniani ida isai fori aꞌonira nihaja.
2 Aꞌonira onoꞌbaihavini fori kihiki ida joho kaaꞌbani.
Ojomoꞌihi kavaranihi kamaꞌdani kaꞌoa fori kihiki ida joho kaaꞌbani.
Isai fori avihini mani ida ꞌbai kaꞌoa havahani-ra avakaabokaꞌiaravini hija.
Ni-avanaabaꞌiaki kaho ida ojomoꞌihi kavaranihi avakamithaꞌiki,
oniani ida ojomoꞌihi kavaranihi hoariha-ra avarigavini-ra avakaabokaꞌiaravini hija.
3 Avakadihojai hiki ida Deus athi-ra vanaabariki vakadihojai.
Ijaꞌari avakakabajahinofiki avakadiania vahojana oadani,
avananokiaki ida asia Deus athi-ra vanaabariki vakadihojaia avakahojaini.
Ijaꞌari abononi kanahoarihakhamavini hiki abononi kakariakakhamaravini,
avananokiaki ida asia Deus athi-ra vanaabariki vakadihojaia avakahojaini.
Vaꞌoaniaro fori avihiki aꞌoni.
4 Vakhaniha adani ijaꞌari avakadiania vahojaki:
—Hovani Paulo ipohina ho.
Nihi ida hoariha:
—Iniani.
Paulo ipohina ohirihi.
Hovani Apolo ipohina ho.
Avakhanini oadani,
ijaꞌari Deus athi-ra vanaabariki vakadihojaia avakahojaiki aꞌoni.
5 Nahina hiriha ada Apolo.
Nahina ohirihi jaboni.
Deus kabadani abono hari.
Aꞌonira akanamonivini hiꞌiki ida Cristo varani hina,
avavakaijokara kaimoni.
Harivani afohanana bada aniꞌaki ida badani Deus haria honariavini hiki.
6 Cristo monina ijaꞌaria bivavaꞌisohihivini vani baꞌbaꞌda rakhajahaki fori hija ida.
Cristo varani hina ijaꞌaria bikaꞌojomoꞌivini vani rakhajahi-ra kapahapahaki fori hija ida.
Homiroꞌa aꞌonira onanamithabiininivini hiki ida Cristo monina.
Naothinia Apolo aꞌonira kaꞌojomoꞌivini hiki ida Cristo monina avanaabaja kaimoni.
Deus vani ada vakaijokana vihiki-ra vaꞌora anaꞌbaꞌdira,
binakaraja jaboni ida vajariꞌdarina.
7 Nahina hiriha ada rakhajahi abono.
Nahina hiriha jaboni ada kapahahihahi abono.
Deua binamoaki ida rakhajahi ꞌbaꞌdani,
avijavaja kaimoni.
8 Ni-rakhajahi abono kabadani kapahahihahi abono kabadani-ra aradaki.
Deus vania binaabosihananaja bana ida kidibadani abono vakadibadani.
Karahohi ida vakadibadani,
karahohi jaboni ida vakadibadani abosini.
Paꞌitxihi ida vakadibadani;
paꞌitxihi jaboni ida vakadibadani abosini.
9 Siroi Deua binamonahaki fori avihiki aꞌoni.
Apolo khama bada akhanijabanaki hari Deus kania.
Hari.
Aꞌonira okavarajomivini ida gora Deua binamonahaki fori avihini jaboni.
10 Deus hora noꞌavini hiꞌiki ida kidiꞌogahai danoki,
okaabokaja kaimoni ida kidibadania okabadanina.
Deus hora anigahijahakivini hiki ida kidibadani.
Hovani onakamaꞌdaja ida kidibadani ijaꞌari Cristo-ra avigariki vakadiania.
Vaꞌora onanamithabiininivini hiꞌiki ida Cristo monina.
Gora amonahani kamaꞌdani fori hiki ida kodibadani.
Hari hihi ida kodibadani,
vahoariha maina bada vaniꞌaki ida.
Vaꞌora vakaꞌojomoꞌivini hiki ida Cristo athi-ra vanaabavini.
Nimania ida badani Deus aꞌonira honariavini hiki afohanana.
Gora amonahani aꞌdiahini fori hiki ida avakadibadani.
Vanajaha bana ida avakadibadani Cristo kaijaꞌari vakadiania.
11 Deus vania binaibavira ada Jesus Cristo gora dadani kaimoni hina.
Ovani oa ada jaꞌdi karaho naibavivahani sohiki fori hira,
kaaraja kaimoni ida gora.
Ovani oa biakavaꞌijoaja ida ijaꞌari.
Ovari kaꞌoa binakaraki ida ijaꞌari Deu-ra vakaijokavini.
Ni-hojaki ada hoariha Jesus Cristo fori hiki.
12 Hari.
Ijaꞌari Cristo monina-ra vanamonivini vani fori hija ida Deus gorana-ra vanamonahavini.
Cristo kaijaꞌari vahoariha Deus kabadania vakabadanijahakiki.
Vakadibadani nahina kaidivaki ouro,
prata,
jaꞌdi jahaki fori hiki ida.
Aꞌboꞌdaki ida.
Cristo kaijaꞌari vahoariha vani adani Deus kabadani-ra bada vaniꞌajahakirara.
Vakadibadani nahina kaidivariki,
hogoi,
avaafani,
ava ꞌdakhariki fori hiki ida.
Ni-aꞌboꞌdaki.
13 Cristo ijaꞌari kahojai-ra naabosivini kamahini binanokiaki bana ida kidijaꞌari vakadibadani,
vakadihojai hahavi jahaki jahariki.
Binaibaviki fori hiki bana ida vakadibadani afohanana siho kabodinia,
binanokiaja kaimoni ida sihoa binihimavini binihimaravini.
Nimania ida hojai jahaki jahariki hiki-ra nanokiavini kamahini.
14 Ijaꞌari vahoariha-ra vaꞌora kakodiabakhiahi vakarara kaimoni Cristo kania;
aꞌboꞌdahi ida kidibadani.
Ni-siho fori kihikia binihimaki bana.
Aanihi ida kidibadani;
bigathanihi ida kidibadani jahaki abosini.
15 Hari.
Siho fori kihikia binihimaki bana ida hoariha kabadani aꞌboꞌdariki.
Ni-bigathaniki bana ida kidibadani abosini.
Ihimini kabaꞌi ida ijaꞌari kabadani,
Cristoa biakavaꞌijoaki bana ida kidijaꞌari hiki.
Ijaꞌari siho kakhororoki kania radahani khaonanini fori hiki ida ijaꞌari aihotani bana.
Deus gorana fori arihiki hari
16 Hari.
Oogaki ida Deus gorana fori avihini-ra avarigavini.
Deus Maꞌonahana Jahaki ibaviki avavaꞌini bodinia.
17 Ijaꞌaria binihimaki ida Deus gorana.
Deus vania binihimaja bana ida hiꞌida ijaꞌari jaboni.
Deus kani kaꞌoa ida gorana.
Gorana fori avihiꞌoamanija afohanana.
Paulo vaꞌora kaabanivini vakadivarania
18 Hariꞌa ijaꞌari abononi korijanahava.
Hariꞌa ijaꞌari abononi kavaꞌibodivaraniva:
—Arafiaki ida ogahai araboa kamaꞌdaki-ra ovahojavini — ni-nikia kavaꞌibodivaranini jahaki ida ijaꞌari.
Jakaho ijaꞌari Deu-ra avigariki ira vaniꞌava ijaꞌari ogahariki ihinia.
Jahaki ida ogahai araboja kamaꞌdaki-ra ikavaꞌipahinivini,
ivahojaja kaimoni ida oogahai kaꞌoa Deua bikavagahinaiki.
19 Deu-ra vanofirikia vavahojaki ida ogahai araboja kamaꞌdaki.
Deua bikavaꞌibodivaraniki ida vakadiꞌogahai ijaꞌari vaꞌini bajadihadihaki aagahai hini.
Hojaki hida athii Deus athi kapapirania:
“Deua bivaꞌahaki ida
vakadiꞌogahai
vaꞌora anagithiki fori
vihina.”
20 Hojaki jaboni hida athii hoariha:
“Deua biogaki ida avigahaki vakadivaꞌibodivarani.
Ni-nahina kaimoni jahani Deua bikahiki ida
vakadiꞌogahai.”
Nihi ida athii.
21 Ni-asohiki ida kodipohi avihinia avaabononi avavaboraborahavini,
Apolo ipohina avihinia avaabononi avavaborahavini jaboni.
Akadiani avihirihi.
Avakadibadani abono hari,
oniani ida avakadiani haria nihaja.
Cristo kaijaꞌari avihini mani ida Deus hahavi hojakia aꞌonira noꞌavini hiꞌia.
22 Aꞌonira kakodiaki kaimoni ida hahavi Deus aꞌonira noꞌavini hiꞌiki.
Avakadiani adani Apolo,
Pedro vihiki,
hovani jaboni aꞌonira aakodiaki kaimoni.
Deus aꞌonira noꞌavini hiꞌiki ida hahavi araboa hojaki.
Avahokini oadani Deus aꞌonira akadavaꞌaꞌiki aꞌoni,
avaabinini naothinia asia aꞌonira akadavaꞌaki ada jaboni.
Hidakabaꞌi,
mahi hahavi khaki aꞌonira akadavaꞌaki bana ada.
Avakadiani ida hihida hahavi hojaki.
23 Cristo kani aꞌoni.
Deus kani ada Cristo.